Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2010-10-01

Na go na le Taba Gore re Rapela Kae, Gona Neng?

Na go na le Taba Gore re Rapela Kae, Gona Neng?

KA NTLE le pelaelo o lemogile gore madumedi a mantši a rulagantšwego a lebiša tlhokomelo go ageng dintlo tše dikgolo tša borapedi gomme a bea nako yeo go swanetšego go rapelwa ka yona. Na Beibele e bea ditekanyetšo gore go swanetšwe go rapelwa kae, gona neng?

Beibele e bontšha gore go na le maemo a swanetšego bakeng sa thapelo. Ka mohlala, pele ga ge a ka ja le barutiwa ba gagwe, Jesu o ile a leboga Modimo ka thapelo. (Luka 22:17) Le gona, ge barutiwa ba gagwe ba be ba bokana bakeng sa borapedi, ba be ba rapela gotee. Ka baka leo, ba ile ba tšwela pele ka mokgwa woo o bego o dirišwa go tloga kgale ka disinagogeng tša Bajuda le ka tempeleng kua Jerusalema. Modimo o be a rerile gore tempele e be “ntlo ya thapelo ya ditšhaba ka moka.”—Mareka 11:17.

Ge bahlanka ba Modimo ba bokana le go rapela gotee, ditopo tša bona di ka ba le mafelelo a mabotse. Ge e ba sehlopha se le boteeng gomme thapelo e rapelwago legatong la sona e bontšha melao ya motheo ya Mangwalo, Modimo o a kgahlega. Thapelo le gona e ka mo šušumeletša go dira seo a bego a ka se se dire. (Baheberu 13:18, 19) Dihlatse tša Jehofa di rapela ka mehla dibokeng tša tšona. O laletšwa ka borutho go tla Holong ya Mmušo ya kgaufsi le wena gomme o kwe dithapelo tše bjalo ka bowena.

Lega go le bjalo, Beibele ga e lekanyetše gore dithapelo di swanetše go dirwa ka nako e itšego goba lefelong le itšego. Ka Beibeleng, re hwetša pego ya bahlanka ba Jehofa ba rapela ka nako e nngwe le e nngwe, lefelong le lengwe le le lengwe. Jesu o itše: “Ge o rapela, tsena phapošing ya gago gomme ge o tswaletše mojako wa gago, rapela Tatago yo a lego sephiring; ke moka Tatago yo a bonago sephiring o tla go putsa.”—Mateo 6:6.

Re ka rapela nako e nngwe le e nngwe, lefelong le lengwe le le lengwe

Na yeo ga se taletšo e kgahlišago? O ka batamela Mmuši wa legohle nako le ge e le efe, ka sephiring, gomme wa kgodišega gore o tla go theetša. Ka gona, ga go makatše ge Jesu gantši a be a nyaka go ba noši ge a rapela! Ka nako e nngwe, o ile a fetša bošego ka moka a rapela Modimo, go bonagala a be a nyaka tlhahlo ya go dira phetho e bohlokwa kudu.—Luka 6:12, 13.

Banna le basadi ba bangwe ka dipegong tša Beibele ba ile ba rapela ge ba be ba swanetše go dira diphetho tše dikgolo goba ba lebeletšane le ditlhohlo tše dikgolo. Ka dinako tše dingwe ba be ba rapela ka go hlaboša gomme ka dinako tše dingwe ka setu; ba be ba rapela ba le ka dihlopha le ge ba nnoši. Selo se bohlokwa ke gore ba be ba rapela. Modimo e bile o laletša bahlanka ba gagwe gore: “Le se kgaotše go rapela.” (1 Bathesalonika 5:17) O ikemišeditše go theetša ka go se kgaotše bao ba dirago thato ya gagwe. Na yeo ga se taletšo e lerato?

Go ba gona, lefaseng la lehono le sa botego batho gabonolo, ba bantši ba ipotšiša ge e ba thapelo e e-na le mohola. O ka botšiša gore, ‘Na ruri e ka nthuša?’