Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2015

Dula o Botegela Mmušo wa Modimo

Dula o Botegela Mmušo wa Modimo

“Bona ga se karolo ya lefase.”—JOHANE 17:16.

DIKOPELO: 63, 129

1, 2. (a) Go botegela Jehofa go tswalana bjang le go se tšee karolo dikgohlanong tša lefase? (Bona seswantšho se se lego ka mo godimo.) (b) Batho ba bantši ba botegela eng, eupša mafelelo ke afe?

RENA bahlanka ba Jehofa ga re tšee karolo dipolotiking le ditabeng tšeo di aroganyago batho, tše bjalo ka botšhaba, morafo goba setšo. Ka baka la’ng? Ka gobane re rata Jehofa, re a mmotegela e bile re a mo kwa. (1 Johane 5:3) Re latela ditekanyetšo tša Modimo go sa šetšwe gore re dula kae goba re tšwa kae. Go botegela Jehofa le Mmušo wa gagwe go bohlokwa kudu go feta selo le ge e le sefe. (Mateo 6:33) Ke ka baka leo re ka bolelago gore ga re “karolo ya lefase.”—Bala Johane 17:11, 15, 16; Jesaya 2:4.

2 Batho ba bantši lehono ba botegela naga ya gabo bona, morafo goba setšo, goba gaešita le dihlopha tša dipapadi tšeo ba di ratago. Ka manyami, se se dirile gore ba bantši ba bona ba phadišane, ba hloyane, gomme ka dinako tše dingwe ba bolaye bao ba sego ka lehlakoreng la bona. Gaešita le ge re sa tšee karolo dikgohlanong tše, di ka kgoma rena le malapa a rena, e bile re ka swarwa ka go hloka toka. Go ka ba bonolo kudu go  tšea lehlakore ge mebušo e dira diphetho tše di se nago toka, ka gobane Modimo o re bopile re na le bokgoni bja go tseba ge e ba selo e le toka goba go se bjalo. (Genesi 1:27; Doiteronomio 32:4) O ikwa bjang ge go sa dirwe toka? Na o tšea lehlakore, goba o ema o tiile?

Bakriste ba therešo ga ba nagane gore karolo e nngwe ya lefase la Sathane e kaone go feta e nngwe

3, 4. (a) Ke ka baka la’ng re sa tšee lehlakore ge go na le dikgohlano? (b) Re tlo ahlaahla’ng sehlogong se?

3 Batho ba bantši ba tšea lehlakore ge go na le dintwa ka gobane mebušo e dira gore ba dumele gore ke sona seo badudi ba kgonthe ba swanetšego go se dira. Eupša rena re latela mohlala wa Jesu. Ka gona ga re tšee karolo dipolotiking e bile ga re ye dintweng. (Mateo 26:52) Bakriste ba therešo ga ba nagane gore karolo e nngwe ya lefase la Sathane e kaone go feta e nngwe. (2 Bakorinthe 2:11) Ga re tsene felo dikgohlanong tša lefase le.—Bala Johane 15:18, 19.

4 Ka ge re sa phethagala, ba bangwe ba rena re ka ba re sa na le maikwelo a fošagetšego ka batho ba merafo e mengwe. (Jeremia 17:9; Baefeso 4:22-24) Sehlogong se, re tlo ahlaahla melao ya motheo yeo e tlago go re thuša go lwantšha maikwelo ao a aroganyago batho le go a fenya. Le gona re tlo ahlaahla kamoo re ka botegelago Mmušo wa Modimo ka go itlwaetša go nagana go swana le Jehofa le Jesu.

LEBAKA LEO RE SA THEKGEGO KAROLO LE GE E LE EFE YA LEFASE

5, 6. Ge Jesu a be a le mo lefaseng, o be a lebelela bjang dihlopha tše di sa swanego tša batho, gona ka baka la’ng?

5 Ge o ikwa o thatafalelwa ke go se tšee lehlakore ditabeng tša lefase le, ipotšiše gore: ‘Jesu nkabe a ile a dira’ng?’ Ge Jesu a be a le mo lefaseng, go be go na le dikgohlano le dingangišano magareng ga batho ba Judea, Galilea le Samaria. Nagana ka mehlala e latelago. Bajuda le Basamaria ba be ba sa boledišane. (Johane 4:9) Bafarisei le Basadutsei ba be ba sa dumelelane ka dilo tše dintši. (Ditiro 23:6-9) Bajuda bao ba bego ba tsene dikolo tša go ithuta Molao wa Moshe ba be ba nagana gore ba kaone go feta bao ba sego ba di tsena. (Johane 7:49) Le gona ba bantši ba bona ba be ba hloile balekgetho le Baroma. (Mateo 9:11) Eupša Jesu ga se a ka a tšea lehlakore dikgohlanong tše. Gaešita le ge ka mehla a be a lwela therešo ya mabapi le Jehofa e bile a tseba gore Baisiraele ke setšhaba se se kgethegilego sa Modimo, le ka mohla ga se a ka a ruta barutiwa ba gagwe gore ba kaone go feta batho ba bangwe. (Johane 4:22) Go e na le moo, o ile a ba ruta gore ba rate batho ka moka.—Luka 10:27.

Jehofa le Jesu ga ba nagane gore go na le morafo wo o phalago e mengwe, setšhaba se se phalago tše dingwe goba leleme leo le phalago a mangwe

6 Ke ka baka la’ng Jesu a se a ka a lebelela sehlopha le ge e le sefe sa batho e le se sekaone? Ke ka baka la tsela yeo yena le Tatagwe ba ikwago ka yona ka batho. Jehofa o bopile batho gore ba tlatše lefase ka merafo ya batho. (Genesi 1:27, 28) Ka gona Jehofa le Jesu ga ba nagane gore go na le morafo wo o phalago e mengwe, setšhaba se se phalago tše dingwe goba leleme leo le phalago a mangwe. (Ditiro 10:34, 35; Kutollo 7:9, 13, 14) Re swanetše go ekiša mohlala wa bona o phethagetšego.—Mateo 5:43-48.

7, 8. (a) Ke mang yo re mo thekgago, gona ka baka la’ng? (b) Tharollo feela ya mathata a batho ke efe?

 7 Ke ka baka la’ng re sa thekge babuši ba batho goba mebušo? Ka gobane re thekga Jehofa. Ke Mmuši wa rena. Kua Edene, Sathane o ile a bolela gore Jehofa ga a kgone go buša batho. Sathane o be a nyaka gore batho ba dumele gore tsela ya gagwe ya go dira dilo e kaone go phala ya Modimo. Jehofa o re dumeletše go ikgethela gore re nyaka go ba ka lehlakoreng la mang. Eupša go thwe’ng ka wena? Na o kwa Jehofa ka gobane o dumela gore tsela ya gagwe ya go dira dilo e phala ya gago? Na o kgodišegile gore ke Mmušo wa gagwe feela o tlago go rarolla mathata a rena? Goba na o nagana gore batho ba ka kgona go ipuša ntle le Modimo?—Genesi 3:4, 5.

8 Ka mohlala, o tla reng ge motho yo mongwe a ka go botšiša gore o nagana’ng ka mokgatlo o itšego wa dipolotiki, ka sehlopha sa batho ba go tliša diphetogo setšhabeng, goba ka mokgatlo o mongwe wo o swanago le yeo? E mengwe ya mekgatlo yeo e ka ba e šoma ka thata gore e thuše batho. Eupša re a tseba gore ke Mmušo wa Modimo feela wo o ka rarollago mathata a batho le go fediša go hloka toka. Le gona, go e na le gore yo mongwe le yo mongwe a dire seo a se ratago, re latela tlhahlo ya Jehofa ka phuthegong. Ke ka baka leo phuthego e nago le botee.

9. Bakriste ba bangwe ba lekgolong la pele la nywaga ba be ba na le bothata bofe, gona ba be ba swanetše go dira’ng?

9 Lekgolong la pele la nywaga, Bakriste ba bangwe kua Korinthe ba be ba ngangišana ba re: “‘Ke wa Paulo,’ yo mongwe a re: ‘Nna ke wa Apollo,’ yo mongwe a re: ‘Nna ke wa Kefase,’ yo mongwe le yena a re: ‘Nna ke wa Kriste.’” Ge Paulo a ekwa taba ye, o ile a galefa. Bjo e be e le bothata bjo bogolo kudu, ka gobane khutšo ya phuthego e be e le kotsing. Ka gona o ile a botšiša bana babo le dikgaetšedi gore: ‘Na Kriste o arogantšwe?’ Paulo o ile a ba eletša ka gore: “Bjale bana bešo, ke le kgothatša ka leina la Morena wa rena Jesu Kriste gore ka moka le bolele ka go dumelelana, le gore go se be le dikarogano gare ga lena, eupša gore le be batee ka mo go feletšego monaganong o swanago le tseleng e swanago ya go nagana.” Keletšo yeo e sa šoma le lehono. Ga se gwa swanela go ba le dikarogano ka phuthegong.—1 Bakorinthe 1:10-13; bala Baroma 16:17, 18.

10. Paulo o gopoditše Bakriste ka’ng, gona re ithuta’ng go seo?

10 Paulo o ile a gopotša Bakriste ba tloditšwego gore ke baagi ba legodimong le gore ga se ba swanela go dula ba naganne ka ‘dilo tša lefaseng.’ (Bafilipi 3:17-20) * (Bona mongwalo wa ka tlase.) Batlotšwa ke batseta  bao ba emetšego Modimo le Kriste. Ge motseta wa naga e itšego a le nageng e šele, ga a leke go rarolla mathata a naga yeo le go tsenatsena dipolotiking tša yona. Ka mo go swanago, e ka se be ga maleba gore batlotšwa ba tšee karolo go rarolleng mathata a lefase le le go tsenela dipolotiki. (2 Bakorinthe 5:20) Bao ba nago le kholofelo ya go phela ka mo go sa felego mo lefaseng le bona ba botegela Mmušo wa Modimo e bile ga ba tšee karolo dikgohlanong tša lefase le.

ITLWAETŠE GO BOTEGELA MMUŠO WA MODIMO

11, 12. (a) Ke mekgwa efe yeo re swanetšego go e phema ge e ba re nyaka go dula re botegela Mmušo wa Modimo? (b) Kgaetšedi yo mongwe o be a ikwa bjang ka morafo o itšego, gona o thušitšwe ke’ng go fetoga?

11 Dinageng tše dintši, batho ba ikwa ba batamelane kgauswi le bao ba nago le histori e swanago le ya bona, setšo le go bolela leleme le le swanago. Gantši ba ikgantšha kudu ka lefelo leo ba tšwago go lona. Eupša rena ga se ra swanela go dumelela moya o bjalo o re fetela. Go e na le moo, re swanetše go fetoša tsela yeo re naganago ka yona e bile re tlwaetše matswalo a rena gore re dule re sa tšee lehlakore dilong tšeo. Re ka dira seo bjang?

12 Ka mohlala, Mirjeta * (bona mongwalo wa ka tlase) o belegetšwe nageng yeo e bego e bitšwa Yugoslavia. Batho ba tikologong yeo a goletšego go yona ba be ba hloile morafo wa Maserbia. Ka morago ga gore a ithute ka Jehofa, o ile a lemoga gore Modimo ga a lebelele morafo o mongwe o le bohlokwa go feta o mongwe le gore Sathane o nyaka gore batho ba hloyane. Ka gona o ile a leka ka thata go fetoša tsela yeo a bego a ikwa ka yona. Eupša ge go be go tsoga ntwa gare ga merafo ya tikologong yeo a bego a dula go yona, Mirjeta o ile a thoma go hloya Maserbia gape. O be a bile a sa nyake le go bolela le ona ka Beibele. O be a tseba gore seo se fošagetše, ka gona o ile a kgopela Jehofa gore a mo thuše go lahla mokgwa woo. Le gona o ile a mo kgopela gore a mo thuše go thoma go bula madibogo. Mirjeta o re: “Ke hweditše gore go swarega bodireding go nthuša kudu. Ge ke le bodireding, ke leka go ekiša lerato la Jehofa, gomme ke bone lehloyo leo ke bego ke na le lona le fela.”

13. (a) Zoila o ile a diragalelwa ke’ng, gona o ile a arabela bjang? (b) Re ka ithuta’ng phihlelong ya Zoila?

13 Zoila ke kgaetšedi yo a tšwago Mexico yo a hudugetšego Yuropa. Phuthegong yeo a lego go yona, go na le bana babo rena le dikgaetšedi bao ba tšwago karolong e nngwe ya Latin America. Zoila o re ba bangwe ba bona ba be ba kwera naga ya gabo, setšo le mmino wa moo. Seo se be se mo kweša bohloko, ka gona o ile a rapela Jehofa gore a mo thuše a se ke a kgopišega. Nkabe o ile wa dira’ng ge o be o le maemong a gagwe? Ba bangwe ba bana babo rena le dikgaetšedi ba sa na le bothata bja go laola maikwelo a bona ge batho ba bolela gampe ka lefelo leo ba tšwago go lona. Ka gona le ka mohla ga re nyake go bolela goba go dira selo le ge e le sefe seo se tla dirago gore go bonagale eka morafo o itšego o kaone go feta o mongwe. Ga re nyake go baka dikarogano ka phuthegong goba lefelong le ge e le lefe.—Baroma 14:19; 2 Bakorinthe 6:3.

Kgopela Jehofa gore a go thuše go ikwa ka tsela yeo yena a ikwago ka yona ka batho

14. Ke’ng seo se ka go thušago go lebelela batho ka tsela yeo Jehofa a ba lebelelago ka yona?

14 Ka moka ga rena re a tseba gore bahlanka ba Jehofa ba boteeng, ka gona le ka mohla ga se ra swanela go nagana gore lefelo le  itšego goba naga e itšego e phala tše dingwe. Eupša lapa la geno le batho bao o phetšego le bona ba ka ba ba ile ba dira gore o rate moo o tšwago gona. Ka go re’alo, mohlomongwe o sa fela o nagana ka tsela e fošagetšego ka ditšhaba tše dingwe, ditšo, maleme goba merafo. Ke’ng seo se ka go thušago gore o fetoge? Naganišiša kamoo Jehofa a ikwago ka gona ka batho bao ba ikgantšhago ka naga ya gabo bona goba bao ba naganago gore ba kaone go feta ba bangwe. Dira nyakišišo ka taba ye thutong ya motho ka noši goba nakong ya borapedi bja lapa. Ke moka o kgopele Jehofa gore a go thuše go ikwa ka tsela yeo yena a ikwago ka yona ka batho.—Bala Baroma 12:2.

E le gore re botegele Jehofa, re swanetše go mo kwa go sa šetšwe seo batho ba bangwe ba ka re dirago sona (Bona serapa 15 le 16)

15, 16. (a) Batho ba bangwe ba tla arabela bjang ka ge re sa swane le bona? (b) Batswadi ba ka thuša bana ba bona bjang gore ba dule ba botegela Jehofa?

15 Re nyaka go hlankela Jehofa ka letswalo le le hlwekilego, ka gona ka dinako tše dingwe re tlo dira dilo ka tsela e fapanego kudu le bašomigotee le rena, bao re tsenago le bona ka klaseng, baagišani goba ba leloko. (1 Petro 2:19) Jesu o re lemošitše gore ba bangwe ba tla re hloya ka gobane re sa swane le bona. Gopola gore batho ba bantši bao ba re ganetšago ga ba tsebe selo ka Mmušo wa Modimo. Ka gona ga ba kwešiše gore ke ka baka la eng re bona go le bohlokwa gore re botegele Mmušo woo go e na le go botegela mebušo ya batho.

16 Gore re botegele Jehofa, re swanetše go mo kwa go sa šetšwe seo batho ba bangwe ba tlago go re dira sona goba go se bolela. (Daniele  3:16-18) Gantši bafsa ke bona ba ka thatafalelwago ke go dira dilo ka tsela e fapanego le ya ba bangwe. Lena batswadi, thušang bana ba lena go ba le sebete sekolong. Bana ba lena ba ka tšhaba go gana go dumediša folaga goba go tšea karolo meletlong e mengwe ya boratanaga. Nakong ya borapedi bja lapa, le ka ithuta kamoo Jehofa a ikwago ka gona ka ditaba tše. Ba ruteng kamoo ba ka hlalosago ditumelo tša bona ka tsela e kwagalago le ka tlhompho. (Baroma 1:16) Le gona, ge e ba go nyakega, thušang bana ba lena ka go bolela le barutiši ba bona gomme le ba hlalosetše seo re se dumelago.

THABELA TLHOLO YA JEHOFA KA MOKA

17. Ke tsela efe ya go nagana yeo re swanetšego go e phema, gona ka baka la’ng?

17 Gantši re thabela dijo, leleme, lefelo le setšo sa moo re goletšego gona. Eupša na re nagana gore ka mehla seo re se ratago se phala seo ba bangwe ba se ratago? Jehofa o nyaka gore re thabele dilo tše di fapafapanego tšeo a di hlodilego. (Psalme 104:24; Kutollo 4:11) Ka gona ke ka baka la’ng o gapeletša gore tsela ya gago ya go dira dilo e phala ya ba bangwe?

Jehofa o nyaka gore batho ba mehuta ka moka ba tle ba phele ka mo go sa felego

18. Ke ka baka la’ng re swanetše go nagana ka ba bangwe ka tsela yeo Jehofa a naganago ka yona ka bona?

18 Jehofa o nyaka gore batho ba mehuta ka moka ba ithute ka yena, ba mo rapele gomme ba tle ba phele ka mo go sa felego. (Johane 3:16; 1 Timotheo 2:3, 4) Ka gona, ge bana babo rena ba na le dikgopolo tše di sa swanego le tša rena, re nyaka go ba theetša, ge feela di sa thulane le seo Jehofa a se nyakago. Ge re dira seo, re ipshina ka bophelo gomme re dula re le boteeng le bana babo rena le dikgaetšedi. Go etša ge re ithutile sehlogong se, ga re tšee karolo dikgohlanong tša lefase, ka ge re botegela Jehofa le Mmušo wa gagwe. Re hloile boikgantšho le diphadišano tša lefaseng la Sathane. Ruri re a leboga gore Jehofa o re rutile go rata khutšo le go ikokobetša! Re ikwa go swana le mopsalme yo a itšego: “Bona gore ke mo gobotse le mo go kgahlišago gakaakang ge bana ba motho ba dudišana ka botee!”—Psalme 133:1.

^ ser. 10 Ba bangwe phuthegong ya kua Filipi ba ka ba ba be ba na le tshwanelo ya go ba baagi ba Roma, ka baka leo, ba be ba na le ditshwanelo tše dintši go feta bana babo bona bao e bego e se baagi ba Roma.

^ ser. 12 Maina a mangwe a fetotšwe.