Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  June 2015

O be a Rata Batho

O be a Rata Batho

“Dilo tšeo di bego di nkgahla e be e le bana ba batho.”—DIEMA 8:31.

1, 2. Jesu o bontšhitše bjang gore o rata batho kudu?

MORWA wa mathomo wa Modimo ke mohlala o mogologolo wa bohlale bja Jehofa bjo bo sa lekanywego le selo e bile e be e le “mošomi yo a nago le bokgoni” wa Tatagwe. Nagana kamoo Jesu a bego a thabile ka gona ge Tagagwe a be a “bopa magodimo” gomme “a thea metheo ya lefase.” Eupša dilong ka moka tšeo Tatagwe a di bopilego, Jesu o be a ‘kgahlwa kudu ke bana ba batho.’ (Diema 8:22-31) Ee, Jesu o ratile batho go tloga mathomong.

2 Ka morago, Jesu o ile a bontšha gore o kwa Tatagwe le go mo rata gotee le gore o tloga a rata batho ka moka ge a be a ithaopela go tloga legodimong gomme a etla lefaseng e le motho. Jesu o dirile se ka go rata e le gore a tle a fane ka bophelo bja gagwe e le “topollo bakeng sa ba bantši.” (Mateo 20:28; Bafilipi 2:5-8) Ge Jesu a be a le mo lefaseng, Modimo o ile a mo nea matla a go dira mehlolo. Mehlolo yeo e bontšha gore Jesu o rata batho kudu le gore kgauswinyane o tlo direla batho dilo tše dibotse kudu.

3. Re tlo ahlaahla’ng sehlogong se?

3 Ge Jesu a be a le mo lefaseng, o ile a bolela “ditaba tše  dibotse tša Mmušo wa Modimo.” (Luka 4:43) O be a tseba gore Mmušo wo o tla kgethagatša leina la Tatagwe le go rarolla mathata a batho sa ruri. Ge Jesu a be a dutše a bolela ditaba tše, o be a dira le mehlolo e mentši. Mehlolo yeo e ile ya bontšha gore o tloga a tshwenyegile ka batho ka moka. Ke ka baka la’ng seo se le bohlokwa go rena? Ka gobane seo a se dirilego se re nea kholofelo e tiilego ka bokamoso. Ka gona anke re ahlaahleng e mene ya mehlolo ya Jesu.

“MATLA A JEHOFA A BE A LE GO YENA GORE A FODIŠE BATHO”

4. Go ile gwa direga’ng ge Jesu a be a kopana le monna yo a bego a swerwe ke bolwetši bja lephera?

4 Nakong ya bodiredi bja gagwe, Jesu o ile a ya tikologong yeo e bitšwago Galilea. Go o mongwe wa metse ya moo, o ile a kopana le monna yo a bego a swerwe ke bolwetši bja go šiiša bja lephera. (Mareka 1:39, 40) Monna yo o be a babja kudu moo Luka, yoo e bego e le ngaka, a ilego a hlalosa gore o be a “tletše lephera.” (Luka 5:12) Beibele e re ge monna yoo a bona Jesu, o ile a “wela fase ka sefahlego sa gagwe a mo kgopela a re: ‘Morena, ge feela o rata, o ka ntlhwekiša.’” Monna yo o be a tseba gore Jesu o na le matla a go ka mo fodiša, eupša o be a nyaka go bona ge e ba Jesu a be a rata go mo fodiša. Ka baka la’ng? Ka gobane monna yo o be a tseba Bafarisei, bao ba bego ba šišimišwa ke batho bao ba swerwego ke lephera. Eupša ke’ng seo Jesu a bego a se nagana ka monna yo? O be a tlo swara bjang monna yo yoo mohlomongwe a bego a šetše a golofaditšwe ke bolwetši bjo? Wena nkabe o ile wa dira’ng?

5. Ke ka baka la’ng Jesu a ile a rata go hlwekiša molephera?

5 Go bonagala molephera yo a se a ka a goeletša ka gore, “Ga se ka hlweka, ga se ka hlweka!” go etša ge Molao wa Moshe o be o laetše gore balephera ba dire bjalo. (Lefitiko 13:43-46) Eupša Jesu ga se a ka a mo galefela. Go e na le moo, o be a tshwenyegile ka monna yoo gomme a nyaka go mo thuša. Ga re tsebe gabotse seo Jesu a bego a se nagana, eupša re tseba kamoo a bego a ikwa ka gona. O ile a šokela monna yoo kudu moo a ilego a dira mohlolo. O ile a kgwatha monna yoo, e lego selo seo go se nago motho yo a bego a ka se dira. Jesu o ile a bolela ka kgodišego le kwelobohloko gore: “Ke a rata. Hlweka.” Ke moka “lephera la mo tloga.” (Luka 5:13) Go molaleng gore Jehofa o ile a nea Jesu matla a go dira mohlolo wo o makatšago le go bontšha kamoo a tlogago a rata batho.—Luka 5:17.

6. Ke’ng se se kgahlišago ka mehlolo yeo Jesu a ilego a e dira, gona e re bontšha’ng?

6 Jesu o ile a kgona go dira mehlolo e mentši e makatšago ka thušo ya matla a Modimo. Ga se a fodiša balephera feela. Jesu o ile a fodiša le batho bao ba bego ba swerwe ke malwetši a mantši a mehutahuta. Beibele e re botša gore batho ba ile ba makala ge ba be ba “bona dimumu di bolela le dihlotša di sepela le difofu di bona.” (Mateo 15:31) Ge Jesu a be a fodiša motho, go be go sa nyakege gore motho yo mongwe yo a phetšego gabotse a neele ka setho sa gagwe. Go e na le moo, Jesu o be a na le matla a go fodiša ditho tše di babjago tša motho le ge e le ofe. Le gona o be a fodiša batho ka ponyo-ya-leihlo, ka dinako tše dingwe a fodiša le batho bao ba lego kgole le yena. (Johane 4:46-54) Mehlala ye e kgahlišago e re bontšha’ng? E re bontšha gore Kgoši ya rena e lego Jesu Kriste, o na le matla le kganyogo ya go fodiša malwetši  sa ruri. Ge re ithuta kamoo Jesu a ilego a swara batho ka gona, re ba le kgodišego ya gore lefaseng le lefsa “o tla kwela mmotlana le modiidi bohloko.” (Psalme 72:13) Jesu o tla fodiša bohle bao ba tlaišegago ka gobane o tloga a rata go dira bjalo.

“TSOGA, TŠEA LEAKO LA GAGO O SEPELE”

7, 8. Hlalosa seo se ilego sa direga pele ga ge Jesu a ka gahlana le monna yo a babjago bodibeng bja Bethesida.

7 Dikgwedi tše sego kae ka morago ga gore Jesu a fodiše molephera, o ile a tloga Galilea gomme a ya Judea moo a ilego a tšwela pele a bolela ditaba tše dibotse tša Mmušo wa Modimo. Batho ba dikete ba swanetše go ba ba kwele molaetša wa Jesu le go kgongwa dipelo ke lerato la gagwe. Jesu o be a tloga a nyaka go homotša badiidi le bao ba gateletšwego gotee le go ba nea kholofelo.—Jesaya 61:1, 2; Luka 4:18-21.

8 Ka kgwedi ya Nisani, Jesu o ile a ya Jerusalema go yo bina Paseka. Motseng wo go be go tletše ka ge batho ba be ba tlo bina monyanya wo o kgethegilego. Ka leboa la tempele go be go na le bodiba bjo bo bitšwago Bethesida, gomme gona moo Jesu o ile a gahlana le monna yo a bego a sa kgone go sepela.

9, 10. (a) Ke ka baka la’ng batho ba be ba rata go ya bodibeng bja Bethesida? (b) Jesu o ile a dira’ng bodibeng bjoo, gona seo se re ruta’ng? (Bona seswantšho seo se lego mathomong a sehlogo.)

9 Mašaba a balwetši a be a rata go ya Bethesida. Ka baka la’ng? Ka gobane a be a dumela gore molwetši o be a ka fodišwa ka mohlolo ge a be a ka itahlela ka bodibeng bjoo nakong ya ge meetse ao a biloga. Nagana ka tlhakatlhakano yeo e swanetšego go ba e be e le gona lefelong leo le tletšego ka batho bao ba hlomolago pelo, ba tshwenyegile e bile ba nyaka go fodišwa. Jesu o be a phethagetše gomme a sa nyake go fodišwa, bjale o be a nyaka’ng lefelong leo? Go rata batho ke gona go dirilego gore a ye moo. E bile ke lona lefelong le moo Jesu a ilego a kopana le monna yo a tlaišitšwego ke bolwetši le pele Jesu a ka belegwa mo lefaseng.—Bala Johane 5:5-9.

Jesu o be a tsomana le bao ba hlokago thušo

10 Jesu o ile a botšiša monna yoo ge e ba a ka rata go fola. Akanya monna yoo a botša Jesu a nyamile gore a ka rata go fola eupša ga go na seo a ka se dirago, ka gobane go be go se na motho yo a bego a ka mo tsenya ka bodibeng bjoo. Ke moka Jesu o ile a botša monna yoo gore a dire selo seo ka tlhago se sa kgonegego. O ile a mmotša gore a tšee leako la gagwe a sepele. Monna yoo o ile a tšea leako la gagwe gomme a thoma go sepela. Mohlolo wo ke bohlatse bjo bo kgahlišago bja seo Jesu a tlago go se dira lefaseng le lefsa. Le gona o bontšha gore Jesu o tloga a rata batho. O be a tsomana le bao ba hlokago thušo. Mohlala wa Jesu o swanetše go re thuša go tšwela pele re tsoma batho bao ba gateletšegilego tšhemong ya gabo rena ka baka la dilo tše mpe tšeo di diregago mo lefaseng.

“KE MANG YO A KGWATHILEGO DIAPARO TŠA KA TŠA KA NTLE?”

11. Mareka 5:25-34 e bontšha bjang gore Jesu o be a tshwenyega ka balwetši?

11 Bala Mareka 5:25-34. Mosadi yo mongwe o be a tlaišitšwe ke bolwetši bjo bo lešago dihlong ka nywaga e 12. Bolwetši bjoo bo be bo kgomile bophelo bja gagwe ka moka, go akaretša le borapedi bja  gagwe. O be a etšwa dingakeng tše dintši e bile a dirišitše tšhelete ya gagwe ka moka gore a fodišwe, eupša boemo bja gagwe bja mpefala le go feta. Ka letšatši le lengwe, mosadi yo o ile a nagana leano le lengwe gore a fole, ka gona a tsena lešabeng gomme a fihla a kgwatha seaparo sa Jesu. (Lefitiko 15:19, 25) Ge Jesu a lemoga gore matla a tšwile go yena, o ile a botšiša gore ke mang a mo kgwathilego. “A tšhogile e bile a thothomela,” mosadi yoo o ile “a tla a wela fase pele ga gagwe ka matolo a mmotša therešo ka moka.” Jesu o be a tseba gore Jehofa o fodišitše mosadi yoo, ka gona a bolela le yena ka botho a re: “Morwedi wa ka, tumelo ya gago e go fodišitše. Sepela ka khutšo gomme o fole bolwetšing bja gago bjo bohloko.”

Mehlolo ya Jesu e hlatsetše gore o tloga a na le taba le rena le mathata a rena (Bona serapa 11 le 12)

12. (a) Go seo re sa tšwago go ithuta sona, o ka hlalosa Jesu bjang? (b) Jesu o re beetše mohlala ofe?

12 Ruri go a homotša go bona kamoo Jesu a bego a rata batho ka gona, kudukudu bao ba bego ba babja. Ga a swane le Sathane, yoo a lekago go re kgodiša gore ga re na mohola le gore ga go na motho yo a re ratago. Go e na le moo, mehlolo ya Jesu e hlatsetše gore o tloga a na le taba le rena le mathata a rena. Re leboga kudu gore re na le Kgoši le Moperisita yo a Phagamego yo a re ratago! (Baheberu 4:15) Go ka ba thata gore re kwešiše kamoo motho yo a lwetšego nako e telele a ikwago ka gona, kudukudu ge e ba rena re sa babje. Eupša nagana ka Jesu. O be a kwela balwetši bohloko gaešita le ge yena a se a ka a babja. Anke re direng sohle se re ka se kgonago go ekiša mohlala wa gagwe wa go rata batho.—1 Petro 3:8.

“JESU A NTŠHA MEGOKGO”

13. Tsogo ya Latsaro e re bontšha’ng ka Jesu?

13 Jesu o be a ekwa bohloko kudu ge ba bangwe ba be ba tlaišega. Ka mohlala, ge mogwera wa gagwe e lego Latsaro a be a hwile, o ile a “tsetsela” gomme “a huduega” ge a be a bona ba gabo Latsaro le bagwera ba gagwe ba nyamile. (Bala Johane 11:33-36.) Gaešita le ge a be a tseba gore o tlo tsoša Latsaro, o ile a lla. O be a sa lešwe dihlong ke gore ba bangwe ba tlo bona kamoo a ikwago ka gona. Jesu o be a rata Latsaro le lapa la gabo kudu moo a ilego a diriša  matla a Modimo go tsoša Latsaro bahung!—Johane 11:43, 44.

14, 15. (a) Ke’ng se se bontšhago gore Jehofa o nyaka go fediša tlaišego ya batho? (b) Re ithuta’ng polelwaneng yeo e rego, “mabitleng a kgopotšo”?

14 Beibele e hlalosa gore Jesu o swana tlwaa le Tatagwe e lego Jehofa. (Baheberu 1:3) Ka gona mehlolo yeo Jesu a e dirilego e bontšha gore Jehofa le yena o nyaka go fediša malwetši, bohloko le lehu. Kgauswinyane, Jehofa le Jesu ba tlo tsoša batho ba bantši bahung. Jesu o boletše gore “nako e a tla yeo ka yona bohle bao ba lego mabitleng” ba tlago go tsošwa.—Johane 5:28, 29, bona le mongwalo wa ka tlase.

15 Jesu o dirišitše polelwana “mabitleng a kgopotšo,” go bontšha gore monagano wa Modimo o a akaretšwa tabeng ye. Modimo Ramatlaohle, yena Mmopi wa legohle ka moka, a ka gopola selo se sengwe le se sengwe ka baratiwa ba rena bao ba hwilego, go akaretša le semelo sa bona. (Jesaya 40:26) Ga se feela gore Jehofa a ka ba gopola, eupša o nyaka go ba gopola. Ditsogo tše di begilwego ka Beibeleng ke mehlala e kgahlišago ya seo se tlago go direga lefaseng le lefsa.

SEO RE ITHUTAGO SONA MEHLOLONG YA JESU

16. Ke sebaka sefe seo ba bantši ba bahlanka ba Modimo ba tlago go ba le sona?

16 Ge re ka dula re botega, re ka ba le sebaka sa go tlo bona mohlolo wa mehlolo, e lego go phologa masetlapelong a magolo! Gateetee ka morago ga Haramagedone, re tlo bona mehlolo e mengwe e mentši. Ka nako yeo, motho yo mongwe le yo mongwe o tlo phethagala mmeleng. (Jesaya 33:24; 35:5, 6; Kutollo 21:4) Nagana o bona batho ba lahla digalase tša bona tša mahlo, mapara, mahlotlo a digole, ditulo tša digole le dilo tšeo di thušago difoa go kwa. Jehofa o a tseba gore bohle bao ba tlago go phologa Haramagedone ba tla swanelwa ke go ba le matla le go phela gabotse, ka gobane ba tla be ba lebanwe ke mošomo o montši. Ke bona ba tlago go fetoša polanete ye ya rena e botse gore e be paradeise ya lefase ka moka.—Psalme 115:16.

17, 18. (a) Ke ka baka la’ng Jesu a ile a dira mehlolo? (b) Ke ka baka la’ng o swanetše go dira selo se sengwe le se sengwe gore o tsene lefaseng le lefsa la Modimo?

17 Lehono “lešaba le legolo” le homotšega kudu ge le bala kamoo Jesu a ilego a fodiša balwetši. (Kutollo 7:9) Mehlolo yeo e tiiša kholofelo ya rena e kgahlišago ya gore nakong e tlago re tlo fodišetšwa sa ruri. Le gona e bontšha kamoo Morwa wa Modimo wa leitšibulo a ratago batho ka gona. (Johane 10:11; 15:12, 13) Kwelobohloko e kgolo ya Jesu ke bohlatse bja gore Jehofa o tloga a rata yo mongwe le yo mongwe wa bahlanka ba gagwe.—Johane 5:19.

18 Lefase lehono le tletše ka mahloko, tlaišego le lehu. (Baroma 8:22) Ke ka baka leo re hlokago lefase le lefsa la Modimo. Lefaseng leo, batho ka moka ba tlo phethagala go etša ge Modimo a re holofeditše. Maleaki 4:2 e re holofetša gore re tlo tshelatshela goba ra “kgana go etša dinamane tšeo di nontšhitšwego,” re thabile ka gobane re tla ba re fodišitšwe malwetšing ka moka e bile re phethagetše. Eka go leboga Jehofa le tumelo ya rena dikholofetšong tša gagwe go ka re tutueletša go dira selo se sengwe le se sengwe gore re tsene lefaseng le lefsa. Ruri go a kgothatša go tseba gore mehlolo yeo Jesu a e dirilego ke mohlala wa seo kgauswinyane batho ba tlago go se thabela ka mo go sa felego ge a tla be a buša mo lefaseng!