Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2010-10-01

Thapelo—Na Modimo o tla e Kwa le go e Araba?

Thapelo—Na Modimo o tla e Kwa le go e Araba?

POTŠIŠO e lego ka mo godimo e tsoša kgahlego e kgolo le go nyaka go tseba. Beibele e bontšha gore Jehofa o theetša dithapelo lehono. Gore o kwa dithapelo tša rena goba ga a di kwe go ithekgile kudu ka rena.

Jesu o ile a sola baetapele ba bodumedi ba mehleng ya gagwe bao ba bego ba rapela ka boikaketši; ba be ba nyaka go bonala ba lokile pele ga batho. O ile a re batho ba bjalo ba tla hwetša “moputso wa bona ka botlalo,” e le ge a e-ra gore ba tla hwetša feela seo ba se nyakago kudu, go bonwa ke batho, e sego seo ba se hlokago kudu, e lego go theetšwa ke Modimo. (Mateo 6:5) Ka mo go swanago lehono, ba bantši ba rapela go ya ka thato ya bona e sego ya Modimo. Ka ge ba hlokomologa melao ya Beibele ya motheo yeo re e ahla-ahlilego, ga ba theetšwe ke Modimo.

Lega go le bjalo, go thwe’ng ka wena? Na Modimo o tla kwa le go araba dithapelo tša gago? Karabo ga se ya ithekga ka morafo, setšhaba, goba maemo a gago setšhabeng. Beibele e re kgonthišetša ka gore: “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira go loka o a amogelega go yena.” (Ditiro 10:34, 35) Na mantšu ao a hlalosa wena? Ge e ba o boifa Modimo, o mo tšeela godimo kudu, o boifa go mo nyamiša. Ge e ba o dira go loka, o nyaka go dira seo Modimo a rego se lokile go e na le go dira thato ya gago goba ya batho ba bangwe. Na ruri o nyaka gore Modimo a theetše dithapelo tša gago? Beibele e go lebiša pakaneng ya gago. *

Go ba gona, ba bantši ba nyaka gore Modimo a arabe dithapelo tša bona ka mohlolo. Gaešita le mehleng ya Beibele, Modimo o be a dira mehlolo e bjalo ka sewelo. Ka dinako tše dingwe go be go feta nywaga-kgolo magareng ga mohlolo o begilwego le woo o o latetšego. Go feta moo, Beibele e bontšha gore mehla ya mehlolo e fedile ka morago ga matšatši a baapostola. (1 Bakorinthe 13:8-10) Na se se bolela gore Modimo ga a arabe dithapelo lehono? Ga go bjalo le gatee! Ela hloko tše dingwe tša dithapelo tšeo a di arabago.

Modimo o nea bohlale. Jehofa ke Mothopo o mogolo wa bohlale ka moka bja kgonthe. O bo nea ka bolokologi, o bo nea bao ba tsomago tlhahlo ya gagwe le bao ba nyakago go phela ka yona.—Jakobo 1:5.

Modimo o nea moya wa gagwe o mokgethwa le mehola ya wona ka moka. Moya o mokgethwa ke matla a Modimo a šomago. Ga go na matla a fetago a. O ka re thuša go kgotlelela diteko. O ka re nea khutšo ge re le tlalelong. O ka re thuša go hlagolela dika tše dibotse le tšeo di rategago. (Bagalatia 5:22, 23) Jesu o ile a kgonthišetša balatedi ba gagwe gore Modimo o nea moya wo ka seatla se se bulegilego.—Luka 11:13.

Modimo o nea bao ba mo tsomago ka phišego tsebo. (Ditiro 17:26, 27) Go dikologa lefase, go na le batho bao ba tsomago therešo ka potego. Ba nyaka go tseba ka Modimo—gore leina la gagwe ke mang, morero wa gagwe ka lefase le ka batho ke ofe le gore ba ka mmatamela bjang. (Jakobo 4:8) Dihlatse tša Jehofa di kopana le batho ba mohuta woo gantši gomme di thabela go diriša Beibele go araba dipotšišo tše bjalo.

Na ke ka baka leo o tšerego makasine wo? Na o nyaka Modimo? Mohlomongwe ye ke tsela yeo a arabago thapelo ya gago ka yona.

^ ser. 5 Bakeng sa tsebišo e oketšegilego mabapi le kamoo re ka rapelago ka gona le go kwewa ke Modimo, bona kgaolo 17 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.