Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2015

Re ka Bontšha Bjang Gore re Rata Jehofa?

Re ka Bontšha Bjang Gore re Rata Jehofa?

“Re na le lerato gobane o re ratile pele.”1 JOHANE 4:19.

DIKOPELO: 56, 138

1, 2. Jehofa o re rutile bjang gore re mo rate?

TSELA e botse kudu yeo tate a ka rutago bana ba gagwe ka yona ke ka mohlala wa gagwe. Ge a bontšha bana ba gagwe lerato, o ba ruta kamoo ba ka ratago ba bangwe. Ga go na motho yo a re ratago kudu go swana le Tatago rena e lego Jehofa. Ka gona re ithuta kamoo re ka ratago ba bangwe ka “gobane o re ratile pele.”—1 Johane 4:19.

2 Jehofa o bontšhitše ka tsela efe gore “o re ratile pele”? Beibele e re: “Ge re be re sa le badiradibe Kriste o ile a re hwela.” (Baroma 5:8) Tatago rena yo lerato e lego Jehofa o re neile Morwa wa gagwe e le topollo go re phološa sebeng le lehung. Mpho ye ya bohlokwa e dirile gore re kgone go batamela kgauswi le Jehofa le go mmontšha gore re a mo rata. Jehofa o re beetše mohlala ka go ikgafa kudu gomme a re nea mpho yeo e kgolo. O re rutile gore re swanetše go rata ba bangwe ka go hloka boithati le go ba le seatla se se bulegilego.—1 Johane 4:10.

3, 4. Re bontšha bjang gore re rata Modimo?

3 Lerato ke seka se segolo sa Jehofa. Ka gona re ka kwešiša  lebaka leo Jesu a ilego a re molao o bohlokwa kudu ke wo o rego: “O rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Mareka 12:30) Jehofa o nyaka gore re mo rate ka ‘dipelo tša rena ka moka.’ Jehofa o tla kwa bohloko ge re ka rata motho yo mongwe goba selo se itšego go feta yena. Eupša ga se ra swanela go no bolela gore re a mo rata. Jehofa gape o letetše gore re mo rate ka ‘menagano ya rena ka moka’ le ka ‘matla a rena ka moka.’ Se se bolela gore go rata ga rena Jehofa go akaretša tsela yeo re naganago ka yona le seo re se dirago.—Bala Mika 6:8.

4 Ka gona re swanetše go rata Jehofa ka sohle seo re lego sona le sohle seo re nago le sona. Ka go mo etiša pele maphelong a rena, re mmontšha gore re tloga re mo rata. Sehlogong se se fetilego, re ahlaahlile ditsela tše nne tšeo ka tšona Jehofa a bontšhago gore o tloga a rata bana ba gagwe. Anke ga bjale re boneng kamoo re ka matlafatšago tsela yeo re ratago Jehofa ka yona le go bontšha gore re mo rata kudu.

BONTŠHA JEHOFA GORE O A LEBOGA

5. Ge re nagana ka dilo ka moka tšeo Jehofa a re diretšego tšona, ke’ng seo re nyakago go se dira?

5 Ge motho a go fa mpho, gantši o mmontšha gore o a mo leboga. Le gona ka ge o tšeela godimo mpho yeo, o a e diriša. Jakobo o ngwadile gore: “Mpho e nngwe le e nngwe e botse le neo e nngwe le e nngwe e phethagetšego e tšwa godimo, e theoga e etšwa go Tate wa dietša tša legodimo yo a sa fetofetogego goba a fetoga go etša meriti yeo e šuthago.” (Jakobo 1:17) Re leboga kudu gore Jehofa o re fa selo se sengwe le se sengwe seo re se hlokago gore re phele le go thaba. Re lemoga kamoo a re ratago ka gona, gomme re nyaka go mmontšha gore le rena re a mo rata. Na ke seo o nyakago go se dira?

6. Baisiraele ba be ba swanetše go dira’ng ge ba be ba nyaka gore Jehofa a tšwele pele a ba šegofatša?

6 Baisiraele ba ile ba amogela dilo tše dintši tše dibotse go Jehofa. Ka nywaga e makgolo, o ile a ba hlahla ka melao ya gagwe gomme a ba nea selo se sengwe le se sengwe seo ba bego ba se hloka. (Doiteronomio 4:7, 8) Ka gona Baisiraele ba be ba ka bontšha gore ba leboga Jehofa ka go kwa melao yeo. Ka mohlala, ge ba be ba direla Jehofa dihlabelo, ba be ba swanetše go mo nea “dithakangwaga tše dibotsebotse” tša naga. (Ekisodo 23:19) Baisiraele ba be ba tseba gore Jehofa o be a tla tšwela pele a ba šegofatša ge ba be ba ka mo kwa le go mo fa dilo tša bona tše dibotsebotse.—Bala Doiteronomio 8:7-11.

7. Re ka diriša bjang ‘dilo tša rena tše bohlokwa’ go bontšha Jehofa gore re a mo rata?

7 Le rena re ka bontšha Jehofa gore re a mo rata ka go mo nea ‘dilo tša rena tše bohlokwa.’ (Diema 3:9) Re dira se ka go diriša seo re nago le sona go mo tumiša. Ka mohlala, re ka ntšha moneelo bakeng sa go thekga modiro wa Mmušo diphuthegong tša gabo rena le lefaseng ka moka. Go sa šetšwe gore re humile goba ga re na selo, ka moka ga rena re ka diriša seo re nago le sona go bontšha gore re rata Jehofa. (2 Bakorinthe 8:12) Eupša go na le ditsela tše dingwe tšeo ka tšona re ka bontšhago Jehofa gore re a mo rata.

Ge re bota Jehofa kudu, ke moo re mmontšhago le go feta gore re a mo rata

8, 9. Ke tsela efe e nngwe yeo re bontšhago Jehofa gore re a mo rata? Mike le lapa la gagwe ba ile ba dira’ng?

 8 Jesu o re rutile gore re tšwele pele re tsoma Mmušo pele gomme re se belaele ka dijo le ka diaparo. Tatago rena o re holofeditše gore o tla re fa seo re se hlokago. (Mateo 6:31-33) Re bota Jehofa e bile re a tseba gore o tla phethagatša seo a re holofeditšego sona. Re a tseba gore ge re rata motho kudu, re a mmota. Ge e le gabotse, ge re bota Jehofa kudu, ke moo re mmontšhago le go feta gore re a mo rata. (Psalme 143:8) Ka gona re ka ipotšiša gore: ‘Na dipakane tša ka le tsela yeo ke dirišago nako le matla a ka di bontšha gore ke tloga ke rata Jehofa? Na ke ithekga ka Jehofa letšatši le letšatši gore o tla hlokomela dinyakwa tša ka?’

9 Mike le lapa la gagwe ba ile ba bota Jehofa. Ge Mike e be e sa le yo monyenyane, o ile a ipeela pakane ya gore ka letšatši le lengwe o tla ya go bolela ditaba tše dibotse nageng e šele. Gaešita le ka morago ga gore a nyale le go ba le bana ba babedi, o be a sa na le kganyogo yeo. Ge Mike le lapa la gagwe ba bala ka bana babo rena le dikgaetšedi bao ba hlankelago moo go nyakegago bagoeledi ba oketšegilego, ba ile ba dira phetho ya go nolofatša maphelo a bona. Ba ile ba rekiša ntlo ya bona gomme ba hudugela lefelong le lenyenyane la bodulo. Le gona Mike o ile a fokotša palo ya batho bao a bego a ba hlwekišetša kgwebong ya gagwe ya go hlwekiša gomme a hwetša tsela ya go e hlokomela a le nageng e šele a diriša Inthanete. Ka go re’alo, Mike le lapa la gagwe ba ile ba kgona go hudugela nageng e šele gomme ba ile ba thabela bodiredi bja bona moo. Mike o itše: “Re bone go rereša ga mantšu a Jesu ao a begilwego go Mateo 6:33.”

NAGANIŠIŠA KA SEO JEHOFA A GO RUTAGO SONA

10. Go etša Kgoši Dafida, ke ka baka la’ng re swanetše go naganišiša ka seo re ithutago sona ka Jehofa?

10 Kgoši Dafida o kile a ngwala gore: “Magodimo a bolela ka letago la Modimo; gomme mediro ya diatla tša gagwe e tsebatšwa ke sebakabaka.” O okeditše ka gore: “Molao wa Jehofa o phethagetše, o tsošološa moya. Kgopotšo ya Jehofa e a botega, e dira gore yo a se nago temogo a be bohlale.” Ge Dafida a dutše a naganišiša ka melao e holago ya Jehofa le tlholo ya gagwe e botse, o ile a batamela kgauswi kudu le Jehofa gomme a nyaka go mmontšha gore o a mo rata. Dafida o itše: “Anke dipolelo tša molomo wa ka le tšeo pelo ya ka e di naganišišago e be tše di kgahlišago pele ga gago, wena Jehofa Leswika la ka le Molopolodi wa ka.”—Psalme 19:1, 7, 14.

11. Re ka diriša bjang tsebo yeo Jehofa a re fago yona go mmontšha gore re a mo rata? (Bona seswantšho seo se lego mathomong a sehlogo.)

11 Lehono, Jehofa o re ruta dilo tše dintši ka yena, ka morero wa gagwe, tlholo ya gagwe le ka Lentšu la gagwe. Lefase le kgothaletša batho go rutega, eupša thuto e phagamego gantši e ba dira gore ba se sa rata Modimo. Go fapana le seo, Jehofa ga a nyake feela gore re be le tsebo, eupša o re thuša le gore re be bohlale. O nyaka gore re diriše seo re ithutago sona go ikhola le go  hola ba bangwe. (Diema 4:5-7) Ka mohlala, o nyaka gore re rute ba bangwe ‘tsebo e nepagetšego ya therešo’ le go ba thuša gore ba tle ba phološwe. (1 Timotheo 2:4) Ge re botša batho ka Mmušo wa Modimo le seo o tlago go re direla sona, re bontšha gore re a ba rata le gore re rata Jehofa.—Bala Psalme 66:16, 17.

12. Kgaetšedi o mongwe wa mofsa o ile a re’ng ka mpho e tšwago go Jehofa?

12 Bafsa le bona ba ka naganišiša ka dilo ka moka tšeo Jehofa a ba neilego tšona le seo a ba rutilego sona. Shannon o sa gopola kamoo a ilego a ikwa ka gona kopanong ya selete yeo a ilego a ba go yona ge a be a sa na le nywaga e 11 gomme ngwanabo a na le nywaga e 10. Kopanong ye ya Selete yeo e bego e na le sehlogo se se rego, “Boineelo go Modimo,” bafsa ka moka, go akaretša Shannon le ngwanabo, ba ile ba kgopelwa go yo dula madulong a itšego. Mathomong, Shannon o be a tšhogile. Eupša o ile a makala ge bafsa ka moka ba be ba newa puku ya Dipotšišo tša Bafsa le Dikarabo tše Šomago. Mpho ye e botse e ile ya dira gore a ikwe bjang ka Jehofa? O re: “E bile letšatšing leo moo ke ilego ka lemoga gore Jehofa ke wa kgonthe le gore o nthata kudu. Re thaba kudu gore Jehofa Modimo wa rena yo mogolo, o re nea ka lerato dimpho tše dibotse tša go swana le puku ye!”

AMOGELA TAYO YA JEHOFA

13, 14. Re swanetše go arabela bjang ge Jehofa a re laya, gona ka baka la’ng?

13 Beibele e re gopotša ka gore: “Jehofa o  kgalema yo a mo ratago, go etša ge tate a kgalema morwa wa gagwe yo a mo ratago.” (Diema 3:12) Ge re amogela tayo ya Jehofa e bile re mo dumelela gore a re tlwaetše, re ithuta go dira seo se lokilego gomme re ba le khutšo. Ke therešo gore “ga go na tayo yeo mo nakong ye e bonagalago e thabiša, eupša e bohloko.” (Baheberu 12:11) Lega go le bjalo, re swanetše go arabela bjang ge Jehofa a re laya? Ga se ra swanela go hlokomologa keletšo ya Jehofa goba ra tšwela pele re kgopišegile ka gobane re sa rate seo re se boditšwego. Re rata Jehofa, ka gona re a mo theetša gomme ra dira diphetogo tšeo di nyakegago.

Ge re amogela tayo ya Jehofa ka go rata e bile re dira diphetogo gore re mo thabiše, re bontšha gore re tloga re mo rata

14 Mehleng ya Maleaki, Bajuda ba bantši ga se ba ka ba theetša Jehofa. Ba be ba sa iše felo ka taba ya gore dihlabelo tša bona ga di mo thabiše. Ka gona Jehofa o ile a ba nea keletšo e matla mabapi le se. (Bala Maleaki 1:12, 13.) Ge e le gabotse, Jehofa o ile a ba eletša gantšintši, eupša ba gana go theetša. Ka gona o ile a ba botša gore: “Ke tla le tlišetša thogako gomme ka fetola ditšhegofatšo tša lena thogako.” (Maleaki 2:1, 2) Go molaleng gore ge re ka tšwela pele re gana go kwa keletšo ya Jehofa goba ra e hlokomologa, o tla re lahla.

Nagana ka seo se thabišago Jehofa go e na le go nagana ka seo se ratwago ke lefase (Bona serapa 15)

15. Ke moya ofe wo re swanetšego go o phema?

15 Lefase la Sathane le kgothaletša batho gore ba ikgantšhe le gore ba be le boithati. Batho ba bantši ga ba rate go phošollwa goba go botšwa seo ba swanetšego go se dira. Ba bangwe ba theetša keletšo ka gobane ba se na kgetho. Ga se ra swanela go ba ka tsela yeo. Beibele e re re “[lese] go bopega ka sebopego sa tshepedišo ye ya dilo.” Go e na le moo, re swanetše go kwešiša seo Jehofa a se letetšego go rena gomme re dire seo se mo kgahlišago. (Baroma 12:2) O diriša mokgatlo wa gagwe go re nea keletšo ka nako e swanetšego. Ka mohlala, re gopotšwa ka tsela yeo re swanetšego go itshwara ka yona ge re na le batho ba bong bjo bo fapanego le bja rena, kamoo re ka kgethago bagwera le boitapološo. Ge re amogela tayo  ya Jehofa ka go rata e bile re dira diphetogo gore re mo thabiše, re bontšha gore re leboga tlhahlo ya gagwe le gore re tloga re mo rata.—Johane 14:31; Baroma 6:17.

ITHEKGE KA JEHOFA GORE A GO THUŠE LE GO GO ŠIRELETŠA

16, 17. (a) Ke ka baka la’ng re swanetše go tseba seo Jehofa a se naganago pele re dira diphetho? (b) Baisiraele ba ile ba dira’ng go e na le gore ba bote Jehofa?

16 Bana ba banyenyane ba ithekga ka batswadi ba bona gore ba ba thuše le go ba šireletša. Gaešita le ge ba godile ba ka kgopela thušo go batswadi ba bona. Ba a lemoga gore gaešita le ge ba ka itirela diphetho, batswadi ba bona ba ka ba nea keletšo e botse. Tatago rena e lego Jehofa, o re dumelela go itirela diphetho. Eupša ka ge re mmota le go mo rata kudu, re dula re kgopela thušo ya gagwe le go dira sohle seo re ka se kgonago go tseba gore o be a ka rata re dira phetho efe. Ge e ba re ithekga ka Jehofa, o tla re fa moya wa gagwe o mokgethwa gore o re thuše go dira se se lokilego.—Bafilipi 2:13.

17 Mehleng ya Samuele, Baisiraele ba ile ba fenywa ke Bafilisita ntweng. Go e na le gore ba botšiše Jehofa seo ba swanetšego go se dira, ba ile ba re: “A re tšeeng areka ya kgwerano ya Jehofa yeo e lego kua Shilo, e be go rena gore e tle e re phološe diatleng tša manaba a rena.” Mafelelo a phetho yeo e bile afe? “Go ile gwa bolawa batho ba bantši kudu mo banna ba Isiraele ba dikete tše masometharo (30 000) bao ba sepelago ka maoto ba ilego ba bolawa. [Go oketša moo], Areka ya Modimo ya thopša.” (1 Samuele 4:2-4, 10, 11) Baisiraele ba be ba nagana gore ge Areka e be e le go bona, Jehofa o be a tla ba thuša le go ba šireletša. Eupša ga se ba ka ba kgopela Jehofa gore a ba thuše goba go mmotšiša seo a se naganago. Go e na le moo, ba ile ba dira seo ba naganago gore se lokile, gomme ba welwa ke masetlapelo.—Bala Diema 14:12.

18. Beibele e re thuša bjang go bota Jehofa?

18 Mopsalme yo a bego a rata Jehofa kudu e bile a ithekgile ka yena o ngwadile gore: “Letela Modimo, gobane ke sa tlo mo reta e le mophološi wa ka o mogolo. Wena Modimo wa ka, moya wa ka o itlhobogile ka gare ga ka. Ke ka baka leo ke go gopolago.” (Psalme 42:5, 6) Na o dumelelana le mantšu ao? Na o ikwa o le kgauswi le Jehofa le go mmota? O ka kgona go ithuta go mmota ka mo go oketšegilego. Beibele e re botša gore: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago.”—Diema 3:5, 6.

19. O tlo bontšha Jehofa bjang gore o a mo rata?

19 Ka ge a re ratile pele, Jehofa o re rutile kamoo re ka mo ratago ka gona. Anke ka mehla re naganeng ka dilo tše dintši tšeo a re diretšego tšona le kamoo a re ratago ka gona. Le gona, eka re ka mmontšha gore re mo rata ka pelo ka moka, moya ka moka, monagano ka moka le ka matla ka moka.—Mareka 12:30.