Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2010-02-01

 Babadi ba Rena ba a Botšiša . . .

Na o Swanetše go Dumela go Boraro-botee e le Gore o be Mokriste?

Na o Swanetše go Dumela go Boraro-botee e le Gore o be Mokriste?

Puku ya sekolo se se phagamego, ya World Religions in Denmark, yeo e gatišitšwego ka 2007, e hlalositše Dihlatse tša Jehofa e le Bakriste ba banyenyane bao ba latelago Beibele kgaufsi. Ge e le gabotse, Dihlatse tša Jehofa ke bodumedi bja boraro ka bogolo bja Bokriste kua Denmark.

Lega go le bjalo, mopišopo wa Kereke ya Setšhaba ya Denmark o ile a swaya diphošo o šoro phetho ya mongwadi ya go akaretša Dihlatse ka pukung yeo ya sekolo. Ka baka la’ng? Mopišopo o itše: “Ke sa nyaka go kopana le rathutatumelo yoo a lebelelago [Dihlatse tša Jehofa] e le Bakriste. Di gana Boraro-botee, bjoo e lego thuto e bohlokwa ya bodumedi bja Bokriste.”

Mongwadi wa puku yeo, setsebi sa tša leago ditabeng tša tša bodumedi e lego Annika Hvithamar, o ile a bolela gore ge batho ba botšišwa lebaka leo ka lona ba itebelelago e le Bakriste, ga ba ke ba araba ka gore ke ka gobane ba dumela gore Modimo ke Boraro-botee. Go oketša moo, karolo e nago le sehlogo se se rego “Na o Mokriste?” ka pukung yeo e re: “Thuto ya Boraro-botee ke bjo bongwe bja mathata a magolo kudu dithutong tša Bokriste.” E tšwela pele ka gore: “Ka mehla, go be go le thata go hlalosetša Bakriste ba sa rutegago lebaka leo ka lona Modimo wa Bakriste e sa dutšego e le modimo o tee e sego ba bararo.”

“Thuto ya Boraro-botee ke bjo bongwe bja mathata a magolo kudu dithutong tša Bokriste”

Seo Beibele e se rutago mabapi le Modimo le Jesu se a kwagala e bile se bonolo. Ga go thata go se kwešiša. Lentšu “Boraro-botee” goba kgopolo ya lona ga se ya thewa Lentšung la Modimo. Beibele e bolela ka mo go kwagalago gore Jesu Kriste ke Morwa wa Modimo wa leitšibulo. (Bakolose 1:15) Le gona, e bolela ka Jesu e le “mmoelanyi . . . magareng ga Modimo le batho.” (1 Timotheo 2:5) Ge Beibele e bolela ka Tate e re: “Wene o nnoši, o bitšwago Jehofa, yo godimodimo, godimo ga lefase ka moka.”—Psalme 83:19PK.

Dihlatse tša Jehofa di dumela gore go dumela go Jesu go bohlokwa. (Johane 3:16) Ka baka leo, di tšeela godimo taelo ya Jesu e rego: “Go ngwadilwe gwa thwe, ‘Ke Jehofa Modimo wa gago yo o swanetšego go mo rapela, gomme ke yena a nnoši yo o swanetšego go mo direla tirelo e kgethwa.’” (Mateo 4:10) Ka ntle le pelaelo, motho yoo a lekago ka thata go kwa ditaelo tša Jesu a ka bitšwa Mokriste.