Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2009-11-01

Nonwane 5: Maria ke Mmago Modimo

Nonwane 5: Maria ke Mmago Modimo

Nonwane ye e tšwa kae?

“Tlhompho ya mmago Modimo e ile ya tšwelela nakong ya ge . . . baheitene ba kgeregela ka kerekeng. . . . Borapedi bja bona le temogo ya bona ya bodumedi [ya boheitene yeo e fetošitšwego ya Bokriste] e be e e-na le nywaga-kete e hlomilwe e le tirelo ya ‘mma yo mogolo’ modimogadi le ‘modimo wa kgarebe.’”—The New Encyclopædia Britannica (1988), Bolumo 16, matlakala 326 le 327.

Beibele e re’ng?

“O tlo ima popelong ya gago gomme wa belega morwa, gomme o swanetše go mmitša Jesu. E tla ba yo mogolo gomme o tla bitšwa Morwa wa Yo Godimo-dimo. . . . Ka baka leo ngwana yoo e tla ba yo mokgethwa gomme o tla bitšwa Morwa wa Modimo.”—Mongwalo o sekamego ke wa rena; Luka 1:31-35, The New Jerusalem Bible.

Ditemana tšeo tša Mangwalo di bontšha gabotse gore Maria e be e le mmago “Morwa wa Modimo,” e sego mmago Modimo. Na o be a ka ima Yoo ‘le magodimo a sa kgonego go lekana go ona’? (1 Dikxoši 8:27) Ga se a ka a bolela bjalo. Thuto ya Boraro-botee ke yona yeo e bakilego kgakanego ya mabapi le yoo Maria e lego yena. Ka go bolela ka yena e le Theotokos (lentšu la Segerika leo le bolelago “Mo-ima-modimo”), goba “Mmago Modimo,” Lekgotla la Efeso, ka 431 C.E., le ile la hloma borapedi bja Maria. Motse wa Efeso woo go wona go bego go swerwe lekgotla le la kereke o be o e-na le nywaga-kgolo o rapela medimo ya diswantšho go tumiša modimogadi wa matla a go ima e lego Aratemise.

Ka gona, dikarolo tše dintši tša borapedi bja seswantšho sa Aratemise “se se welego se e-tšwa legodimong,” tše bjalo ka melokeloke, di ile tša tsenywa borapeding bja Maria. (Ditiro 19:35) Tirelo e nngwe yeo e ilego ya tsena ganyenyane-ganyenyane dithutong tša Bokriste ke ya go dirišwa ga diswantšho tša Maria le tše dingwe borapeding.

Bapiša ditemana tše tša Beibele: Mateo 13:53-56; Mareka 3:31-35; Luka 11:27, 28

THEREŠO:

Maria e be e le mmago Morwa wa Modimo, e sego mmago Modimo. Nonwane ya Boraro-botee e tswetše borapedi bja Maria go thwe ke Mmago Modimo