Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2015

“Re Nee Tumelo e Oketšegilego”

“Re Nee Tumelo e Oketšegilego”

“Nthuše moo ke hlokago tumelo!”—MAREKA 9:24.

DIKOPELO: 81, 135

1. Tumelo e bohlokwa gakaaka’ng? (Bona seswantšho se se lego ka mo godimo.)

NA O kile wa ipotšiša gore: ‘Na Jehofa o tla tla a mphološa nakong ya masetlapelo a magolo?’ Moapostola Paulo o boletše gore tumelo ke seka sa bohlokwa kudu seo re swanetšego go ba le sona gore re tle re phologe. O itše: “Ka ntle le tumelo go kgahliša Modimo gabotse ga go kgonege.” (Baheberu 11:6) O ka nagana gore go dira seo go bonolo, eupša therešo ke gore “tumelo ga se batho bohle bao ba nago le yona.” (2 Bathesalonika 3:2) Mangwalo ao a mabedi a re thuša go kwešiša kamoo go lego bohlokwa ka gona go matlafatša tumelo ya rena.

2, 3. (a) Tumelo ya rena e bohlokwa gakaaka’ng? (b) Re tlo ahlaahla’ng sehlogong se?

2 Moapostola Petro o boletše ka tumelo e “lekilwego.” (Bala 1 Petro 1:7.) Masetlapelo a magolo a kgauswiuswi, ka gona re nyaka go ba “mohuta wo o nago le tumelo yeo e lebišago go phedišweng ga moya.” (Baheberu 10:39) Ka gona re swanetše go šoma ka thata go matlafatša tumelo ya rena. Re nyaka go ba gare ga bao ba tlago go putswa ge Kgoši ya rena Jesu Kriste, a utollwa. Ka gona, go etša monna yo a ilego a lopa Jesu gore a mo nee tumelo e oketšegilego, le rena re ka re: “Nthuše moo ke hlokago tumelo!” (Mareka 9:24) Goba re ka bolela go swana le  baapostola ra re: “Re nee tumelo e oketšegilego.”—Luka 17:5.

3 Sehlogong se, re tlo ahlaahla dintlha tše di latelago: kamoo re ka matlafatšago tumelo ya rena, kamoo re ka bontšhago ka gona gore tumelo ya rena e tiile le gore ke ka baka la eng re ka kgodišega gore Modimo o tla re araba ge re mo kgopela tumelo e oketšegilego.

MODIMO O A THABA GE RE MATLAFATŠA TUMELO YA RENA

4. Ke mehlala ya bomang yeo e ka re tutueletšago go matlafatša tumelo ya rena?

4 Ka ge tumelo e le bohlokwa kudu, Jehofa o re neile mehlala e mentši ka Beibeleng ya batho bao ba bontšhitšego tumelo. Mehlala ye e ‘ngwaletšwe go re ruta.’ (Baroma 15:4) Batho ba go swana le Aborahama, Sara, Isaka, Jakobo, Moshe, Rahaba, Gideone, Baraka le ba bangwe ba bantši ba ka re tutueletša go matlafatša tumelo ya rena. (Baheberu 11:32-35) Go oketša mehlaleng ye ya batho ba bogologolo, re na le mehlala e mengwe e mebotse kudu ya tumelo gare ga bana babo rena le dikgaetšedi lehono. * (Bona mongwalo wa ka tlase.)

Re na le mehlala e mebotse kudu ya tumelo gare ga bana babo rena le dikgaetšedi lehono

5. Eliya o bontšhitše bjang gore o be a na le tumelo e tiilego go Jehofa, gona re swanetše go ipotšiša’ng?

5 Mohlala o mongwe wa ka Beibeleng ke wa moporofeta Eliya. Ge o dutše o naganišiša ka mohlala wa gagwe, ela hloko maemo a mahlano ao go ona a ilego a bontšha gore o bota Jehofa ka mo go feletšego. (1) Ge Eliya a be a botša Kgoši Ahaba gore Jehofa o tlo tliša komelelo, o ile a bolela ka kgodišego gore: “Ke ikana ka Jehofa Modimo wa Isiraele yo a phelago yoo ke emego pele ga gagwe gore nywageng ye go ka se ne phoka goba pula.” (1 Dikgoši 17:1) (2) Eliya o be a kgodišegile gore Jehofa o be a tla nea yena le bangwe seo ba se hlokago nakong ya komelelo. (1 Dikgoši 17:4, 5, 13, 14) (3) Le gona Eliya o be a kgodišegile gore Jehofa a ka tsoša morwa wa mohlologadi bahung. (1 Dikgoši 17:21) (4) O be a kgodišegile gore mollo wa Jehofa o be o tla fiša sehlabelo sa gagwe Thabeng ya Karamele. (1 Dikgoši 18:24, 37) (5) Le pele ga ge pula e ka na nakong ya komelelo yeo, Eliya o ile a botša Ahaba ka kgodišego gore: “Rotoga, o je o be o nwe; gobane go kwala modumo wa pula.” (1 Dikgoši 18:41) Ka morago ga go ahlaahla diphihlelo tše, yo mongwe le yo mongwe wa rena a ka ipotšiša gore: ‘Na tumelo ya ka e tiile go swana le ya Eliya?’

RE SWANETŠE GO DIRA ENG GORE RE MATLAFATŠE TUMELO YA RENA?

6. Re swanetše go kgopela’ng go Jehofa gore re tle re kgone go matlafatša tumelo ya rena?

6 Ka ge re ka se kgone go matlafatša tumelo ya rena ka borena, re swanetše go kgopela Modimo gore a re nee moya o mokgethwa. Ka baka la’ng? Ka gobane tumelo ke se sengwe sa dika tšeo di enywago ke moya o mokgethwa. (Bagalatia 5:22) Re dira gabotse ge  re latela keletšo ya Jesu ya gore re rapele Modimo gore a re nee moya o mokgethwa o oketšegilego. Jesu o holofeditše gore Jehofa o tla ‘nea moya o mokgethwa go bao ba mo kgopelago.’—Luka 11:13.

Re dira gabotse ge re latela keletšo ya Jesu ya gore re rapele Modimo gore a re nee moya o mokgethwa o oketšegilego

7. Hlalosa kamoo re ka dirago gore tumelo ya rena e dule e tiile.

7 Ge re šetše re na le tumelo e tiilego go Modimo, re swanetše go e kgomarela. Re ka bapiša tumelo le mollo. Ge re sa tšwa go gotša mollo, kgabo ya wona e ka ba e matla kudu. Lega go le bjalo, ge e ba re sa o bešeletše, mafelelong o tla tima gomme gwa šala molora feela. Eupša ge e ba re dula re o bešeletša, re ka dira gore o dule o tuka. Go bjalo le ka tumelo ya rena. Ge e ba re tšwela pele re bala Lentšu la Modimo letšatši le letšatši, re tla rata Beibele le Jehofa kudu. Ka baka leo, re tla matlafatša tumelo ya rena le go dula re na le yona.

8. O ka thušwa ke’ng go matlafatša tumelo ya gago le go dula o na le yona?

8 O se ke wa kgotsofalela feela go tseba dilo tšeo o ithutilego tšona pele o kolobetšwa. (Baheberu 6:1, 2) Ka mohlala, go ithuta diporofeto tša Beibele tšeo di šetšego di phethagetše go tla go thuša go matlafatša tumelo ya gago le go dula o na le yona. Le gona o ka diriša Lentšu la Modimo go bona ge e ba tumelo ya gago e tiile e le ka kgonthe.—Bala Jakobo 1:25; 2:24, 26.

9, 10. Tumelo ya rena e matlafatšwa bjang ke (a) bagwera ba babotse? (b) diboka tša phuthego? (c) go bolela ditaba tše dibotse?

9 Moapostola Paulo o boletše gore Bakriste ba ka ‘kgothatšana ka tumelo ya bona.’ (Baroma 1:12) Seo se ra go re’ng? Ge re fetša nako re na le bana babo rena le dikgaetšedi, re ka matlafatšana tumelong. Seo se bjalo kudukudu ge re fetša nako re na le bao tumelo ya bona e “lekilwego.” (Jakobo 1:3) Bagwera ba babe ba senya tumelo ya rena, eupša bagwera ba babotse ba a e matlafatša. (1 Bakorinthe 15:33) Ke ka baka leo re eletšwago gore re be gona dibokeng ka mehla. Ge re le moo, re ka “kgothatšana.” (Bala Baheberu 10:24, 25.) Go oketša moo, tlhahlo yeo re e hwetšago dibokeng e matlafatša tumelo ya rena. Beibele e re “tumelo e latela seo se kwelwego.” (Baroma 10:17) Ka gona ipotšiše gore: ‘Na ke ya dibokeng tša Bokriste ka mehla?’

10 Le gona re matlafatša tumelo ya rena ge re bolela ditaba tše dibotse le go ruta batho Beibele. Ka go swana le Bakriste ba lekgolong la pele la nywaga, re ithuta go bota Jehofa le go bolela ka sebete boemong le ge e le bofe.—Ditiro 4:17-20; 13:46.

11. Go tlile bjang gore Kalebe le Joshua ba be le tumelo e tiilego, gona re ka ba ekiša bjang?

11 Tumelo ya rena go Jehofa e a matlafala ge re bona kamoo a re thušago ka gona le kamoo a arabago dithapelo tša rena. Seo se ile sa diragalela Kalebe le Joshua. Ba ile ba bontšha tumelo go Jehofa ge ba be ba etšwa go hlola Naga ya Kholofetšo. Ge nako e dutše e eya, tumelo ya bona e ile ya ba matla le go feta nako e nngwe le e nngwe ge ba be ba  bona kamoo Jehofa a bego a ba thuša ka gona. Ka go re’alo, Joshua o ile a kgona go botša Baisiraele ka sebete gore: “Ga go le lentšu letee mantšung ka moka a mabotse ao Jehofa Modimo wa lena a le boditšego ona leo le sa kago la phethega.” Ka morago o itše: “Bjale lena boifang Jehofa le mo hlankeleng ka go hloka bosodi le ka go rereša.” Ke moka o ile a oketša ka gore: “Ge e le nna le ba lapa la ka re tla hlankela Jehofa.” (Joshua 23:14; 24:14, 15) Ge re bota Jehofa gomme re bona kamoo a thušago yo mongwe le yo mongwe wa rena ka gona, tumelo ya rena e tla matlafala le go feta.—Psalme 34:8.

KAMOO RE KA BONTŠHAGO TUMELO YA RENA

12. Re bontšha bjang gore re na le tumelo e tiilego?

12 Re bontšha bjang gore re na le tumelo e tiilego? Morutiwa Jakobo o itše: “Ke tla go bontšha tumelo ya ka ka mediro.” (Jakobo 2:18) Ditiro tša rena ke tšona di bontšhago gore re na le tumelo e tiilego. Anke re boneng gore ke ka baka la eng re re’alo.

Bao ba dirago sohle seo ba ka se kgonago bodireding ba bontšha gore ba na le tumelo e tiilego (See paragraph 13)

13. Re bontšha bjang gore re na le tumelo ge re bolela ditaba tše dibotse?

13 Go botša ba bangwe ditaba tše dibotse ke tsela e botse kudu ya go bontšha gore re na le tumelo. Ka baka la’ng? Ka gobane ge re dira bjalo, re bontšha gore re a dumela gore bofelo bo kgauswi le gore ‘bo ka se diege.’ (Habakuku 2:3) E le gore re bone ge e ba tumelo ya rena e tiile, re ka ipotšiša gore: ‘Go bolela ditaba tše dibotse go bohlokwa gakaaka’ng go nna? Na ke dira sohle seo nka se kgonago go botša ba bangwe ka Modimo? Na ke tsoma ditsela tša go katološa bodiredi bja ka?’ (2 Bakorinthe 13:5) Anke re bontšheng gore tumelo ya rena e tiile ka go bolela “phatlalatša ka molomo bakeng sa phološo,” ke gore, ka go bolela ditaba tše dibotse.—Bala Baroma 10:10.

14, 15. (a) Re ka bontšha tumelo bjang maphelong a rena letšatši le letšatši? (b) Anega phihlelo ya lapa leo le ilego la bontšha tumelo e tiilego.

 14 Le gona re bontšha gore re na le tumelo go Jehofa ge re kgotlelela mathata a lefase le. Ge re babja, re nyamile, re gateletšegile, re diila goba re na le mathata a mangwe, re swanetše go ba le tumelo ya gore Jehofa le Jesu ba tla “[re thuša] ka nako e swanetšego.” (Baheberu 4:16) Re bontšha gore re na le tumelo go Jehofa ge re mo kgopela thušo. Jesu o itše re ka kgopela Jehofa gore a re nee ‘dijo go ya ka dinyakwa tša rena tša letšatši’ le letšatši. (Luka 11:3) Dipego tša ka Beibeleng di hlatsela gore Jehofa a ka re nea selo le ge e le sefe seo re se hlokago. Ka mohlala, ge go be go na le komelelo e šoro kua Isiraele, Jehofa o ile a nea Eliya dijo le meetse. Beibele e re “magokobu a be a mo tlišetša senkgwa le nama mesong, mantšiboa le gona a mo tlišetša senkgwa le nama, a enwa meetse a moeding wa mafula.” (1 Dikgoši 17:3-6) Le gona re na le tumelo ya gore Jehofa a ka re nea seo re se hlokago.

Re bontšha gore re na le tumelo ge re kgotlelela mathata a lefase le (See paragraph 14)

15 Re kgodišegile gore ge re diriša melao ya motheo ya Beibele, re tla kgona go hlokomela malapa a rena nameng. Rebecca, e lego kgaetšedi yo a nyetšwego wa kua Asia, o hlalosa kamoo yena le lapa la gagwe ba ilego ba diriša melao ya motheo yeo e lego go Mateo 6:33 le Diema 10:4. O re monna wa gagwe o ile a lemoga gore mošomo wa gagwe o ka senya tswalano ya bona le Jehofa. Ka gona o  ile a tlogela mošomo woo. Eupša ba be ba swanetše go hlokomela bana ba bane, ka gona ba ile ba thoma go apea dijo gomme ba di rekiša. Ka baka la go šoma ga bona ka thata, ka mehla ba be ba hwetša tšhelete e lekanego go hlokomela lapa la bona. Rebecca o re: “Re ile ra kgona go bona gore Jehofa ga se a re lahla. Ga sa nka ra robala ka tlala.” Na o bile le phihlelo e swanago le ye yeo e ilego ya matlafatša tumelo ya gago?

Re kgodišegile gore ge re diriša melao ya motheo ya Beibele, re tla kgona go hlokomela malapa a rena

16. Go tla direga’ng ge e ba re bota Modimo?

16 Le ka mohla ga se ra swanela go belaela gore Jehofa o tla re thuša ge re latela tlhahlo ya gagwe. Paulo o ile a tsopola mantšu a Habakuku ge a be a re: “Moloki o tla phela ka baka la tumelo.” (Bagalatia 3:11; Habakuku 2:4) Ke ka baka leo re swanetšego go ba le tumelo e tiilego go Yo a ka re thušago e le ka kgonthe. Paulo o re gopotša gore Modimo ke yena “yo a kgonago go dira go feta kudu ka kua ga tšohle tšeo re di kgopelago goba re di naganago, go ya ka matla a gagwe ao a šomago go rena.” (Baefeso 3:20) Bahlanka ba Jehofa ba dira sohle seo ba ka se kgonago go dira thato ya gagwe, eupša gape ba a tseba gore go na le dilo tšeo ba ka se di kgonego. Re leboga kudu gore Modimo o a re thekga le gore o šegofatša maiteko a rena ka moka.

JEHOFA O ARABA DITHAPELO TŠA RENA GE RE KGOPELA TUMELO

17. (a) Jesu o ile a araba kgopelo ya baapostola ba gagwe bjang? (b) Ke ka baka la’ng re ka letela gore Jehofa a re arabe ge re kgopela tumelo e oketšegilego?

17 Go ya ka seo re se ahlaahlilego, re ka ikwa go etša baapostola ge ba be ba kgopela Jesu gore: “Re nee tumelo e oketšegilego.” (Luka 17:5) Jesu o ile a araba kgopelo ya baapostola ba gagwe ka tsela e kgethegilego ka Pentekoste ya ngwaga wa 33, ge ba be ba amogela moya o mokgethwa gomme ba kgona go kwešiša ka mo go tseneletšego morero wa Modimo. Se se ile sa matlafatša tumelo ya bona. Mafelelo e bile afe? Ba ile ba thoma modiro o mogolo kudu wa boboledi wo o bego o se wa ka wa dirwa ka nako yeo. (Bakolose 1:23) Na re ka letela gore Jehofa a arabe dithapelo tša rena tša ge re kgopela tumelo e oketšegilego? Jehofa o re holofetša gore a ka di araba ge re ‘kgopela go ya ka thato ya gagwe.’—1 Johane 5:14.

18. Jehofa o šegofatša bjang bao ba matlafatšago tumelo ya bona?

18 Jehofa o tla thaba ge re mmota ka mo go feletšego. O tla re araba ge re mo kgopela tumelo e oketšegilego gomme tumelo ya rena ya matlafala, ke moka ra tla ra “swanelwa ke mmušo wa Modimo.”—2 Bathesalonika 1:3, 5.

[Mongwalo wa tlase]

^ par. 4 Gore o hwetše mehlala e mengwe, bala phihlelo ya Lillian Gobitas Klose (ka go Phafoga! ya Seisemane ya July 22, 1993), ya Feliks Borys (ka go Phafoga! ya Seisemane ya February 22, 1994) le ya Josephine Elias (ka go Phafoga! ya October 2009).