Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MAY 2015

O ka Kgona go Lwa le Sathane Gomme wa mo Fenya!

O ka Kgona go Lwa le Sathane Gomme wa mo Fenya!

“Emeletšanang le [Sathane] le tiile tumelong.”—1 PETRO 5:9.

1. (a) Ke ka baka la’ng ntwa ya rena le Sathane e le bohlokwa kudu gona bjale? (b) Re tseba bjang gore re ka fenya Sathane?

SATHANE o lwa le batlotšwa bao ba sa lego mo lefaseng le “dinku tše dingwe.” (Johane 10:16) Ka nakonyana yeo e mo šaletšego, Diabolo o nyaka go senya tumelo ya ba bantši ba bahlanka ba Jehofa ka mo a ka kgonago. (Bala Kutollo 12:9, 12.) Eupša re ka mo fenya ntweng ye. Beibele e re: “Le ganetše Diabolo, yena o tla le tšhaba.”—Jakobo 4:7.

2, 3. (a) Ke ka baka la’ng Sathane a nyaka gore batho ba dumele gore ga a gona? (b) O tseba bjang gore Sathane o gona?

2 Batho ba bantši ga ba dumele gore Sathane o gona. Ba dumela gore Sathane le batemona ke batho feela ba dipukung, dimobing tša go tšhoša le dipapading tša bidio. Batho ba bjalo ba nagana gore ge o tšea gabotse, o ka se dumele gore go na le meoya e kgopo. Na Sathane o a kgopišega ge batho ba sa dumele gore yena le batemona ba gagwe ba gona? Aowa. Go bonolo kudu gore Sathane a fore bao ba sa dumelego gore o gona. (2 Bakorinthe 4:4) Ge e le gabotse, Sathane o kgothaletša dikgopolo tša mohuta woo e le gore a kgone go fora batho.

 3 Ka ge re le bahlanka ba Jehofa, ga re forwe. Re a tseba gore Diabolo o gona. Re tseba seo bjang? Beibele e re botša gore Sathane o kile a bolela le Efa a diriša noga. (Genesi 3:1-5) O kile a boledišana le Jehofa, a mmotšološiša ka maikemišetšo a Jobo. (Jobo 1:9-12) Sathane o kile a leka Jesu. (Mateo 4:1-10) Le gona ka morago ga gore Jesu e be Kgoši ka 1914, Sathane o ile a thoma “go lwa” le batlotšwa bao ba sa lego mo lefaseng. (Kutollo 12:17) Ntwa yeo e sa tšwela pele ka ge Diabolo a leka go senya tumelo ya batlotšwa le ya dinku tše dingwe. E le gore re fenye ntweng ye, re swanetše go lwa le Sathane le go boloka tumelo ya rena e tiile. Sehlogo se se ahlaahla ditsela tše tharo tša go dira bjalo.

GANA BOIKGANTŠHO

4. Ke ka baka la’ng Sathane e le mohlala o mogolo wa boikgantšho?

4 Sathane o ikgantšha ka mo go feteletšego. Morongwa yo yo kgopo o ile a nyatša Modimo ka go hlohla tshwanelo ya gagwe ya go buša, e bile o ile a leka go dira gore ba bangwe ba rapele yena go e na le go rapela Jehofa. Ka gona ke mohlala o mogolo wa motho wa go ikgantšha le wa lenyatšo. Ka baka leo, tsela e nngwe yeo ka yona re ka lwantšhago Sathane ke ka go gana go ikgantšha gomme ra ikokobetša. (Bala 1 Petro 5:5.) Eupša boikgantšho ke’ng? Na ka mehla go ikgantšha go fošagetše?

5, 6. (a) Na ka mehla go ikgantšha go fošagetše? Hlalosa. (b) Ke boikgantšho bofe bjo bo lego kotsi, gona mehlala e mengwe ya bjona ya ka Beibeleng ke efe?

5 Go ya ka pukuntšu e nngwe, boikgantšho ke go ikholofela le go ipona re le bohlokwa. E bile ke “go ikwa o kgotsofetše ka gobane wena goba batho bao o tswalanago le bona ba dirile selo se itšego se sebotse goba ba na le selo se itšego se sebotse.” Ga se phošo go ikwa ka tsela yeo. Moapostola Paulo o boditše bana babo rena ba Thesalonika gore: “Rena ka noši re ikgantšha ka lena gare ga diphuthego tša Modimo ka baka la kgotlelelo ya lena le tumelo ditlaišegong tša lena tšohle le masetlapelo ao a le wetšego.” (2 Bathesalonika 1:4) Ka gona go ikwa o kgotsofetše ka seo ba bangwe ba se dirilego le go ikwa o ikgantšha go ka re hola. Ga se ra swanela go lešwa dihlong ke ditho tša malapa a gabo rena, setšo goba lefelo leo re goletšego go lona.—Ditiro 21:39.

6 Eupša go na le boikgantšho bjo bongwe bjoo bo ka senyago ditswalano tša rena le ba bangwe, kudukudu segwera sa rena le Jehofa. Boikgantšho bjo bjalo bo ka dira gore re kgopišege ge re newa keletšo. Bo ka ba bja dira gore re gane keletšo go e na le go e amogela ka boikokobetšo. (Psalme 141:5) Boikgantšho bja mohuta wo bo hlaloswa e le go ipona goba go “ikgogomoša moo go bonagatšwago ke batho bao gantši ba iponago ba le bohlokwa go feta batho ba bangwe.” Jehofa o hloile boikgantšho bja mohuta woo. (Hesekiele 33:28; Amose 6:8) Eupša Sathane o thaba kudu ge batho ba ekiša boikgantšho bja gagwe gomme ba ikgogomoša. Nagana kamoo Sathane a ilego a thaba ka gona ge Nimirode, Farao le Abesalomo ba be ba bontšha boikgantšho bjo bobe ka go ikgogomoša! (Genesi 10:8, 9; Ekisodo 5:1, 2; 2 Samuele 15:4-6) Le gona boikgantšho ke bjona bo dirilego gore Kaine a lahlegelwe ke tswalano ya gagwe le Modimo. Jehofa ka boyena o ile a eletša Kaine, eupša ka ge a be a ikgantšha kudu, o ile a palelwa ke go theetša. O ile a thatafiša hlogo, a gana temošo ya Modimo, gomme a direla Jehofa sebe gabonolo.—Genesi 4:6-8.

7, 8. (a) Kgethollo ya semorafo ke’ng, gona e tswalana bjang le boikgantšho? (b) Hlalosa kamoo boikgantšho bo ka senyago khutšo ka phuthegong.

 7 Lehono, batho ba ikgantšha ka ditsela tše dintši tše kotsi. Ka dinako tše dingwe boikgantšho bo bakwa ke kgethollo ya semorafo. Go ya ka pukuntšu e nngwe, kgethollo ya semorafo ke go se rate batho ba bangwe ka gobane e le ba morafo o itšego. E bile ke “kgopolo ya gore batho ba merafo e sa swanego ba na le dika le bokgoni tše di sa swanego, le gore ka tlhago merafo e mengwe e phagametše e mengwe goba gore e ka tlasana ga e mengwe.” Kgethollo ya semorafo e bakile dikgaruru, dintwa gaešita le go bolawa ga batho ka bontši.

Boikgantšho bo ka senya khutšo ka phuthegong

8 Dilo tše bjalo ga se tša swanela go direga ka phuthegong ya Bokriste. Lega go le bjalo, diphapano magareng ga bana babo rena le dikgaetšedi di ka bakwa ke boikgantšho gomme dilo tša tšwa taolong. Seo se ile sa diragalela Bakriste ba bangwe ba lekgolong la pele la nywaga, moo Jakobo a ilego a ba botšiša potšišo e matla ya gore: “Dintwa le diphapano tše di lego gare ga lena di bakwa ke eng?” (Jakobo 4:1) Ge e ba o ikwa o hloile ba bangwe gomme o nagana gore o kaone go ba feta, o ka bolela goba wa dira selo se itšego seo se ka ba kwešago bohloko kudu. (Diema 12:18) Go molaleng gore boikgantšho bo ka senya khutšo ka phuthegong.

9. Beibele e re thuša bjang go lwantšha kgethollo ya semorafo le mehuta e mengwe ya boikgantšho bjo bo fošagetšego? (Bona seswantšho seo se lego mathomong a sehlogo.)

9 Ge e ba re fela re ipotša gore re kaone go feta ba bangwe, re swanetše go gopola gore Jehofa o hloile motho “yo mongwe le yo mongwe yo a ikgogomošago pelong.” (Diema 16:5) Le gona re swanetše go hlahloba dipelo tša rena gomme re ipotšiše gore: ‘Na ke ipona ke le kaone go feta batho ba morafo o mongwe, setšhaba goba setšo?’ Ge e ba re ikwa bjalo, re swanetše go gopola gore Modimo “go tšwa mothong o tee o dirile setšhaba se sengwe le se sengwe sa batho.” (Ditiro 17:26) Ka gona, go ra gore ka moka ga rena re morafo o tee ka gobane ka moka re tšwa go Adama. Ke bošilo bjo bogolo go nagana gore Modimo o dirile gore merafo e mengwe e be kaone go feta e mengwe! Ge e ba re nagana bjalo, gona re dumelela gore Sathane a senye lerato la rena la Bokriste le botee. (Johane 13:35) E le gore re lwe le Sathane le go mo fenya, re swanetše go phema mehuta ka moka ya boikgantšho bjo bo fošagetšego.—Diema 16:18.

PHEMA GO RATA DILO TŠE DI BONAGALAGO LE GO RATA LEFASE

10, 11. (a) Ke ka baka la’ng go ka ba bonolo gore re rate lefase? (b) Dema o ile a feleletša a dirile’ng ka baka la go rata lefase?

10 Sathane ke “mmuši wa lefase le,” e bile o a le laola. (Johane 12:31; 1 Johane 5:19) Dilo tše dintši tšeo lefase le le di kgothaletšago di thulana le ditekanyetšo tša Beibele. Ke therešo gore ga se dilo ka moka tšeo di fošagetšego lefaseng le. Lega go le bjalo, re ka kgodišega gore Sathane o tla diriša lefase le la gagwe go re tanya ka dikganyogo tša rena gomme a leka go re diriša sebe. Goba o tla dira gore re rate lefase gomme re hlokomologe borapedi bja rena go Jehofa.—Bala 1 Johane 2:15, 16.

11 Bakriste ba bangwe ba lekgolong la pele la nywaga ba be ba rata lefase. Ka  mohlala, Paulo o ngwadile gore: “Dema o ntlogetše ka baka la go rata tshepedišo ya gona bjale ya dilo.” (2 Timotheo 4:10) Beibele ga e re botše tlwaa gore Dema o be a rata dilo dife tša lefase, e lego tšeo di ilego tša dira gore a hlanogele Paulo. Go ka direga gore Dema o ile a thoma go rata dilo tše di bonagalago go feta go hlankela Jehofa. Ge e ba go le bjalo, Dema o lahlegetšwe ke ditokelo tše di kgahlišago tirelong ya Modimo. Na go rata lefase e bile phetho e botse? Aowa. Dema nkabe a ile a dula e le mothuši wa Paulo. Lefase le be le ka se tsoge le mo neile seo Jehofa a bego a tla mo nea sona!—Diema 10:22.

Anke le ka mohla re se ke ra dumelela tšhelete e e ba bohlokwa kudu go feta tswalano ya rena le Jehofa

12. Sathane a ka diriša bjang dikganyogo tša rena gampe a diriša “matla a forago a mahumo”?

12 Le rena re ka diragalelwa ke se se swanago lehono. Ka ge re le Bakriste, ke ga tlhago gore re nyake go itlhokomela le go hlokomela malapa a rena. (1 Timotheo 5:8) Jehofa o nyaka re thabela bophelo. Re tseba seo ka gobane o neile Adama le Efa paradeise e botse gore ba phele go yona. (Genesi 2:9) Eupša Sathane a ka diriša dikganyogo tšeo tša rena gampe a diriša “matla a forago a mahumo.” (Mateo 13:22) Batho ba bantši ba nagana gore tšhelete le dilo tše di bonagalago di tla ba tlišetša lethabo goba katlego. Ge e ba le rena re nagana bjalo, re ka lahlegelwa ke selo sa bohlokwahlokwa seo re nago le sona, e lego tswalano ya rena le Jehofa. Jesu o lemošitše ka gore: “Ga go yo a ka bago lekgoba la marena a mabedi, gobane o tla hloya yo mongwe a rata yo mongwe goba o tla kgomarela yo mongwe a nyatša yo mongwe. Le ka se be makgoba a Modimo le a Mahumo.” (Mateo 6:24) Ge e ba re le makgoba a dilo tše di bonagalago feela, gona re tlogetše go hlankela Jehofa. Sathane o nyaka gore re dire sona seo. Anke le ka mohla re se ke ra dumelela tšhelete goba dilo tšeo e ka di rekago di e ba bohlokwa kudu go feta tswalano ya rena le Jehofa. E le gore re lwe le Sathane le go mo fenya, re swanetše go ba le pono e botse ka dilo tše di bonagalago.—Bala 1 Timotheo 6:6-10.

GANA BOITSHWARO BJO BO GOBOGILEGO

13. Lefase le le kgothaleditše bjang pono e fošagetšego ka lenyalo le thobalano?

13 Molaba o mongwe wa Sathane ke boitshwaro bjo bo gobogilego. Batho ba bantši ba nagana gore go botegela monna wa gago goba mosadi wa gago, goba go botega lenyalong, go fetilwe ke nako e bile go ba tima tokologo. Ka mohlala, mosadi yo mongwe yo a bapalago difilimi o ile a re ga go kgonege go ratana le motho o tee feela. O okeditše ka gore: “Ga go motho yo ke tsebago a botega lenyalong goba a nyaka go botega.” Sebapadi se sengwe sa monna sona se itše: “Ke nagana gore ga se ra bopelwa go ratana le motho o tee feela bophelo ka moka.” Sathane o swanetše go ba a thaba kudu ge batho ba go tuma ba swaya mpho ya Modimo ya lenyalo diphošo. Diabolo ga a thekge thulaganyo ya lenyalo, e bile ga a nyake gore manyalo a atlege. Ka gona e le gore re lwe le Sathane le go mo fenya, re swanetše go lebelela lenyalo ka tsela yeo Modimo a le lebelelago ka yona.

14, 15. O ka dira’ng ge e ba o lekega go wela boitshwarong bjo bo gobogilego bja tša thobalano?

 14 Go sa šetšwe gore re lenyalong goba go se bjalo, re swanetše go katanela go lwantšha mehuta ka moka ya boitshwaro bjo bo gobogilego bja tša thobalano. Na go bonolo? Aowa! Ka mohlala, ge e ba o le mofsa, o ka kwa bao o tsenago le bona sekolo ba ikgantšha ka go ba le thobalano le motho le ge e le ofe yo ba mo nyakago. E bile ba ka ikgantšha ka gore ba romelana melaetša ya tša thobalano le dinepe tša batho bao ba sa aparago diselefounong tša bona. Ge e le gabotse, dinageng tše dingwe, mokgwa wo o swantšhwa le go romela motho yo mongwe dibidio tša bana bao ba dirago thobalano goba bao ba sa aparago. Beibele e re: “Yo a tlwaetšego go dira bootswa o direla mmele wa gagwe sebe.” (1 Bakorinthe 6:18) Malwetši ao a tsenago batho ka thobalano a feleleditše ka masetlapelo a magolo le mahu. E bile bafsa ba bantši bao ba bilego le thobalano pele ga lenyalo ba bolela gore ba a itshola. Boithabišo bja lehono bo nyaka re dumela gore re ka se diragalelwe ke selo ge re tshela melao ya Modimo. Ge e ba re dumela maaka a bjalo, re ka lahletšwa ke “matla a forago a sebe.”—Baheberu 3:13.

15 Ge e ba o lekega go wela boitshwarong bjo bo gobogilego bja tša thobalano, o ka dira’ng? O se ke wa gana gore o na le bofokodi. (Baroma 7:22, 23) Rapela Modimo gore a go nee matla. (Bafilipi 4:6,  7, 13) Phema maemo ao a ka go wetšago boitshwarong bjo bo gobogilego. (Diema 22:3) Le gona ge go tšwelela teko, e gane gateetee.—Genesi 39:12.

16. Jesu o ile a re’ng ge Sathane a be a mo leka, gona re ka ithuta’ng mohlaleng woo?

16 Jesu o re beetše mohlala o mobotse kudu. Ga se a ka a forwa ke dikholofetšo tša Sathane. Ga se a ka a leka le go nagana ka tšona. Go e na le moo, gateetee o ile a botša Sathane gore: “Go ngwadilwe gwa thwe.” (Bala Mateo 4:4-10.) Jesu o be a tseba Lentšu la Modimo, ka gona o ile a kgona go tsopola mangwalo le semeetseng ge Sathane a be a mo leka. E le gore re lwe le Sathane le go mo fenya, ga se ra swanela go ipea maemong ao a ka re lekago go itshwara ka tsela e gobogilego.—1 Bakorinthe 6:9, 10.

FENYA SATHANE KA GORE O KGOTLELELE

17, 18. (a) Sathane o diriša melaba efe e mengwe, gona ke ka baka la’ng re ka letela seo? (b) Go tlo direga’ng ka Sathane, gona seo se go thuša bjang gore o kgotlelele?

17 Boikgantšho, go rata dilo tše di bonagalago le boitshwaro bjo bo gobogilego bja tša thobalano e fo ba e mengwe ya melaba e meraro ya Sathane. Go na le e mengwe e mentši. Ka mohlala, Bakriste ba bangwe ba na le ditho tša malapa tšeo di ba ganetšago goba ba bangwe ba kwerwa ke bao ba tsenago le bona sekolo. Ba bangwe ba dula dinageng tšeo mmušo o lekago go ba thibela go nea bohlatse. Re letetše go lebeletšana le mathata a bjalo. Jesu ka boyena o re lemošitše ka gore: “Le tla ba ba hloilwego ke batho bohle ka baka la leina la ka, eupša yo a kgotleletšego go fihla bofelong ke yena a tlago go phološwa.”—Mateo 10:22.

Sathane o tlo fedišwa (Bona serapa 18)

18 Re ka lwantšha Sathane bjang gomme ra mo fenya? Jesu o itše: “Ka go kgotlelela ga lena, le tla rua meoya ya lena.” (Luka 21:19) Ga go na selo le ge e le sefe seo batho ba ka se dirago seo se ka re gobaletšago sa ruri. Ga go na motho yo a ka re amogago tswalano ya rena le Modimo ka ntle le ge rena re dumelela seo se direga. (Baroma 8:38, 39) Gaešita le ge ba bangwe ba bahlanka ba botegago ba Jehofa ba ehwa, seo ga se bolele gore Sathane o fentše. Jehofa o tla ba tsoša. (Johane 5:28, 29) Eupša Sathane ga a na bokamoso. Ka morago ga ge lefase le le kgopo le fedišitšwe, o tla lahlelwa sekoting ka nywaga e 1 000. (Kutollo 20:1-3) Mafelelong a nywaga e sekete ya pušo ya Kriste, Sathane o tla “lokollwa kgolegong ya gagwe” gomme a leka ka lekga la mafelelo go timetša batho bao ba phethagetšego. Ka morago ga moo, o tla fedišwa. (Kutollo 20:7-10) Gaešita le ge Diabolo a se na bokamoso, wena o na le bjona! Tšwela pele o elwa le Sathane, gomme o boloke tumelo ya gago e le matla. O ka kgona go lwa le Sathane gomme wa mo fenya!