Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  2009-11-01

Nonwane 4: Modimo ke Boraro-botee

Nonwane 4: Modimo ke Boraro-botee

Nonwane ye e tšwa kae?

“Go ka naganwa gore thuto ya Boraro-botee ge e le gabotse e ile ya hlangwa lekgolong la bo-4 la nywaga. Ka kgopolo e itšego, se ke therešo . . . Taba ya motheo ya ‘Modimo o tee go Batho ba bararo’ e be e se ya hlongwa ka go tia, ka kgonthe e be e se ya amogelwa ka botlalo bophelong bja Bokriste le boipolelong bja bjona bja tumelo, pele ga bofelo bja lekgolo la bo-4 la nywaga.”—New Catholic Encyclopedia (1967), Bolumo 14, letlakala 299.

“Lekgotla la kua Nicaea le ile la kopana ka May 20, 325 [C.E.]. Constantine ka boyena o ile a swara marapo le go hlahla dipoledišano ka mafolofolo, yena ka noši a ba a šišinya . . . tlhaloso ya makgaola-kgang ya go hlalosa tswalano magareng ga Kriste le Modimo tumelong yeo e boletšwego ke lekgotla, ‘e lego yo a lego boemong bja go swana le bja Tate.’ . . . Ka go tšhošwa ke mmušiši, bapišopo ba ile ba saenela tumelo ka ntle le ba babedi feela, ba bantši ba bona ba saena ba tloga ba sa rate go dira bjalo.”—Encyclopædia Britannica (1970), Bolumo 6, letlakala 386.

Beibele e re’ng?

“[Stefano] a tlala Môya-mokxêthwa, a lelalêla lexodimong, a bôna letaxô la Modimo; a bôna Jesu à eme ka letsoxong le letona la Modimo; A bolela a re: Tsebang, ke bôna maxodimo à bulexile; Morwa-motho ke mmôna à eme ka letsoxong le letona la Modimo.”—Ditiro 7:55, 56, Beibele ya Sepedi.

Pono ye e utollotše eng? A tletše matla a Modimo a šomago, Stefano o ile a bona Jesu a “eme ka letsoxong le letona la Modimo.” Ka gona, go molaleng gore Jesu ga se a ka a ba Modimo gape ka morago ga go tsošetšwa legodimong, eupša go e na le moo, o ile a ba sephedi seo se ikemetšego sa moya. Ga go bolelwe ka motho wa boraro a le kgaufsi le Modimo ponong ye. Go sa šetšwe maiteko a go hwetša ditemana tša Mangwalo tša go thekga thuto ya Boraro-botee, moruti wa Dominican e lego Marie-Émile Boismard o ngwadile ka pukung ya gagwe ya À l’aube du christianisme—La naissance des dogmes (Mathomong a Bokriste—Go Tswalwa ga Dithuto) gore: “Polelo ya gore go na le batho ba bararo Modimong o tee . . . ga go moo e ka balwago gona ka Testamenteng e Mpsha.”

Thuto yeo Constantine a bego a e godiša e be e le ya go leka go fediša diphaphang tše di bego di le gona ka Kerekeng ya lekgolong la bone la nywaga. Lega go le bjalo, e ile ya tsoša kgang e nngwe: Na Maria, mosadi yo a belegego Jesu, e be e le “Mmago Modimo”?

Bapiša ditemana tše tša Beibele: Mateo 26:39; Johane 14:28; 1 Bakorinthe 15:27, 28; Bakolose 1:15, 16

THEREŠO:

Thuto ya Boraro-botee e hlamilwe mafelelong a lekgolo la bone la nywaga

Ithute ka mo go Oketšegilego

DITABA TŠE DIBOTSE TŠE DI TŠWAGO GO MODIMO!

Modimo ke Mang?

Na Modimo o na le leina le gona na o na le taba le rena?