Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2010-08-01

 Babadi ba Rena ba a Botšiša . . .

Na Batho Bohle ba na le Sebaka se se Lekanago sa go Tseba Modimo?

Na Batho Bohle ba na le Sebaka se se Lekanago sa go Tseba Modimo?

Ge Jesu a be a botšišwa gore taelo e kgolo ke efe, o itše: “O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.” (Mateo 22:37) Lega go le bjalo, pele batho ba ka rata Modimo, ba swanetše go hwetša tsebo e nepagetšego ka yena. (Johane 17:3) Na batho bohle ba tla ba le sebaka se se lekanago sa go hwetša tsebo ye?

Beibele ke mothopo o mogolo wa tsebo ya go tseba Modimo. (2 Timotheo 3:16) Ba bantši ba dula dinageng tšeo go tšona Beibele e hwetšagalago gabonolo. Batho bao ba ka no laletšwa gantši go hwetša tsebo e nepagetšego ka Modimo ka gore ba ithute Beibele. (Mateo 28:19) Ba bangwe ba godišitšwe ke batswadi ba bona ba lerato ba Bakriste, bao ba ba neago sebaka sa go ithuta ka Modimo letšatši le letšatši.—Doiteronomio 6:6, 7; Baefeso 6:4.

Lega go le bjalo, ba bangwe ba phela maemong a sego bjalo. Batho ba bangwe ba tšwa malapeng a gobošago ao go ona batswadi ba sa bontšhego bana ba bona lerato la tlhago. (2 Timotheo 3:1-5) Bao ba godišeditšwego malapeng a bjalo ba ka thatafalelwa ke go bona Modimo e le Tate yo lerato wa legodimong. Ba bantši ga se ba ka ba hwetša thuto e lekanego, e lego seo se šitišago bokgoni bja bona bja go bala Beibele. Lega go le bjalo, ba bangwe menagano ya bona e foufaditšwe ke dithuto tša maaka tša bodumedi, goba ba dula ka malapeng, ditšhabeng, goba dinageng tšeo thuto ya therešo ya Beibele e sa amogelwego. (2 Bakorinthe 4:4) Na maemo a batho ba bjalo ga a ba nee sebaka sa go ithuta ka Modimo le go mo rata?

Jesu o ile a dumela gore ditlhohlo tšeo batho ba bangwe ba lebeletšanego le tšona di tla dira gore ba thatafalelwe ke go rata Modimo le go ikokobeletša yena. (Mateo 19:23, 24) Lega go le bjalo, Jesu o ile a gopotša barutiwa ba gagwe gore gaešita le ge mathata a mangwe a bonala e le a magolo go ya ka pono ya batho, “go Modimo dilo tšohle di a kgonega.”—Mateo 19:25, 26.

Ela hloko dintlha tše di latelago: Jehofa Modimo o kgonthišeditše gore Lentšu la gagwe, Beibele, e dule e le puku e phatlalatšwago kudu. Beibele e boletše e sa le pele gore ditaba tše dibotse tša mabapi le Modimo le morero wa gagwe ka lefase di tla bolelwa “lefaseng ka moka le go agilwego go lona.” (Mateo 24:14) Lehono, Dihlatse tša Jehofa di bolela ditaba tše dibotse dinageng tša ka godimo ga tše 230 gomme di tšweletša dikgatišo tšeo di theilwego Beibeleng ka maleme a ka bago a 500. Gaešita le bao ba sa kgonego go hwetša Beibele ba ka kgona go ithuta go gontši mabapi le Modimo wa therešo ka go lebeledišiša dilo tšeo a di bopilego.—Baroma 1:20.

Go oketša moo, Lentšu la Modimo le re: “Morêna ó fenyêka dipelo ka moka, ó hlaoloxanya thopa tšohle tša dikêlêlô; xe O mo nyaka, ó tlo re: Ké Nna é!” (1 Koronika 28:9) Ka gona gaešita le ge Jehofa a sa holofetše motho yo mongwe le yo mongwe gore o tla hwetša sebaka se se swanago, o kgonthišetša gore bohle ba dipelo tše botegago ba a se hwetša. O tla kgonthišetša le gore batho bao ba sa kago ba ba le nako ya go ithuta ka ga yena ba tla fiwa sebaka ka gore ba tsošetšwe bophelong lefaseng le lefsa la go loka.—Ditiro 24:15.

Ithute ka mo go oketšegilego

O ka Lemoga Borapedi bja Therešo Bjang?

Na go na le bodumedi bjo tee feela bja therešo? Ela hloko maswao a mahlano ao a bontšhago borapedi bja therešo.