Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2015

Phela ka go Dumelelana le Thapelo ya Mohlala—Karolo II

Phela ka go Dumelelana le Thapelo ya Mohlala—Karolo II

“Tatago lena o tseba gore ke dilo dife tšeo le di nyakago.”—MATEO 6:8.

1-3. Ke ka baka la’ng kgaetšedi yo mongwe a be a kgodišegilego gore Jehofa o be a tseba seo a se hlokago?

LANA, e lego mmulamadibogo wa ka mehla, a ka se tsoge a lebetše seo se ilego sa direga ge a be a etetše Jeremane ka 2012. O nagana gore Jehofa o ile a araba dithapelo tša gagwe tše pedi. Ge a be a le ka tereneng a eya boemafofaneng, o ile a kgopela Jehofa gore a mo thuše go hwetša motho yo a tlago go boledišana le yena ka Beibele. Ge a fihla boemafofaneng, o ile a hwetša gore sefofane sa gagwe se be se tlo tloga letšatšing le le latelago. Lana o ile a kgopela Jehofa gore a mo thuše ka gobane o be a šetše ka tšhelete e nyenyane gomme a hloka mo a ka robalago gona bošegong bjoo.

2 Eitše ge Lana a fetša go rapela, a kwa motho yo mongwe a re: “Thobela Lana, o dira’ng mo?” E be e le lesogana leo a tsenego le lona sekolo. Le be le sepela le mmago lona le makgolo wa lona, bao ba bego ba le felegeditše moo boemafofaneng ka ge le be le etela Afrika Borwa. Ge Lana a ba botša ka boemo bja gagwe, mmago lesogana leo le makgolo wa lona ba ile ba re  Lana a tle a dule ntlong ya bona. Ba ile ba mmotšiša dipotšišo tše dintši ka ditumelo tša gagwe le ka mošomo wa gagwe wa go ba mmulamadibogo.

3 Mesong e latelago ka morago ga go ja, Lana o ile a araba dipotšišo tša bona tše di oketšegilego tša mabapi le Beibele. Lana o ile a kgopela gore ba mo nee dinomoro tša go ikgokaganya le bona e le gore Hlatse e nngwe e kgone go tšwela pele e araba dipotšišo tša bona. Lana o ile a boela gae a šireletšegile, gomme e sa le mmulamadibogo. O nagana gore Jehofa o arabile dithapelo tša gagwe ka ge a be a tseba seo a se hlokago gomme a mo thuša.—Psalme 65:2.

Ga go hlokagale gore re tshwenyege ka dinyakwa tša rena tša nakong e tlago

4. Re tlo ahlaahla dilo dife?

4 Ge re na le mathata, go bonolo go rapela Jehofa gore a re thuše, gomme o thabela go kwa dithapelo tša rena. (Psalme 34:15; Diema 15:8) Eupša thapelo ya Jesu ya mohlala e re ruta gore go na le dilo tše dingwe tša bohlokwa kudu tšeo re swanetšego go di rapelela. Sehlogong se, re tlo ahlaahla kamoo dikgopelo tše nne tša mafelelo thapelong ya mohlala di ka re thušago go botegela Jehofa.—Bala Mateo 6:11-13.

“RE NEE LEHONO DIJO TŠA RENA TŠA LETŠATŠI LE”

5, 6. Ke ka baka la’ng Jesu a ile a re ruta gore re kgopele “dijo tša rena” gaešita le ge re ka ba re na le dijo tše dintši?

5 Jesu o re rutile gore re kgopele “dijo tša rena,” e sego feela “dijo tša ka.” Victor, e lego molebeledi wa tikologo Afrika, o hlalosa gore: “Gantši ke leboga Jehofa go tšwa pelong gore ga go hlokagale gore nna le mosadi wa ka re tshwenyege ka gore re tlo ja eng, le gore ke mang a tlago go lefa rente. Ka botho bana babo rena ba re hlokomela letšatši le lengwe le le lengwe. Eupša ke rapela gore bao ba re thušago ba kgone go lebeletšana ka katlego le maemo a thata a tša ikonomi.”

6 Rena re ka ba re na le dijo tše dintši, eupša bana babo rena ba bantši ba a diila. Le gona ba bangwe ba wetšwe ke dikotsi. Re ka dira selo se itšego go ba thuša go feta go fo ba rapelela. Ka mohlala, re ka abelana le bona seo re nago le sona. Le gona ka mehla re ka ntšha moneelo bakeng sa go thekga modiro wa lefase ka bophara wa batho ba Jehofa. Re a tseba gore meneelo ya rena e thuša bana babo rena bao ba hlokago thušo.—1 Johane 3:17.

7. Jesu o re rutile bjang gore ‘le ka mohla re se ke ra belaela ka letšatši le le latelago?’

7 Ka morago ga gore Jesu a re rute thapelo ya mohlala, o re rutile gore re se ke ra tshwenyega kudu ka dilo tše di bonagalago. O itše ge e ba Jehofa a kgona go hlokomela matšoba a naga, “na a ka se upše a apeša lena kudu, lena ba tumelo e nyenyane? Ka gona le ka mohla le se ke la belaela la re: . . . ‘Re tla . . . apara’ng?’” Ke moka a boeletša mantšu a rego: “Le ka mohla le se ke la belaela ka letšatši le le latelago.” (Mateo 6:30-34) Ga go hlokagale gore re tshwenyege ka dinyakwa tša rena tša nakong e tlago. Go e na le moo, re swanetše go kgotsofalela dinyakwa tša rena tša motheo tša letšatši le lengwe le le lengwe. Ka mohlala, re ka rapelela gore re hwetše lefelo la go dula, mošomo e le gore  re hlokomele malapa a rena le bohlale bja go dira diphetho tše dibotse ge re babja. Eupša go na le selo se sengwe sa bohlokwa le go feta seo re swanetšego go se rapelela.

8. Mantšu a Jesu a gore re rapelele dijo tša rena tša letšatši le letšatši a re gopotša’ng? (Bona seswantšho seo se lego mathomong.)

8 Mantšu a Jesu a gore re rapelele dijo tša rena tša letšatši le letšatši a re gopotša selo se sengwe seo a se boletšego, o itše: “Motho a ka se phele ka senkgwa feela, eupša o tla phela le ka polelo e nngwe le e nngwe e tšwago molomong wa Jehofa.” (Mateo 4:4) Ka gona re swanetše go rapelela gore Jehofa a tšwele pele a re ruta le go re nea dilo tšeo re di hlokago gore re dule re le kgauswi le yena.

“RE LEBALELE MELATO YA RENA”

9. Ke ka baka la’ng dibe tša rena di swana le melato?

9 Jesu o itše: “Re lebalele melato ya rena.” Nakong e nngwe o itše: “Re lebalele dibe tša rena.” (Mateo 6:12; Luka 11:4) O boletše se ka gobane dibe tša rena di swana le melato goba dikoloto. Ka 1951, Morokami wa Seisemane o hlalositše gore ge re dira sebe, go swana le ge eka re kolota Jehofa. Re kolota Jehofa lerato le go mo kwa. Ka gona ge re direla Modimo sebe, ga re mo nee seo re mo kolotago sona. Morokami woo o boletše gore ge nkabe Jehofa a be a nyaka, o be a ka fediša segwera sa rena le yena. O okeditše ka gore: “Go dira sebe ke go se rate Modimo.”—1 Johane 5:3.

Ka mehla leboga Jehofa bakeng sa mpho ya bohlokwa ya topollo

10. Ke ka baka la’ng Jehofa a ka re lebalela dibe tša rena, gona re swanetše go ikwa bjang ka seo?

 10 Re leboga kudu gore Jehofa o re neile sehlabelo sa Jesu sa topollo gore re kgone go lebalelwa dibe! Letšatši le lengwe le le lengwe re hloka gore Jehofa a re lebalele. Jesu o re hwetše nywageng e ka bago e 2 000 e fetilego, eupša lehono re holwa ke topollo. Ka mehla re swanetše go leboga Jehofa bakeng sa mpho ye ya bohlokwa. Ga go le o tee wa rena yo a bego a ka kgona go lefa topollo yeo e bego e hlokega gore re lokollwe sebeng le lehung. (Bala Psalme 49:7-9; 1 Petro 1:18, 19.) Mantšu ao a lego thapelong ya mohlala a gore “re lebalele melato ya rena” a re gopotša gore ka ge re hloka topollo, bana babo rena le dikgaetšedi le bona ba a e hloka. Jehofa le yena o nyaka gore re nagane ka bona le ka tswalano ya bona le yena. Se se ra gore re ba lebalele kapejana ge ba re senyetša. Gantši ba re direla diphošo tše dinyenyane, eupša ge re ba lebalela, re bontšha gore re a ba rata. Le gona re bontšha gore re leboga gore Jehofa o a re lebalela.—Bakolose 3:13.

11. Ke ka baka la’ng go le bohlokwa gore re lebalele ba bangwe?

11 Ka ge re sa phethagala, ka dinako tše dingwe go ka ba thata go lebalela bao ba re kgopišago. (Lefitiko 19:18) Ge re ka thoma go bolela ka seo ba re dirilego sona, ba bangwe ka phuthegong ba ka tsena taba yeo gomme seo sa kgoma botee bja phuthego. Ge e ba re dumelela se se tšwela pele, re tla ba re bontšha gore ga re tšeele godimo mpho ya Modimo ya topollo gomme re ka se hwetše mehola ya yona. (Mateo 18:35) Ge re sa lebalele ba bangwe, Jehofa le yena a ka se re lebalele. (Bala Mateo 6:14, 15.) Le gona, ge e ba re nyaka gore Jehofa a re lebalele, ga se ra swanela go dula re dira selo le ge e le sefe seo a se hloilego.—1 Johane 3:4, 6.

Ge e ba o nyaka gore Modimo a go lebalele, o swanetše go lebalela ba bangwe (Bona serapa 11)

“O SE RE TSENYE MOLEKONG”

12, 13. (a) Jesu o ile a diragalelwa ke’ng ka morago ga gore a kolobetšwe? (b) Ke ka baka la’ng re se ra swanela go sola ba bangwe ge re ineela tekong? (c) Jesu o ile a hlatsela’ng ka go botega go fihla lehung?

12 Mantšu a thapelong ya mohlala ao a rego, “o se re tsenye molekong” a re gopotša seo se ilego sa diragalela Jesu ka moragonyana ga gore a kolobetšwe. Moya wa Modimo o ile wa mo iša lešokeng “gore a lekwe ke Diabolo.” (Mateo 4:1; 6:13) Ke ka baka la’ng Jehofa a ile a dumelela se? Jehofa o ile a romela Jesu lefaseng go tlo rarolla kgang yeo e tsogilego ge Adama le Efa ba be ba gana pušo ya Jehofa. Borabele bja bona bo rotošitše dipotšišo tšeo go bego go tla tšea nako gore di arabje. Ka mohlala, na go be go na le phošo ka tsela yeo Jehofa a bopilego batho? Na motho yo a phethagetšego o be a ka kgona go dula a botegela Jehofa ge a lekwa ke “yo kgopo”? Le gona na go be go tla ba kaone ge batho ba be ba ka ipuša? (Genesi 3:4, 5) Nakong e tlago, ge dipotšišo tše ka moka di arabilwe ka tsela yeo e kgotsofatšago Jehofa, yo mongwe le yo mongwe legodimong le mo lefaseng o tla tseba gore tsela ya Jehofa ya go buša ke yona e kaonekaone.

Re ka kgona go botegela Jehofa gaešita le maemong a thata kudu

 13 Jehofa ke yo mokgethwa, ka gona le ka mohla ga a leke motho le ge e le ofe ka dilo tše kgopo. “Moleki” ke Sathane. (Mateo 4:3) Sathane o re leka ka ditsela tše dintši. Eupša re na le kgetho. Yo mongwe le yo mongwe wa rena a ka kgetha go ganetša teko goba go se e ganetše. (Bala Jakobo 1:13-15.) Ge Jesu a be a lekwa ke Sathane, gateetee o ile a mo ganetša ka go tsopola Lentšu la Modimo. Jesu o be a botegela Modimo. Lega go le bjalo, Sathane ga se a ka a hwa matwa. O ile a leta “go fihla ka nako e nngwe e loketšego” gore a leke Jesu. (Luka 4:13) Eupša go sa šetšwe seo Sathane a bego a se dira, Jesu o ile a dula a ekwa Modimo e le Mmuši wa gagwe. O ile a hlatsela gore motho yo a phethagetšego a ka kgona go botegela Jehofa gaešita le maemong a thata kudu. Eupša Sathane o leka balatedi ba Jesu, go akaretša le wena, gore ba se kwe Jehofa.

Jehofa o kgodišegile gore re ka dula re mmotegela, e bile o nyaka go re thuša

14. Re swanetše go dira’ng gore re pheme go tsena molekong?

14 Dipotšišo tšeo di ilego tša rotošwa mabapi le pušo ya Jehofa di sa swanetše go arabja. Ka gona, ga bjale Jehofa o sa dumeletše Sathane go re leka. Jehofa ga a “re tsenye molekong.” Ge e le gabotse, o kgodišegile gore re ka dula re mmotegela e bile o nyaka go re thuša. Eupša le ka mohla ga a re gapeletše go dira se se nepagetšego. O hlompha tokologo ya rena ya go ikgethela. Ka gona o re dumelela go ikgethela go botega goba go se botege. E le gore  re pheme go tsena molekong, re swanetše go dira dilo tše tše pedi: re swanetše go dula re le kgauswi le Jehofa le go dula re rapela gore a re thuše. Jehofa o araba bjang dithapelo tša rena tša gore re pheme go tsena molekong?

Dula o le kgauswi le Jehofa gomme o fišege bodireding (Bona serapa 15)

15, 16. (a) Ke meleko efe e mengwe yeo re swanetšego go e phema? (b) Re swanetše go bea mang molato ge re ineela molekong?

15 Jehofa o re nea moya wa gagwe o mokgethwa o matla go re thuša go lwantšha diteko tša Sathane. Le gona Jehofa o re neile Beibele le phuthego go re lemoša ka dikotsi. Ka mohlala, o re lemoša gore re se ke ra diriša nako ya rena e ntši, tšhelete le matla dilong tšeo re sa di hlokego. Espen le Janne ba dula nageng e humilego kua Yuropa. E bile babulamadibogo ba ka mehla ka nywaga e mentši tikologong yeo go bego go na le tlhokagalo ya bagoeledi. Ge ba eba le ngwana, ba ile ba swanelwa ke go tlogela bobulamadibogo, gomme gona bjale ba na le bana ba babedi. Espen o re: “Gantši re rapela Jehofa gore re se ke ra wela tekong ka ge ga bjale re se sa kgona go fetša nako e ntši re dira mediro ya pušo ya Modimo go etša peleng. Re kgopela Jehofa gore a re thuše go kgomarela bomoya bja rena le go dula re fišega bodireding.”

16 Moleko o mongwe wo re swanetšego go o phema ke go bogela diswantšho tša batho bao ba sa aparago. Ge re ka ineela molekong wo, re ka se bee Sathane molato. Ka baka la’ng? Ka gobane Sathane le lefase la gagwe ba ka se re gapeletše go dira selo le ge e le sefe se se fošagetšego. Ba bangwe ba bogela diswantšho tša batho bao ba sa aparago ka gobane ga ba ganetše dikgopolo tše mpe. Eupša ba bantši ba bana babo rena le dikgaetšedi ba kgonne go phema moleko wo, gomme le rena re ka kgona.—1 Bakorinthe 10:12, 13.

“RE HLAKODIŠE GO YO KGOPO”

17. (a) Re ka bontšha bjang gore re nyaka gore Jehofa a “re hlakodiše go yo kgopo”? (b) Kgauswinyane re tlo imologa go eng?

17 Re ka bontšha bjang gore re nyaka gore Jehofa a “re hlakodiše go yo kgopo”? Ga se ra swanela go ba “karolo ya lefase” e bile ga se ra swanela go “rata lefase goba dilo tše di lego lefaseng.” (Johane 15:19; 1 Johane 2:15-17) Ruri re tla imologa ge Jehofa a fediša Sathane le lefase le le kgopo! Eupša ge re sa letile seo, re swanetše go gopola gore Sathane o “galefile kudu, ka ge a tseba gore o na le nako e kopana.” O tla dira sohle seo a ka se kgonago go re dira gore re kgaotše go hlankela Jehofa. Ka gona re swanetše go dula re rapela Jehofa gore a re šireletše go Sathane.—Kutollo 12:12, 17.

18. Re swanetše go dira’ng ge e ba re nyaka go phologa bofelo bja lefase la Sathane?

18 Na o nyaka go phela lefaseng leo le se nago Sathane? Gona tšwela pele o rapelela gore Mmušo wa Modimo o tle, gore leina la Modimo le kgethagatšwe le gore thato ya gagwe e direge mo lefaseng. Ka mehla ithekge ka Jehofa gore a go hlokomele le go go nea dilo tšohle tše o di hlokago gore o dule o mmotegela. Ee, dira sohle se o ka se kgonago gore o phele ka go dumelelana le thapelo ya mohlala.