Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  2010-03-01

Na Beibele ke Lentšu la Modimo?

Na Beibele ke Lentšu la Modimo?

“Lengwalo ka moka le buduletšwe ke Modimo gomme le hola ka go ruta, go sola, go lokiša dilo, go laya ka toko, gore motho wa Modimo a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.”2 TIMOTHEO 3:16, 17.

A MANTŠU a matla gakaakang ao moapostola Paulo a a boletšego mabapi le mohola o mogolo wa Beibele! Ke therešo gore o be a bolela ka karolo ya Beibele yeo e bego e hwetšagala ka nako yeo—mangwalo ao batho ka dinako tše dingwe ba rego ke Testamente ya Kgale. Eupša ge e le gabotse mantšu a gagwe a šoma ka tsela e swanago dipukung ka moka tše 66 tša Beibele, go akaretša le tšeo di ngwadilwego ke barutiwa ba botegago ba Jesu ba lekgolong la pele la nywaga C.E.

Na o tšeela Beibele godimo kudu bjalo ka Paulo? Na o nagana gore bangwadi ba Beibele ba be ba tloga ba buduletšwe ke Modimo? Bakriste ba lekgolong la pele la nywaga ba be ba nagana bjalo. Tumelo yeo ga se ya ka ya fokotšega nywaga-kgolong e latetšego. Ka mohlala, moruti wa Leisemane wa lekgolong la bo-14 la nywaga John Wycliffe o be a lebelela Beibele e le “molao o sa hwego wa therešo.” The New Bible Dictionary, ge e hlalosa mantšu a Paulo ao a tsopotšwego ka mo godimo, e bolela gore “ge e le gabotse, go budulelwa [ke Modimo] go tiišetša gore sohle seo Beibele e se bolelago ke therešo.”

Go Fetoga ga Boemo bja Kgopolo Mabapi le Beibele

Lega go le bjalo, mehleng ya morago-bjale batho ga ba sa bota Beibele. Puku e bitšwago The World’s Religions, e re: “Ge go bolelwa feela, Bakriste ka moka [ba sa] bota Beibele, bobedi gore e ka hlahla ditiro tša bona le gore e ka bopa  ditumelo tša bona.” Lega go le bjalo, seo ga se therešo ge go tliwa go dirišweng ga yona. Batho ba bantši lehono ba lebelela Beibele e le feela “motlwae wa batho o sa botegego.” Gaešita le ge ba lemoga gore bangwadi ba Beibele e be e le batho ba nago le tumelo e tiilego, ba bona bangwadi bao e le feela banna ba fokolago bao ba ilego ba katanela go hlalosa ditherešo tše di tseneletšego tša moya eupša ba se na tsebo le tshedimošo ya lehono.

Ge e le gabotse, batho ba mmalwa kudu lehono ba dumelela Beibele e hlahla menagano le ditiro tša bona e le ka kgonthe. Ka mohlala, ke gakae moo o kwago batho ba re ditekanyetšo tša Beibele tša boitshwaro e fo ba e le tše di šiilwego ke nako e bile ga di šome? Ba bangwe ba ikwa ba lokologile go nyatša melao ya Beibele le melao ya yona ya motheo—goba gaešita le go e hlokomologa ka mo go feletšego ge go bonagala go le kaone go dira bjalo. Ba bangwe bao ba ipitšago Bakriste ba hlokomologa ka go lebanya seo Beibele e se bolelago mabapi le bootswa, bohlotlolo, go se botege le botagwa.1 Bakorinthe 6:9, 10.

Ke ka baka la’ng go le bjalo? Mathomong a lekgolo la bo-20 la nywaga, lebaka le lengwe le ile la bolelwa ke moepi wa marope Mohlomphegi Charles Marston ka pukung ya gagwe ya The Bible Is True. O itše, batho ba ile ba kitimela go “amogela dikakanyetšo tša bangwadi ba mehleng yeno ntle le go ngongorega,” bangwadi bao ba bego ba hlasela go botega ga Beibele. Na seo e ka ba e le therešo le lehono? O ka lebelela bjang dipono le dithuto tša diithuti tša Beibele tšeo di nyatšago go botega ga Beibele? Bona seo se bolelwago ke sehlogo se se latelago mabapi le taba ye.