Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2015

Tswalano ya Gago le Jehofa ke ya Kgonthe Gakaaka’ng?

Tswalano ya Gago le Jehofa ke ya Kgonthe Gakaaka’ng?

“Batamelang Modimo gomme o tla le batamela.”—JAKOBO 4:8.

1. Ke ka baka la’ng re swanetše go dira gore tswalano ya rena le Jehofa e dule e le matla?

GE E ba o le Hlatse ya Jehofa e kolobeditšwego, o na le selo sa bohlokwa kudu. O na le tswalano le Jehofa. Eupša lefase la Sathane le hlasela tswalano yeo e bile e ka fokodišwa ke go se phethagale ga rena. Ke ka baka leo ka moka ga rena re swanetšego go dira sohle seo re ka se kgonago gore tswalano ya rena le Jehofa e dule e le matla.

2. (a) Tswalano ke’ng? (Bona mongwalo wa ka tlase.) (b) Re ka matlafatša bjang tswalano ya rena le Jehofa?

2 Na Jehofa ke wa kgonthe go wena? Na o mo tšea e le Mogwera wa gago? Na o ka rata gore tswalano ya gago le yena e be matla le go feta? Lengwalo la Jakobo 4:8 le go botša seo o swanetšego go se dira. Le re: ‘Batamela Modimo gomme o tla go batamela.’ Tswalano ya gago le Jehofa e akaretša  wena le yena. * (Bona mongwalo wa ka tlase.) Ge o ka gata megato ya gore o batamele kgauswi le Jehofa, le yena o tla gata megato ya gore a go batamele. Ge o dira se ka mehla, ke moo e tlago go ba wa kgonthe go wena, gomme tswalano ya lena e tla ba ya kgonthe kudu moo o tlago go ikwa ka tsela yeo Jesu a ilego a ikwa ka yona ge a be a re: “Yo a nthomilego ke wa kgonthe” e bile “ke a mo tseba.” (Johane 7:28, 29) Eupša tše dingwe tša dilo tšeo o ka di dirago gore o batamele kgauswi le Jehofa ke dife?

O ka boledišana bjang le Modimo? (Bona serapa 3)

3. Re ka boledišana le Jehofa bjang?

3 Ge e ba o nyaka go batamela kgauswi le Jehofa, go bohlokwa kudu gore wena le yena le boledišane ka mehla. Eupša se se ka kgonega bjang? Anke o nagane kamoo wena le mogwera wa gago yo a dulago kgole le ka boledišanago ka gona. Le ka ngwalelana gantši e bile la boledišana founong. O bolela le Jehofa ge ka mehla o mo rapela. (Bala Psalme 142:2.) Eupša o ka dumelela Jehofa bjang gore a bolele le wena? O ka dira seo ka go bala lentšu la gagwe e lego Beibele ka mehla le go naganišiša ka lona. (Bala Jesaya 30:20, 21.) Anke re boneng kamoo poledišano ye ya magareng ga gago le Jehofa e ka matlafatšago tswalano ya gago le yena gomme ya dira gore e be Mogwera wa gago wa kgonthe.

DUMELELA JEHOFA GO BOLELA LE WENA GE O ITHUTA BEIBELE

4, 5. Jehofa o bolela le wena bjang ge o ithuta Beibele? Nea mohlala.

4 Re a tseba gore Beibele ke molaetša wa Modimo wo o ngwaletšwego batho ka moka. Eupša na Beibele e ka go thuša go batamela kgauswi le Jehofa? Ee! Ge o bala Beibele ka mehla le go ithuta yona, ela hloko kamoo o ikwago ka gona ka seo o se balago. Le gona nagana kamoo o ka dirišago seo o ithutago sona. Ge o dira bjalo, o dumelela Jehofa a bolela le wena. E ba Mogwera wa gago wa kgauswi yo a go thušago, e bile o batamela kgauswi le yena.—Baheberu 4:12; Jakobo 1:23-25.

5 Ka mohlala, o ikwa bjang ge o bala mantšu a Jesu ao a rego: “Tlogelang go ipolokela matlotlo lefaseng”? Ge e ba o dira sohle se o ka se kgonago go etiša Jehofa  pele bophelong bja gago, le wena o tla kwa gore o a mo thabiša. Eupša o ka bala mantšu ao a Jesu gomme wa lemoga gore o swanetše go nolofatša bophelo bja gago e le gore o swarege kutšwanyana go hlankeleng Modimo. Ge e ba go le bjalo, gona Jehofa o go thuša gore o kwešiše seo wena o ka se dirago gore o batamele kgauswi kudu le yena.—Mateo 6:19, 20.

6, 7. (a) Ge re ithuta Beibele, go direga’ng ka tsela yeo re ratago Jehofa le yeo a re ratago ka yona? (b) Morero wa rena o mogolo e swanetše go ba ofe ge re ithuta Beibele?

6 Ke therešo gore ge re ithuta Beibele, re ithuta ka diphetogo tšeo re ka di dirago gore re hlankele Jehofa gakaone. Eupša re ithuta le ka dilo tše di kgahlišago tšeo a di dirago le ka semelo sa gagwe se sebotse, e lego dilo tšeo di dirago gore re mo rate kudu. Le gona ge re tšwela pele re mo rata, le yena o tla re rata kudu, gomme tswalano ya rena le yena ya ba matla le go feta.—Bala 1 Bakorinthe 8:3.

7 Ge e ba re nyaka go batamela kgauswi le Jehofa, go bohlokwa gore re ithute Beibele ka maikemišetšo a mabotse. Jesu o itše: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Ge re bala Beibele re ka ithuta dilo tše dintši tše difsa le tše di kgahlišago, eupša morero wa rena o mogolo e swanetše go ba go tseba Jehofa gakaone.—Bala Ekisodo 33:13; Psalme 25:4.

8. (a) Ba bangwe ba ka nagana’ng ka tsela yeo Jehofa a ilego a swara Kgoši Asaria? (b) Ge e ba o tseba Jehofa, o tla ikwa bjang ka seo a se dirago?

8 Ge re tseba Jehofa e le Mogwera wa kgauswi, re ka se tshwenyege ge ka dinako tše dingwe Beibele e sa re hlalosetše lebaka leo a ilego a dira dilo ka tsela e itšego. Ka mohlala, ge Asaria e be e le kgoši ya Juda, setšhaba se be se rapela medimo ya maaka. Asaria ga se a ka a se tlatša. O ile a tšwela pele “a dira tše di lokilego mahlong a Jehofa.” (2 Dikgoši 15:1-5) Eupša Jehofa o ile a otla Asaria ka lephera. Ka baka la’ng? Pego ye ya Beibele ga e re botše. Ka gona o ikwa bjang ka seo Jehofa a ilego a se dira Asaria? Na se a go tshwenya gomme sa dira gore o nagane gore Jehofa ga se a bontšha toka, gore o otlile Asaria ka ntle le lebaka? Aowa. Ge e ba o tseba Jehofa gabotse, o a tseba gore ka mehla tayo ya gagwe e nepagetše. Ka mehla o re phošolla “go fihla tekanyong e swanetšego.” (Jeremia 30:11) Ka gona, le ge o ka se tsebe gore ke ka baka la eng Jehofa a ile a otla Asaria, o ka kgodišega gore Jehofa o dirile se se nepagetšego.

9. Ke ditaba dife tšeo di re thušago go kwešiša lebaka leo Jehofa a ilego a otla Asaria ka lephera?

9 Beibele e re botša ditaba tše dingwe ka bophelo bja Kgoši Asaria, yoo gape a bego a tsebja e le Kgoši Usia. (2 Dikgoši 15:7, 32) Pego yeo e lego go 2 Dikoronika 26:3-5, 16-21 e re o ile a dira “tše di lokilego mahlong a Jehofa.” Eupša e bolela le gore ka morago “pelo ya gagwe e ile ya ikgogomoša go fihlela a bile a ipakela bošula.” Kgoši ye e ile ya leka go dira selo seo e bego e le baperisita feela ba bego ba dumeletšwe go se dira. Baperisita ba 81 ba ile ba mo kgala gomme ba leka go mo thibela. O ile a arabela bjang? O be a šetše a ikgogomoša kudu moo a ilego a ba befelela! Ditaba tše di re thuša go  kwešiša gore ke ka baka la eng Jehofa a ile a otla kgoši yeo ka lephera.

Ge o dutše o tseba Jehofa ka mo go oketšegilego, ke mo o tlago go bota gore ka mehla o dira se se nepagetšego

10. Ke ka baka la’ng go sa hlokagale gore re tsebe lebaka la selo se sengwe le se sengwe seo Jehofa a se dirago? Ke’ng se se ka dirago gore re bote gore Jehofa ka mehla o dira se se nepagetšego?

10 Re ithuta thuto efe ya bohlokwa? Pegong ye ya Kgoši Asaria, re na le ditaba ka botlalo tše di re thušago go kwešiša gore ke ka baka la eng Jehofa a ile a mo otla. Eupša o tla dira’ng maemong ao go ona Beibele e sa bolelego ditaba ka botlalo? Na o tla ipotšiša ge e ba ruri Jehofa a dirile se se nepagetšego? Goba na o tla nagana gore Beibele e na le boitsebišo bjo bo lekanego bjo bo ka go thušago go dumela gore Modimo ka mehla o dira se se nepagetšego? (Doiteronomio 32:4) Ge o dutše o tseba Jehofa ka mo go oketšegilego, ke mo o tlago go mo rata le go mmota kudu. Ka go re’alo o ka se nyake go tseba lebaka la selo se sengwe le se sengwe seo a se dirago. Ge o dutše o ithuta Beibele, Jehofa e tla ba wa kgonthe kudu go wena e bile o tla batamela kgauswiuswi le yena.—Psalme 77:12, 13.

O BOLELA LE JEHOFA GE O RAPELA

11-13. O tseba bjang gore Jehofa o kwa dithapelo? (Bona seswantšho seo se lego mathomong a sehlogo.)

11 Ge re rapela, re batamela kgauswi le Jehofa. Re a mo tumiša, ra mo leboga le go mo kgopela thušo. (Psalme 32:8) Eupša ge e ba o nyaka go ba le tswalano ya kgauswi le Jehofa, o swanetše go kgodišega gore o kwa dithapelo.

12 Batho ba bangwe ba re Modimo ga a kwe dithapelo e bile ba re go rapela e  fo ba selo se se dirago gore o ikwe bokaone. Ba dumela gore thapelo e go thuša feela gore o naganišiše ka mathata a gago le go ikhweletša dikarabo. Ke therešo gore thapelo e ka go thuša ka ditsela tše. Eupša ge o bolela le Jehofa thapelong, o tloga a go theetša. O ka kgodišega bjang ka se?

O ka kgodišega gore Jehofa o kwa dithapelo tša gago

13 Nagana ka se: Pele ga ge Jesu a ka tla mo lefaseng, o ile a bona gore Jehofa o araba dithapelo tša bahlanka ba Gagwe. Ge a be a le mo lefaseng, o ile a rapela Tatagwe wa legodimong gomme a mmotša dikgopolo le maikwelo a gagwe. Nakong e nngwe, o ile a ba a rapela bošego ka moka. (Luka 6:12; 22:40-46) Na Jesu o be a ka dira seo ge nkabe a be a nagana gore Jehofa ga se a theetša? Le gona Jesu o ile a ruta balatedi ba gagwe tsela ya go rapela Jehofa. Na o be a ka dira seo ge nkabe a be a nagana gore Jehofa ga a theetše dithapelo? Go molaleng gore Jesu o be a tseba gore Jehofa o tloga a ekwa dithapelo. O ile a ba a re: “Tate, ke a go leboga ka ge o nkwele. Ke therešo gore ke be ke tseba gore o nkwa ka mehla.” Le rena re ka kgodišega gore Jehofa o kwa dithapelo tša rena.—Johane 11:41, 42; Psalme 65:2.

14, 15. (a) Re holega bjang ge re kgopela dilo tše itšego ka go lebanya dithapelong tša rena? (b) Dithapelo tša Kathy di mo thušitše bjang gore a batamele kgauswi le Jehofa?

14 Ga se ka mehla dikarabo tša dithapelo tša gago di ka bago molaleng. Eupša ge o kgopela dilo tše itšego ka go lebanya dithapelong tša gago, o tla kgona go bona gabotse dikarabo tša Jehofa, le gona e tla ba wa kgonthe kudu go wena. Ge e ba o botša Jehofa dilo ka moka tšeo di go tshwenyago, o tla batamela kgauswi le wena.

 15 Ka mohlala, gantši Kathy o be a eya tšhemong eupša a sa e thabele. * (Bona mongwalo wa ka tlase.) O itše: “Ke be ke sa rate tšhemo. Ke re, ke be ke tloga ke sa e rate.” Ka morago ga gore a role modiro, mogolo yo mongwe o ile a mo kgothaletša gore e be mmulamadibogo wa ka mehla. Kathy o itše: “O ile a ba a nnea fomo. Ka tšea bobulamadibogo, eupša gape ka thoma go rapela Jehofa letšatši le letšatši gore a nthuše go rata tšhemo.” Na Jehofa o ile a araba dithapelo tša gagwe? Ka morago ga go bula madibogo ka nywaga e meraro, ga bjale o re: “Go fetša nako e ntši ke le bodireding le go ithuta go dikgaetšedi tše dingwe go nthušitše gore ganyenyane-ganyenyane ke kaonefatše bokgoni bja ka bja go nea bohlatse. Lehono ga ke fo thabela tšhemo—eupša ke a e rata. Go oketša moo, tswalano ya ka le Jehofa e matlafetše kudu go feta pele.” Ruri dithapelo tša Kathy di mo thušitše go batamela kgauswi le Jehofa.

Tšwela pele o batamela kgauswi kudu le Jehofa (Bona serapa 16 le 17)

KGATHA TEMA YA GAGO

16, 17. (a) Re swanetše go dira’ng gore re dule re matlafatša tswalano ya rena le Jehofa? (b) Re tlo ahlaahla’ng sehlogong se se latelago?

16 Re ka tšwela pele go batamela kgauswi kudu le Jehofa ka mo go sa felego. Ka gona a re tšweleng pele re mo theetša ka go ithuta Beibele ka mehla, e bile re dule re bolela le yena ka thapelo. Ge e ba re dira se, tswalano ya rena le Jehofa e tla ba matla le go feta, gomme o tla re thuša go kgotlelela diteko.

Re ka tšwela pele go batamela kgauswi kudu le Jehofa ka mo go sa felego

17 Eupša ka dinako tše dingwe re welwa ke mathata gaešita le ge re rapela Jehofa ka mehla. Dinakong tše bjalo, re ka thoma go se sa bota Jehofa. Re ka nagana gore Jehofa ga a kwe dithapelo tša rena gomme ra ipotšiša ge e ba re tloga re le bagwera ba gagwe. O ka dira’ng ge o thoma go ikwa ka tsela ye? Sehlogo se se latelago se tlo go thuša.

^ ser. 2 Tswalano ke tsela yeo batho ba babedi ba ikwago ka yona ka bobedi bja bona le kamoo ba swaranago ka gona. Bobedi bja bona ba swanetše go gata megato e itšego gore tswalano ya bona e dule e le matla.

^ ser. 15 Leina le fetotšwe.