Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  April 2015

Bota Jehofa ka Mehla!

Bota Jehofa ka Mehla!

“Mmoteng ka dinako tšohle.”—PSALME 62:8.

1-3. Ke ka baka la’ng Paulo a be a kgodišegile gore a ka bota Jehofa? (Bona seswantšho se se lego ka mo godimo.)

GE E ba o be o le Mokriste kua Roma lekgolong la pele la nywaga, o be o tla ba o phetše nakong e kotsi kudu. Baroma ba be ba tlaiša Bakriste o šoro. Ba ile ba latofatša Bakriste ka gore ke bona ba thomilego mollo o mogolo kua Roma le gore ba hloile batho. Bana beno ba bantši le dikgaetšedi ba Bakriste ba ile ba golegwa. Ba bangwe ba ile ba gagoganywa ke diphoofolo. Ba bangwe ba ile ba kokotelwa dikoteng gomme ba fišwa ba sa phela gore ba bonege bošego. Letšatši le lengwe le le lengwe o be o tseba gore o ka diragalelwa ke se sengwe sa dilo tšeo.

2 Nakong ye e thata kudu, moapostola Paulo o be a le kgolegong. A ka ba a ile a ipotšiša ge e ba bana babo ba Bakriste ba be ba tla mo thuša ka gobane o ile a gopola gore pejana ga moo ga go na motho yo a ilego a mo thuša. Eupša Jehofa o ile a mo thuša a diriša Morena Jesu. O ngwadile gore: “Morena o ile a ema le nna gomme a mpha matla.” Jesu o ile a nea Paulo matla ao a bego a a hloka. Paulo o ile a ba a ngwala gore o  “hlakodišitšwe molomong wa tau.”—2 Timotheo 4:16, 17. * (Bona mongwalo wa ka tlase.)

3 Paulo o ile a gopola kamoo Jehofa a ilego a mo thuša ka gona nakong e fetilego. Ka gona o be a kgodišegile gore Jehofa o tla mo nea matla ao a a hlokago gore a kgotlelele boemo bjo a bego a lebeletšane le bjona mo nakong ye gotee le diteko le ge e le dife tša nakong e tlago. O be a tloga a kgodišegile ka se moo a ilego a ngwala gore: “Morena o tla ntlhakodiša modirong o mongwe le o mongwe o kgopo.” (2 Timotheo 4:18) Paulo o be a ithutile gore gaešita le maemong ao bana babo ba bego ba sa kgone go mo thuša, ka mehla o be a ka bota thušo ya Jehofa le Jesu. O be a tloga a kgodišegile ka seo.

DIBAKA TŠA GORE RE BOTE JEHOFA

4, 5. (a) Ke mang yo ka mehla a ka go neago thušo yeo o e hlokago? (b) O ka dira’ng gore tswalano ya gago le Jehofa e be matla kudu?

4 Na o kile wa ba le bothata bjo bogolo moo o ilego wa ikwa o le noši, go se na motho yo a ka go thušago? Mohlomongwe o be o lahlegetšwe ke mošomo goba o na le mathata sekolong. Mohlomongwe o be o babja kudu goba o lebeletšane le teko e nngwe e thata kudu. O ka ba o ile wa kgopela batho ba bangwe gore ba go thuše eupša wa nyamišwa ke gore ba paletšwe ke go go thuša. Ke therešo gore go na le mathata a mangwe ao batho ba ka se kgonego go a rarolla. O tla dira’ng ge go le bjalo? Beibele e re botša gore re ‘bote Jehofa.’ (Diema 3:5, 6) Eupša na o ka kgodišega gore o tla go thuša? Ee! Re ka bala mehlala e mentši ka Beibeleng yeo e re kgodišago gore ruri Jehofa o thuša batho ba gagwe.

Teko e re nea sebaka sa go bota Jehofa ka mo go feletšego

5 O se ke wa kgopišega ge batho ba sa go nee thušo yeo o e hlokago. Go e na le moo, ka go swana le Paulo, nagana ka teko yeo o lebeletšanego le yona e le sebaka sa gore o bote Jehofa ka mo go feletšego. Le gona ke sebaka sa gore o bone kamoo a nago le taba le wena. Ka go re’alo, tsela yeo o botago Jehofa le tswalano ya gago le yena di tla ba matla kudu.

RE SWANETŠE GO BOTA JEHOFA

6. Ke ka baka la’ng go ka fo se be bonolo go bota Jehofa ge re na le bothata bjo bogolo?

6 O ka ba o na le bothata bjo bogolo bjo bo go ferekanyago. O dirile sohle se o ka se kgonago go rarolla bothata bjoo, e bile o rapetše Jehofa gore a go thuše. Na bjale o ka iša maswafo fase ka ge o bota gore o tla go thuša? Ee! (Bala Psalme 62:8; 1 Petro 5:7.) Ge e ba o nyaka go ba le tswalano e botse le Jehofa, go bohlokwa gore o ithute go mmota. Eupša ga se ka mehla go lego bonolo go dira se. Ka baka la’ng? Lebaka le lengwe ke gore Jehofa a ka fo se arabe thapelo ya gago le semeetseng.—Psalme 13:1, 2; 74:10; 89:46; 90:13; Habakuku 1:2.

Jehofa, yena Tatago rena wa legodimong, o a re rata e bile o tseba seo re se hlokago

7. Ke ka baka la’ng e se ka mehla moo Jehofa a arabago dithapelo tša rena le semeetseng?

7 Ke ka baka la’ng e se ka mehla moo Jehofa a arabago dithapelo tša rena le semeetseng?  Beibele e re Jehofa ke Tatago rena gomme rena re bana ba gagwe. (Psalme 103:13) Tate ga a nee ngwana wa gagwe dilo ka moka tšeo a mo kgopelago tšona goba go mo nea tšona le semeetseng. Tate o a tseba gore ngwana a ka nyaka selo se itšego ke moka ka moragonyana a se sa se nyaka. Le gona tate o tseba seo se swanetšego ngwana wa gagwe, e bile o tseba kamoo se ka kgomago batho ba bangwe. O tseba seo ngwana wa gagwe a se hlokago le gore o swanetše go se hwetša neng. Ge e ba tate a ka nea le semeetseng ngwana wa gagwe dilo ka moka tše a di kgopelago, e tla ba mohlanka wa ngwana wa gagwe. Jehofa, yena Tatago rena wa legodimong, o a re rata. Ka ge e le Mmopi wa rena yo bohlale, o tseba seo re se hlokago e bile o tseba nako ya maleba ya go re nea seo re mo kgopelago sona. Ke mo gobotse gore re lete gomme re bone kamoo Jehofa a arabago dithapelo tša rena.—Bapiša le Jesaya 29:16; 45:9.

8. Jehofa o re holofetša’ng ka seo re kgonago go se kgotlelela?

8 Le gona gopola gore Jehofa o tseba seo motho yo mongwe le yo mongwe a ka kgonago go se kgotlelela le seo a ka se kgonego go se kgotlelela. (Psalme 103:14) Ka gona o re nea matla ao re a hlokago. Ke therešo gore ka dinako tše dingwe re ka ikwa re se sa kgona go kgotlelela. Eupša Jehofa o re holofetša gore ge re se sa kgona go kgotlelela teko e itšego, o tla “bula tsela ya go tšwa.” (Bala 1 Bakorinthe 10:13.) Ruri go a kgothatša go tseba gore re ka bota gore Jehofa o tseba gabotse gore re ka kgotlelela go fihla kae!

9. Re swanetše go dira’ng ge e ba re rapela Jehofa gore a re thuše eupša a sa re arabe le semeetseng?

9 Ge e ba re rapela Jehofa gore a re thuše eupša a sa re arabe le semeetseng, anke re se fele pelo. Gopola gore Jehofa o dula a loketše go re thuša, eupša o leta ka go se fele pelo gore go fihle nako ya maleba ya go re nea seo re se hlokago. Beibele e re botša gore: “Jehofa o tla dula a le letile gore a le gaugele, gomme o tla ema gore a le bontšhe kgaugelo. Jehofa ke Modimo wa kahlolo. Go thaba bao ba dulago ba mo letetše.”—Jesaya 30:18.

“MOLOMONG WA TAU”

10-12. (a) Ke’ng seo se ka dirago gore go be thata go hlokomela setho sa lapa seo se babjago? (b) Ge o bota Jehofa dinakong tše thata, se se tla kgoma bjang tswalano ya gago le yena? Nea mohlala.

10 Boemo bjo o lego go bjona bo ka ba bo le thata kudu moo o ikwago go swana le Paulo gomme o hloka go hlakodišwa “molomong wa tau.” (2 Timotheo 4:17) Dinakong tše bjalo ka tše, go bohlokwa le go feta gore o bote Jehofa. Ka mohlala, o ka ba o hlokometše setho sa lapa seo se babjago. O rapetše Jehofa gore a go thuše go dira diphetho tše dibotse le gore o be matla. * (Bona mongwalo wa ka tlase.) Ga bjale o ka ikwa o na le khutšo ge o gopola gore Jehofa o a go bona boemong bjo o  lego go bjona e bile o a kwešiša. O tla go thuša gore o kgotlelele le go mmotegela.—Psalme 32:8.

Bota gore Tatago wa legodimong o tla go nea matla a gore o mmotegele

11 Ka dinako tše dingwe go ka bonagala eka Jehofa ga a go thuše. Mohlomongwe dingaka ga di dumelelane ka seo se swanetšego go dirwa. Goba o ka ba o be o holofetše gore ba leloko ba tla go homotša, eupša go bonagala ba mpefatša boemo. Ka mehla ithekge ka Jehofa gore a go nee matla. Dula o batamela kgauswi le yena. (Bala 1 Samuele 30:3, 6.) Ka morago ge o bona kamoo Jehofa a go thušitšego ka gona, tswalano ya gago le yena e tla matlafala kudu.

12 Linda o ile a ikwa ka yona tsela yeo. * (Bona mongwalo wa ka tlase.) O ile a hlokomela batswadi ba gagwe bao ba ilego ba babja ka nako e telele pele ba ka hwa. O re: “Ge re be re le boemong bjo, nna, monna wa ka le kgaetšedi ya ka gantši re be re sa tsebe gore re dire eng. Ka dinako tše dingwe re be re bona go se na motho yo a ka re thušago. Lega go le bjalo, ge re lebelela morago re bona gabotse kamoo Jehofa a re thekgilego ka gona. O ile a re matlafatša gomme a re nea seo re bego re tloga re se hloka, gaešita le ge go be go bonagala re feletšwe ke maano.”

13. Go bota Jehofa go thušitše Rhonda bjang go kgotlelela masetlapelo a go latelana?

13 Go bota ga rena Jehofa ka mo go feletšego go tla re thuša le go kgotlelela masetlapelo. Se ke seo se ilego sa diragalela Rhonda. Monna wa gagwe, yo e sego yo mongwe wa Dihlatse tša Jehofa, o be a mo hlala. Yona nakong ye, kgaetšedi ya gagwe o ile a botšwa gore o na le bolwetši bjo bošoro kudu bjo bo golofatšago mmele bjo bo bitšwago lupus. Ke moka, dikgwedi tše sego kae ka morago, mogadibo wa gagwe o ile a hwa. Ge Rhonda a be a thoma go tielela ka morago ga masetlapelo a, o ile a tšea bobulamadibogo bja ka mehla. Eupša ka yona nako yeo, mmagwe o ile a hwa. Rhonda o kgonne bjang go kgotlelela masetlapelo a? O re: “Ke be ke boledišana le Jehofa letšatši le lengwe le le lengwe, ke boledišana le yena le ka diphetho tše dinyenyane. Go dira seo go dirile gore Jehofa e be wa kgonthe go nna. Go nthutile gore ke ithekge ka yena go e na le go ipota goba go bota batho ba bangwe. Le gona thušo yeo a ilego a nnea yona e be e le ya kgonthe—ke ile ka hwetša dilo ka moka tšeo ke bego ke di hloka. Ka baka leo, ke latswitše go šoma gotee le Jehofa.”

Maemo a mangwe ka lapeng a ka leka tswalano ya gago le Jehofa (Bona dirapa 14-16)

14. Jehofa a ka go thuša bjang ge setho sa lapa se kgaotšwe?

14 Nagana ka boemo bjo bongwe ke bjo bjo thata. A re re setho sa lapa la geno se kgaotšwe. O tseba seo Beibele e se bolelago mabapi le kamoo re swanetšego go swara batho bao ba kgaotšwego. (1 Bakorinthe 5:11; 2 Johane 10) Eupša ka ge o rata motho yoo, o ka nagana gore go thata kudu go kwa taelo ye ya Beibele goba ga go kgonege go ekwa. Na o tla bota gore Tatago wa legodimong o tla go  nea matla a gore o mmotegele? Na o tla bona boemo bjo e le sebaka sa gore o batamele kgauswi le Jehofa?

15. Ke ka baka la’ng Adama a ile a se kwe Jehofa?

15 Re ka bapetša bjang boemo bjo le bja motho wa pele e lego Adama? Na o ile a ipotša gore a ka kgetha go se kwe Jehofa gomme a tšwela pele a phela? Aowa, Adama ga se yena a ilego “a forwa.” (1 Timotheo 2:14) Bjale ke ka baka la’ng a ile a se kwe Jehofa? Adama o ile a ja seenywa se mosadi wa gagwe a mo neilego sona ka gobane o be a rata mosadi wa gagwe go feta Jehofa. O ile a kwa mosadi wa gagwe go e na le go kwa taelo yeo Jehofa a bego a mo neile yona.—Genesi 3:6, 17.

16. Ke mang yo re swanetšego go mo rata kudu, gona ka baka la’ng?

16 Seo Adama a se dirilego se re ruta gore re swanetše go rata Jehofa go feta motho le ge e le ofe. (Bala Mateo 22:37, 38.) Le gona ge re ka rata Jehofa ka tsela yeo e matla, re ka thuša ba leloko ka tsela e kaonekaone, go sa šetšwe gore ba hlankela Jehofa goba go se bjalo. Ka gona dula o matlafatša tsela yeo o ratago Jehofa le yeo o mmotago ka yona. Ge e ba o tshwenyegile ka setho sa lapa seo se kgaotšwego, rapela Jehofa gomme o mo ntšhetše sa mafahleng. * (Bona mongwalo wa ka tlase.) (Baroma 12:12; Bafilipi 4:6, 7) Gaešita le ge o ekwa bohloko kudu, nagana ka boemo bjo e le sebaka sa go matlafatša tswalano ya gago le Jehofa le go feta. Ka go re’alo o tla kgona go mmota gomme wa tseba gore go mo kwa go tla ba le mafelelo a mabotse kudu.

 SEO RE KA SE DIRAGO GE RE SA LETILE

Bontšha Jehofa gore o a mmota ka go dula o swaregile modirong wa boboledi (Bona serapa 17)

17. Ge e ba re dula re swaregile modirong wa boboledi, re ka bota gore Jehofa o tla dira’ng?

17 Ke ka baka la’ng Jehofa a ile a hlakodiša Paulo “molomong wa tau”? Paulo o re: “E le gore boboledi bo phethwe ka botlalo ka nna.” (2 Timotheo 4:17) Le rena Jehofa o re neile modiro wa go bolela “ditaba tše dibotse,” e bile o re bitša “bašomigotee” le yena. (1 Bathesalonika 2:4; 1 Bakorinthe 3:9) Ge e ba re dula re swaregile kamoo re ka kgonago ka gona modirong wo, re ka bota gore Jehofa o tla re nea dilo ka moka tšeo re di hlokago. (Mateo 6:33) Le gona go tla ba bonolo gore re lete Jehofa gore a arabe dithapelo tša rena.

18. Ke’ng se o ka se dirago go matlafatša tsela yeo o botago Jehofa le go matlafatša tswalano ya gago le yena?

18 Ka gona diriša letšatši le lengwe le le lengwe go matlafatša tswalano ya gago le Jehofa. Ge go tšwelela teko gomme e dira gore o tshwenyege, lebelela seo e le sebaka sa go batamela kgauswi le Jehofa. Bala le go ithuta Lentšu la Modimo e lego Beibele gomme o naganišiše ka lona. Dula o rapela Jehofa gomme o swarege ka go mo hlankela. Ge o ka dira dilo tše, o ka kgodišega gore Jehofa o tla go thuša go kgotlelela diteko ka moka tšeo o lebeletšanego le tšona gona bjale le tšeo di ka go welago nakong e tlago.

^ ser. 2 Paulo a ka ba a ile a hlakodišwa ditaung tša kgonthe goba maemong a mangwe a kotsi.

^ ser. 10 Go na le dihlogo tše di gatišitšwego go thuša Bakriste go kgotlelela malwetši le go thuša bao ba ba hlokomelago. Bala Phafoga! ya February 8, 1994; February 8, 1997; June 8, 2000 le ya February 8, 2001.

^ ser. 12 Maina a fetotšwe.

^ ser. 16 Go gatišitšwe dihlogo tša go re thuša ge setho sa lapa se tlogela go hlankela Jehofa. Bala Morokami wa September 1, 2006, matlakala 17-21, le wa January 15, 2007, matlakala 17-20.