Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  May 2015

Ekiša yo a re Holofeditšego Bophelo bjo bo sa Felego

Ekiša yo a re Holofeditšego Bophelo bjo bo sa Felego

“Ebang baekiši ba Modimo, le le bana ba ba rategago.”—BAEFESO 5:1.

1. Ke bokgoni bofe bjo bo ka re thušago go ekiša Jehofa?

JEHOFA o re bopile re na le bokgoni bja go kwešiša kamoo batho ba bangwe ba ikwago ka gona, gaešita le ge re se ra ka ra ba boemong bja bona. (Bala Baefeso 5:1, 2.) Bokgoni bjo bo ka re thuša bjang go ekiša Jehofa? Gona ke ka baka la’ng re swanetše go ba šedi tseleng yeo re bo dirišago ka yona?

2. Jehofa o ikwa bjang ge re tlaišega?

2 Jehofa o re holofeditše bokamoso bjo bo kgahlišago moo go tla bago go se na tlaišego. Batlotšwa le “dinku tše dingwe” ba ka lebelela pele bophelong bjo bo sa felego, e ka ba legodimong goba mo lefaseng. (Johane 10:16; 17:3; 1 Bakorinthe 15:53) Eupša Jehofa o kwešiša bohloko bjo re bo kwago ge re diragalelwa ke dilo tše mpe lehono. Nakong e fetilego, Jehofa o ile a kwa bohloko kudu ge batho ba gagwe ba be ba tlaišega kua Egipita. “O be a tlalelwa.” (Jesaya 63:9) Le gona, ka morago ge batho ba gagwe ba be ba aga tempele  lefsa gomme ba boifa manaba a bona, Jehofa o ile a kwešiša kamoo ba bego ba ikwa ka gona. O ile a ba botša gore: “Yo a le kgwathago o kgwatha thaka ya leihlo la ka.” (Sakaria 2:8) Go etša ge mma a rata ngwana wa gagwe, Jehofa le yena o rata bahlanka ba gagwe gomme o nyaka go ba thuša. (Jesaya 49:15) Re ekiša lerato la Jehofa ge re leka go kwešiša kamoo ba bangwe ba ikwago ka gona ka go ipea boemong bja bona.—Psalme 103:13, 14.

JESU O ILE A EKIŠA JEHOFA KA GO RATA BATHO

3. Jesu o be a ikwa bjang ka batho?

3 Jesu o be a kwešiša kamoo batho ba bego ba ikwa ka gona ge ba tlaišega, gaešita le ge a be a se a ka a ba maemong a bona. Ka mohlala, o be a tseba gore batho ba bantši ba be ba hlaka. Baetapele ba bodumedi ba be ba ba ruta maaka gomme ba bea melao e mentši yeo e bego e sa tšwe go Modimo. Batho ba be ba boifa baetapele ba. (Mateo 23:4; Mareka 7:1-5; Johane 7:13) Gaešita le ge Jesu a be a sa ba boife e bile a se a ka a dumela maaka a bona, o be a kwešiša kamoo batho ba bego ba ikwa ka gona. Jesu o ile a kwa bohloko kudu ge a be a bona kamoo ba bego ba swarwa gampe ka gona. Go be go se na motho yo a ba thušago, ba “swana le dinku tše di se nago modiši.” (Mateo 9:36) Jesu o ithutile go Tatagwe go rata batho, go ‘ba gaugela le go ba šokela.’—Psalme 103:8.

4. Jesu o be a dira’ng ge a be a bona batho ba tlaišega?

4 Ge Jesu a be a bona gore batho ba a tlaišega, o be a ba thuša ka gobane a ba rata. O be a swana le Tatagwe. Ka mohlala, nakong e nngwe ka morago ga gore baapostola ba Jesu ba sepele leeto le letelele go yo dira boboledi, ba be ba lapile gomme ba nyaka go khutša lefelong leo le se nago mašata. Eupša Jesu o ile a bona lešaba la batho le mo letile. O be a kwešiša gore le be le hloka thušo ya gagwe, ka gona o ile “a thoma go le ruta dilo tše dintši.”—Mareka 6:30, 31, 34.

EBA LE LERATO GO SWANA LE JEHOFA

5, 6. Re swanetše go dira’ng ge e ba re nyaka go ba le lerato go swana le Jehofa? Nea mohlala. (Bona seswantšho seo se lego mathomong a sehlogo.)

5 Ge e ba re nyaka go ba le lerato go swana le Jehofa, re swanetše go dira’ng? Nagana ka boemo bjo: Go na le ngwanabo rena yo mongwe wa mofsa yo a bitšwago Alan. O nagana ka ngwanabo rena yo mongwe yo a tšofetšego yo a sa kgonego go sepela gabotse e bile a sa bonego gabotse. Alan o nagana ka mantšu a Jesu ao a rego: “Ka mo le nyakago batho ba le dira ka gona, le lena le ba direng ka wona mokgwa woo.” (Luka 6:31) Ka gona, Alan o ipotšiša gore: ‘Ke nyaka gore batho ba bangwe ba ntirele’ng?’ O re: ‘Ke nyaka gore ba bapale kgwele le nna!’ Eupša ngwanabo rena yo a tšofetšego a ka se kgone go kitima le go bapala kgwele. Ka gona, seo ge e le gabotse Alan a swanetšego go ipotšiša sona ke gore: ‘Ge e ba ke be ke le ngwanabo rena yoo, ke be ke tla nyaka gore ba bangwe ba ntirele’ng?’

6 Gaešita le ge Alan e sa le mofsa, o leka go nagana kamoo a bego a tla ikwa ka gona ge e ba a be a tšofetše. O fetša nako e ntši a na le ngwanabo rena yoo a tšofetšego gomme o mo theetša ka kelohloko  ge a bolela. Ke moka o thoma go kwešiša gore go thata gore ngwanabo rena yo a bale Beibele le go ya ka ntlo le ntlo bodireding. Alan o bona kamoo a ka mo thušago ka gona gomme o nyaka go mo direla selo le ge e le sefe se a ka se kgonago. Ge re kwešiša kamoo batho ba bangwe ba ikwago ka gona gomme re ba bontšha lerato, re tla swana le Jehofa.—1 Bakorinthe 12:26.

Eba botho go swana le Jehofa (Bona serapa 7)

7. Re ka kwešiša bjang kamoo bana babo rena ba ikwago ka gona?

7 Ga se ka mehla go lego bonolo go kwešiša kamoo batho ba bangwe ba ikwago ka gona, kudukudu ge e ba re sa ka ra ba maemong a swanago le a bona. Ka mohlala, bana babo rena ba bantši ba kwa bohloko ka gobane ba a babja goba ba gobetše goba ka gobane ba a tšofala. Ba bangwe ba tlaišega o šoro ka baka la kgateletšego ya monagano goba go tshwenyega kudu goba ka gobane ba ile ba tlaišwa nakong e fetilego. Ba bangwe ba godiša bana ba nnoši goba ba na le ditho tša lapa tšeo di sa hlankelego Jehofa. Motho yo mongwe le yo mongwe o na le mathata, gomme a mantši a mathata ao ga a swane le a rena. Eupša re nyaka go bontšha ba bangwe lerato le go ba thuša. Ka gona, re ka dira’ng? Dinyakwa tša rena ga di swane. Ka gona ge e ba re theetša motho yo a itšego ka kelohloko gomme ka mehla re leka go kwešiša kamoo a ikwago ka gona, re tla tseba tsela e kaone ya go mo thuša. Mohlomongwe re ka mo gopotša kamoo Jehofa a ikwago ka gona ka bothata bja gagwe. Goba re ka mo thuša ka ditsela tše dingwe. Ge re dira se, re ekiša Jehofa.—Bala Baroma 12:15; 1 Petro 3:8.

EBA BOTHO GO SWANA LE JEHOFA

8. Ke’ng se se thušitšego Jesu go ba botho?

8 Jehofa o bontšha batho ka moka botho. (Luka 6:35) Le gona Jesu o swana le Tatagwe tabeng ye. Ke’ng se se thušitšego Jesu go bontšha batho botho ge a be a le mo lefaseng? O be a nagana kamoo ba bego ba tla ikwa ka gona ka seo a bego a ka se bolela goba go se dira. Ka mohlala, mosadi yo a bego a dirile dilo tše dintši tše mpe o ile a tla go Jesu. O ile a lla kudu moo megokgo ya gagwe e ilego ya rothela dinaong tša Jesu. Jesu o ile a kgona go bona gore mosadi yo o be a itshola kudu ka dilo tše mpe tšeo a di dirilego le gore o be a sokologile. O ile a lemoga gore ge a ka se mo sware ka botho, mosadi yoo o tla nyama le go feta. Ka gona o ile a mo reta bakeng sa dilo tše dibotse tšeo a di dirilego gomme a mo lebalela. Le gona Jesu o ile a bolela  ka botho le Mofarisei yo a bego a sa dumelelane le seo a se diretšego mosadi yo.—Luka 7:36-48.

Pele re dira phetho e itšego, re ka nagana kamoo e ka re kgomago ka gona goba ya kgoma ba bangwe

9. Ke’ng se se ka re thušago go ba botho go swana le Jehofa? Nea mohlala.

9 Re ka dira’ng gore re be botho go swana le Jehofa? Re swanetše go nagana pele re bolela goba pele re dira selo se itšego e le gore re sware ba bangwe ka bonolo gomme re se ke ra ba kweša bohloko maikwelong. Paulo o ngwadile gore Mokriste “ga se a swanela go lwa eupša o swanetše go ba bonolo go bohle.” (2 Timotheo 2:24) Ka mohlala, nagana kamoo o ka bontšhago botho maemong a latelago: O tla dira’ng ge e ba mothwadi wa gago a sa dire mošomo wa gagwe gabotse? O tla re’ng go ngwanabo rena yo a nago le dikgwedi tše dintši a sa tle Holong ya Mmušo ge o mmona a tlile dibokeng? Ge o ka re o le tšhemong gomme motho yo a itšego a re o swaregile kudu a ka se kgone go bolela le wena, o ka mmontšha botho bjang? Ge e ba mosadi wa gago a go botšiša gore ke ka baka la eng o se wa mmotša ka dithulaganyo tše itšego tšeo o di dirilego, na o tla mo araba ka botho? Re swanetše go nagana kamoo ba bangwe ba ikwago ka gona le kamoo mantšu a rena a ka ba kgomago ka gona. Ke moka re tla tseba seo re swanetšego go se bolela le go se dira gore re be botho go swana le Jehofa.—Bala Diema 15:28.

EBA BOHLALE GO SWANA LE JEHOFA

10, 11. Re ka ithuta’ng go Jehofa gomme ra ba bohlale? Nea mohlala.

10 Jehofa o bohlale go feta sebopiwa le ge e le sefe gomme a ka kgetha go bona seo se tlago go direga nakong e tlago. Gaešita le ge re sa tsebe bokamoso, le rena re ka ba bohlale. Bjang? Pele re dira phetho e itšego, re ka nagana kamoo e ka re kgomago ka gona goba ya kgoma ba bangwe. Ga se ra swanela go swana le Baisiraele. Ga se ba ka ba nagana ka seo se bego se tla ba diragalela ge ba be ba ka se kwe Jehofa. Le gona ga se ba ka ba nagana ka tswalano ya bona le yena le dilo ka moka tšeo a bego a ba diretše tšona. Ka ge Moshe a ile a lemoga se, o ile a tseba gore Baisiraele ba tlo dira dilo tše mpe. O itše: “Ke setšhaba seo se se nago tlhaologanyo, e bile ga se na kwešišo. A mola nkabe e le se bohlale! Se be se tla eleletša ka se. Se be se tla nagana gore se tla felela kae ka morago.”—Doiteronomio 31:29, 30; 32:28, 29.

11 Ka mohlala, ge e ba o beana mabaka, gopola gore ge o rata motho yo a itšego, go thata go laola maikwelo a gago le dikganyogo tša thobalano. Ka gona o se ke wa dira selo le ge e le sefe seo se ka senyago tswalano ya gago ya bohlokwa le Jehofa! Go e na le moo, eba bohlale gomme o pheme kotsi. Theetša keletšo e bohlale ya Jehofa yeo e rego: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.”—Diema 22:3.

 LAOLA SEO O NAGANAGO KA SONA

12. Seo re naganago ka sona se ka re gobatša bjang?

12 Motho yo bohlale o laola seo a naganago ka sona. Dilo tšeo re di naganago di ka re thuša goba tša re gobatša, go etša ge mollo o ka re thuša goba wa re gobatša. Ge e ba re le šedi ka mollo, re ka o diriša go apea. Eupša ge e ba re se šedi, o ka fiša ntlo ya rena wa ba wa re bolaya. Go bjalo le ka dilo tšeo re di naganago. Ge re nagana ka dilo tšeo re ithutago tšona go Jehofa, re a holega. Eupša ge e ba re dulela go nagana ka boitshwaro bjo bo gobogilego bja thobalano gomme re ipona re dira dilo tše mpe, re tla kganyoga dilo tše kudu moo re ka feleletšago re di dirile. Seo se ka senya tswalano ya rena le Jehofa.—Bala Jakobo 1:14, 15.

13. Efa o ile a nagana’ng ka bophelo bja gagwe?

13 Re ka ithuta mohlaleng wa mosadi wa pele e lego Efa. Jehofa o be a laetše Adama le Efa gore ba se ke ba ja seenywa sa “sehlare sa go tseba botse le bobe.” (Genesi 2:16, 17) Eupša Sathane o ile a botša Efa gore: “Le ka se hwe lehu. Gobane Modimo o tseba gore ka lona letšatši leo le tlago go ja tša sona, mahlo a lena a tla bulega gomme la swana le Modimo, la tseba botse le bobe.” Efa o ile a nagana kamoo bophelo bja gagwe bo bego bo tla ba kaone ka gona ge a be a ka ikgethela se sebotse le se sebe. O ile a dulela go nagana ka se gomme “a bona gore sehlare se se loketše go ka jewa le gore ke selo se se kganyogwago ke mahlo.” Go ile gwa direga’ng ka morago ga moo? O ile “a fula seenywa sa sona a se ja. Ka morago a nea le monna wa gagwe ge a be a na le yena, le yena a ja.” (Genesi 3:1-6) Ka baka leo, “sebe [sa tsena] lefaseng gomme lehu la tsena ka sebe.” (Baroma 5:12) Nkabe Efa a se a ka a dulela go nagana ka go dira sebe!

14. Beibele e re nea ditemošo dife mabapi le boitshwaro bja thobalano?

14 Ke therešo gore sebe sa Efa e be e se sa thobalano. Eupša Beibele e re lemoša ka mo go kwagalago gore re se ke ra dulela go ipona re dira selo le ge e le sefe seo se gobogilego. Jesu o itše: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mateo 5:28) Le gona Paulo o lemošitše ka gore: “Le se ke la rulaganya e sa le pele go kgotsofatša dikganyogo tša nama.”—Baroma 13:14.

15. Re swanetše go ipolokela matlotlo afe, gona ka baka la’ng?

15 Le gona Beibele e re botša gore re swanetše go swarega ka go kgahliša Jehofa e sego go dulela go nagana ka go huma. Gaešita le ge motho yo a itšego a humile, tšhelete ya gagwe e ka se mo nee tšhireletšego ya kgonthe. (Diema 18:11) Jesu o itše motho ke lešilo ge e ba a ikgobokeletša mahumo eupša a sa etiše Jehofa pele bophelong bja gagwe. Ga “se a huma go Modimo.” (Luka 12:16-21) Ge re ipolokela “matlotlo legodimong” ka go dira dilo tše di kgahlišago Jehofa, re a mo thabiša gomme le rena re a thaba. (Mateo 6:20; Diema 27:11) Le gona tswalano e botse le Jehofa e bohlokwa go feta selo le ge e le sefe.

O SE KE WA DULELA GO TSHWENYEGA

16. Ke’ng se se ka re thušago ge re tshwenyegile?

16 Ge e ba re leka go huma lefaseng le, seo se tlo re tlišetša mathata a mantši. (Mateo 6:19) Jesu o itše batho bao ba  dulago ba tshwenyega ka tšhelete ba tla thatafalelwa ke go etiša Mmušo wa Modimo pele maphelong a bona. (Mateo 13:18, 19, 22) Le gona, batho ba bangwe ba dula ba tshwenyegile ka dilo tše mpe tšeo di ka ba diragalelago. Eupša ge e ba re dula re tshwenyegile, re ka babja goba ra thoma go se sa ba le tumelo go Jehofa. Go e na le moo, re swanetše go bota gore Jehofa o tla re thuša. Beibele e re “pelaelo e lego pelong ya motho e tla e imela, eupša lentšu le lebotse le tla e thabiša.” (Diema 12:25) Ka gona ge e ba o tshwenyegile ka selo se itšego, bolela le motho yo a itšego yo a hlankelago Jehofa le yo a go tsebago gabotse. Motswadi, monna wa gago goba mosadi wa gago, goba mogwera wa kgonthe a ka go thuša go bota Jehofa le go se tshwenyege kudu.

Ge o tshwenyegile, rapela Jehofa gomme o nagane ka thušo yeo a go neago yona

17. Jehofa a ka re thuša bjang ge re tshwenyegile?

17 Jehofa o kwešiša kamoo re ikwago ka gona go feta motho le ge e le ofe gomme a ka re thuša gore re iše maswafo fase ge re tshwenyegile. Paulo o ngwadile gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.” (Bafilipi 4:6, 7) Ka gona ge o tshwenyegile, nagana ka thušo yeo Jehofa a go neago yona gore o boloke tswalano ya gago le yena e le matla, go etša thušo yeo o e hwetšago go bana beno le dikgaetšedi, bagolo, mohlanka yo a botegago, barongwa le Jesu.

18. Bokgoni bja rena bja go bona dilo ka leihlo la kgopolo bo ka re thuša bjang?

18 Go etša ge re ithutile, re ekiša Jehofa ge re diriša bokgoni bja rena bja go kwešiša kamoo batho ba bangwe ba ikwago ka gona. (1 Timotheo 1:11; 1 Johane 4:8) Re tla thaba ge re bontšha ba bangwe lerato le botho, ge re nagana ka ditlamorago tša dilo tšeo re di dirago le ge re phema go dula re tshwenyegile. Anke re naganeng kamoo bophelo bo tla bago ka gona ge Mmušo wa Modimo o tla be o buša gomme re dire sohle seo re ka se kgonago go ekiša Jehofa.—Baroma 12:12.