Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2015

Na o Bona Seatla sa Modimo Bophelong bja Gago?

Na o Bona Seatla sa Modimo Bophelong bja Gago?

“Seatla sa Jehofa se tla tsebja ke bahlanka ba gagwe.”—JESAYA 66:14.

DIKOPELO: 65, 26

1, 2. Batho ba bangwe ba nagana’ng ka Modimo?

BATHO ba bantši ba nagana gore Modimo ga a na taba le seo ba se dirago. Ba nagana gore Modimo ga a na taba le dilo tšeo di ba diragalelago. Ka mohlala, ka morago ga gore ledimo le matla le senye karolo e kgolo ya Philippines ka November 2013, ramotse yo mongwe o itše: “Modimo o swanetše go ba a be a sa ile kaekae.”

2 Batho ba bangwe ba nagana gore Modimo a ka se bone seo ba se dirago. (Jesaya 26:10, 11; 3 Johane 11) Batho ba bangwe ba mehleng ya moapostola Paulo le bona ba be ba nagana bjalo. O boletše ka bona gore ba kgethile go se be le taba le Modimo. Ba be ba tletše go se loke, ba le kgopo, ba na le megabaru e bile e le ba babe.—Baroma 1:28, 29.

3. (a) Ke dipotšišo dife tšeo re swanetšego go ipotšiša tšona? (b) Gantši ka Beibeleng “seatla” sa Modimo se šupa go eng?

3 Go thwe’ng ka rena? Re a tseba gore Jehofa o bona selo se sengwe le se sengwe seo re se dirago. Eupša na re a dumela gore Jehofa o na le taba le rena? Na re bona seatla sa gagwe se re  thuša maphelong a rena? Ka Beibeleng, gantši “seatla” sa Modimo se šupa go matla a gagwe. O diriša matla a gagwe go thuša bahlanka ba gagwe le go fenya manaba a gagwe. (Bala Doiteronomio 26:8.) Jesu o boletše gore batho ba bangwe ba tla “bona Modimo.” (Mateo 5:8) Na re ba bangwe ba batho bao? Re ka “bona Modimo” bjang? Anke re ithuteng ka mehlala ya batho ba ka Beibeleng bao ba ilego ba bona seatla sa Modimo maphelong a bona le bao ba sa kago ba se bona. Le gona a re ithuteng kamoo tumelo e re thušago go bona seatla sa Modimo.

BA ILE BA GANA GO BONA SEATLA SA MODIMO

4. Ke ka baka la’ng manaba a Baisiraele a ilego a gana go bona seatla sa Modimo?

4 Nakong e fetilego, batho ba bantši ba bile le sebaka sa go bona le go kwa kamoo Modimo a ilego a thuša Baisiraele ka gona. Jehofa o ile a diriša mehlolo go lokolla batho ba gagwe Egipita le go fenya dikgoši tše dintši Nageng ya Kholofetšo. (Joshua 9:3, 9, 10) Gaešita le ge dikgoši tše dingwe di be di ekwa e bile di bona kamoo Jehofa a bego a phološa batho ba gagwe, di ile “tša kwana go ipopa ngatana gore di yo lwa le Joshua le Baisiraele.” (Joshua 9:1, 2) Ge dikgoši tšeo di be di elwa le Baisiraele, di be di eba le sebaka sa go bona seatla sa Modimo. Ka baka la matla a Jehofa a magolo, “letšatši [le ile] la ema le kgwedi ya ema go fihlela setšhaba se itefeletša go manaba a sona.” (Joshua 10:13) Eupša Jehofa o ile a lesa dipelo tša manaba a Baisiraele di ‘thatafala’ gomme manaba ao a lwa le Baisiraele. (Joshua 11:20) Manaba a Baisiraele a ile a fenywa ka gobane a be a gana go dumela gore Jehofa o lwela batho ba gagwe.

Re swanetše go nyaka dibaka tša go bona seatla sa Modimo maphelong a rena

5. Kgoši Ahaba yo kgopo o ile a gana go dumela’ng?

5 Ka morago, Kgoši Ahaba yo kgopo o ile a ba le sebaka sa go bona seatla sa Modimo ka makga a mmalwa. Eliya o ile a mmotša gore: “Go ka se ne phoka goba pula, ka ntle le ge nka ntšha taelo ya gore go be bjalo!” (1 Dikgoši 17:1) Se se kgonegile feela ka baka la seatla sa Modimo, eupša Ahaba o ile a gana go dumela seo. Ka morago, Eliya o ile a rapela Jehofa, gomme A mo araba ka go romela mollo o tšwago legodimong. Ahaba o ile a bona mohlolo woo. Ke moka, Eliya o ile a botša Ahaba gore Jehofa o tla fediša komelelo gomme a neša pula ya matlorotloro. (1 Dikgoši 18:22-45) Ahaba o ile a bona mehlolo ye ka moka eupša le lekgeng le a gana go dumela gore o bone matla a Jehofa. Re ithuta’ng mehlaleng ye? Re ithuta gore re swanetše go nyaka dibaka tša go bona seatla sa Modimo maphelong a rena.

BA ILE BA BONA SEATLA SA JEHOFA

6, 7. Bagibeoni le Rahaba ba ile ba bona’ng?

6 Bagibeoni ba be ba fapane kudu le ditšhaba tšeo di bego di ba dikologile. Ba ile ba bona seatla sa Modimo. Go e na le gore Bagibeoni ba lwe le Baisiraele, ba be ba nyaka go dira khutšo le bona. Ka baka la’ng? Ba boletše gore ke ka gobane ba kwele ka Jehofa le dilo tšohle tšeo a di dirilego. (Joshua 9:3, 9, 10) Ka bohlale ba ile ba lemoga gore Jehofa o be a lwela Baisiraele.

7 Rahaba le yena o ile a bona seatla sa Jehofa.  E be e se Moisiraele, eupša o be a kwele kamoo Jehofa a ilego a lokolla setšhaba sa gagwe Egipita. Ge dihlodi tše pedi tša Baisiraele di be di tlile go yena, o ile a di botša gore: “Ke a tseba gore Jehofa o tlo le nea naga ye.” Rahaba o be a dumela gore Jehofa a ka phološa yena le lapa la gabo. O ile a bontšha tumelo go Jehofa gaešita le ge a be a tseba gore go dira bjalo go be go le kotsi.—Joshua 2:9-13; 4:23, 24.

8. Baisiraele ba bangwe ba ile ba bona bjang seatla sa Modimo?

8 Ka go se swane le Kgoši Ahaba yo kgopo, ba bangwe ba Baisiraele bao ba ilego ba bona mollo o theoga legodimong e le ge Modimo a araba thapelo ya Eliya, ba ile ba bona gore Modimo ke yena a rometšego mollo woo. Ba ile ba goeletša ka gore: “Jehofa ke Modimo wa therešo!” (1 Dikgoši 18:39) Ba be ba tloga ba kgodišegile gore ba bone matla a Modimo.

9. Lehono re ka bona bjang Jehofa le seatla sa gagwe?

9 Re ahlaahlile mehlala e mebotse le e mebe yeo e re thušago go kwešiša seo se bolelwago ke go “bona Modimo” goba go bona seatla sa Modimo. Ge re dutše re tseba Jehofa le dika tša gagwe, re bona seatla sa gagwe ka ‘mahlo a dipelo tša rena.’ (Baefeso 1:18) Se se re tutueletša go ekiša batho ba botegago ba mehleng ya bogologolo le ba lehono bao ba bonego kamoo Jehofa a thušitšego batho ba gagwe. Eupša na re na le bohlatse bja gore Modimo o thuša batho ba gagwe lehono?

BOHLATSE BJA GORE SEATLA SA MODIMO SE A RE THUŠA LEHONO

10. Re na le bohlatse bofe bja gore Jehofa o thuša batho lehono? (Bona seswantšho seo se lego mathomong a sehlogo.)

10 Re na le bohlatse bjo bontši bja gore Jehofa  o tšwela pele a thuša batho lehono. Re fela re ekwa ka diphihlelo tša batho bao ba ilego ba rapela Modimo gore a ba thuše gomme dithapelo tša bona tša arabja. (Psalme 53:2) Ka mohlala, ge Allan a be a le modirong wa boboledi sehlakahlakeng se senyenyane sa kua Philippines, o ile a kopana le mosadi yo a itšego yo a ilego a thoma go lla. Allan o re: “Mesong yona yeo, mosadi yo o ile a rapela Jehofa gore Dihlatse tša gagwe di mo etele.” Mosadi yo o kile a ithuta Beibele le Dihlatse ge e be e sa le mofsa, eupša ka morago ga go nyalwa le go hudugela sehlakahlakeng se, thuto e ile ya kgaotša. Modimo o ile a araba thapelo ya gagwe kapela kudu moo a ilego a kgomega pelo. Pele ngwaga o fela, o ile a ineela go Jehofa.

Na o nyaka ditsela tšeo o ka bonago seatla sa Jehofa bophelong bja gago? (Bona dirapa 11-13)

11, 12. (a) Jehofa o thuša bjang bahlanka ba gagwe? (b) Hlalosa kamoo Jehofa a ilego a thuša kgaetšedi yo a itšego.

11 Bahlanka ba Jehofa ba bantši ba ile ba bona kamoo seatla sa gagwe se ilego sa ba thuša ka gona ge ba be ba lahla mekgwa e mebe e bjalo ka go kgoga, go diriša dihlaretagi gampe goba go bogela diswantšho tša batho bao ba sa aparago. Ba bangwe ba re ba kile ba leka go lahla mekgwa ye ka bobona eupša ba palelwa. Lega go le bjalo, ka morago ga go kgopela Jehofa gore a ba thuše, o ile a ba nea “matla a fetago a tlwaelegilego,” gomme mafelelong ba kgona go lahla mekgwa ya bona e mebe.—2 Bakorinthe 4:7; Psalme 37:23, 24.

Jehofa o thuša bahlanka ba gagwe go kgotlelela mathata

12 Le gona Jehofa o thuša bahlanka ba gagwe go kgotlelela mathata. Se se diragaletše Amy. O be a neilwe kabelo ya go thuša ka go aga Holo ya Mmušo le legae la baromiwa sehlakahlakeng se senyenyane Lewatleng la Pacific. Setšo sa moo se be se fapane kudu le sa gabo, go be go dula go se na mohlagase goba meetse, diterata di dula di tletše meetse, a hlologela ba gabo e bile a dula ka phapošing e nyenyane hoteleng. Ka letšatši le lengwe, o ile a kgadimola kgaetšedi yo a bego a šoma le yena. O ile a itshola kudu ka seo a se dirilego. Ge a boela phapošing ya gagwe ya leswiswi, o ile a rapela Jehofa gomme a mo kgopela thušo. Ke moka ge mohlagase o boa, o ile a bala sehlogo se itšego ka Morokaming seo se bego se bolela ka go aloga sekolong sa Gilead. Sehlogo seo se be se bolela ka mathata a go swana le ao a bego a lebeletšane le ona. O re: “Bošegong bjoo ke ile ka ikwa eka Jehofa o bolela le nna. Sehlogo seo se ile sa nnea matla a go tšwela pele kabelong ya ka.”—Psalme 44:25, 26; Jesaya 41:10, 13.

13. Re na le bohlatse bofe bja gore Jehofa o thušitše batho ba gagwe go lwela tshwanelo ya go bolela ditaba tše dibotse?

13 Jehofa gape o thušitše batho ba gagwe go lwela le go thea ditaba tše dibotse ka molao. (Bafilipi 1:7) Ka mohlala, ge mebušo e mengwe e be e leka go thibela modiro wa boboledi, re ile ra itwela dikgorong tša tsheko. Re šetše re fentše melato e ka bago e 268 dikgorong tše di phagamego tša tsheko lefaseng ka bophara, moo e 24 ya melato yeo re e fentšego Kgorong ya Yuropa ya Ditshwanelo tša Batho ga e sa le go tloga ka ngwaga wa 2000. Go molaleng gore ga go na motho yo a ka thibelago seatla sa Modimo!—Jesaya 54:17; bala Jesaya 59:1.

14. Re na le bohlatse bofe bjo bongwe bja gore Modimo o thuša batho ba gagwe?

 14 Taba ya gore ditaba tše dibotse di bolelwa lefaseng ka bophara ke bohlatse bjo bongwe bja gore seatla sa Modimo se a re thuša. (Mateo 24:14; Ditiro 1:8) Le gona botee bjo bo lego gona gare ga bahlanka ba Jehofa bao ba tšwago ditšhabeng ka moka bo kgonega feela ka thušo ya Jehofa. Ga go na batho bao ba nago le botee go swana le rena! Gaešita le batho bao ba sa hlankelego Jehofa ba dumela ka gore: “Ruri Modimo o gare ga lena.” (1 Bakorinthe 14:25) Re na le bohlatse bjo bontši bja gore Modimo o thuša batho ba gagwe. (Bala Jesaya 66:14.) Go thwe’ng ka wena? Na o bona kamoo seatla sa Jehofa se go thušago ka gona bophelong bja gago?

NA O BONA SEATLA SA JEHOFA SE GO THUŠA BOPHELONG BJA GAGO?

15. Ke ka baka la’ng ka dinako tše dingwe re ka no se bone seatla sa Jehofa se re thuša maphelong a rena?

15 Ka dinako tše dingwe, re ka no se bone seatla sa Modimo se re thuša maphelong a rena. Ka baka la’ng? Ka gobane ge re na le mathata a mantši, re ka lebala gore Jehofa o kile a re thuša ka makga a mantši nakong e fetilego. Se se ile sa diragalela Eliya. O be a na le sebete, eupša ge Mohumagadi Isebele a be a nyaka go mmolaya, o ile a boifa. Ka nakwana, o ile a lebala kamoo Jehofa a ilego a mo thuša ka gona dinakong tše di fetilego. Beibele e re Eliya o be a nyaka le go hwa. (1 Dikgoši 19:1-4) O be a ka hwetša kae thušo le sebete? O be a swanetše go ithekga ka Jehofa!—1 Dikgoši 19:14-18.

16. Re ka thušwa ke’ng go bona Modimo ge re na le mathata?

16 Jobo o kile a tshwenyega kudu ka mathata a gagwe moo a ilego a se bone boemo bja gagwe go etša Jehofa. (Jobo 42:3-6) Ka dinako tše dingwe, le rena re ka thatafalelwa ke go bona Modimo ka baka la mathata a rena. Ke’ng seo se ka re thušago go bona seo Modimo a re direlago sona? Re swanetše go  naganišiša ka seo Beibele e se bolelago ka mathata a rena. Ke moka, Jehofa e tla ba wa kgonthe kudu go rena, gomme le rena re tla kgona gore: “Ke kwele ka wena ka mabarebare, eupša bjale leihlo la ka le a go bona.”

Na Jehofa o go diriša go thuša ba bangwe gore ba mmone? (Bona serapa 17 le 18)

17, 18. (a) O ka thušwa ke’ng go bona seatla sa Jehofa bophelong bja gago? (b) Anega phihlelo yeo e bontšhago kamoo Modimo a re thušago ka gona lehono.

17 O ka bona bjang seatla sa Jehofa bophelong bja gago? Anke re ahlaahleng mehlala e mehlano. Sa pele, o ka bona gore Jehofa o go thušitše go hwetša therešo. Sa bobedi, o ka gopola o be o le dibokeng tša Bokriste gomme wa kwa polelo e itšego, ke moka wa re: “Se ke sona seo ke bego ke se hloka!” Sa boraro, mohlomongwe o bone kamoo Jehofa a ilego a araba e nngwe ya dithapelo tša gago. Sa bone, mohlomongwe o be o nyaka go hlankela Jehofa ka mo go oketšegilego gomme wa bona kamoo a go thušitšego go fihlelela pakane yeo. Sa bohlano, mohlomongwe o ile wa tlogela mošomo ka gobane o be o go jela nako ya go hlankela Jehofa gomme wa bona Modimo a phethagatša kholofetšo ya gagwe yeo e rego: ‘Le ka mohla nka se ke ka go lahla.’ (Baheberu 13:5) Ge re na le tswalano e botse le Jehofa, go ka ba bonolo gore re bone seatla sa gagwe maphelong a rena.

18 Kgaetšedi yo mongwe wa kua Kenya yo a bitšwago Sarah, o re: “Ke ile ka botša Jehofa ka morutwana wa ka wa Beibele yo a bego a goga maoto ge re swanetše go bala. Ke ile ka botšiša Jehofa ge e ba ke swanetše go tlogela go mmadiša. Gateetee ge ke fetša gore ‘Amene,’ founo ya ka e ile ya lla. E be e le morutwana yoo a nyaka go tseba ge e ba a ka ya le nna dibokeng! Ke ile ka šala ke maketše!” Ge e ba re naganišiša ka dilo tšeo Modimo a re direlago tšona, re tla bona gore seatla sa gagwe se a re thuša. Rhonna, e lego kgaetšedi yo a dulago kua Asia, o re go tšea nako gore re bone kamoo Jehofa a re thušago ka gona maphelong a rena. O oketša ka gore: “Gateetee ge o dirile seo, o tla makatšwa ke go bona kamoo a tlogago a na le taba le rena!”

19. Ke selo sefe se sengwe seo re swanetšego go se dira gore re bone Modimo?

19 Jesu o itše bao ba tlago go “bona Modimo” ba swanetše go ‘seka pelong.’ (Mateo 5:8) Seo se ra go re’ng? Se ra gore re dule re nagana dilo tše di sekilego gomme re tlogele go dira selo le ge e le sefe seo se fošagetšego. (Bala 2 Bakorinthe 4:2.) Sehlogong se, re ithutile gore ge re nyaka go bona Modimo, re swanetše go dula re matlafatša tswalano ya rena le yena. Sehlogong se se latelago, re tlo ahlaahla kamoo tumelo e ka re thušago go bona seatla sa Jehofa gabotse maphelong a rena.