Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  2010-10-01

Thapelo e Swanetše go Lebišwa go Mang?

Thapelo e Swanetše go Lebišwa go Mang?

NA DITHAPELO ka moka di leba lefelong le tee, go sa šetšwe gore go rapelwa mang? Lefaseng la lehono, ba bantši ba dumela bjalo. Kgopolo ye e kgahla ba bantši bao ba ratago mekgatlo e tswakanyago ditumelo le bao ba nyakago gore madumedi ka moka a amogelege, go sa šetšwe go se swane ga ona. Lega go le bjalo, na go na le kgonagalo ya gore kgopolo yeo ga se therešo?

Beibele e ruta gore dithapelo tše dintši ge e le gabotse ga di lebišwe mo go swanetšego. Mehleng ya ge Beibele e ngwalwa, go be go tlwaelegile gore batho ba lebiše dithapelo tša bona diswantšhong tše di betlilwego. Lega go le bjalo, Modimo o ba lemošitše leboelela kgahlanong le mokgwa woo. Ka mohlala, Psalme 115:4-6 e bolela mabapi le medimo ya diswantšho gore: “E na le ditsêbê, ’me xa e kwe.” Taba ye e a kwagala. Ke ka baka la’ng o swanetše go rapela Modimo yo a ka se go kwego?

Pego e kwagalago gabotse ya Beibele e dira gore ntlha ye e bonale gabotse. Moporofeta Eliya o ile a hlohla baporofeta ba Baali gore ba rapele modimo wa bona, gomme yena ka morago a rapele Modimo wa gagwe. Eliya o boletše gore Modimo wa therešo o be a tla araba gomme wa maaka o be a ka se arabe. Ba amogetše tlhohlo, baporofeta ba Baali ba ile ba rapela lebaka le letelele le ka mo go tseneletšego, gaešita le ka go lla ka go hlaboša—eupša ga se ba ka ba atlega! Pego e balega ka gore: “Xwa hlôkwa phetolô, le e a arabaxo, le mokwi wa dithapêlô.” (1 Dikxoši 18:29) Lega go le bjalo, go ile gwa direga’ng ka Eliya?

Ka morago ga ge Eliya a rapetše, Modimo wa gagwe o ile a araba gatee-tee, a romela mollo o tšwago legodimong go fiša sehlabelo seo se bego se dirilwe ke Eliya. Phapano e be e le efe? Go na le tshedimošo e bohlokwa thapelong ya Eliya, yeo e begilwego go 1 Dikxoši 18:36, 37. Ke thapelo e kopana—e na le mantšu a e ka bago a 30 ka Seheberu sa mathomo. Lega go le bjalo, mantšung ao a sego kae, Eliya o bitša Modimo gararo ka leina la gagwe la Jehofa.

Baali, yeo e bolelago gore “mong,” e be e le modimo wa Bakanana, gomme go be go na le mehuta e fapa-fapanego ya diswantšho tša gagwe tša borapedi. Lega go le bjalo, Jehofa ke leina la moswa-noši, leo e lego la Gagwe a nnoši legohleng ka moka. Modimo yo o boditše batho ba gagwe gore: “Ke Nna Jehofa, ke lona leina la-ka, nka se ke ka neela e mongwe kgodišo ya-ka.”—Jesaya 42:8PK.

Na thapelo ya Eliya le ya baporofeta ba Baali di ile tša leba lefelong le tee? Barapedi ba Baali ba be ba dira gore batho ba nyatšege ka ditirelo tša go gweba ka mmele le ka dihlabelo tša batho. Go fapana le moo, go rapela Jehofa go be go nea batho ba gagwe ba Isiraele seriti le go ba lokolla mekgweng e bjalo e dirago gore batho ba nyatšege. Ka gona nagana ka taba ye: Ge o be o ka romela mogwera yo a hlomphegago kudu lengwalo gomme wa ngwala aterese ya gagwe, na o be tla letela  gore lengwalo leo le romelwe go motho yoo leina la gagwe le sa swanego le la mogwera wa gago le yoo botumo bja gagwe bjo bobe bo bego bo thulana le dilo ka moka tšeo mogwera wa gago a di dumelago? Ga go bjalo le gatee!

Tlhohlo ya Eliya go baporofeta ba Baali e ile ya hlatsela gore dithapelo ga di lebe felo gotee

Ge e ba o rapela Jehofa, o rapela Mmopi, Tatago batho ka moka. * Moporofeta Jesaya o boletše thapelong ya gagwe gore: “Tata wešo ké Wene [Jehofa].” (Jesaya 63:16) Ka gona, yo ke Yena yo Jesu a boletšego ka yena ge a be a botša balatedi ba gagwe gore: “Ke rotogela go Tate le go Tatago lena le go Modimo wa-ka le go Modimo wa lena.” (Johane 20:17) Jehofa ke Tatago Jesu. Ke Modimo yoo Jesu a bego a mo rapela le yoo Jesu a rutilego balatedi ba gagwe go mo rapela.—Mateo 6:9.

Na Beibele e re laela gore re rapele Jesu, Maria, bakgethwa, goba barongwa? Aowa—e re laela go rapela Jehofa feela. Ela hloko mabaka a mabedi. La pele, thapelo ke mokgwa wa borapedi gomme Beibele e re borapedi bo swanetše go lebišwa go Jehofa a nnoši. (Ekisodo 20:5) La bobedi, Beibele e utolla gore o na le sereto sa “Mokwi wa dithapêlô.” (Psalme 65:2) Gaešita le ge Jehofa a nea batho ba bangwe boikarabelo, bjo ke boikarabelo bjoo a sa ka go a bo fetišetša go motho le ge e le ofe. Ke Modimo yo a holofetšago go kwa dithapelo tša rena ka boyena.

Ka gona, ge e ba o nyaka gore dithapelo tša gago di kwewe ke Modimo, gopola temošo ya Mangwalo e rego: “Yo mongwe le yo mongwe yo a bitšago leina la Jehofa o tla phološwa.” (Ditiro 2:21) Eupša na Jehofa o kwa dithapelo ka moka? Goba na go na selo se sengwe seo re swanetšego go se tseba ge re nyaka gore dithapelo tša rena di kwewe ke Jehofa?

^ ser. 9 Madumedi a mangwe a bolela gore go bitša leina la Modimo go fošagetše, gaešita le ge go rapelwa. Lega go le bjalo, leina leo le tšwelela ka makga a e ka bago a 7 000 malemeng a mathomo a Beibele, mabakeng a mantši le tšwelela dithapelong le dipsalmeng tša bahlanka ba botegago ba Jehofa.