Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2015

Jehofa o re Bontšha Lerato ka Ditsela Dife?

Jehofa o re Bontšha Lerato ka Ditsela Dife?

“Bonang mohuta wa lerato le Tate a re bontšhitšego lona!”—1 JOHANE 3:1.

DIKOPELO: 91, 13

1. Moapostola Johane o re kgothaleditše go naganišiša ka’ng, gona ka baka la’ng?

MOAPOSTOLA JOHANE o re kgothaleditše gore re naganišiše ka mo go tseneletšego ka lerato leo Jehofa a re ratago ka lona. Go 1 Johane 3:1, re bala gore: “Bonang mohuta wa lerato le Tate a re bontšhitšego lona!” Ge re naganišiša kamoo Jehofa a re ratago kudu ka gona le kamoo a re bontšhago lerato ka gona, re kgona go batamela kgauswi kudu le yena e bile re mo rata le go feta.

2. Ke ka baka la’ng ba bangwe ba thatafalelwa ke go kwešiša gore Modimo o a ba rata?

2 Ka manyami, ba bangwe ga ba nagane gore Jehofa a ka ba rata. Ba nagana gore Modimo ga a na taba le batho. Ba ka ba ba dumela gore Modimo o fo dira melao le go otla bao ba sa mo kwego. Ka baka la dithuto tša maaka, ba bangwe ba bile ba nagana gore Modimo o sehlogo le gore ga go kgonege gore  re mo rate. Ba bangwe ba nagana gore Modimo o rata batho ka moka go sa šetšwe seo ba se dirago. Eupša go ithuta Beibele go go thušitše gore o tsebe therešo ka Jehofa. O a tseba gore lerato ke seka sa gagwe se segologolo le gore o go neile Morwa wa gagwe gore a go hwele. (Johane 3:16; 1 Johane 4:8) Lega go le bjalo, ka baka la dilo tšeo di go hlagetšego bophelong, go ka ba thata gore o kwešiše kamoo Jehofa a go ratago ka gona.

3. Ke’ng seo se tlago go re thuša go kwešiša gore Jehofa o a re rata?

3 E le gore re kwešiše gore Jehofa o a re rata, sa pele re swanetše go tseba gore Jehofa ke yena a re bopilego. O re file bophelo. (Bala Psalme 100:3-5.) Ke ka baka leo Beibele e hlalosago motho wa pele e le “morwa wa Modimo.” (Luka 3:38) Le gona Jesu o re rutile gore re bitše Jehofa gore ke “Tatago rena wa magodimong.” (Mateo 6:9) Ka gona Jehofa ke Tatago rena, e bile o re rata ka tsela yeo tate yo lerato a ratago bana ba gagwe.

4. (a) Jehofa ke Tate wa mohuta mang? (b) Re tlo ahlaahla’ng sehlogong se le go se se latelago?

4 Batho ba bangwe ba thatafalelwa ke go nagana gore tate e ka ba motho yo a nago le lerato. Ba ka ba ba godišitšwe ke botate bao ba bego ba ba swara gampe. Jehofa a ka se tsoge a dirile seo go bana ba gagwe. Ga go na Tate yo a swanago le yena. (Psalme 27:10) O re rata kudu e bile o re hlokomela ka ditsela tše dintši. Ge re bona tsela yeo Jehofa a re ratago ka yona, ke moo re tlago go mo rata le go feta. (Jakobo 4:8) Sehlogong se, re tlo ahlaahla ditsela tše nne tšeo Jehofa a re ratago ka tšona. Sehlogong se se latelago, re tlo bona ditsela tše nne tšeo re ka bontšhago ka tšona gore re a mo rata.

JEHOFA O A RE RATA E BILE O A RE HLOKOMELA

5. Modimo o nea batho ka moka eng?

5 Ge moapostola Paulo a be a le Athene, kua Gerika, o ile a bona medingwana e mentši le go lemoga gore batho ba moo ba be ba dumela gore medingwana yeo ke yona e ba neago bophelo. Ka gona o ile a ba botša ka “Modimo yo a dirilego lefase le dilo ka moka tše di lego go lona.” O itše Modimo “o nea batho ka moka bophelo le mohemo le dilo ka moka” le gore “ka yena re na le bophelo, re a sepela e bile re gona.” (Ditiro 17:24, 25, 28) Jehofa o re nea selo se sengwe le se sengwe seo re se hlokago gore re phele le go thabela bophelo. Nagana ka tše dingwe tša dilo tšeo a re filego tšona ka baka la ge a re rata.

6. Jehofa o re neile legae la mohuta mang? (Bona seswantšho seo se lego mathomong a sehlogo.)

6 Ka mohlala, Jehofa o re neile legae le lebotse. (Psalme 115:15, 16) Go dipolanete ka moka tšeo a di bopilego, lefase le bonagala e le la moswananoši. Borathutamahlale ba sepetše dipolanete tše dintši, eupša ga se ba hlwa ba hwetša polanete e nngwe yeo e nago le dilo ka moka tšeo batho ba di hlokago gore ba phele. Ga se feela gore Jehofa o re neile dilo ka moka tšeo re di hlokago gore re phele, eupša gape o dirile gore lefase e be le lebotse, le šireletšege e bile re thabele go phela go lona. (Jesaya 45:18) Ge re nagana ka legae le leo Tatago rena e lego Jehofa a re neilego lona, re tloga re bona kamoo a re ratago ka gona.—Bala Jobo 38:4, 7; Psalme 8:3-5.

7. Tsela yeo Jehofa a re bopilego ka yona e bontšha bjang gore o re rata kudu?

 7 Tsela e nngwe yeo Jehofa a re bontšhitšego lerato ka yona ke ka go re bopa re na le bokgoni bja go mo ekiša. (Genesi 1:27) Se se bolela gore re ka kgona go bona tsela yeo a re ratago ka yona gomme le rena ra mo rata. O a tseba gore seo ke sona se tlogago se re thabiša. Re a tseba gore bana ba thaba kudu ge ba bona gore batswadi ba bona ba a ba rata. Le gona gopola gore Jesu o re rutile gore re tla thaba ge e ba re na le tswalano ya kgauswi le Tatago rena e lego Jehofa. (Mateo 5:3) Jehofa o re nea “dilo tšohle tšeo re di thabelago.” Go molaleng gore o a re hlokomela e bile o re rata kudu.—1 Timotheo 6:17; Psalme 145:16.

JEHOFA O RE RUTA THEREŠO

8. Ke ka baka la’ng re nyaka go rutwa ke Jehofa?

8 Botate ba rata bana ba bona e bile ga ba nyake gore ba lahletšwe goba ba forwe.  Eupša batswadi ba bantši lehono ga ba na taba le seo Beibele e rego se lokile goba se fošagetše. Ka gona ga ba kgone go hlahla bana ba bona, e lego seo gantši se feleletšago ka manyami le kgakanego. (Diema 14:12) Lega go le bjalo, Jehofa o nea bana ba gagwe tlhahlo e di phalago tšohle ka gobane ke “Modimo wa therešo.” (Psalme 31:5) O thabela go re ruta therešo ka yena. Le gona o re ruta kamoo re ka mo hlankelago ka gona e bile o re bontšha tsela e di phalago tšohle ya go phela. (Bala Psalme 43:3.) Ka gona, ke’ng seo Jehofa a re rutilego sona seo se bontšhago kamoo a re ratago ka gona?

Botate ba Bakriste ba ekiša Jehofa ka go ruta bana ba bona therešo le go ba thuša gore ba be le tswalano e botse le Tatago bona wa legodimong (Bona dirapa 8-10)

9, 10. (a) Ke ka baka la’ng Jehofa a re botša ka yena? (b) Jehofa o re ruta gore morero wa gagwe ka rena ke ofe?

9 Sa pele, Jehofa o re botša ka yena. O nyaka gore re mo tsebe. (Jakobo 4:8) Ka gona o re botša leina la gagwe. Ge e le gabotse, ka Beibeleng leina la gagwe le tšwelela ka makga a mantši go feta leina le ge e le lefe. Le gona Jehofa o re botša gore ke Modimo wa mohuta mang. Ge re lebelela dilo tše a di bopilego, re ithuta gore o na le matla le bohlale. (Baroma 1:20) E bile ge re bala Beibele, re ithuta gore o na le tekatekano le gore o re rata kudu. Ge re dutše re tseba semelo se sebotse sa Jehofa, re ikwa re le kgauswi kudu le yena.

Ge re dutše re tseba semelo se sebotse sa Jehofa, re ikwa re le kgauswi kudu le yena

10 Jehofa o re ruta le ka morero wa gagwe. O re botša gore re karolo ya lapa la gagwe. Le gona o re hlalosetša seo a se letetšego go rena gore re kgone go dirišana ka botee le ka khutšo le ditho ka moka tša lapa la gagwe. Beibele e bolela ka mo go kwagalago gore Modimo ga se a re bopa re na le tshwanelo ya go itirela phetho ya se se lokilego le se se fošagetšego. (Jeremia 10:23) Jehofa o tseba se se tlago go re hola. Ke feela ge re ka amogela bolaodi bja gagwe le go mo kwa moo re ka phelago ka khutšo le go kgotsofala. Jehofa o re rutile therešo ye ya bohlokwa ka gobane o a re rata.

11. Tatago rena yo lerato o re boditše’ng ka bokamoso?

11 Tate yo lerato o nagana ka mo go tseneletšego ka bokamoso bja bana ba gagwe. O ba kganyogela tše dibotse bophelong. Ka manyami, batho ba bantši lehono ba tshwenyegile ka bokamoso, e bile ba bantši ba senya maphelo a bona ba šomela dilo tšeo di ka se felelego felo. (Psalme 90:10) Ruri re leboga gore Tatago rena e lego Jehofa, ga se a fo re ruta go phela bophelo bjo bo kgotsofatšago gona bjale, eupša o re holofeditše le bokamoso bjo bo kgahlišago!

JEHOFA O HLAHLA BANA BA GAGWE LE GO BA LAYA

12. Jehofa o ile a leka bjang go thuša Kaine le Baruke?

12 Ge Jehofa a be a bona gore Kaine o kgauswi le go dira sebe, o ile a leka go mo thuša ka go mmotšiša gore: “O re’ng o tuka bogale e bile sefahlego sa gago se bontšha manyami? Na nka se go phagamiše ge o ka fetoga wa dira botse?” (Genesi 4:6, 7) Kaine o ile a gana thušo ya Jehofa, gomme a welwa ke ditlamorago tše bohloko. (Genesi 4: 11-13) Lebakeng le lengwe, Jehofa o ile a lemoga gore pono ya Baruke e fošagetšego e be e mo dira gore a ikwe a lapile le go nyama. Ka gona Jehofa o ile a botša Baruke gore seo a se naganago se fošagetše le gore o swanetše go fetoga. Baruke o ile a theetša keletšo ya Jehofa gomme ya phološa bophelo bja gagwe.—Jeremia 45:2-5.

13. Bahlanka ba botegago ba Jehofa ba ile ba ithuta’ng ditekong tša bona?

13 Jehofa o a re hlahla le go re laya ka gobane a re rata. Ga a tshwenyege feela ka go re phošolla, eupša e bile o a re tlwaetša. (Baheberu 12:6) Ka Beibeleng, re bala ka bahlanka ba botegago bao Jehofa a ilego a ba tlwaetša gore e be batho ba bakaone. Ka mohlala, Josefa, Moshe le Dafida ba ile ba lebeletšana le maemo a thata kudu. Dinakong tše bjalo, Jehofa o be a ba thekga. Le gona dilo tše ba ithutilego tšona ditekong tšeo, ka morago di ile tša ba thuša ge Jehofa a be a ba nea maikarabelo a magolo. Ge re bala Beibele gomme re ekwa kamoo Jehofa a thekgago batho ba gagwe le go ba tlwaetša, re a bona gore Jehofa o tloga a re rata.—Bala Diema 3:11, 12.

14. Ge e ba re dirile selo se se fošagetšego, Jehofa o re bontšha bjang lerato?

14 Gaešita le ge re dirile selo se se fošagetšego, Jehofa o tšwela pele a re bontšha lerato. Ge e ba re amogela tayo ya gagwe gomme re itshola, o tla re lebalela “kudu.” (Jesaya 55:7) Seo se bolela’ng? Mantšu a Dafida a mabapi le go lebalela ga Jehofa a re bontšha gore ruri re na le Tate yo a gaugelago. O itše: “Yena yo a go lebalelago melato ya gago ka moka, yo a fodišago malwetši a gago ka moka, yo a lopollago bophelo bja gago moleteng, yo a go rwešago botho le dikgaugelo hlogong. Go etša ge bohlabela bo le kgole le bodikela, le dikarogo tša rena o di lahletše kgole le rena ka tsela yeo.” (Psalme 103:3, 4, 12) Jehofa o re laya le go re hlahla ka ditsela tše di fapafapanego. Na o arabela kapela ge a go hlahla goba a go laya? Dula o gopola gore Jehofa o re laya ka gobane a re rata.—Psalme 30:5.

JEHOFA O A RE ŠIRELETŠA

15. Ke tsela efe e nngwe yeo Jehofa a re bontšhago gore o a re rata?

15 Tate yo lerato o šireletša lapa la gagwe kotsing. Tatago rena e lego Jehofa le yena o dira sona seo. Mopsalme o boletše ka Jehofa gore: “O šireletša meoya ya bao ba mmotegelago; o ba hlakodiša seatleng sa ba kgopo.” (Psalme 97:10) Nagana ka se: Go no swana le ge o šireletša mahlo a gago kapejana ka ge a le bohlokwa kudu go wena, Jehofa le yena o šireletša batho ba gagwe kapejana ka ge ba le bohlokwa kudu go yena.—Bala Sakaria 2:8.

Jehofa o šireletša batho ba gagwe kapejana ka ge ba le bohlokwa kudu go yena

16, 17. Jehofa o šireleditše bjang batho ba gagwe nakong e fetilego le mehleng yeno?

16 Tsela e nngwe yeo Jehofa a bego a šireletša batho ba gagwe ba nakong e fetilego ke ka go diriša barongwa. Le lehono o sa dira bjalo. (Psalme 91:11) Morongwa o tee o ile a bolaya mašole a Baasiria a 185 000 ka  bošego bjo tee gomme a phološa batho ba Modimo. (2 Dikgoši 19:35) Lekgolong la pele la nywaga, barongwa ba ile ba hlakodiša Petro, Paulo le ba bangwe kgolegong. (Ditiro 5:18-20; 12:6-11) Morago bjale, go ile gwa ba le ntwa e sehlogo nageng e nngwe Afrika. Nageng yeo go ile gwa ba le tlhakatlhakano ka baka la dintwa, go utswa, go kata le dipolao. Le ge go se na le o tee wa bana babo rena yo a ilego a hwa, ba bantši ba ile ba loba dilo tša bona ka moka. Eupša ka moka ba ile ba bona gore Jehofa o a ba rata le gore o be a ba hlokomela. Le ge ba be ba tlaišega, ba be ba thabile. Ge moemedi wa ntlongkgolo a be a etetše nageng yeo gomme a botšiša bana babo rena le dikgaetšedi gore ba tsoga bjang, ba ile ba re: “Dilo ka moka di sepela gabotse, re leboga Jehofa!”

17 Ke therešo gore ba bangwe ba bahlanka ba Jehofa, ba bjalo ka morutiwa Stefano le ba bangwe ba go swana le yena, ba ile ba bolawa ka gobane ba botegela Modimo. Ga se ka mehla Jehofa a thibelago seo go direga. Eupša o šireletša batho ba gagwe e le sehlopha ka go ba lemoša ka ditsela tše difapafapanego tšeo Sathane a lekago go re tanya ka tšona. (Baefeso 6:10-12) Re hwetša ditemošo tše ka Beibeleng le ka dikgatišong tšeo di tšwago mokgatlong wa Jehofa. Ka mohlala, re rutwa ka dikotsi tša Inthanete, go rata tšhelete, dimobi, dipuku goba dipapadi tša khomphutha tše di gobogilego le tša bošoro. Ruri Jehofa o a re rata e bile o nyaka go re šireletša.

TOKELO E KGOLO KUDU

18. O ikwa bjang ka go tseba gore Jehofa o a go rata?

18 Ge Moshe a be a nagana ka nywaga ka moka yeo a hlanketšego Jehofa ka yona, o ile a kgodišega gore Jehofa o be a mo rata. Moshe o itše: “Mesong o re kgotsofatše ka botho bja gago, gore re goelele ka lethabo re be re thabe matšatšing ohle a rena.” (Psalme 90:14) Re šegofaditšwe ka gobane re kwešiša lerato la Jehofa le kamoo a re ratago ka gona. Ruri ke tokelo e kgolo go ratwa ke Jehofa! Re ikwa go swana le moapostola Johane, yo a itšego: “Bonang mohuta wa lerato le Tate a re bontšhitšego lona!”—1 Johane 3:1.