Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2010-04-01

 Ruta Bana ba Gago

Jesu o Ithutile go kwa

Jesu o Ithutile go kwa

NA O thatafalelwa ke go kwa ka dinako tše dingwe?— * Ga go makatše ge e ba o ikwa ka tsela yeo. Motho yo mongwe le yo mongwe o thatafalelwa ke go kwa ka dinako tše dingwe. Na o be o tseba gore Jesu le yena o ile a swanelwa ke go ithuta go kwa?—

Na o a tseba gore ke mang yoo bana ka moka ba swanetšego go mo kwa?— Ee, ke mma le tate. Beibele e bolela gore: “Kwang batswadi ba lena boteeng le Morena.” (Baefeso 6:1) Tatago Jesu ke mang?— Ke Jehofa Modimo gomme le rena ke Tatago rena. (Mateo 6:9, 10) Eupša ge e ba o itše Josefa e be e le tatago Jesu gomme Maria e le mmagwe, gona o tla ba o bolela therešo. Na o a tseba gore go tlile bjang gore e be batswadi ba gagwe?—

Morongwa Gabariele o ile a botša Maria kamoo a tlago go ba mma gaešita le ge a se a ka a robala le monna. Jehofa o dirile gore se se kgonege ka go dira mohlolo o mogolo. Gabariele o hlaloseditše Maria ka gore: “Matla a Yo Godimo-dimo a tla go aparetša. Ka baka leo, le yo a tlago go belegwa o tla bitšwa yo mokgethwa, Morwa wa Modimo.”—Luka 1:30-35.

Modimo o tšere bophelo bja Morwa wa gagwe legodimong gomme a bo tsenya ka gare ga Maria. Ke moka bophelo bjoo bo ile bja gola ka gare ga gagwe go fo swana le ge bana ba bangwe ba gola ka gare ga bo-mmago bona. Ka morago ga dikgwedi tše e ka bago tše senyane, Jesu o ile a belegwa. Go sa dutše go le bjalo, Josefa o ile a nyala Maria gomme batho ba bantši ba ile ba tšea gore Josefa e be e le tatago Jesu wa kgonthe. Ge e le gabotse, Josefa e be e le tatagwe wa mogodiši. Ka gona, ka tsela e itšego, Jesu o be a e-na le bo-tate ba babedi!

Ge Jesu a be a e-na le nywaga e 12 feela, o dirile selo se sengwe seo se bego se bontšha gore o be a tloga a rata Tatagwe wa legodimong, Jehofa. Ka nako yeo, lapa labo Jesu, bjalo ka ge le be le tlwaetše, le ile la tšea leeto le letelele la go ya Jerusalema bakeng sa Paseka. Ka morago ga moo, ge ba be ba boela gae Natsaretha, Josefa le Maria ba ile ba palelwa ke go lemoga gore Jesu o be a se gona. Na o ipotšiša gore ba ka ba ba lebadišitšwe ke eng?—

Go ba gona, ka nako yeo Josefa le Maria ba be ba e-na le bana ba bangwe. (Mateo 13:55, 56) Le gona, ba ka ba ba be ba sepela le ba leloko, ba bjalo ka Jakobo le Johane gotee le tatago bona, Tsebedeo, le mmago bona, Salome, yoo e ka bago e be e le ngwanabo Maria. Ka gona, Maria a ka ba a be a nagana gore Jesu o be a e-na le ba leloko ba bangwe bao ba bego ba le sehlopheng seo.—Mateo 27:56; Mareka 15:40; Johane 19:25.

Ge Josefa le Maria ba be ba lemoga gore Jesu ga a gona, ba ile ba boela Jerusalema ka lebelo. Ba ile ba mo tsoma ka phagahlo. Ka letšatši le boraro ba ile ba mo hwetša ka tempeleng. Maria o ile a re go yena: “Ke ka baka la’ng o re dirile ka tsela ye? Nna le tatago re be re go nyaka re tshwenyegile megopolong.” Eupša Jesu o ile a araba ka gore: “Ke ka baka la’ng le be le swanetše go nnyaka? Na le be le sa tsebe gore ke swanetše go ba ntlong ya Tate?”—Luka 2:45-50.

Na o nagana gore go be go fošagetše gore  Jesu a arabe mmagwe ka tsela yeo?— Go ba gona, batswadi ba gagwe ba be ba tseba gore o be a rata go rapela ka ngwakong wa Modimo. (Psalme 122:1) Ka gona na e be e se mo go nepagetšego gore Jesu a nagane gore lefelo la mathomo leo ba bego ba swanetše go mo nyaka go lona e be e le tempeleng?— Ka morago, Maria o ile a dula a nagana ka seo Jesu a se boletšego.

Boemo bja Jesu bja kgopolo e be e le bofe ka Josefa le Maria?— Beibele e re: “[Jesu] a theoga le bona a tla Natsaretha gomme a tšwela pele a ikokobeleditše bona.” (Luka 2:51, 52) Re ka ithuta’ng mohlaleng wa Jesu?— Ee, le rena re swanetše go kwa batswadi ba rena.

Lega go le bjalo, go be go se bonolo go Jesu gore a kwe ka mehla—gaešita le go kwa Tatagwe wa legodimong.

Bošego bja pele ga lehu la gagwe, Jesu o ile a botšiša Jehofa ge e ba A tla fetoša monagano wa Gagwe mabapi le seo Jehofa a bego a nyaka gore a se dire. (Luka 22:42) Eupša Jesu o ile a kwa Modimo gaešita le ge go be go se bonolo. Beibele e bolela gore “o ithutile go kwa dilong tšeo a tlaišegilego ka tšona.” (Baheberu 5:8) Na o nagana gore le rena re ka ithuta thuto yeo?—

^ ser. 3 Ge e ba o bala le ngwana, thaladi ke ya go go gopotša gore o khutše gomme o kgothaletše ngwana go ntšha sa mafahleng.