Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MOROKAMI 2008-06-01

 Ruta Bana ba Gago

O be a Nyaka go Thuša

O be a Nyaka go Thuša

NA O tseba motho yo a itšego yo a kilego a babja kudu?— Na o ile wa ikwa eka o ka dira selo se itšego go mo thuša?— Go thwe’ng ge e ba a be a e-tšwa nageng e nngwe goba e le wa bodumedi bjo bo fapanego le bja gago? Na o be o sa dutše o tla rata go mo thuša gore a fole?— Ngwanenyana yo a bego a dula nageng ya Isiraele mo e ka bago nywageng e 3 000 e fetilego o ile a dira bjalo. Anke re bolele ka seo se diregilego ka nako yeo.

Gantši Isiraele ya bogologolo e be e e-lwa le naga yeo ba bego ba agile kgaufsi le yona ya Siria moo ngwanenyana yo a bego a dula gona. (1 Dikxoši 22:1) Ka letšatši le lengwe Basiria ba ile ba tla Isiraele gomme ba thopa ngwanenyana yo. O išwa Siria, moo a fetogago mohlanka wa mosadi wa Naamane, molaodi wa madira a Siria. Naamane o na le bolwetši bjo šoro bjo bo bitšwago lephera, bjoo bo ka dirago gore nama ya motho e ngwathege.

Ngwanenyana wa mohlanka o botša mosadi wa Naamane kamoo monna wa gagwe a ka fodišwago ka gona. O re: ‘Ge e ba Naamane a be a ka ya Samaria, moporofeta wa Jehofa e lego Elisa a ka mo fodiša lephera la gagwe.’ Tsela yeo ngwanenyana wa mohlanka a hlalosago Elisa ka yona e dira gore Naamane a dumele gore moporofeta yoo a ka kgona go mo fodiša e le ruri. Ka gona, ka tumelelo ya Benehadada, kgoši ya Siria, Naamane o tšea leeto le letelele la mo e ka bago dikhilomithara tše 150 go yo nyaka Elisa a e-na le bahlokomedi ba bangwe ba gagwe.

Sa pele, ba ya go Jorama, kgoši ya Isiraele. Ba mmontšha lengwalo la Kgoši Benehadada leo le kgopelago gore Naamane a thušwe. Eupša Jorama ga a na tumelo go Jehofa goba go moporofeta Elisa. Jorama o nagana gore Benehadada o leka go thoma ntwa. Ge Elisa a e-kwa taba ye, o botša Kgoši Jorama gore: “A a tlê xo nna.” Elisa o nyaka go bonagatša matla a Modimo ka go fodiša Naamane bolwetši bja gagwe bjo šoro.—2 Dikxoši 5:1-8.

Ge Naamane a fihla ntlong ya Elisa ka dipere tša gagwe le dikoloi tša ntwa, Elisa o romela moromiwa gore a mmotše gore: ‘O swanetše go hlapa gašupa Nokeng ya Jorodane gomme o tla fola.’ Naamane o a galefa. O letetše gore Elisa a tšwe, a iše letsogo la gagwe kua le kua godimo ga lephera e le gore le fole. Go e na le moo, o bona moromiwa wa gagwe feela! Ka gona Naamane o a tloga a galefile gomme o boela gae.—2 Dikxoši 5:9-12.

 O be o tla dira’ng ge nkabe o be o le yo mongwe wa bahlanka ba Naamane?— Bahlanka ba gagwe ba ile ba mmotšiša gore: ‘Ge nkabe Elisa a go kgopetše selo se thata, na o be o ka se se dire? Ka gona, ke ka baka la’ng o sa dire selo se se bonolo—go fo hlapa gomme o fole?’ Naamane o a ba theetša. A ‘fologela nokeng ya Jorodane, a nwelela gašupa gomme mmele wa gagwe wa boela wa ba bjalo ka wa lesogana le lefsa.’

Naamane o boela go Elisa gomme o re: “O tsebê xore nna ke lemoxile xe mo lefaseng ka moka xò se’ Modimo xe e se xo Isiraele.” O holofetša Elisa gore le ka mohla a ka se “hlwê [a] iša didimo medimong e šele, xe e se Morêna.”—2 Dikxoši 5:13-17.

Na o ka rata go thuša motho yo mongwe go ithuta ka Jehofa le ka seo a ka se dirago, go etša ge ngwanenyana yo a dirile?— Ge Jesu a be a le mo lefaseng, monna yo a bego a e-na le lephera o ile a bontšha tumelo go yena gomme a re: ‘Ge e ba o tloga o nyaka go nthuša, o ka nthuša.’ Na o a tseba gore Jesu o mo arabile ka go re’ng?— “Ke a rata.” Ke moka Jesu o ile a mo fodiša, go etša ge Jehofa a ile a fodiša Naamane.—Mateo 8:2, 3.

Na o tseba ka lefase le lefsa leo Jehofa a tlago go le bopa leo go lona batho ba tlago go ba le bophelo bjo bobotse bja mmele le go phela ka mo go sa felego?— (2 Petro 3:13; Kutollo 21:3, 4) Ka gona, ruri o tla rata go botša ba bangwe ka ditaba tše tše di kgahlišago!