Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  2010-10-01

 Ruta Bana ba Gago

Mmušo wo o Tlago go Fetoša Lefase ka Moka

Mmušo wo o Tlago go Fetoša Lefase ka Moka

NA O ka bolela gore ke Mmušo ofe wo go bolelwago ka wona?— * Ke woo Jesu a re rutilego go o rapelela. O re rutile gore re kgopele Modimo re re: “Mmušo wa gago a o tle.” (Mateo 6:9, 10) Ka nywaga e nyakilego go ba e 2 000, balatedi ba Jesu ba be ba rapela Modimo gore Mmušo wa Gagwe o tle. Na le wena o ile wa o rapelela?—

Gore o kwešiše gore mmušo ke eng, o swanetše go kwešiša gore kgoši ke eng. Kgoši ke motho yo a bušago. Naga yeo a e bušago e bitšwa tikologo ya gagwe. Tikologo ya Mmušo wa Modimo e akaretša lefase ka moka. Ge Mmušo wa Modimo o e-tla, yo mongwe le yo mongwe mo lefaseng o tla thabela ditšhegofatšo tšeo pušo ya gagwe e tlago go di tlišetša batho.

Mmušo wa Modimo ke pušo ya legodimong. Go Jesaya 9:6 (NW), Beibele e bolela ka Mmuši wa pušo ye. Ela hloko seo e se bolelago ka yena: “Re belegetšwe ngwana . . . pušo e tla ba legetleng la gagwe. O tla bitšwa . . . Kgošana ya Khutšo.”

Na o a tseba gore kgošana ke eng?— Ee, ke morwa wa kgoši. Kgoši e phagamego ya legodimong ke mang?— O rerešitše ge o itše ke Jehofa. Beibele e mmitša “Yo-xodimo-dima Kukama-lefase.” (Psalme 83:18) Ka Beibeleng, Jesu gantši o bitšwa “Morwa wa Modimo.” Lebaka le lengwe ke gore Jehofa o file Jesu bophelo. Jehofa ke Tatago Jesu wa kgonthe.—Luka 1:34, 35; Johane 1:34, 49; 3:17; 11:27; 20:31; Ditiro 9:20.

Mmušo wa Modimo, woo Jesu a re rutilego go o rapelela, ke pušo e kgethegilego kudu. Ke “pušo” ya kgošana ka gobane Jehofa o dira gore Mmuši goba Kgoši ya Mmušo wo e be Morwa wa gagwe, Jesu. Eupša na o be o tseba gore go tla kgethwa ba bangwe gore ba buše bjalo ka dikgoši gotee le Jesu Mmušong wa Tatagwe?— A re boledišane ka bona.

Pejana ga lehu la gagwe, Jesu o ile a botša baapostola ba gagwe ba botegago gore o be a e-ya “ntlong” ya Tatagwe legodimong. O itše: “Ke a tloga ke ya go le lokišetša lefelo . . . gore moo ke lego gona le lena le be gona.” (Johane 14:1-3) Na o a tseba gore baapostola gotee le ba bangwe bao ba kgethilwego ba ya go dira’ng  legodimong le Jesu?— Ba tla “buša le yena.” Beibele gape e re botša gore ke ba bakae bao ba tlago go buša le Jesu e le dikgoši. E tla ba ba 144 000.—Kutollo 14:1, 3; 20:6.

O nagana gore mo lefaseng go tla ba bjang ge Kgošana ya Khutšo le bakgethwa ba gagwe ba 144 000 ba buša?— Go tla kgahliša e le ruri! Go ka se be le ntwa. Diphoofolo di tla phedišana ka khutšo gotee le rena. Ga go motho yo a tlago go babja goba go hwa. Mahlo a difofu a tla bona, ditsebe tša difoa tša kwa, digole di tla kitima le go taboga bjalo ka kgama. Lefase le tla tšweletša dijo tše bose bakeng sa bohle. Le gona, batho bohle ba tla ratana bjalo ka ge Jesu a rutile barutiwa ba gagwe. (Johane 13:34, 35) A re buleng ditemana tšeo di lokeleditšwego mo pukung ya Jesaya gomme re bale mabapi le dilo tše di kgahlišago tšeo di tlago go direga.—Jesaya 2:4; 11:6-11; 25:8; 33:24; 35:5, 6; 65:21-24.

Ga e sa le go tloga ge Jesu a ruta batho gore ba rapele ba re “Mmušo wa gago a o tle,” batho ba dimilione ba ithutile ka Mmušo woo. Tsebo ye e fetotše maphelo a bona. Go se go ye kae, ge Mmušo woo o fihla gomme o tšeela mebušo ya lefase legato, yo mongwe le yo mongwe yo a hlankelago Jehofa Modimo le Mmuši yo a Mo kgethilego, Jesu Kriste, ba tla ba le khutšo, ba phela gabotse mmeleng ba thabile.—Johane 17:3.

^ ser. 3 Ge e ba o bala le ngwana, thaladi ke ya go go gopotša gore o khutše gomme o kgothaletše ngwana go ntšha sa mafahleng.

Ithute ka mo go oketšegilego

DIPOTŠIŠO TŠA BEIBELE DI A ARABJA

Khutšo Lefaseng—E tla ba Gona Bjang?

Ithute kamoo Modimo a holofetšago go tliša khutšo lefaseng ka Mmušo wa gagwe.

DITABA TŠE DIBOTSE TŠE DI TŠWAGO GO MODIMO!

Morero wa Modimo ka Lefase ke Ofe?

Beibele e hlalosa lebaka leo Modimo a bopilego lefase, tlaišego e tla fela neng, gomme bokamoso ke bofe ka lefase le bao ba dulago go lona.