Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  August 2015

 PHIHLELO

“Anke Dihlakahlaka tše Dintši di Hlalale”

“Anke Dihlakahlaka tše Dintši di Hlalale”

Nka se tsoge ke lebetše letšatši le kua Brooklyn. Ke be ke letile ka phapošing yeo Sehlopha se Bušago se swarelago diboka tša sona ka go yona, ke na le bana babo rena ba bangwe bao ba tšwago dinageng tše dingwe. Re be re letile Komiti ya Bongwadi gore e fihle. Re be re tlo e hlalosetša ditharollo tša mathata ao bafetoledi ba kopanago le ona, gomme re be re tšhogile. E be e le ka May 22, 2000. Eupša ke ka baka la’ng seboka se e be e le sa bohlokwa? Pele nka hlalosa, e re ke le anegeleng se sengwe ka nna.

Ke kolobeditšwe kua Queensland, ka bula madibogo kua Tasmania, gomme ka hlankela ke le moromiwa kua Tuvalu, Samoa le Fiji

KE BELEGETŠWE seleteng sa Queensland, kua Australia, ka 1955. Kapejana ka morago ga moo, mma e lego Estelle, o ile a thoma go ithuta Beibele le Dihlatse tša Jehofa. O ile a kolobetšwa ka morago ga ngwaga, gomme tate e lego Ron, a amogela therešo ka morago ga nywaga e 13. Nna ke kolobeditšwe ka 1968 tikologong yeo e lego kgole le toropo, metsemagaeng kua Queensland.

Ke ratile dipuku le maleme go tloga ke sa le mošemanyana. Kae le kae moo ke bego ke eya gona le batswadi ba ka ka koloi, ke be ke rata go dula setulong sa ka morago ke bala puku. Ke nagana gore batswadi ba ka ba be ba šetše ba no tenwa ke gore ke hlwa ke bala go e na le go tšama ke bogetše tlhago. Eupša go rata go bala go nthušitše gore ke šome gabotse sekolong. Le gona ke ile ka ba ka thopa difoka tše mmalwa ge ke be ke sa le sekolong motseng wa Glenorchy, sehlakahlakeng sa Tasmania.

Nakong yeo, ke ile ka swanelwa ke go dira phetho e bohlokwa. Na ke be ke tla amogela thušo ya ditšhelete (scholarship) gore ke ye yunibesithing? Gaešita le ge ke be ke rata dipuku le go ithuta, ke leboga gore mma o ile a nthuta go rata Jehofa go feta motho le ge e le ofe goba selo le ge e le sefe. (1 Bakorinthe 3:18, 19) Ka gona ka tumelelo ya batswadi ba ka, ke ile ka dira phetho ya gore gateetee ge ke feditše  sekolo, ke tla tšea bobulamadibogo. Ke ile ka dira seo ka January 1971, ge ke be ke na le nywaga e 15.

Nywageng e seswai e latetšego, ke ile ka ba le tokelo ya go bula madibogo kua Tasmania. Nakong yeo, ke ile ka nyalana le kgarebe e botsana ya go tšwa Tasmania, e lego Jenny Alcock. Re ile ra hlankela ka nywaga e mene re le babulamadibogo ba kgethegilego metsemagaeng a kua Smithton le Queenstown.

BAROMIWA DIHLAKAHLAKENG TŠA PACIFIC

Ka 1978, nna le mosadi wa ka re ile ra ya Port Moresby, kua Papua New Guinea kopanong ya ditšhabatšhaba. Ke gopola gabotse moromiwa yo mongwe a nea polelo ka leleme la Sehiri Motu. Le ge ke be ke sa kwešiše seo a bego a se bolela, ke ile ka thoma go nagana gore le nna ke nyaka go ba moromiwa ka letšatši le lengwe, ke ithute leleme le lengwe e bile ke kgone go kgothatša bana babo rena ka go nea dipolelo ka segagabo bona. E bile nakong ye moo ke ilego ka lemoga gore nka diriša go rata ga ka maleme go hlankela Jehofa.

Ge re boetše gae, re ile ra šala re maketše ge re be re laletšwa go hlankela re le baromiwa. Re fihlile sehlakahlakeng sa Funafuti, kua Tuvalu, ka January 1979. Go be go na le bagoeledi ba bangwe ba bararo feela bao ba kolobeditšwego nageng ka moka ya Tuvalu.

Ke na le Jenny kua Tuvalu

Go be go se bonolo go ithuta Setuvalu. Puku feela yeo e bego e le gona ka leleme leo e be e le “Testamente e Mpsha.” Go be go se na dipukuntšu goba diklase tša go ithuta leleme leo, ka gona re ile ra dira phetho ya go leka go ithuta mantšu a mafsa a 10 go ya go a 20 ka letšatši. Eupša go se go ye kae re ile ra lemoga gore re be re sa kwešiše seo se bolelwago ke a mantši a mantšu ao re bego re ithuta ona. Go e na le gore re botše batho gore go dirišana le meoya e mebe go fošagetše, re ile ra ba botša gore ga se ba swanela go diriša dikala le mahlotlo! Eupša re ile ra swanelwa ke go tšwela pele re leka go ithuta leleme leo ka gobane re be re šetše re thomile go ithuta Beibele le batho ba mmalwa. Nywaga e mentši ka morago, yo mongwe wa barutwana bao o ile a re botša gore: “Re thaba kudu gore gona bjale le kgona go bolela segagabo rena. Ge le be le sa fihla mo, re be re sa le kwe!”

Eupša go na le selo se sengwe seo se re thušitšego go ithuta leleme leo kapejana. Ka ge go be go se na mafelo a go renta, re ile ra swanelwa ke go dula le lapa le lengwe la Dihlatse motseng wa moo. Re ile ra swanelwa ke go bolela Setuvalu kae le kae, go akaretša le ka gae. Ka morago ga go se bolele Seisemane ka nywaga e mentši, Setuvalu e be e šetše e le segagabo rena.

Ka moragonyana ga gore re fihle sehlakahlakeng se, batho ba bantši ba ile ba thoma go kgahlwa ke therešo ya Beibele. Eupša re be re tla diriša’ng go ithuta le bona? Dikgatišo tša rena di be di se gona ka segagabo bona. Ba be ba tla ithuta bjang Beibele ka bobona? Ge ba be ba ka tla dibokeng, ba be ba tla opela dikopelo  dife, ba be ba tla nea dipolelo bjang, le gona ba be ba tla lokišeletša bjang diboka? Ba be ba tla thušwa ke’ng gore ba feleletše ba kolobeditšwe? Batho ba bao ba ikokobeditšego ba be ba hloka dikgatišo ka segagabo bona gore re ba rute ka Jehofa! (1 Bakorinthe 14:9) Re ile ra ipotšiša gore: ‘Na re tla ka ra tsoga re bile le dikgatišo ka Setuvalu, e lego leleme leo le bolelwago ke batho ba sa fetego 15 000?’ Jehofa o ile a araba dipotšišo tšeo, a re bontšha dilo tše tše pedi: (1) O nyaka gore batho ba “dihlakahlakeng tša kgole” ba ithute ka yena, (2) o nyaka le gore batho ba tlasana bao lefase le ba lebelelago e le “baikokobetši le ba boleta” ba bote leina la gagwe.—Jeremia 31:10; Tsefanya 3:12.

MOŠOMO WA BOFETOLEDI BAKENG SA GO RUTA THEREŠO

Ka 1980 ofisi ya lekala e ile ya re abela gore re fetolele dikgatišo ka Setuvalu. Re ile ra dira bjalo, le ge re be re ikwa gore ga re tsebe leleme leo gabotse. (1 Bakorinthe 1:28, 29) Mathomong, re ile ra reka motšhene wa kgale mmušong e le gore re dire dikgatišo bakeng sa diboka tša rena. Ka morago, re ile ra ba ra fetolela puku ya Tsebo e Išago Bophelong bjo bo sa Felego ka Setuvalu gomme ra e phrintha motšheneng woo o monyenyane. Ke sa gopola monkgo wa go tsenelela wa enke le phišo ya sehlakahlakeng seo tšeo di dirilego gore go be thata go phrintha dikgatišo tšeo ka matsogo. Mehleng yeo re be re se na mohlagase!

Go be go se bonolo go fetolela Setuvalu ka gobane go be go se na dipukuntšu goba dipuku tša Setuvalu bakeng sa go dira nyakišišo. Eupša ka dinako tše dingwe re be re hwetša thušo yeo re bego re e hloka ka ditsela tše dingwe. Mesong e mengwe ke ile ka tsena ka phošo lapeng la motho yo a bego a ganetša therešo. Mokgalabje yo, yoo e kilego ya ba morutiši, o ile a nkgopotša gore re se ke ra le bea ka lapeng la gagwe. Ke moka o ile a re: “Ke nyaka go le botša selo setee feela. Ge le fetolela dikgatišo tša Setuvalu, ga le latelanye ditiragalo gabotse. Mokgwa woo ga o dirišwe gantši lelemeng la Setuvalu.” Ke ile ka botšiša batho ba bangwe ka taba yeo, gomme ra hwetša gore o nepile. Ka gona re ile ra dira diphetogo e le gore re kaonefatše bofetoledi bja rena. Ke ile ka makatšwa ke gore Jehofa o re neile thušo ye a diriša motho yo a ganetšago therešo eupša go le molaleng gore o be a bala dikgatišo tša rena!

Pampišana ya Kingdom News No. 30 ka Setuvalu

 Kgatišo ya mathomo ya Setuvalu yeo re ilego ra e fa batho ke taletšo ya Segopotšo. Ka morago ra ba nea pampišana ya Kingdom News No. 30, yeo e ilego ya lokollwa ka nako e tee le ya Seisemane. Re be re thabile gakaakaang gore re kgonne go fa batho selo seo ba ka se balago ka segagabo bona! Ka morago, re ile ra ba le diporoutšha gotee le dipuku tše dingwe ka Setuvalu. Ka 1983, lekala la Australia le ile la thoma go phrintha Morokami ka Setuvalu. Makasine woo o be o na le matlakala a 24 gomme o gatišwa ka morago ga dikgwedi tše dingwe le tše dingwe tše tharo. Na batho ba moo Tuvalu ba ile ba thabela dikgatišo tšeo? Ee, ba ile ba di thabela ka gobane ba rata go bala. Nako le nako ge re lokolla kgatišo e mpsha, seteišene sa radio sa mmušo se be se tsebiša ditabeng, gomme ka dinako tše dingwe seo e eba tabakgolo ya letšatši! *—Bona mongwalo wa ka tlase.

Mošomo wa bofetoledi o be o dirwa bjang? Sa mathomo, re be re ngwala selo se sengwe le se sengwe ka pene letlakaleng. Ke moka re thaepa gantšintši seo re se fetoletšego go fihlela se lokela go romelwa lekaleng la kua Australia. Dikgaetšedi tše pedi lekaleng leo di be di thaepa seo re se fetoletšego khomphutheng, gaešita le ge di be di sa kwešiše leleme leo. Ge yo mongwe le yo mongwe wa bona a feditše, ba be ba kopana gomme ba bapetša seo ba se ngwadilego. Seo se be se fokotša diphošo tše dintši. Ka morago ga moo, lekala le be le tsenya diswantšho boitsebišong bjo bo fetoletšwego gore go bonagale eka ke kgatišo e feletšego. Ge ba feditše ba be ba re romela kgatišo yeo ka sefofane. Re be re lekola kgatišo yeo ke moka ge re kgotsofetše re e romela gape lekaleng gore e yo gatišwa.

Mošomo wa bofetoledi o kaonefaditšwe kudu! Ga bjale bafetoledi ba fetolela dikgatišo dikhomphutheng gomme ba dira diphošollo gona moo. Gantši motho yo a tsenyago diswantšho dikgatišong tšeo o šomela lefelong leo bafetoledi ba šomelago go lona. Ka morago ga moo, bafetoledi ba diriša Inthanete go romela difaele tša dikgatišo tšeo makaleng ao a nago le metšhene ya go phrintha. Ga go sa hlokagala gore go be le motho yo a kitimelago posong ka motsotso wa mafelelo a yo romela boitsebišo bjo bo fetoletšwego ka poso.

DIKABELO TŠE DINGWE

Ge nywaga e dutše e eya, nna le Jenny re ile ra newa dikabelo tše di fapafapanego dikarolong tše mmalwa tša Pacific. Ge re tloga Tuvalu, re ile ra abelwa go hlankela lekaleng la Samoa ka 1985. Lekaleng leo re be re thuša bafetoledi ba Sesamoa, Setonga le Setokelau, gotee le go thuša ka go fetolela Setuvalu. * (Bona mongwalo wa ka tlase.) Ke moka ka 1996, re ile ra abelwa go hlankela lekaleng la Fiji, moo re bego re thuša bafetoledi ba Sefiji, Sekiribati, Senauru, Serotuma le Setuvalu.

Re be re diriša dikgatišo tša Setuvalu go ruta batho Beibele

Ke dula ke kgahlwa ke tsela yeo bafetoledi ba ratago mošomo wa bona gaešita le ge o se bonolo e bile o dira gore ba lape. Go etša Jehofa, bana babo rena ba bao ba botegago le dikgaetšedi ba tloga ba nyaka gore batho ba kwe ditaba tše dibotse ka segagabo bona. (Kutollo 14:6) Ka mohlala, ge go be go rulaganywa gore makasine wa Morokami o thome go fetolelwa ka Setonga, ke ile ka swara seboka le bagolo ka moka ba kua Tonga gomme ka ba botšiša gore ke bomang ba ka tlwaeletšwago go dira mošomo woo. Yo  mongwe wa bagolo bao, yo e bego e le mekheniki gomme a gola tšhelete e ntši, o ile a ithaopela go tlogela mošomo letšatšing le le latelago gomme gateetee a thome go šoma e le mofetoledi. Ke ile ka kgothatšwa ke tumelo ya gagwe e tiilego, ka ge a be a na le lapa eupša a sa tsebe gore o tlo hwetša kae tšhelete ya go le hlokomela. Eupša Jehofa o ile a mo hlokomela le lapa la gagwe, gomme a tšwela pele e le mofetoledi ka nywaga e mentši.

Go etša bafetoledi ba, bana babo rena ba Sehlopha se Bušago ba tshwenyegile kudu ka go tšweletša dikgatišo ka maleme ka moka, gaešita le ao a bolelwago ke batho ba sego kae. Ka mohlala, go ile gwa botšišwa ge e ba go le bohlokwa go fetolela dikgatišo ka Setuvalu. Ke ile ka kgothatšwa kudu ke karabo e tšwago go Sehlopha se Bušago e rego: “Ga re bone lebaka la gore le kgaotše go fetolela dikgatišo ka Setuvalu. Gaešita le ge batho bao ba bolelago Setuvalu e se ba bantši go swana le ba maleme a mangwe, le bona ba swanetše go kwa ditaba tše dibotse ka segagabo bona.”

Ge ke be ke kolobetša motho yo a itšego ka lewatleng

Ka 2003, nna le Jenny re ile ra tlošwa Lefapheng la Bofetoledi kua Fiji, gomme ra išwa lefapheng leo le thušago bafetoledi kua Patterson, New York. Go be go le bjalo ka ge eka toro ya rena e a phethagala! Re ile ra ba karolo ya sehlopha seo se thušago gore dikgatišo tša rena di fetolelwe ka maleme a mantši. Nywageng e mebedi goba go feta moo re le lefapheng leo le thušago bafetoledi, re ile ra abelwa go tlwaetša dihlopha tša bafetoledi dinageng tše di fapafapanego.

DIPHETHO TŠE BOHLOKWA KUDU

Bjale e re ke bolele ka seboka se bohlokwa seo ke boletšego ka sona mathomong. Ka 2000, Sehlopha se Bušago se ile sa bona gore dihlopha tša bafetoledi lefaseng ka bophara di hloka thušo mošomong wa tšona. Bafetoledi ba bantši ba be ba se ba hlwa ba newa tlwaetšo ya go fetolela. Ka morago ga seboka seo le Komiti ya Bongwadi , Sehlopha se Bušago se ile sa dira phetho ya gore bafetoledi ka moka ba newe tlwaetšo. Bafetoledi ba be ba tla rutwa kamoo ba ka kwešišago Seisemane, kamoo ba ka rarollago mathata a bofetoledi le kamoo ba ka šomago mmogo e le sehlopha.

Tlwaetšo yeo e bile le mafelelo afe? Bofetoledi bo kaonefetše kudu. Le gona, dikgatišo tša rena di fetolelwa ka maleme a mantši go feta le ge e le neng pele. Ka 1979, ge re be re abelwa go hlankela re le baromiwa, makasine wa Morokami o be o hwetšagala ka maleme a 82 feela. Lega go le bjalo, malemeng a mantši Morokami o be o etšwa ka morago ga dikgwedi tše itšego Morokami wa Seisemane o šetše o tšwile. Eupša ga bjale Morokami o fetolelwa ka maleme a fetago a 240, gomme a mantši a ona a hwetša Morokami ka nako e tee le Seisemane. Ga bjale batho ba kgona go bala dikgatišo tša rena tšeo di ba rutago therešo ya Beibele ka maleme a fetago a 700. Nywageng e fetilego, go be go bonagala seo se ka se tsoge se kgonegile.

Ka 2004, Sehlopha se Bušago se ile sa dira phetho ya gore go bohlokwa kudu gore re be le Phetolelo ya Lefase le Lefsa ka maleme a mangwe a mantši kapejana ka mo go ka kgonegago. Ka baka la phetho yeo, batho ba bangwe ba bantši ga bjale ba kgona go bala Phetolelo ya Lefase le Lefsa ka segagabo bona. Ge e le gabotse, ka 2014, Beibele ye e be e hwetšagala ka maleme a 128, e feletše goba ka karolo ya yona, go akaretša le ka maleme ao a bolelwago South Pacific.

Ge go be go lokollwa Phetolelo ya Lefase le Lefsa ya Mangwalo a Bakriste a Segerika ka Setuvalu

Se sengwe sa dilo tše di kgahlišago tšeo ke sa di lebalego ke kopano ya selete kua Tuvalu ka 2011. Go ile gwa ba le komelelo e šoro nageng ka moka ka  dikgwedi tše dintši. Bana babo rena ba ile ba nagana gore kopano yeo e be e tla swanelwa ke gore e se sa ba gona. Eupša se se thabišago ke gore bošegong bjo re fihlilego ka bjona pula e ile ya tšhologa. Ka gona re ile ra kgona go ba le kopano! Ke ile ka ba le tokelo e kgolo ya go lokolla Phetolelo ya Lefase le Lefsa ya Mangwalo a Bakriste a Segerika ka Setuvalu! Gaešita le ge bana babo rena bao ba bolelago leleme le e le ba sego kae, le bona ba ile ba hwetša mpho ye e botse e tšwago go Jehofa. Ke moka, ka morago ga kopano, pula e ile ya tšhologa gape. Ka gona motho yo mongwe le yo mongwe o ile kgona go ba le meetse a mantši a therešo gotee le a pula!

Ge ke be ke boledišana le batswadi ba ka e lego Ron le Estelle kopanong ya selete kua Townsville, Australia, ka 2014

Ka manyami, mosadi wa ka yo a rategago e lego Jenny o be a se na le nna. O hwile ka 2009, ka morago ga go lwantšhana le bolwetši bja kankere ka nywaga e lesome. Re be re na le nywaga e 35 re nyalane. Ge a tlo tsošwa bahung, o tla thaba kudu ge a ekwa gore go ile gwa lokollwa Beibele ya Setuvalu.

Jehofa o ntšhegofaditše ka mosadi yo mongwe gape yo mobotse e lego Loraini Sikivou. Loraini le Jenny ba šomile mmogo Bethele ya kua Fiji, gomme Loraini le yena e be e le mofetoledi. Le lebakeng le, ke na le mosadi yo a hlankelago Jehofa ka potego le yo a ratago maleme go swana le nna!

Ke na le Loraini, re nea bohlatse kua Fiji

Go theoša le nywaga, ke bone kamoo Tatago rena yo lerato e lego Jehofa a hlokomelago dinyakwa tša batho ba maleme ka moka, le ge maleme ao a ka ba a bolelwa ke batho ba sego kae. (Psalme 49:1-3) Ke bone kamoo batho ba thabago ka gona ge ba hwetša dikgatišo tša rena ka segagabo bona ka lekga la pele goba ge ba opelela Jehofa ka leleme leo le ba kgomago dipelo. Dinakong tša go swana le tšeo, ke nagana ka tsela yeo Jehofa a re ratago kudu ka yona. (Ditiro 2:8, 11) Ke sa gopola gabotse mantšu a ngwanabo rena yo mongwe yo a tšofetšego wa Motuvalu, e lego Saulo Teasi. Ka morago ga gore a opele kopelo ya Mmušo ka lekga la pele ka segagabo, o ile a re: “Ke nagana gore o swanetše go botša Sehlopha se Bušago gore dikopelo tše di bose ka Setuvalu, di phala tša Seisemane.”

Ka September 2005, ke ile ka makala ge ke newa tokelo ya go ba setho sa Sehlopha se Bušago sa Dihlatse tša Jehofa. Le ge ke se sa le mofetoledi, ke leboga Jehofa gore o ntumeletše go tšwela pele ke thekga modiro wa lefase ka bophara wa bofetoledi. Go a nthabiša go tseba gore Jehofa o hlokomela dinyakwa tša batho ba gagwe ka moka, gaešita le bao ba lego dihlakahlakeng tša kgole bogareng bja Lewatle la Pacific! Ee, go etša ge mopsalme a boletše, “Jehofa bjale ke kgoši! Anke lefase le thabe. Anke dihlakahlaka tše dintši di hlalale.”—Psalme 97:1.

^ ser. 18 Ge o nyaka go tseba ka mo go oketšegilego ka tsela yeo batho ba ilego ba arabela ka yona dikgatišong tša rena, bala Morokami wa December 15, 2000, letlakala 32; August 1, 1988, letlakala 22; le Phafoga! ya January 8, 2001, letlakala 27.

^ ser. 22 Ge o nyaka go tseba ka mo go oketšegilego ka mošomo wa bofetoledi kua Samoa, bala 2009 Yearbook, matlakala 120-121, 123-124.