Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2015

Na o ‘Rata Moagišani wa Gago ka Mokgwa wo o Ithatago ka Wona’?

Na o ‘Rata Moagišani wa Gago ka Mokgwa wo o Ithatago ka Wona’?

O rate moagišani wa gago ka mokgwa wo o ithatago ka wona.”—MATEO 22:39.

DIKOPELO: 73, 36

1, 2. Mangwalo a bontšha bjang gore lerato le bohlokwa?

LERATO ke seka se segolo sa Jehofa. (1 Johane 4:16) Motho wa pele yo Jehofa a mmopilego, e lego Jesu Kriste, o feditše nywaga e dibilione a le legodimong a na le Tatagwe gomme a ithuta kamoo Jehofa e lego Modimo yo lerato ka gona. (Bakolose 1:15) Jesu le yena o bontšhitše lerato le le swanago bophelong bja gagwe ka moka, ge a be a le legodimong le ge a be a le mo lefaseng. Ka gona re ka kgodišega gore ka mehla Jehofa le Jesu ba tla buša ka lerato.

2 Ge motho yo a itšego a be a botšiša Jesu gore taelo e kgolokgolo ke efe, Jesu o ile a re: “‘O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.’ Ye ke taelo e kgolokgolo le ya pele. Ya bobedi ya go swana le yona ke ye: ‘O rate moagišani wa gago ka mokgwa wo o ithatago ka wona.’”—Mateo 22:37-39.

3. “Moagišani” wa rena ke mang?

 3 Go bohlokwa gore re bontšhe lerato ditswalanong tša rena ka moka. Jesu o itše re swanetše go rata Jehofa le baagišani ba rena. Eupša “moagišani” wa rena ke mang? Ge e ba o nyetše goba o nyetšwe, moagišani wa gago yo mogolo ke monna wa gago goba mosadi wa gago. Le gona baagišani ba rena ba akaretša bana babo rena le dikgaetšedi ka phuthegong gotee le batho bao re kopanago le bona bodireding. Sehlogong se, re tlo ithuta kamoo re ka bontšhago baagišani ba rena lerato.

RATA MOLEKANE WA GAGO WA LENYALO

4. Lenyalo le ka atlega bjang gaešita le ge re na le mafokodi?

4 Jehofa o ile a bopa Adama le Efa gomme a ba nyadiša. Leo e be e le lenyalo la mathomo. Modimo o be a nyaka gore ba be le lenyalo leo le thabišago gomme ba tlatše lefase ka bana. (Genesi 1:27, 28) Lega go le bjalo, ka morago ga gore ba se kwe Jehofa, lenyalo la bona le ile la senyega, gomme ka moka ga rena re ile ra fetišetšwa sebe le lehu. (Baroma 5:12) Go sa šetšwe seo, lenyalo le ka atlega lehono. Ka Beibeleng, Jehofa, yena Mohlami wa lenyalo, o neile banyalani keletšo e botse kudu.—Bala 2 Timotheo 3:16, 17.

Jehofa o letetše gore monna e be hlogo e lerato

5. Lerato le bohlokwa gakaaka’ng lenyalong?

5 Beibele e bontšha gore lerato le bohlokwa kudu gore re be le ditswalano tše di thabišago. Se ke sa therešo lenyalong. Moapostola Paulo o be a hlalosa lerato la kgonthe ge a be a re: “Lerato ga le fele pelo e bile le botho. Lerato ga le hufege, ga le ikgantšhe, ga le ikgogomoše, ga le dire tša go leša dihlong, ga le nyake tša go ikhola, ga le rumolege. Ga le boloke pego ya bobe. Ga le thabele go se loke eupša le thaba le therešo. Le tiišetša tšohle, le dumela tšohle, le holofela tšohle, le kgotlelela tšohle. Lerato le ka mohla ga le fele.” (1 Bakorinthe 13:4-8) Ge re nagana ka mantšu ao a Paulo le go a diriša, re ka ba le lenyalo leo le thabišago.

Beibele e re bontšha kamoo re ka bago le lenyalo leo le atlegilego (Bona serapa 6 le 7)

6, 7. (a) Beibele e re’ng ka go ba hlogo? (b) Monna wa Mokriste o swanetše go swara bjang mosadi wa gagwe?

6 Jehofa o ile a dira phetho ya gore ke mang yo e swanetšego go ba hlogo ya lapa. Paulo o hlalositše gore: “Ke nyaka ge le tseba gore hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.” (1 Bakorinthe 11:3) Eupša Jehofa o letetše gore monna e be hlogo e lerato, le ka mohla a se be bogale goba yo sehlogo. Jehofa ka boyena ke Hlogo e botho le yeo e se nago boithati. Ka baka leo, Jesu o hlompha bolaodi bjo lerato bja Modimo. O itše: “Ke rata Tate.” (Johane 14:31) Jesu o be a ka se ikwe ka tsela yeo ge nkabe Jehofa a be a mo swara makgwakgwa.

7 Gaešita le ge monna e le hlogo ya mosadi wa gagwe, Beibele e re o swanetše go mo godiša. (1 Petro 3:7) Monna a ka dira seo bjang? A ka ela hloko dilo tšeo mosadi wa gagwe a di nyakago le go hlompha dikgetho tša gagwe. Beibele e re: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafa ka  baka la yona.” (Baefeso 5:25) Ee, Jesu o ile a ba a hwela balatedi ba gagwe. Ge monna e le hlogo e lerato go etša Jesu, go tla ba bonolo gore mosadi wa gagwe a mo rate le go mo hlompha gotee le go thekga diphetho tša gagwe.—Bala Tito 2:3-5.

RATA BANA BENO LE DIKGAETŠEDI

8. Re swanetše go ikwa bjang ka bana babo rena le dikgaetšedi?

8 Lehono, batho ba dimilione lefaseng ka moka ba rapela Jehofa. Batho bao ke bana babo rena le dikgaetšedi. Re swanetše go ikwa bjang ka bona? Beibele e re: “Anke re direleng bohle botse, eupša kudukudu re bo direleng bao ba tswalanego le rena tumelong.” (Bagalatia 6:10; bala Baroma 12:10.) Moapostola Petro o ngwadile gore ‘go kwa ga rena therešo’ go swanetše go dira gore re be le ‘lerato la kgonthe la borwarre.’ Le gona Petro o boditše Bakristegotee le yena gore: “Godimo ga tšohle, ratanang ka lerato le le tseneletšego.”—1 Petro 1:22; 4:8.

9, 10. Ke ka baka la’ng batho ba Modimo ba na le botee?

9 Mokgatlo wa rena wa lefaseng ka moka ke wa moswananoši. Ka baka la’ng? Ka gobane re rata bana babo rena le dikgaetšedi kudu le go tšwa pelong. Sa bohlokwa kudu ke ka gobane re rata Jehofa le go kwa melao  ya gagwe, e bile o re thekga ka moya o matla kudu legohleng, e lego moya wa gagwe o mokgethwa. Moya wa Modimo o re thuša gore re be barwarre ba lefase ka bophara bao ba nago le botee.—Bala 1 Johane 4:20, 21.

10 Paulo o ile a gatelela bohlokwa bja gore Bakriste ba ratane ge a be a ngwala gore: “Aparang lerato leo le bonagatšago lešoko, botho, boikokobetšo, boleta le go se fele pelo. Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo. Eupša ka godimo ga dilo tše ka moka, aparang lerato gobane ke setlemo se se phethagetšego sa botee.” (Bakolose 3:12-14) Re leboga kudu gore go sa šetšwe gore re dula kae, re na le lerato, e lego “setlemo se se phethagetšego sa botee.”

Lerato le botee ke maswao a gore Dihlatse tša Jehofa ke balatedi ba therešo ba Kriste, e lego batho bao Modimo a ba dirišago go bolela ditaba tše dibotse tša Mmušo lefaseng ka moka

11. Mokgatlo wa Modimo o tsebja ka’ng?

11 Lerato la kgonthe le botee tšeo di lego gona gare ga bahlanka ba Jehofa di bontšha gore ba bodumeding bja therešo. Jesu o itše: “Bohle ba tla tseba ka se gore le barutiwa ba ka, ge e ba le ratana.” (Johane 13:34, 35) Le gona moapostola Johane o ngwadile gore: “Bana ba Modimo le bana ba Diabolo ba bonagala ka taba ye: Yo mongwe le yo mongwe yo a sa tlwaelego go dira go loka ga a tšwe go Modimo gomme go bjalo le ka yo a sa ratego ngwanabo. Gobane wo ke molaetša wo le o kwelego go tloga mathomong, gore re swanetše go ratana.” (1 Johane 3:10, 11) Lerato le botee ke maswao a gore Dihlatse tša Jehofa ke balatedi ba therešo ba Kriste, e lego batho bao Modimo a ba dirišago go bolela ditaba tše dibotse tša Mmušo lefaseng ka moka.—Mateo 24:14.

GO KGOBOKETŠA “LEŠABA LE LEGOLO”

12, 13. Ditho tša “lešaba le legolo” di dira’ng lehono, gona go tlo direga’ng ka tšona kgauswinyane?

12 Ba bantši ba bahlanka ba Jehofa lehono ke karolo ya “lešaba le legolo” leo le tšwago dikarolong tše dintši tša lefase, le gona ba bontšha gore ba thekga Mmušo wa Modimo. Ke “bao ba tšwago masetlapelong a magolo gomme ba hlatswitše diaparo tša bona tše telele ba di šweufatša mading a Kwana” ka go bontšha tumelo sehlabelong sa Jesu sa topollo. Batho bao e lego ditho tša “lešaba le legolo” ba rata Jehofa le Morwa wa gagwe, le gona ba hlankela Jehofa “mosegare le bošego.”—Kutollo 7:9, 14, 15.

13 Kgauswinyane Modimo o tlo fediša lefase le le kgopo ‘masetlapelong a magolo.’ (Mateo 24:21; bala Jeremia 25:32, 33.) Eupša Jehofa o tla šireletša bahlanka ba gagwe le go ba tsenya lefaseng le lefsa ka gobane o a ba rata. Go etša ge a holofeditše  nywageng e ka bago e 2 000 e fetilego, “o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” Na o lebeletše pele go phela Paradeiseng, ge bokgopo, tlaišego le lehu di tla ba di fedišitšwe?—Kutollo 21:4.

14. Lešaba le legolo le oketšegile gakaaka’ng?

14 Ge mehla ya bofelo e be e thoma ka 1914, go be go na le bahlanka ba Modimo ba dikete tše sego kae. Ka baka la go rata baagišani le ka thušo ya moya o mokgethwa wa Modimo, sehlopha seo se senyenyane sa bana babo rena le dikgaetšedi ba tloditšwego se ile sa bolela ditaba tše dibotse tša Mmušo go sa šetšwe mathata. Mafelelo e bile afe? Lehono go kgoboketšwa lešaba le legolo la batho bao ba nago le kholofelo ya go phela ka mo go sa felego lefaseng. Go na le Dihlatse tše e ka bago tše 8 000 000 diphuthegong tša ka godimo ga tše 115 400 lefaseng ka moka, gomme palo ye e tšwela pele e gola. Ka mohlala, ngwageng wa tirelo wa 2014 go kolobeditšwe Dihlatse tša ka godimo ga tše 275 500. Seo se ra gore beke e nngwe le e nngwe go kolobetšwa batho ba e ka bago ba 5 300.

15. Lehono batho ba ithuta ditaba tše dibotse bjang?

15 Go makatša kudu go bona gore ke batho ba bakae bao ba šetšego ba kwele ditaba tše dibotse tša Mmušo. Lehono dikgatišo tša rena di hwetšagala ka maleme a ka godimo ga a 700. Morokami ke makasine wo o abjago kudu go feta dimakasine tše dingwe ka moka lefaseng. Kgwedi le kgwedi go gatišwa dikopi tša ka godimo ga tše 52 000 000 ka maleme a 247. Le gona puku yeo re ithutago Beibele le batho ka yona ya Ke Eng Seo ge e le Gabotse Beibele e se Rutago? e fetoletšwe ka maleme a ka godimo ga a 250. Go fihla ga bjale, go šetše go gatišitšwe dikopi tša yona tša ka godimo ga tše 200 000 000.

16. Ke ka baka la’ng mokgatlo wa Jehofa o tšwela pele o gola?

16 Mokgatlo wa rena o tšwela pele o gola ka gobane re na le tumelo go Modimo e bile re dumela gore Beibele ke Lentšu la gagwe leo le buduletšwego. (1 Bathesalonika 2:13) Jehofa o tšwela pele a re šegofatša le ge Sathane a re hloile e bile a re ganetša.—2 Bakorinthe 4:4.

RATA BA BANGWE KA MEHLA

17, 18. Jehofa o letetše gore re ikwe bjang ka bao ba sa mo hlankelego?

17 Batho ba arabela modirong wa rena wa boboledi ka ditsela tše di sa swanego. Ba bangwe ba a re theetša, mola ba bangwe ba hloile molaetša wa rena. Jehofa o letetše gore re ikwe bjang ka bao ba sa mo hlankelego? Go sa šetšwe gore batho ba arabela bjang molaetšeng wa rena, re latela keletšo ya Beibele yeo e rego: “Anke mantšu a lena ka mehla e be a kgahlišago, a nokilwego ka letswai, e le gore le tsebe kamoo le swanetšego go araba yo mongwe le yo mongwe ka gona.” (Bakolose 4:6) Nako le nako ge re lwela ditumelo tša rena, re nyaka go dira bjalo ka “moya o boleta le ka tlhompho e tseneletšego” ka gobane re rata baagišani ba rena.—1 Petro 3:15.

18 Le ge batho ba re galefela gomme ba gana molaetša wa rena, re ba bontšha lerato la boagišani e bile re ekiša mohlala wa Jesu. Ge Jesu “a be a rogwa gabohloko, ga se a ka a ithogela. Ge a be a tlaišega, ga se a ka a  tšhošetša motho.” Go e na le moo, Jesu o be a botile Jehofa. (1 Petro 2:23) Ka gona ka dinako tšohle re bontšha boikokobetšo le go diriša keletšo yeo e rego: “Le se lefeletše bobe ka bobe goba go roga ka go roga. Go e na le moo, le šegofatše.”—1 Petro 3:8, 9.

Re swanetše go rata manaba a rena go sa šetšwe gore a re swara bjang

19. Re swanetše go swara manaba a rena bjang?

19 Boikokobetšo bo re thuša go kwa molao wa motheo o bohlokwa woo re o neilwego ke Jesu. O hlalositše gore: “Le kwele gore go ile gwa thwe: ‘O rate moagišani wa gago gomme o hloye lenaba la gago.’ Eupša ke re go lena: Tšwelang pele le rata manaba a lena le go rapelela bao ba le tlaišago, e le gore le itlhatsele le le barwa ba Tatago lena yo a lego magodimong, ka ge a hlabišetša ba kgopo le baloki letšatši la gagwe gomme a nešetša ba ba lokilego le ba sa lokago pula.” (Mateo 5:43-45) Ka ge re le bahlanka ba Modimo, re swanetše go rata manaba a rena go sa šetšwe gore a re swara bjang.

20. Re tseba bjang gore mo lefaseng go tlo phela feela batho bao ba ratago Modimo le baagišani ba bona? (Bona seswantšho seo se lego mathomong a sehlogo.)

20 Re swanetše go bontšha ka dinako tšohle gore re rata Jehofa le baagišani ba rena. Le ge batho ba re ganetša e bile ba ganetša molaetša wa rena, re a ba thuša ge ba hloka thušo. Moapostola Paulo o ngwadile gore: “Le se ke la kolota le ge e le mang selo, ge e se go ratana; gobane yo a ratago wa gabo o phethagaditše molao. Gobane molao o rego: ‘O se ke wa hlotlola. O se ke wa bolaya. O se ke wa utswa. O se ke wa duma tša ba bangwe,’ le taelo le ge e le efe e nngwe yeo e lego gona, o akaretšwa ka lentšu le, le le rego: ‘O rate wa geno ka mokgwa wo o ithatago ka wona.’ Lerato ga le sware moagišani wa motho gampe; ka baka leo lerato ke phethagatšo ya molao.” (Baroma 13:8-10) Lefaseng le leo le aroganego, le sehlogo le le kgopo leo le bušwago ke Sathane, bahlanka ba Modimo ba bontšha baagišani ba bona lerato la kgonthe. (1 Johane 5:19) Ka morago ga gore Jehofa a fediše Sathane, batemona ba gagwe le batho ba kgopo, lefaseng ka moka go tla phela feela batho bao ba ratanago. Ruri go tla thabiša kudu ge batho ka moka mo lefaseng ba tla be ba rata Jehofa le baagišani ba bona!