Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2010-10-01

Thapelo—Na e tla re Thuša?

Thapelo—Na e tla re Thuša?

NA GO rapela go a re hola? Beibele e bontšha gore ee, dithapelo tša bahlanka ba botegago ba Modimo di a ba hola. (Luka 22:40; Jakobo 5:13) Ge e le gabotse, thapelo e ka re hola moyeng, maikwelong gaešita le nameng. Bjang?

Bjale, a re re ngwana wa gago o amogela mpho. Na o tla mo ruta gore go lekane go ikwa a thabile? Goba na o tla mo ruta go bontšha tebogo? Ge re tsenya maikwelo a bohlokwa mantšung, re dira gore ba be šedi le go ba matlafatša. Na se se a nyakega ge re boledišana le Modimo? Ee, se a nyakega! Ela hloko mehlala e mengwe.

Dithapelo tša go leboga. Ge re leboga Tatago rena bakeng sa dilo tše dibotse tšeo a re diretšego tšona, re lebiša tlhokomelo ditšhegofatšong tša rena. Ka baka leo, re ka ikwa re leboga kudu, re thabile e bile re ikwa gabotse.—Bafilipi 4:6.

Mohlala: Jesu o ile a leboga tsela yeo Tatagwe a ilego a kwa le go araba dithapelo tša gagwe.—Johane 11:41.

Dithapelo tša go kgopela tebalelo. Ge re kgopela Modimo tebalelo, re matlafatša letswalo la rena, re dira gore go itshola ga rena e be mo go tseneletšego e bile re matlafatša go lemoga ga rena bogolo bja sebe. Le gona, re hwetša kimologo letswalong-le-molato.

Mohlala: Dafida o ile a rapela go bontšha go itshola le go nyama.—Psalme 51.

Go rapelela tlhahlo le bohlale. Go kgopela Jehofa gore a re hlahle goba gore a re nee bohlale bjo re bo nyakago bakeng sa go dira diphetho tše bohlale go ka re thuša gore re be ba ikokobeditšego e le ka kgonthe. Go ka re gopotša mafokodi a rena gomme gwa re thuša go dula re bota Tatago rena wa legodimong.—Diema 3:5, 6.

Mohlala: Solomone ka boikokobetšo o ile a kgopela tlhahlo le bohlale bja go buša Isiraele.—1 Dikxoši 3:5-12.

Go rapela ka baka la kgateletšego. Ge re tšhollela Modimo dipelo tša rena ge re le tlalelong, dipelo tša rena di tla imologa gomme re tla ithekga ka Jehofa go e-na le go ipota.—Psalme 62:8.

Mohlala: Kgoši Asa o ile a rapela ge a be a lebeletšane le lenaba le matla.—2 Koronika 14:11.

Go rapelela bao ba tsomago thušo. Dithapelo tše bjalo di re thuša gore re se be baithati gomme tša dira gore re rate ba bangwe le go ba kwela bohloko.

Mohlala: Jesu o ile a rapelela balatedi ba gagwe.—Johane 17:9-17.

Dithapelo tša theto. Ge re tumiša Jehofa bakeng sa mediro ya gagwe e kgahlišago le dika tša gagwe, go mo hlompha le go mo rata ga rena go a gola. Dithapelo tše bjalo di ka re thuša le go batamela Modimo wa rena le Tatago rena.

Mohlala: Dafida o ile a reta Modimo ka borutho bakeng dilo tšeo a di bopilego. —Psalme 8.

Tšhegofatšo e nngwe yeo e sepedišanago le thapelo ke “khutšo ya Modimo ye e fetago kgopolo yohle.” (Bafilipi 4:7) Go hwetša khutšo lefaseng le leo le dubegilego ke tšhegofatšo ya moswana-noši. E bile go na le mehola e bonagalago. (Diema 14:30) Eupša na e tla ka baka la maiteko a rena ka noši feela? Goba na go akaretšwa selo se sengwe se bohlokwa kudu?

Thapelo e na mehola e mentši—nameng, maikwelong, godimo ga tšohle le moyeng