Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  May 2015

Dipotšišo tše Tšwago go Babadi

Dipotšišo tše Tšwago go Babadi

Gogo wa Magogo yo go boletšwego ka yena pukung ya Hesekiele ke mang?

Ka nywaga e mentši, dikgatišo tša rena di be di hlalosa gore leina Gogo wa Magogo le šupa go Sathane ka morago ga gore a rakwe legodimong. Ka baka la’ng? Ka gobane puku ya Kutollo e bontšha Sathane e le yena a eteletšego dilo pele ge batho ba Modimo ba tla be ba hlaselwa lefaseng ka moka. (Kutollo 12:1-17) Ka baka leo, re be re nagana gore Gogo e swanetše go ba e be e le leina le lengwe la Sathane.

Lega go le bjalo, tlhaloso ye e be e na le mathatanyana. Nagana ka taba e latelago: Ge Jehofa a be a bolela ka go fedišwa ga Gogo, o ile a re o tla mo gafela “go dinonyana tša go ja nama, dinonyana tša mehutahuta le dibata tša naga gore [a] be dijo tša tšona.” (Hesekiele 39:4) Ke moka Jehofa o ile a oketša ka gore: “Letšatšing leo Gogo ke tla mo nea lefelo moo, e lego mabitla a Isiraele.” (Hesekiele 39:11) Eupša ke ka tsela efe Sathane, yoo e lego sebopiwa se se sa bonagalego sa moya, a ka jewago ke dinonyana le dibata? A ka bolokwa bjang mo lefaseng? Beibele e bontšha gabotse gore Sathane o tlo lahlelwa sekoting gomme a fetša nywaga e 1 000 a le moo. A ka se jewe ke selo goba go bolokwa.—Kutollo 20:1, 2.

Beibele e re ge nywaga e 1 000 e fela, Sathane o tlo lokollwa sekoting, gomme “o tla tšwela go timetša ditšhaba tšeo di lego dikhutlong tše nne tša lefase, Gogo le Magogo, go di rapela ntweng.” (Kutollo 20:8) Ka gona ge e ba Sathane e le Gogo, gona seo se ra gore Sathane o tlo swanelwa ke go itimetša. Ka go re’alo, lentšu “Gogo” ka pukung ya Hesekiele le pukung ya Kutollo ga le šupe go Sathane.

Bjale Gogo wa Magogo ke mang? E le gore re kgone go araba potšišo yeo, re swanetše go nyakišiša ka Beibeleng gomme re hwetše yoo a tlago go hlasela batho ba Modimo. Beibele e bolela ka tlhaselo ya ‘Gogo wa Magogo,’ tlhaselo ya “kgoši ya leboa” le tlhaselo ya “dikgoši tša lefase.” (Hesekiele 38:2, 10-13; Daniele 11:40, 44, 45; Kutollo 17:14; 19:19) Na ditlhaselo tše ga di swane? Ga go bonagale go le bjalo. Go bonagala Beibele e diriša maina a sa swanego go hlalosa tlhaselo e swanago. Ke ka baka la’ng re rea’lo? Ke ka gobane Beibele e re ditšhaba ka moka tša lefaseng di tla tšea karolo tlhaselong ye ya mafelelo yeo e tlago go thoma ntwa ya Haramagedone.—Kutollo 16:14, 16.

Ge re bapetša ditemana tše ka moka tša Beibele  tša mabapi le go hlaselwa la mafelelo ga batho ba Modimo, go molaleng gore leina Gogo wa Magogo ga le šupe go Sathane. Go e na le moo, Gogo wa Magogo ke ditšhaba tšeo di ipopilego ngatana e tee. Na “kgoši ya leboa” e tlo etelela pele ditšhaba tše? Ga re tsebe. Eupša tlhaloso ye e bonagala e dumelelana le seo Jehofa a se bolelago ka Gogo gore: “O tla tla o etšwa lefelong la gago ka leboaboa, wena le meraforafo, ka moka ga yona e nametše dipere, e le phuthego e kgolo, gaešita le madira a mantšintši.”—Hesekiele 38:6, 15.

Ka mo go swanago, moporofeta Daniele, yo a phetšego mehleng ya Hesekiele, o boletše se se latelago ka kgoši ya leboa: “Go tla ba le dipego tšeo di tšwago bohlabatšatši le leboa tšeo di tlago go e ferekanya; e tla tšwa lesolo e befetšwe kudu e le gore e senye le go fediša ba bantši. E tla hloma ditente tša yona tše bjalo ka metse ya dibo magareng ga lewatle le legolo le thaba e kgethwa ya Mokgabišo; ke mo e tlago go leba pheletšong ya yona gomme e ka se be le mothuši.” (Daniele 11:44, 45) Pego ye e bolela tlwaa seo puku ya Hesekiele e rego Gogo o tlo se dira.—Hesekiele 38:8-12, 16.

Go tlo direga’ng ka morago ga tlhaselo ye ya mafelelo? Daniele o a re botša. O re: “Mehleng yeo Mikaele [Jesu Kriste] o tla ema [nakong ya ntwa ya Haramagedone], e lego kgoši e kgolo yeo e tlago go emela barwa ba batho ba geno [ga e sa le go tloga ka 1914]. Le gona go tla ba le tlalelo [masetlapelo a magolo] yeo e sa kago ya ba gona ga e sa le go tloga ge setšhaba se eba gona go ba go fihla ka nako yeo. Mehleng yeo go tla phonyokga yo mongwe le yo mongwe wa batho ba geno yo a hwetšwago a ngwadilwe ka pukung.” (Daniele 12:1) Go Kutollo 19:11-21, re hwetša tlhaloso e swanago ya seo Jesu a tlago go se dira.

Eupša “Gogo le Magogo” bao go boletšwego ka bona go Kutollo 20:8 ke bomang? Leina le le šupa go batho ka moka bao ba tlago go rabela go Jehofa gomme ba hlasela batho ba gagwe nakong ya teko ya mafelelo ka morago ga nywaga e 1 000. Batho bao ba tla hloya batho ba Modimo go fo swana le Gogo wa Magogo, e lego ditšhaba tšeo di tlago go hlasela batho ba Modimo mafelelong a masetlapelo a magolo. Le gona go fo swana le ditšhaba tšeo di tlago go fedišwa nakong ya Haramagedone, Gogo le Magogo le bona ba tlo fedišwa. (Kutollo 19:20, 21; 20:9) Ka go re’alo, ke mo go swanetšego gore bohle bao ba tlago go rabela mafelelong a nywaga e 1 000 ba bitšwe “Gogo le Magogo.”

Ka ge re le diithuti tše mafolofolo tša lentšu la Modimo, re fagahletše go tseba yoo e tlo bago “kgoši ya leboa” kgauswinyane. Eupša go sa šetšwe gore ke mang a tlago go etelela ditšhaba pele go hlasela batho ba Modimo, re kgodišegile ka dilo tše tše pedi: (1) Gogo wa Magogo le madira a gagwe ba tla fenywa gomme ba fedišwa. (2) Kgoši ya rena e lego Jesu Kriste, o tla phološa batho ba Modimo gomme a ba tsenya lefaseng le lefsa la khutšo le polokego.—Kutollo 7:14-17.