Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2015

‘Go Nyakega Gore o Kgotlelele’

‘Go Nyakega Gore o Kgotlelele’

GE Anita a be a eba yo mongwe wa Dihlatse tša Jehofa, monna wa gagwe o ile a galefa kudu. * (Bona mongwalo wa ka tlase.) O ile a leka go mo thibela go ya dibokeng gomme a mmotša tsebe-go-kwa gore le ka mohla a se ke a bitša leina la Modimo. Ge a mo kwa a bitša leina Jehofa, o be a galefa o šoro.

Go oketša moo, monna wa Anita o be a sa nyake gore a rute bana ba bona ka Jehofa goba go ya le bona dibokeng. Se se be se le thata kudu go yena ka gobane o be a swanetše go leka go ruta bana ba bona ka Jehofa eupša monna wa gagwe a sa tsebe.

Go etša ge phihlelo ya Anita e bontšha, setho se itšego sa lapa se ka leka go go thibela go hlankela Jehofa. Goba o ka ba o lebeletšane le boemo bjo bongwe bjo thata. Mohlomongwe e šetše e le kgale o babja. Mohlomongwe o hwetšwe ke ngwana, monna goba mosadi. Goba mohlomongwe setho sa lapa seo o se ratago ga se sa hlankela Jehofa. Maemong a, o ka dira’ng gore o dule o botegela Jehofa?

Moapostola Paulo o itše: ‘Go nyakega gore o kgotlelele.’ (Baheberu 10:36) Ka gona, ke’ng seo se ka go thušago go kgotlelela?

RAPELA JEHOFA GORE A GO THUŠE

Ge o na le mathata, gopola gore o swanetše go ithekga ka Jehofa gore a go thuše go kgotlelela. Mo rapele gore a go thuše. Se ke seo Ana a ilego a se dira ge monna wa gagwe a ehwa go sa letelwa. Ba be ba na le nywaga e 30 ba nyalane. Ana o re: “Ga se a ka a boa gae go tšwa mošomong. O be a na le nywaga e 52 feela.”

Mošomo wa Ana o ile wa mo dira gore a dule a swaregile, eupša ga se wa ka wa tloša bohloko bjo a bego a bo kwa. O ile a dira’ng? O re: “Ke ile ka rapela Jehofa ka go tšwa pelong gomme ka mo kgopela gore a nthuše.” Ana o a tseba gore Jehofa o ile a mo thuša ka gobane ka morago ga gore a rapele, o be a ikwa a na le khutšo e bile a sa kwe bohloko kudu. Le gona o re: “Ke tloga ke kgodišegile gore Jehofa o tlo tsoša monna wa ka nakong ya tsogo.”—Bafilipi 4:6, 7.

Jehofa o holofetša bahlanka ba gagwe gore o tla kwa dithapelo tša bona. (Psalme 65:2) Le gona o tla ba nea selo se sengwe le se sengwe seo ba se hlokago gore ba tšwele pele ba mo hlankela. Jehofa o tla go thuša gore o mmotegele gaešita le maemong a thata.

 DULA O LE KGAUSWI LE BANA BENO LE DIKGAETŠEDI

Go na le tsela e nngwe yeo Jehofa a re thušago ka yona gore re kgotlelele. O re neile bana babo rena le dikgaetšedi ka phuthegong. Re ka ithuta tseleng yeo bana babo rena ba kua Thesalonika ba ilego ba thušana ka yona ge ba be ba tlaišwa o šoro. Nakong yeo, go be go le bohlokwa le go feta gore ba dule ba kgothatšana. (1 Bathesalonika 2:14; 5:11) Ba ile ba thuša bana babo bona le dikgaetšedi go dula ba botegela Jehofa ka go bokana gotee le ka go ba bagwera ba kgonthe. Re ka dira’ng gore re dule re botega go etša bana babo rena ba Thesalonika?

Re swanetše go ba le bagwera ba kgonthe ka phuthegong gomme re kgothatšane, kudukudu dinakong tše thata. (Baroma 14:19) Moapostola Paulo o ile a tlaišega ka baka la go swarwa gampe le ka baka la mathata a mangwe, eupša Jehofa o ile a mo nea matla a go kgotlelela. Ka mohlala, Jehofa o ile a diriša bana babo rena le dikgaetšedi gore ba kgothatše Paulo. Moapostola yo o boletše ka bagwera ba gagwe gore: “Ke bona bao ba tlogago ba mmatlafatša.” (Bakolose 4:10, 11) Bana babo rena ba ba be ba rata Paulo. Ka gona ge a be a hloka thušo, ba be ba mo homotša le go mo kgothatša. Mohlomongwe o ka nagana dinako tša ge bana babo rena le dikgaetšedi ba phuthegong ya geno ba be ba go botša goba ba go direla selo seo se ilego sa go kgothatša.

 KGOPELA BAGOLO GORE BA GO THUŠE

Le gona Jehofa o go neile bagolo ka phuthegong. Banna ba ba ka go kgothatša le go go nea keletšo e botse e tšwago ka Beibeleng. Ba “swana le lefelo la go tšhabela phefo le lefelo la go utela ledimo, [ba] swana le melapo nageng e se nago meetse, le moriti wa leswika le legolo nageng e omilego.” (Jesaya 32:2) Go a re homotša go tseba gore bana babo rena ba ba dula ba loketše go re thuša. Ka gona ge o na le mathata, eya go bagolo. Ba ka go thuša gore o tšwele pele o hlankela Jehofa.

Ke therešo gore bagolo ba ka se rarolle mathata a gago ka moka. Ba swana le wena, le bona ga se ba phethagala. (Ditiro 14:15) Eupša o ka ikwa o imologile ge o eya go mogolo gomme a rapela Jehofa mabapi le bothata bja gago. (Jakobo 5:14, 15) Ka mohlala, bagolo ba ile ba kgothatša ngwanabo rena yo mongwe kua Italy yo a feditšego nywaga e mentši a na le bothata bjo bogolo bja tša maphelo. Ge e le gabotse, ngwanabo rena yo o itše: “Lerato la bana babo rena le diketelo tša bona tša ka mehla di nthušitše go kgotlelela.” Ge e ba o na le mathata, Jehofa o nyaka gore o kgopele bagolo gore ba go thuše.

SWAREGA KA GO HLANKELA JEHOFA

Ge re swarega ka go hlankela Jehofa, re tla bona kamoo Jehofa a re thušago ka gona. John o ile a dira sona seo. Ge a be a na le nywaga e 39, o ile a hwetša gore o na le mohuta o sa tlwaelegago wa kankere. O be a sa kgolwe gore o a babja, kudukudu ka ge e be e se motho yo mogolo kudu. Le gona o be a tshwenyegile ka mosadi wa gagwe le morwa wa bona yo a bego a na le nywaga e meraro feela. O re: “Mosadi wa ka o be a swanetše go hlokomela ngwana wa rena yo monyenyane, a hlokomele le nna le go nthuša go ya mabakeng ka moka a tša kalafo.” Ka baka la kalafo yeo John a bego a e hwetša, o be a lapa kudu e bile a na le bothata bja mala. Go be go sa felele moo. John o ile a kwa gore tatagwe o be a babja wa go hwa gomme a hloka motho yo a ka mo hlokomelago.

Ke’ng se se thušitšego John le lapa la gagwe nakong yeo e thata? Gaešita le ge gantši John a be a ikwa a lapile, o ile a kgonthišetša gore lapa la gagwe le dula le swaregile ka go hlankela Jehofa. O re: “Re be re eba gona dibokeng ka moka, re eya tšhemong beke le beke e bile re swara borapedi bja lapa ka mehla gaešita le ge go be go le thata.” John o ile a bona kamoo go lego bohlokwa ka gona go boloka tswalano ya gagwe le Jehofa e tiile. Gaešita le ge mathomong a be a maketše e bile a tshwenyegile, go se go ye kae o ile a ikwa a le kaone. O be a tseba gore Jehofa o a mo rata le gore o be a mo nea matla ao a bego a a hloka. Le wena Jehofa a ka go thuša ka tsela e swanago ge o tshwenyegile goba o boifa. John o re: “Jehofa a ka go matlafatša, go etša ge a ile a mmatlafatša.”

Ge o na le mathata, gopola mantšu a Paulo ao a rego: ‘Go nyakega gore o kgotlelele.’ Ithekge ka Jehofa ka go mo rapela. Dula o le kgauswi le bana beno ka phuthegong, kgopela bagolo gore ba go thuše gomme o dule o swaregile ka go hlankela Jehofa. O tla go thuša bothateng le ge e le bofe bjo o ka bago o na le bjona gona bjale goba bothateng le ge e le bofe bjo bo ka tšwelelago nakong e tlago.

^ ser. 2 Maina a mangwe a fetotšwe.