Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) AUGUST 2015

Itokišeletše Gona Bjale go tlo Phela Lefaseng le Lefsa

Itokišeletše Gona Bjale go tlo Phela Lefaseng le Lefsa

“Ba botše gore ba dire botse, . . . e le gore ba swarelele ka go tia bophelong bja kgonthe.”—1 TIMOTHEO 6:18, 19.

DIKOPELO: 125, 40

1, 2. (a) O lebeletše pele go dira’ng Paradeiseng? (Bona seswantšho se se lego ka mo godimo.) (b) Ke’ng seo se tlago go re thabiša le go feta lefaseng le lefsa?

RE TLOGA re lebeletše pele go tlo phela “bophelo bjo bo sa felego.” Moapostola Paulo o bo hlalositše e le ‘bophelo bja kgonthe.’ (Bala 1 Timotheo 6:12, 19.) Go ba bantši, se se tla bolela go phela ka mo go sa felego lefaseng la Paradeise. Go thata go nagana kamoo o tlago go ikwa ka gona mesong e mengwe le e mengwe o tsoga o phetše gabotse, o thabile e bile o kgotsofetše. (Jesaya 35:5, 6) Nagana gore e tla ba mo go kgahlišago gakaakaang go iketla le lapa la gago le bagwera, go akaretša le bao ba tla bego ba tsošitšwe! (Johane 5:28, 29; Ditiro 24:15) O tla ba o na le nako ya go ithuta dilo tše mpsha gomme wa ba sekgwari dilong tšeo o thabelago go di dira. Ka mohlala, o ka ithuta mo go oketšegilego ka thutamahlale. Goba o ka ithuta go bapala diletšo tša mmino goba go thala polane ya ntlo ya gago.

2 Gaešita le ge re lebeletše pele dilong tše ka moka tše dibotse, go hlankela Jehofa go tla re thabiša le go feta. Nagana gore  bophelo bo tlo ba bjang ge batho ka moka ba tla be ba swara leina la Jehofa ka tsela e kgethwa gomme ba amogela gore Jehofa ke Mmuši wa bona. (Mateo 6:9, 10) Re tla thabela go bona lefase le tletše ka batho ba phethagetšego, le le ka tsela yeo Modimo a bego a rerile ka yona go tloga mathomong. Le gona nagana kamoo go tlago go ba bonolo ka gona go godiša segwera sa rena le Jehofa ge ganyenyane-ganyenyane re phethagala!—Psalme 73:28; Jakobo 4:8.

3. Re swanetše go itokišeletša eng gona bjale?

3 Re kgodišegile gore Jehofa o tlo dira dilo tše ka moka tše di kgahlišago, ka gobane “go Modimo dilo tšohle di a kgonega.” (Mateo 19:25, 26) Ge e ba re nyaka go phela ka mo go sa felego lefaseng le lefsa, ga bjale ke nako ya gore re “swarelele ka go tia” bophelong bjo bo sa felego. Re a tseba gore bofelo bo kgauswi le go tla, ka gona re swanetše go phela ka tsela yeo e bontšhago gore re letetše gore bo ka tla ka nako le ge e le efe. Re swanetše go dira sohle se re ka se kgonago gona bjale go itokišeletša go tlo phela lefaseng le lefsa. Anke re boneng kamoo re ka dirago seo ka gona.

KAMOO RE KA ITOKIŠAGO

4. Re ka dira’ng gona bjale go itokišeletša go tlo phela lefaseng le lefsa? Nea mohlala.

4 Re ka dira’ng gona bjale go itokišeletša go tlo phela lefaseng le lefsa? Ge e ba re be re rulaganya go hudugela nageng e nngwe, re ka dira dilo tše itšego go itokišeletša go phela nageng yeo. Ka mohlala, re ka thoma go ithuta leleme la batho ba moo le setšo sa bona. Re ka leka go ja tše dingwe tša dijo tšeo ba di jago. Ka mo go swanago, re ka itokišeletša gona bjale go phela lefaseng le lefsa ka go dira seo re ka se kgonago go phela bjalo ka ge eka re šetše re le moo. Anke re ahlaahleng tše dingwe tša ditsela tšeo re ka dirago se.

5, 6. Go ithuta go kwa tlhahlo e tšwago mokgatlong wa Jehofa go tla re thuša bjang go itokišeletša go tlo phela lefaseng le lefsa?

5 Lefaseng le, Sathane o nyaka gore batho ba nagane gore ba ka dira selo le ge e le sefe seo ba se ratago. Ba bantši ba nagana gore go bohlokwa go itaola le gore go kwa Modimo ga go hlokagale. Seo se bile le mafelelo afe? Se dirile gore go be le tlaišego e kgolo le manyami. (Jeremia 10:23) Eupša Jehofa ke Mmuši yo a nago le lerato. Ruri bophelo bo tla kgahliša kudu lefaseng le lefsa ge motho yo mongwe le yo mongwe a tla be a mo kwa!

6 Lefaseng le lefsa, re tlo thabela go latela tlhahlo e tšwago mokgatlong wa Jehofa yeo e tla bego e re thuša go fetoša lefase gore e be paradeise e botse le go thuša go ruta bao ba tsošitšwego bahung. Go tla be go na le mošomo o mogolo woo Jehofa a nyakago re o dira. Eupša a re re bao ba tla bego ba re eteletše pele ka nako yeo ba re kgopela go dira selo seo re sa se ratego. Na re tla ba kwa? Na re tla dira sohle se re ka se kgonago go phethagatša dikabelo tša rena le go di thabela? E le gore re itokišeletše go tlo phela ka mo go sa felego lefaseng le lefsa, re swanetše go kwa ditaelo tše di tšwago mokgatlong wa Jehofa gona bjale.

7, 8. (a) Ke ka baka la’ng re swanetše go dirišana le bao ba re eteletšego pele? (b) Bakriste ba bangwe ba ile ba lebeletšana le diphetogo dife? (c) Re ka kgonthišega gore bophelo bo tla ba bjang lefaseng le lefsa?

7 Ge e ba re nyaka go swanelega go tlo phela lefaseng le lefsa, re swanetše go ithuta go kgotsofala le go dirišana le mokgatlo wa Jehofa le batho ba bangwe. Ka mohlala, ge re neilwe kabelo e mpsha, re e amogela ka diatla tše pedi gomme ra dira sohle se re ka se kgonago go e thabela le go e kgotsofalela. Ge e  ba re ithuta go dirišana le bao ba etelelago pele ka mokgatlong gona bjale, ga go pelaelo gore re tla dira se se swanago lefaseng le lefsa. (Bala Baheberu 13:17.) Ge Baisiraele ba be ba tsena Nageng ya Kholofetšo, ba ile ba abelwa moo ba swanetšego go dula gona. (Numeri 26:52-56; Joshua 14:1, 2) Ga re tsebe gore re ka tla ra abelwa go dula kae lefaseng le lefsa. Eupša ge e ba re ithutile go ba le moya wa tirišano, ga re tlo ba le bothata bja go dira thato ya Jehofa le ge e le kae mo re tla bago re dula gona.

8 Ruri e tla ba tokelo e kgolo go hlankela Modimo lefaseng le lefsa ge Mmušo wa gagwe o tla ba o buša! Ka baka leo, re thabela go dirišana le mokgatlo wa Jehofa gona bjale le go phetha kabelo le ge e le efe yeo re e newago. Lega go le bjalo, ka dinako tše dingwe dikabelo tša rena di ka fetoga. Ka mohlala, ba bangwe ba bana babo rena le dikgaetšedi bao ba hlankelago Bethele ya United States ba abetšwe go yo hlankela tšhemong. Le gona ka baka la botšofadi goba maemo a mangwe, balebeledi ba bangwe ba basepedi ba abetšwe go ba babulamadibogo ba kgethegilego. Ba thabela dikabelo tša bona tše mpsha e bile Jehofa o a ba šegofatša. Ge e ba re rapela gore Jehofa a re thuše, re dira sohle se re ka se kgonago go mo hlankela e bile re ithuta go kgotsofalela kabelo le ge e le efe yeo re e newago, re tla thaba gomme Jehofa o tla re šegofatša. (Bala Diema 10:22.) Go thwe’ng ge e ba lefaseng le lefsa re ka rata go dula lefelong le itšego, eupša mokgatlo wa Jehofa wa re kgopela go hudugela go le lengwe? Ka nako yeo, re tla ba re sa tshwenyege ka gore re dula kae goba gore re dira eng. Re tla leboga feela gore re phela lefaseng le lefsa.—Nehemia 8:10.

9, 10. (a) Ke ka baka la’ng re ka tla ra swanelwa ke go se fele pelo lefaseng le lefsa? (b) Re ka bontšha bjang gore gona bjale ga re fele pelo?

9 Ka dinako tše dingwe, go tlo nyakega gore re se fele pelo ge re le lefaseng le lefsa. Ka mohlala, re ka tla ra kwa gore batho ba bangwe ba thabile ka gobane ba leloko le bagwera ba bona ba tsošitšwe. Eupša rena re ka swanelwa ke go tlo leta gore baratiwa ba rena ba tsošwe. Ge e ba go ka tla gwa ba bjalo, na re tla thaba le ba bangwe gomme ra leta ka go se fele pelo? (Baroma 12:15) Ge e ba gona bjale re ithuta go leta ka go se felo pelo gore Jehofa a phethagatše dikholofetšo tša gagwe, seo se tla re thuša gore ka nako yeo re se fele pelo.—Mmoledi 7:8.

10 Le gona re ka itokišeletša go tlo phela lefaseng le lefsa ka go bontšha go se fele pelo ge go dirwa diphetogo tseleng yeo re kwešišago therešo ya Beibele. Ge phetogo e dirwa, na re ithuta taba yeo e mpsha, gomme ra se fele pelo ge e ba re sa e kwešiše ka mo go feletšego? Ge e ba go le bjalo, go tla ba bonolo gore lefaseng le lefsa re se fele pelo nako e nngwe le e nngwe ge Jehofa a re nea ditaelo tše mpsha.—Diema 4:18; Johane 16:12.

11. Ke ka baka la’ng re swanetše go ithuta go lebalela ba bangwe gona bjale, gona se se tla re thuša bjang lefaseng le lefsa?

11 Tsela e nngwe yeo re ka itokišeletšago go  tlo phela lefaseng le lefsa ke ka go ithuta go lebalela. Nakong ya Pušo ya Kriste ya Nywaga e Sekete, go tlo tšea nako pele batho ka moka ba phethagala. (Ditiro 24:15) Na re tla rata ba bangwe le go ba lebalela? Ge e ba re ithuta go lebalela ba bangwe le go phedišana le bona gabotse gona bjale, go tlo ba bonolo gore re dire seo lefaseng le lefsa.—Bala Bakolose 3:12-14.

Lefaseng le lefsa, re tlo swanelwa ke go bontšha dika tšeo Jehofa a re rutago gore re di bontšhe gona bjale

12. Ke ka baka la’ng re swanetše go itokišeletša gona bjale go tlo phela lefaseng le lefsa?

12 Go ka direga gore lefaseng le lefsa re se tle re hwetša dilo ka moka tšeo re di nyakago, goba re ka tla ra swanelwa ke go di leta. Re tlo swanelwa ke go leboga le go kgotsofalela boemo le ge e le bofe bjo re tla bago re le go bjona. Ge e le gabotse, re tlo swanelwa ke go bontšha dika tšeo Jehofa a re rutago gore re di bontšhe gona bjale. Ka gona ge re ithuta go bontšha dika tšeo gona bjale, re bontšha gore lefase le lefsa ke la kgonthe go rena le gore re itokišeletša go tlo phela ka mo go sa felego. (Baheberu 2:5; 11:1) Le gona, re bontšha gore re tloga re nyaka go phela lefaseng leo go lona motho yo mongwe le yo mongwe a kwago Jehofa.

SWAREGA KA GO HLANKELA JEHOFA

Bolela ditaba tše dibotse ka mafolofolo

13. Ke’ng seo re tlago go se etiša pele maphelong a rena lefaseng le lefsa?

13 Lefaseng le lefsa, re tlo ba le selo se sengwe le se sengwe seo re se hlokago gore re thabele bophelo. Eupša selo seo se tlo re thabišago kudu ke go ba le tswalano ya kgauswi le Jehofa. (Mateo 5:3) Re tlo swarega tirelong ya Jehofa gomme ra thabela go mo hlankela. (Psalme 37:4) Ka gona ge e ba gona bjale re etiša Jehofa pele maphelong a rena, re itokišeletša go tlo phela lefaseng le lefsa.—Bala Mateo 6:19-21.

14. Bafsa ba ka ipeela dipakane dife tirelong ya Jehofa?

14 Re ka dira’ng gore re thabele go hlankela Jehofa ka mo go oketšegilego? Se sengwe sa dilo tšeo re ka di dirago ke go ipeela dipakane. Ge e ba o sa le mofsa, naganišiša ka go diriša bophelo bja gago tirelong ya Jehofa. Ke  ka baka la’ng o sa dire nyakišišo ka dikgatišong tša rena ka mehuta e fapafapanego ya tirelo ya nako e tletšego? O ka kgetha e nngwe ya tšona gore e be pakane ya gago. * (Bona mongwalo wa ka tlase.) Boledišana le ba bangwe bao ba hlanketšego Jehofa ka nywaga e mentši tirelong ya nako e tletšego. Ge e ba o diriša bophelo bja gago go hlankela Jehofa, o tla hwetša tlwaetšo ya bohlokwa. Phihlelo yeo e tla go thuša go hlankela Jehofa lefaseng le lefsa.

Ipeele dipakane tirelong ya Jehofa

15. Ke dipakane dife tše dingwe tšeo re ka ipeelago tšona tirelong ya Jehofa?

15 Go na le dipakane tše dintši tšeo re ka ipeelago tšona tirelong ya Jehofa. Ka mohlala, re ka ipeela pakane ya go ithuta bokgoni bjo bofsa bodireding. Goba re ka leka go kwešiša melao ya motheo ya Beibele gakaone gomme ra ithuta kamoo re ka e dirišago maphelong a rena. Re ka leka go kaonefatša tsela yeo re balago ka yona phatlalatša goba yeo re neago dipolelo le dikarabo dibokeng. Tabakgolo še: Ge o ipeela dipakane tirelong ya Jehofa, seo se tla go thuša go ba le mafolofolo kutšwanyana le go itokišeletša go tlo phela lefaseng le lefsa.

TSELA E DI PHALAGO TŠOHLE YA GO PHELA GONA BJALE

Leboga dilo ka moka tšeo Jehofa a go neago tšona

16. Ke ka baka la’ng go hlankela Jehofa e le tsela e di phalago tšohle ya go phela?

16 Ge re diriša nako ya rena go itokišeletša go tlo phela lefaseng le lefsa la Modimo, na re fetwa ke menate ya lefase? Aowa! Go hlankela Jehofa ke tsela e di phalago tšohle ya go phela. Ga re mo hlankele ka gobane go na le motho yo a re gapeletšago goba e le feela ka gobane re nyaka go tlo phologa masetlapelo a magolo. Ge re na le tswalano e botse le Jehofa, re phela gakaone e bile lethabo la rena le a oketšega. Ke ka tsela yeo a bego a rerile gore re phele ka yona. Ga go na selo seo se phalago go ratwa ke Modimo le go hlahlwa ke  yena bophelong. (Bala Psalme 63:1-3.) Ka moka ga rena re ka ipshina ka lethabo leo le tlišwago ke go hlankela Jehofa ka pelo ka moka. Ba bangwe bao ba nago le nywaga e mentši ba mo hlankela ba ka bolela go tšwa pelong gore ruri ye ke tsela e di phalago tšohle ya go phela.—Psalme 1:1-3; Jesaya 58:13, 14.

Nyaka tlhahlo ka Beibeleng

17. Go dira dilo tšeo re di ratago le go itapološa e tla ba ga bohlokwa gakaaka’ng Paradeiseng?

17 Ge re le Paradeiseng, re tlo thabela go fetša nako e itšego re dira dilo tše re di ratago le go itapološa. Go ba gona, Jehofa ke yena a re bopilego re na kganyogo ya go thabela bophelo, le gona o holofetša gore o tla “kgotsofatša kganyogo ya sephedi se sengwe le se sengwe.” (Psalme 145:16; Mmoledi 2:24) Re hloka go itapološa le go khutša, eupša re di thabela kudu ge e ba re etiša pele tswalano ya rena le Jehofa. Seo se ka se fetoge lefaseng le lefsa. Ka gona re swanetše go tšwela pele re “tsoma Mmušo pele” le go dula re naganne ka ditšhegofatšo tšeo re di hwetšago ka ge re hlankela Jehofa.—Mateo 6:33.

Ge re na le tswalano e botse le Jehofa, re phela gakaone e bile lethabo la rena le a oketšega

18. Re ka bontšha bjang gore re itokišeletša go tlo phela ka mo go sa felego Paradeiseng?

18 Lefaseng le lefsa, bophelo bo tlo kgahliša go feta kamoo re ka naganago ka gona. Eka re ka bontšha gore re tloga re nyaka go ba moo ka go itokišeletša gona bjale go tlo hwetša ‘bophelo bja kgonthe.’ Anke re hlagoleleng dika tšeo Jehofa a re rutago gore re di bontšhe, gomme re bolele ditaba tše dibotse ka mafolofolo. Eka re ka latswa lethabo leo le tlišwago ke go etiša pele borapedi bja Jehofa maphelong a rena. Ga re na pelaelo gore lefaseng le lefsa Jehofa o tlo phethagatša dilo ka moka tšeo a re holofeditšego tšona. Ka gona anke re pheleng bjalo ka ge eka re šetše re le moo!

^ ser. 14 Bala puku ya Dipotšišo tša Bafsa le Dikarabo tše Šomago, Bolumo 2, matlakala 311-318.