Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI 2009-08-01

Bodumedi bjo bo Lokilego bo Kgothaletša go Hlompha Lentšu la Modimo

Bodumedi bjo bo Lokilego bo Kgothaletša go Hlompha Lentšu la Modimo

JESU o ile a kgothaletša gore go hlompšhe Lentšu la Modimo, Beibele. Se se bonagetše tseleng yeo a arabetšego ka yona ge a be a lekwa ke Diabolo. (Mateo 4:4-11) Ka mohlala, Jesu o ile a arabela bjang ge Sathane a be a re a fetoše mafsika gore a be dinkgwa? Jesu o ile a ganetša teko yeo ka go tsopola mantšu a Moše a buduletšwego, ao o ka ipalelago ona go Doiteronomio 8:3. Le gona, ge Diabolo a be a holofetša Jesu bobuši bja mebušo ka moka ya lefase ge feela a be a ka dira tiro e tee ya borapedi, Jesu o ile a arabela bjang? O ile a gana seo a bego a se holofetšwa ka go bolela molao wa Mangwalo wa motheo woo o ka o hwetšago go Doiteronomio 6:13.

Nagana feela! Gaešita le ge a be a le Morwa wa Modimo, Jesu o ile a ithekga ka Beibele e le mothopo wa gagwe wa tsebišo ge a be a ruta. Le gona ga go pelaelo gore ga se a ka a hlokomologa Lentšu la Modimo ka baka la metlwae ya batho. (Johane 7:16-18) Lega go le bjalo, baetapele ba bantši ba bodumedi ba mehleng ya Jesu ba be ba sa hlomphe Lentšu la Modimo go swana le yena. Ka baka la’ng? Ba be ba dumeletše metlwae ya batho e bipa Mangwalo a Makgethwa. Jesu o boditše banna bao ba bodumedi ka go lebanya gore: “Le lahla Molaô wa Modimo, Lè e-ya ka metlwaê ya lena. Baikaketši-tenang! Jesaya o porofetile xa-botse a e-ra bô-lena, xe a re. Sethšaba sé se mpatamêla ka lexano, se nthèta ka melomo; mola dipelo tša bôná di le kxolê le Nna. Xomme xe ba mpoifa, e fo ba lefêla, ké thutô ya ma-laya-batho.”—Mateo 15:6-9, Beibele ya Sepedi.

Madumedi a mantši a lefase, a Bokriste goba ao e sego a Bokriste, a bolela gore a hlompha  Beibele. Lega go le bjalo, ke madumedi a makae ao o a tsebago ao a lahlago metlwae ya batho ge e thulana le dithuto tše di kwagalago tšeo di hwetšwago ka Lentšung la Modimo? Ela hloko mehlala e mebedi feela.

TABA: Direto tša Bodumedi.

SEO BEIBELE E SE RUTAGO:

Jesu o ile a sola baetapele ba bodumedi ba mehleng ya gagwe ka baka la go rata ga bona direto le kganyogo ya bona ya go tuma. O boletše gore banna bao ba be ba rata “dibaka tša ka pele monyanyeng, le ditulo tša ka pele disinagogeng, Le ditumedišo mapatlelong, le go bitšwa ke batho: Rabbi.” Ke moka Jesu o ile a botša barutiwa ba gagwe gore: “Lena le se bitšwe Rabbi, gobane o tee ke moetapele wa lena, . . . gomme lena ka moka le bana ba o tee. Gomme le se ke la bitša e mongwe mo lefaseng le re ke tata weno; gobane Tata weno o tee, e lego wa magodimong.”—Mateo 23:1-10PK.

POTŠIŠO:

Na baetapele ba bodumedi bjo ba rata go bitšwa ka direto tša go ba hlompha le go nyaka botumo setšhabeng, goba na ba kwa taelo ya Jesu ya gore ba pheme go dira bjalo?

TABA: Go dirišwa ga diswantšho borapeding.

SEO BEIBELE E SE RUTAGO:

“O se ke wa itirêla modimo wa xo betlwa, le xe e le seswanthšô se sengwê sa tše di lexo kwa lexodimong, le xe e le sa tše di lexo mono lefaseng, le sa tše di lexo meetseng ka tlase xa lefase. O se ke wa di khunamêla; O se kê wa di dirêla.”—Ekisodo 20:4, 5.

Moapostola Johane o ile a ngwalela Bakriste gore: “Le swanetše go katoga medimo ya diswantšho.”—1 Johane 5:21, Contemporary English Version.

POTŠIŠO:

Na bodumedi bjo bo kwa taelo e kwagalago ya Beibele ya gore bo pheme go diriša diswantšho le medingwana ge go rapelwa Modimo?

O ka Hwetša Tsela e Nepagetšego

Go sa šetšwe bontši bja madumedi a lego gona lehono a bakago kgakanego, o ka hwetša bjoo bo lebišago bophelong. Go na le maswao a mantši a go hlaola “borapedi bjo bo sekilego, bjo bo se nago mmala pele ga Modimo.” (Jakobo 1:27, PK) Mangwalo ao a ahla-ahlilwego dihlogong tše a bjalo ka maswao ao a ka go thušago go bona bodumedi bjoo.

O re’ng o sa kgopele Dihlatse tša Jehofa gore di go nee dikarabo tša dipotšišo tšeo di rotošitšwego dihlogong tše? Ge o dutše o hlahloba seo di se bolelago, latela mohlala o mobotse wa bao ba phetšego lekgolong la pele la nywaga motseng wa Berea. Ka morago ga go kwa moapostola Paulo a dira boboledi, “ba ile ba ithuta Mangwalo go bona ge e ba seo Paulo a bego a se bolela e le therešo ruri.” (Ditiro 17:11, Today’s English Version) Ge e ba, go swana le Baberea, o hlompha Lentšu la Modimo le go le bala ka mafolofolo, o tla hwetša tsela e lebišago bophelong. Ke wena o swanetšego go dira phetho ya ge e ba o tla sepela ka tsela yeo goba go se sepele ka yona.

Ke bodumedi bofe bjoo bo kgothaletšago batho gore ba bale Mangwalo go bona ge e ba seo ba ithutago sona e le therešo ruri?

Ithute ka mo go oketšegilego

PHAFOGA!

Na Bakriste ba Swanetše go Diriša Direto tša Bodumedi?

Direto “mohlomphegi” le “mopishopo” di tlwaelegile. Na direto tše bjalo le tše dingwe di dumelelwa ke Beibele?