Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2015

Thuša go Kaonefatša Paradeise ya Rena ya Moya

Thuša go Kaonefatša Paradeise ya Rena ya Moya

“Ke tla tagafatša moo dinao tša ka di gatilego gona.”—JESAYA 60:13.

DIKOPELO: 102, 75

1, 2. Lentšu “bogato bja dinao” le ka šupa go eng ka Mangwalong a Seheberu?

JEHOFA MODIMO o itše: “Magodimo ke sedulo sa ka sa bogoši gomme lefase ke bogato bja dinao tša ka.” (Jesaya 66:1) Modimo o be a bile a bolela ka “bogato bja dinao” tša gagwe ge a be a re: “Ke tla tagafatša moo dinao tša ka di gatilego gona.” (Jesaya 60:13) Jehofa o tagafatša bjang bogato bja dinao tša gagwe, goba go bo botsefatša? Gona se se bolela’ng go bao ba dulago bogatong bja dinao tša gagwe, ke gore mo lefaseng?

2 Ka Mangwalong a Seheberu, lentšu “bogato bja dinao” le bile le dirišetšwa go hlalosa tempele ya Isiraeleng ya bogologolo. (1 Dikoronika 28:2; Psalme 132:7) Jehofa o be a lebelela tempele yeo e le e botse kudu ka gobane e be e le moo batho ba gagwe ba bego ba mo rapela gona. E bile e be e le lefelo leo ba bego ba mo tagafatša go lona.

3. Borapedi bja therešo ke’ng lehono, gona bo thomile go šoma neng?

3 Borapedi bja therešo ke’ng lehono? Ga se moago le ge e le  ofe wa go swana le tempele. Ke tempele ya moya, le gona e tagafatša Jehofa go feta moago le ge e le ofe wo o kilego wa agwa. Tempele yeo ya moya ke’ng? Ke tokišetšo ya Modimo yeo e dumelelago batho gore e be bagwera ba gagwe le go mo hlankela. Tokišetšo ye e kgonega feela ka baka la sehlabelo sa Jesu sa topollo. E thomile go šoma ka ngwaga wa bo-29 ge Jesu a be a kolobetšwa gomme a tlotšwa gore e be Moperisita yo a Phagamego tempeleng ya Jehofa ya moya.—Baheberu 9:11, 12.

Batho ba Jehofa ba swanetše go mo tumiša gona bjale ba sa phela

4, 5. (a) Go ya ka Psalme 99, ke’ng seo barapedi ba therešo ba Jehofa ba nyakago go se dira? (b) Ke potšišo efe yeo re swanetšego go ipotšiša yona?

4 Ruri re leboga Modimo bakeng sa tokišetšo ye ya borapedi bja therešo. Re bontšha gore re a mo leboga ge re botša ba bangwe ka leina la gagwe le mpho e kgahlišago yeo a re neilego yona ya topollo. Re thaba kudu gore go na le Bakriste ba therešo ba ka godimo ga dimilione tše seswai bao ba tumišago Jehofa letšatši le letšatši! Ge batho ba bantši dikerekeng ba ipotša gore ge ba hwile ke gona ba yo tumišago Modimo legodimong, batho ba Jehofa ba tseba bohlokwa bja go mo tumiša gona bjale ba sa phela.

5 Ge re tumiša Jehofa, re ekiša bahlanka ba gagwe ba botegago bao go boletšwego ka bona go Psalme 99:1-3, 5. (Bala.) Banna ba botegago ba go swana le Moshe, Arone le Samuele ba ile ba thekga ka pelo ka moka tokišetšo ya Modimo ya borapedi bja therešo mehleng ya bona. (Psalme 99:6, 7) Lehono, pele ga ge batlotšwa bao ba sa lego mo lefaseng ba ka yo hlankela e le baperisita le Jesu legodimong, ba hlankela Jehofa ka potego karolong ya lefaseng ya tempele ya moya. “Dinku tše dingwe” tše dimilione di thušana le bona ka potego. (Johane 10:16) Dihlopha tše ka bobedi di hlankela Jehofa di le ngatana e tee. Lega go le bjalo, yo mongwe le yo mongwe wa rena o swanetše go ipotšiša gore: ‘Na ke thekga borapedi bja Jehofa ka pelo ka moka?’

KAMOO RE KA TSEBAGO BAO BA HLANKELAGO TEMPELENG YA MODIMO YA MOYA

6, 7. Go ile gwa tšwelela bothata bofe phuthegong ya Bokriste ya lekgolong la pele la nywaga, gona go ile gwa direga’ng ka 1919?

6 Pele go ka fela nywaga e 100 phuthego ya Bokriste e hlomilwe, bahlanogi ba ile ba tšwelela go etša ge go be go boletšwe e sa le pele. (Ditiro 20:28-30; 2 Bathesalonika 2:3, 4) Ka morago ga moo, go ile gwa ba thata kudu go tseba bao e lego barapedi ba Modimo ba therešo. Go ile gwa feta nywaga e makgolo pele Jehofa a ka diriša Jesu go hlaola batho bao ba bego ba hlankela Modimo ka tsela ya maleba tempeleng ya Gagwe ya moya.

7 Ka 1919, go ile gwa ba molaleng gore ke bomang bao Modimo a ba kgethilego gore ba mo hlankele tempeleng ya gagwe ya moya. Ba be ba dirile diphetogo e le gore borapedi bja bona bo amogelege kudu go Jehofa. (Jesaya 4:2, 3; Maleaki 3:1-4) Ka  gona pono yeo moapostola Paulo a ilego a e bona nywageng e makgolo pejana ga moo e ile ya thoma go phethagala.

8, 9. “Paradeise” yeo Paulo a e bonego ponong ke’ng?

8 Pono yeo ya Paulo e hlalositšwe go 2 Bakorinthe 12:1-4. (Bala.) Ponong yeo, Jehofa o ile a bontšha Paulo selo seo se bego se tla ba gona nakong e tlago. “Paradeise” yeo Paulo a e bonego ke’ng? Sa pele, e ka šupa go Paradeise ya kgonthe yeo Modimo a tlago go e tliša kgauswinyane mo lefaseng. (Luka 23:43) Sa bobedi, e ka šupa go paradeise e phethagetšego ya moya lefaseng le lefsa. E bile sa boraro, e ka šupa go maemo a kgahlišago kua legodimong “paradeiseng ya Modimo.”—Kutollo 2:7.

9 Eupša ke ka baka la’ng Paulo a re o “[kwele] mantšu a sa bolelegego ao go sa dumelelwego ke molao gore motho a a bolele”? Lebaka ke gore e be e se ya hlwa e e ba nako ya gore a hlalose ka botlalo dilo tše di kgahlišago tšeo a di bonego ponong yeo. Eupša lehono Jehofa o re dumeletše go botša ba bangwe ka ditšhegofatšo tšeo batho ba gagwe ba di thabelago gona bjale!

10. Ke ka baka la’ng paradeise ya moya le tempele ya moya e se selo setee?

10 Re na le go fela re bolela ka paradeise ya moya, eupša paradeise yeo ke’ng? Ke boemo bjo bo kgethegilego bja khutšo bjoo Modimo a bo neago batho ba gagwe. Ka gona paradeise ya moya le tempele ya moya ga se selo setee. Tempele ya moya ke tokišetšo ya Modimo ya borapedi bja therešo. Go molaleng gore paradeise ya moya ke batho bao Modimo a ba amogelago le bao ba mo hlankelago tempeleng ya gagwe ya moya.—Maleaki 3:18.

11. Re na le tokelo efe lehono?

11 Go a thabiša go tseba gore ga e sa le go tloga ka 1919 Jehofa o dumeletše batho bao ba sa phethagalago gore ba hlagolele paradeise ya moya, ba e matlafatše le go e godiša. Na o tsenya letsogo modirong wo o kgahlišago? Na o tšeela godimo tokelo ya go šoma le Jehofa gore a tumišwe mo lefaseng?

JEHOFA O DIRA GORE MOKGATLO WA GAGWE O KGAHLIŠE LE GO FETA

12. Re tseba bjang gore Jesaya 60:17 e a phethagala? (Bona seswantšho seo se lego mathomong a sehlogo.)

12 Moporofeta Jesaya o boletše e sa le pele gore go tlo ba le diphetogo tše dintši tše di kgahlišago karolong ya lefaseng ya mokgatlo wa Modimo. (Bala Jesaya 60:17.) Bafsa goba batho bao e sa tšwago go ba Bakriste ba badile feela ka diphetogo tše goba ba kwele di bolelwa. Eupša go na le bana babo rena le dikgaetšedi ba bantši bao ba bilego le tokelo ya go bona diphetogo tšeo di direga. Bahlanka ba bao ba botegago ba kgodišegile gore Modimo o diriša Kgoši ya rena e lego Jesu, go hlahla mokgatlo wa Gagwe. Ge re theetša diphihlelo tša Bakriste ba bao ba rategago, tumelo ya  rena go Jehofa e tla matlafala gomme ra mmota kudu.

Paradeise ya moya ke boemo bjo bo kgethegilego bja khutšo bjo bo thabelwago ke Bakriste ba therešo lehono

13. Go ya ka Psalme 48:12-14, re swanetše go dira’ng?

13 Bakriste ka moka ba therešo ba swanetše go botša ba bangwe ka mokgatlo wa Jehofa. Ke mohlolo gore gaešita le ge re phela lefaseng le kgopo leo le bušwago ke Sathane, re phela ka khutšo le ka botee le bana babo rena lefaseng ka moka! Ka lethabo re swanetše go botša “ba molokong o tlago” ka mokgatlo wa Jehofa le ka paradeise ya moya!—Bala Psalme 48:12-14.

14, 15. Go ile gwa dirwa diphetogo dife ka morago ga 1970, gona mokgatlo o holegile bjang?

14 Batho ba bantši bao e lego kgale ba le ka phuthegong ba bone diphetogo tšeo di dirilego gore karolo ya lefaseng ya mokgatlo wa Jehofa e kgahliše le go feta. Ba sa gopola ge diphuthego di be di okamelwa ke mohlanka wa phuthego go e na le go okamelwa ke sehlopha sa bagolo, ge dinaga di be di hlokometšwe ke mohlanka wa lekala go e na le go hlokomelwa ke Komiti ya Lekala, goba ge mopresidente wa Watch Tower Society e be e le yena a neago ditaelo go e na le gore di newe ke Sehlopha se Bušago sa Dihlatse tša Jehofa. Gaešita le ge bana babo rena bao ka moka ba be ba na le bathuši ba botegago, ge e le gabotse ke bona ba bego ba dira diphetho ka diphuthegong, diofising tša makala le ntlongkgolo. Ka morago ga 1970, go ile gwa dirwa phetogo ya gore dihlopha tša bagolo e be tšona di dirago diphetho, go e na le gore di dirwe ke motho o tee.

 15 Ke ka baka la’ng re ka re diphetogo tše di hotše mokgatlo? Ke ka gobane bana babo rena ba be ba di dira ba na le kwešišo e kaone ya Mangwalo. Go e na le gore diphetho di dirwe ke motho o tee, mokgatlo o holwa ke dika tše dibotse tša bagolo ka moka, goba “dimpho tšeo e lego banna” tšeo di tšwago go Jehofa.—Baefeso 4:8; Diema 24:6.

Jehofa o nea batho lefaseng ka moka tlhahlo yeo ba e hlokago bophelong (Bona serapa 16 le 17)

16, 17. Ke diphetogo dife tšeo di sa tšwago go dirwa tšeo di go kgahlilego, gona ka baka la’ng?

16 Nagana ka diphetogo tšeo di sa tšwago go dirwa dikgatišong tša rena. Re ipshina ka go sepedišetša batho dikgatišo tše di ba thušago le tše di kgahlišago ge re le bodireding. Nagana le kamoo re dirišago thekinolotši ya sebjalebjale go bolela ditaba tše dibotse. Ka mohlala, batho ba bantši ba kgona go tsena wepesaeteng ya jw.org moo ba ka hwetšago thušo yeo ba tlogago ba e hloka. Diphetogo tše ka moka di re bontšha gore Jehofa o tloga a tshwenyega ka batho le go ba rata kudu.

Re leboga kudu tlwaetšo yeo re e newago dikolong tša rena tše dintši tša Beibele

17 Le gona re leboga kudu phetogo yeo e dirilwego dibokeng tša rena e le gore re kgone go ba le nako ya borapedi bja lapa goba ya thuto ya motho ka noši. E bile re leboga diphetogo tšeo di dirilwego mananeong a dikopano tše dikgolo le tše dinyenyane. Mananeo ao a kaonefala ngwaga o mongwe le o mongwe! Le gona re leboga kudu tlwaetšo yeo re e newago dikolong tša rena tše dintši tša Beibele. Diphetogo tše ka moka di bontšha gabotse gore Jehofa o  hlahla mokgatlo wa gagwe le gore o tšwela pele a dira gore paradeise ya moya e kgahliše le go feta!

KAMOO RE THUŠAGO GORE PARADEISE YA MOYA E KGAHLIŠE LE GO FETA

18, 19. Re ka thuša bjang gore paradeise ya moya e kgahliše le go feta?

18 Jehofa o re neile tokelo ya go tsenya letsogo go thušeng gore paradeise ya rena ya moya e kgahliše le go feta. Eupša seo re se dira bjang? Ka go bolela ditaba tše dibotse tša Mmušo ka mafolofolo le go dira barutiwa ba bantši. Nako le nako ge re thuša motho go ba mohlanka wa Modimo, re thuša gore paradeise ya moya e gole.—Jesaya 26:15; 54:2.

19 Le gona re thuša gore paradeise ya moya e kgahliše ge re šoma ka thata go kaonefatša semelo sa rena sa Bokriste. Se se thuša gore batho ba bangwe ba tle paradeiseng ye ya moya. Gantši go tseba ga rena Mangwalo ga se gona feela go gogelago batho ka mokgatlong, go Jehofa le go Jesu, eupša bohlweki bja rena le go phedišana ka khutšo le tšona di dira seo.

O ka thuša gore paradeise ya moya e gole (Bona serapa 18 le 19)

20. Go ya ka Diema 14:35, ke’ng seo re swanetšego go se dira?

20 Jehofa le Jesu ba swanetše go ba ba thaba kudu ge ba bona paradeise ya rena ya moya lehono. Lethabo leo re le kwago gona bjale ge re thuša gore paradeise ye e kgahliše kudu, ke tatso feela ya lethabo leo re tlago go ba le lona nakong e tlago ge re tla be re fetoša lefase gore e be paradeise ya kgonthe. Re swanetše go dula re gopola Diema 14:35, yeo e rego: “Kgoši e kgahlwa ke mohlanka yo a nago le temogo.” Anke re beng bohlale ge re dutše re šoma ka thata go botsefatša paradeise ya rena ya moya!