Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2015

Jehofa ke Modimo yo a Nago le Lerato

Jehofa ke Modimo yo a Nago le Lerato

“Modimo ke lerato.”—1 JOHANE 4:8, 16.

DIKOPELO: 18, 91

1. Seka se segolo sa Modimo ke sefe, gona go tseba se go dira gore o ikwe bjang ka yena?

BEIBELE e re botša gore “Modimo ke lerato.” (1 Johane 4:8) Eupša se ge e le gabotse se ra go re’ng? Lerato ga e fo ba se sengwe sa dika tša Jehofa tše dintši tše dibotse. Se ke seka sa gagwe se segolo. Ga se feela gore o na le lerato. Yena ka boyena ke lerato. Selo se sengwe le se sengwe seo a se dirago o se dira ka lerato. Ruri re leboga gore lerato le tutueleditše Jehofa go bopa legohle le diphedi ka moka!

2. Lerato la Modimo le re nea kgodišego efe? (Bona seswantšho se se lego ka mo godimo.)

2 Jehofa o rata tlholo ya gagwe kudu. Tsela yeo a re ratago ka yona e re kgodiša gore morero wa gagwe ka batho o tla phethagala ka tsela e di phalago tšohle. Se se tla tlišetša bao ba mo kwago lethabo la kgonthe. Ka mohlala, ka baka la lerato, Jehofa “o beile letšatši leo ka lona a rerago go ahlola lefase ka toko a diriša motho yo a mmeilego,” e lego Jesu Kriste. (Ditiro 17:31) Re  kgodišegile gore kahlolo yeo e tla tla. Se se tla tlišetša batho bao ba kwago bokamoso bjo bo kgahlišago bja ka mo go sa felego.

SEO HISTORI E SE HLATSETŠEGO

3. Bophelo bo be bo tla ba bjang ge nkabe Modimo a sa rate batho?

3 Go be go tlo direga’ng ka batho ge nkabe lerato e be e se seka se segolo sa Modimo? Batho ba be ba tla tšwela pele ba buša ba bangwe e bile ba tutuetšwa ke modimo yo a se nago lerato le yo a tletšego lehloyo, e lego Sathane. (2 Bakorinthe 4:4; 1 Johane 5:19; bala Kutollo 12:9, 12.) Ruri bophelo bja rena e be e tla ba masetlapelo ge nkabe Jehofa a sa re rate!

4. Ke ka baka la’ng Jehofa a ile a dumelela batho ba rabela pušong ya gagwe?

4 Ge Sathane a be a rabela bogošing bja Modimo, o ile a tutuetša le batswadi ba rena ba pele gore le bona ba rabele. O ile a hlohla tshwanelo ya Modimo ya go ba Mmuši wa Legohle. Sathane o ile a bolela gore yena a ka buša batho gakaone go phala Modimo. (Genesi 3:1-5) Ka bohlale, Jehofa o dumeletše Sathane ka nakwana gore a hlatsele seo a se boletšego. Eupša ditlamorago di bontšha gabotse gore batho goba Sathane ba ka se tsoge ba kgonne go buša gabotse.

Jehofa ga se a bopa batho ba na le bokgoni goba tshwanelo ya go ipuša ntle le tlhahlo ya gagwe

5. Histori e bontšhitše’ng?

5 Lehono lefase le mpefala le go feta. Nywageng e 100 e fetilego, batho ba ka godimo ga dimilione tše 100 ba bolailwe dintweng. Beibele e bolela ka ‘mehla ya bofelo’ gore: “Batho ba kgopo le baikgakanyi ba tla fetelela ka bobe.” (2 Timotheo 3:1, 13) Le gona e re: “Ke tseba gabotse, wena Jehofa, gore tsela ya motho ga e matleng a gagwe. Ga go matleng a motho yo a sepelago gore a laole dikgato tša gagwe.” (Jeremia 10:23) Histori e bontšhitše gabotse gore mantšu ao ke therešo. Jehofa ga se a bopa batho ba na le bokgoni goba tshwanelo ya go ipuša ntle le tlhahlo ya gagwe.

6. Ke ka baka la’ng Modimo a dumeletše bokgopo?

6 Ka go dumelela gore bokgopo bo tšwele pele ka nako e itšego, Jehofa o bontšhitše gabotse gore pušo ya gagwe ke yona feela yeo e ka atlegago. Nakong e tlago, Modimo o tla fediša batho ba kgopo ka moka. Ka morago ga moo, motho le ge e le ofe yo a tla belaelago tsela yeo Modimo a bušago ka yona, o tla fedišwa gateetee. Modimo a ka diriša seo se kilego sa diragalela batho ba kgopo e le bohlatse bja gore bao ba rabelago pušong ya gagwe ba swanetše go fedišwa gateetee. Bokgopo bo ka se sa dumelelwa gape.

MODIMO O BONTŠHITŠE LERATO LA GAGWE BJANG?

7, 8. Jehofa o re bontšhitše lerato la gagwe bjang?

7 Jehofa o bontšhitše lerato la gagwe le legolo ka ditsela tše dintši. Nagana ka bogolo le bobotse bja legohle la rena. Le na le melalatladi ya dinaledi e dibilione, gomme molalatladi o mongwe le o mongwe o na le dinaledi tše dibilione le dipolanete. Letšatši ke e nngwe ya dinaledi tše di lego molalatlading wa rena wa dinaledi wa Milky Way. Ka ntle le  letšatši, ga go na selo seo se tla phelago mo lefaseng. Tlholo ye ka moka e hlatsela gore Jehofa ke Mmopi wa rena, le gona e bontšha dika tša gagwe tše bjalo ka matla, bohlale le lerato. Ee, “dika tša [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego, ke gore matla a gagwe a neng le neng le Bomodimo bja gagwe.”—Baroma 1:20.

Dilo ka moka tšeo Jehofa a di bopilego mo lefaseng di hola diphoofolo le batho

8 Jehofa o bopile lefase ka mo go kgethegilego gore go phelwe go lona. Selo se sengwe le se sengwe lefaseng se hola diphoofolo le batho. Modimo o be a diretše batho serapa se sebotse gore e be legae la bona gomme a ba neile menagano le mebele e phethagetšego gore ba phele ka mo go sa felego. (Bala Kutollo 4:11.) Go oketša moo, “[o nea] nama ka moka dijo, gobane botho bja gagwe ke bja go iša mehleng ya neng le neng.”—Psalme 136:25.

9. Le ge Jehofa e le Modimo yo a nago le lerato, ke’ng seo a se hloilego?

9 Jehofa ke Modimo yo a nago le lerato, eupša o hloile bobe. Ka mohlala, Psalme 5:4-6 e bolela ka Jehofa gore: “Ga o Modimo yo a kgahlwago ke bokgopo . . . O hloile bohle bao ba tlwaetšego go dira tše di gobatšago.” Le gona Modimo o hloile “motho yo a tšhollago madi le yo a dirago tša bofora.”

JEHOFA O KGAUSWI LE GO FEDIŠA BOKGOPO

10, 11. (a) Go tlo direga’ng ka batho ba kgopo? (b) Ke’ng seo Jehofa a tlo se direlago batho bao ba kwago?

10 Ka nako ya gagwe e swanetšego, Jehofa o tla fediša bokgopo ka moka legohleng ka gobane ke Modimo yo lerato yo a hloilego dilo tše mpe. Lentšu la Modimo le re holofetša gore: “Badirabobe bona ba tla fedišwa, eupša bao ba holofetšego Jehofa ke bona bao e tlago go ba beng ba lefase. Go se gokae yo kgopo o tla be a se sa le gona.” Manaba a Jehofa ‘a tlo hwelela go etša muši.’—Psalme 37:9, 10, 20.

11 Le gona Lentšu la Modimo le holofetša gore: “Baloki bona e tla ba beng ba lefase, ba tla dula mo go lona ka mo go sa felego.” (Psalme 37:29) Batho ba botegago “ba tla thaba kudu ka baka la go ata ga khutšo.” (Psalme 37:11) Ka baka la’ng? Ka gobane ka mehla Modimo wa rena yo lerato o direla bahlanka ba gagwe ba botegago dilo tše dibotse. Beibele e re botša gore: “O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:4) Ruri batho bao ba kwago le go leboga lerato la Modimo ba tla ba le bokamoso bjo bo kgahlišago kudu!

12. “Motho yo a se nago bosodi” ke mang?

12 Beibele e re botša gore: “Šetša motho yo a se nago bosodi gomme o dule o lebeletše moloki, gobane bokamoso bja motho yoo e tla ba bja khutšo. Eupša bao ba tshelago molao bona ba tla fedišwa ka moka; ba kgopo ga ba na bokamoso.” (Psalme 37:37, 38) “Motho yo a se nago bosodi” o ithuta ka Jehofa le Morwa wa gagwe gomme a dira thato ya Modimo ka pelo ka moka. (Bala Johane 17:3.) O tloga a dumela gore “lefase le a feta gomme  go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Johane 2:17) Ka ge bofelo bja lefase bo le kgauswi, ke mo go akgofilego gore re ‘holofele Jehofa gomme re lote tsela ya gagwe.’—Psalme 37:34.

PONTŠHO E KGOLO YA LERATO LA MODIMO

13. Tsela e kgolo kudu yeo Modimo a re ratilego ka yona ke efe?

13 Gaešita le ge re sa phethagala, re ka kwa Modimo. Le gona re ka ba le tswalano ya kgauswi le Jehofa ka baka la sehlabelo sa Jesu sa topollo, e lego yona tsela e kgolo kudu yeo Modimo a re ratilego ka yona. Jehofa o re neile sehlabelo sa topollo e le gore batho bao ba kwago ba hwetše sebaka sa go lokollwa sebeng le lehung. (Bala Baroma 5:12; 6:23.) Jesu o botegetše Modimo legodimong ka nako e telele kudu, ka gona Jehofa o be a kgodišegile gore Morwa wa gagwe o be a tla dula a botega ge a be a le mo lefaseng. Ka ge Jehofa e le Tate yo lerato, o be a ekwa bohloko kudu ge a be a bona batho ba swara Morwa wa gagwe gampe. Lega go le bjalo, ka potego Jesu o ile a thekga tshwanelo ya Modimo ya go buša gomme a bontšha gore motho yo a phethagetšego a ka dula a botegela Modimo gaešita le maemong a thata kudu.

Ka ge Modimo a re rata, o ile a re romela Morwa wa gagwe (Bona serapa 13)

14, 15. Lehu la Jesu le hotše batho bjang?

14 Gaešita le ge Jesu a ile a welwa ke diteko tše šoro, o ile a dula a botegela Modimo le go thekga tshwanelo ya Jehofa ya go buša. Re swanetše go leboga gore Jesu ka lehu la gagwe o lefile topollo ka gobane e nea batho sebaka sa go phela ka mo go sa felego lefaseng le lefsa la Modimo! Moapostola Paulo o hlalositše lerato leo Jehofa le Jesu ba le bontšhitšego ka go re nea sehlabelo sa topollo. O itše: “Ruri Kriste ge re be re sa dutše re na le sebe, o ile a hwela batho ba ba sa boifego Modimo ka nako e beilwego. Gobane go thata gore motho le ge e le ofe a hwele moloki; ge e le motho yo botho yena, mohlomongwe yo mongwe a ka beta pelo a mo hwela. Eupša Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.” (Baroma 5:6-8) Moapostola Johane o ngwadile gore: “Re utolletšwe lerato  la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena. Lerato le ka tsela ye, ga se gore rena re ratile Modimo, eupša yena o re ratile gomme a romela Morwa wa gagwe e le sehlabelo sa poelanyo bakeng sa dibe tša rena.”—1 Johane 4:9, 10.

15 Jesu o itše “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Gaešita le ge seo se ile sa kweša Jehofa bohloko kudu, o ile a re nea Morwa wa gagwe gore e be sehlabelo sa topollo. Se se bontšha gore o re rata kudu. Le gona o tla re rata ka mo go sa felego. Paulo o ngwadile gore: “Ke kgodišegile gore le ge e le lehu goba bophelo goba barongwa goba mebušo goba dilo tšeo di lego gona gona bjale goba dilo tše di tlago go tla goba matla goba bophagamo goba go iša goba sebopiwa le ge e le sefe se sengwe di ka se kgone go re aroganya le lerato la Modimo leo le lego go Kriste Jesu Morena wa rena.”—Baroma 8:38, 39.

MMUŠO WA MODIMO O A BUŠA

16. Mmušo wa Mesia ke’ng, gona Jehofa o kgethile mang gore e be Kgoši ya wona?

16 Mmušo wa Modimo, e lego Mmušo wa Mesia, le wona ke bohlatse bja gore Jehofa o rata batho. Ke ka baka la’ng re re’alo? Jehofa o šetše a kgethile Mmuši yo a ratago batho le yo a swanelegago go buša, e lego Jesu Kriste. (Diema 8:31) Go oketša moo, batho ba 144- 000 bao ba kgethilwego bathong ba tla buša le Kriste legodimong. Ge ba tsošwa bahung, ba ya legodimong ba tseba gore go ba motho go bjang. (Kutollo 14:1) Ge Jesu a be a le mo lefaseng, selo se segolo seo a bego a ruta batho ka sona e be e le Mmušo wa Modimo, le gona o ile a ruta barutiwa ba gagwe go rapela ka gore: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:9, 10) Re letetše go bona dithapelo tše bjalo di phethagala, ge Mmušo wa Modimo o tla be o tlišetša batho ditšhegofatšo tše dintši!

17. Pušo ya Jesu e fapana bjang le pušo ya batho?

17 Go na le phapano e kgolo magareng ga pušo e lerato ya Jesu le pušo ya batho. Pušo ya batho e feleleditše ka dintwa tšeo di bolailego batho ba dimilione. Eupša Kgoši ya rena e lego Jesu, o re rata kudu e bile o ekiša dika tše dibotse tša Modimo, kudukudu lerato la gagwe. (Kutollo 7:10, 16, 17) Jesu o itše: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya ka le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo. Gobane joko ya ka e botho, morwalo wa ka o bohwefo.” (Mateo 11:28-30) Ruri ye ke kholofetšo e lerato!

18. (a) Ke’ng seo se bego se dutše se direga ga e sa le go tloga ka 1914? (b) Re tlo ahlaahla’ng sehlogong se se latelago?

18 Beibele e bontšha gore Mmušo wa Modimo o thomile go buša legodimong ka 1914. Ga e sa le go tloga ka nako yeo, Modimo o be a dutše a kgoboketša ditho tša mafelelo tša bao ba tlago go buša le Jesu legodimong gotee le go kgoboketša “lešaba le legolo” la batho bao ba tlago go phologa bofelo bja tshepedišo ye gomme ba tsena lefaseng le lefsa. (Kutollo 7:9, 13, 14) Lešaba le legolo le gotše gakaaka’ng lehono? Modimo o nyaka gore le dire’ng? Sehlogo se se latelago se tlo ahlaahla dipotšišo tše.