Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2015

Ithute Seswantšhong sa Ditalente

Ithute Seswantšhong sa Ditalente

“A nea yo mongwe ditalente tše hlano, yo mongwe tše pedi, yo mongwe gape ka e tee.”—MATEO 25:15.

1, 2. Ke ka baka la’ng Jesu a ile a bolela ka seswantšho sa ditalente?

JESU o boletše seswantšho sa ditalente gore a thuše balatedi ba gagwe ba tloditšwego gore ba kwešiše gabotse boikarabelo bja bona. Eupša seswantšho seo se kgoma barutiwa ba Jesu ka moka. Ka gona go sa šetšwe gore re na le kholofelo ya go phela legodimong goba mo lefaseng, re swanetše go kwešiša seo se bolelwago ke seswantšho se.

2 Jesu o boletše seswantšho se neng? O se boletše ge a be a nea barutiwa ba gagwe pontšho yeo e bego e tla bontšha gore e šetše e le Kgoši le gore mehla ya bofelo e thomile. (Mateo 24:3) Ka gona seswantšho sa ditalente ke karolo ya pontšho yeo gomme se phethagala mo mehleng ya rena.

3. Re ithuta’ng diswantšhong tšeo di lego go Mateo kgaolo 24 le 25?

3 Ge Jesu a be a bolela seswantšho sa ditalente, o boletše diswantšho tše dingwe tše tharo tšeo le tšona e bego e le karolo ya pontšho ya mehla ya bofelo. Diswantšho tše ka moka di hlalosa dika tše itšego tšeo balatedi ba gagwe ba swanetšego go ba le tšona. Re ka bala diswantšho tše go Mateo 24:45 go ya go 25:46. Seswantšho sa pele se mabapi le mohlanka yo a  botegago, e lego sehlopha se senyenyane sa batlotšwa bao ba nago le boikarabelo bja go ruta batho ba Jehofa. Ba swanetše go botega le go ba le temogo. * (Bona mongwalo wa ka tlase.) Seswantšho sa bobedi se mabapi le dikgarebe tše lesome. Seswantšhong seo, Jesu o lemošitše batlotšwa ka moka gore ba be ba tla swanelwa ke go itokiša le go phakgama ka gobane ba be ba ka se tsebe letšatši le ge e le iri yeo a tlago go tla ka yona. * (Bona mongwalo wa ka tlase.) Ka morago ga moo, Jesu o ile a bolela seswantšho sa ditalente gore a rute batlotšwa ka moka gore ba be ba tlo swanelwa ke go šoma ka thata go phetha boikarabelo bja bona bja Bokriste. Ke moka, Jesu o ile a bolela seswantšho sa mabapi le dinku le dipudi, seo se bolelago kudu ka bao ba bego ba tla ba le kholofelo ya go phela mo lefaseng. O ile a gatelela gore ba swanetše go botega le go dira sohle seo ba ka se kgonago go thuša bana babo bao ba tloditšwego. * (Bona mongwalo wa ka tlase.) Sehlogo se se tlo hlalosa seo se bolelwago ke seswantšho sa ditalente.

MOTHO O NEA BAHLANKA BA GAGWE TŠHELETE E NTŠI

4, 5. Motho wa seswantšhong sa ditalente o swantšhetša mang, gona talente ke’ng?

4 Bala Mateo 25:14-30. Seswantšhong sa ditalente, Jesu o boletše ka motho yo a ilego a tšea leeto. Seswantšhong seo se swanago le sona se, Jesu o boletše ka motho yo a ilego a tšea leeto gore e tle e be kgoši. * (Bona mongwalo wa ka tlase.) (Luka 19:12) Ka nywaga e mentši, dikgatišo tša rena di boletše gore diswantšhong tše ka bobedi motho yo o swantšhetša Jesu, yoo a rotogetšego legodimong ka ngwaga wa 33. Eupša Jesu ga se a ka a ba Kgoši gateetee ge a fihla legodimong. O ile a leta go fihlela ka 1914, ge manaba a gagwe a “[beilwe] go ba bogato bja dinao tša gagwe.”—Baheberu 10:12, 13.

5 Jesu o boletše gore motho wa seswantšhong se o be a na le ditalente tše seswai. Yeo e be e le tšhelete e ntši kudu. * (Bona mongwalo wa ka tlase.) Pele ga ge motho yoo a ka tšea leeto, o ile a nea bahlanka ba gagwe tšhelete yeo. O ile a ba botša gore ba e diriše e le gore ba mo direle tšhelete e oketšegilego. Go etša ge tšhelete yeo e be e le ya bohlokwa kudu go motho yoo, go na le selo se sengwe seo e bego e le sa bohlokwa kudu go Jesu. E be e le eng? E be e le modiro wo a ilego a o dira ge a be a le mo lefaseng.

“Emišang mahlo le bone mašemo gore a šweufaletše go bunwa”

6, 7. Ditalente di swantšhetša’ng?

6 Modiro wa boboledi o be o le bohlokwa kudu go Jesu. Ka baka la go dira ga gagwe boboledi, batho ba bantši ba ile ba  fetoga barutiwa ba gagwe. (Bala Luka 4:43.) Eupša o be a tseba gore go be go sa na le modiro o montši wo o swanetšego go dirwa le gore batho ba bantši ba be ba tla amogela ditaba tše dibotse. Ge e le gabotse, o ile a botša barutiwa ba gagwe gore: “Emišang mahlo le bone mašemo gore a šweufaletše go bunwa.” (Johane 4:35-38) Molemilemi a ka se tlogele tšhemo yeo e lego kgauswi le go bunwa. Jesu o be a nagana go etša molemi yoo. Ka gona pejana ga ge a ka boela legodimong, Jesu o ile a laela balatedi ba gagwe gore: ‘Eyang le dire barutiwa.’ (Mateo 28:18-20) Ka go re’alo, Jesu o ile a ba nea letlotlo la bohlokwa, e lego boikarabelo bjo bohlokwa bja go dira boboledi.—2 Bakorinthe 4:7.

7 Go etša motho yo a ilego a nea bahlanka ba gagwe tšhelete, Jesu o neile balatedi ba gagwe ba tloditšwego modiro wa go dira barutiwa. (Mateo 25:14) Ka gona ditalente di swantšhetša boikarabelo bja go dira boboledi le go dira barutiwa.

8. Gaešita le ge bahlanka ba seswantšhong sa ditalente ba se ba newa tšhelete e lekanago, mong wa bona o be a letetše’ng?

8 Jesu o boletše gore mong wa bahlanka bao o ile a nea mohlanka wa mathomo ditalente tše hlano, wa bobedi a mo nea tše pedi gomme wa boraro a mo nea tše tharo. (Mateo 25:15) Mong wa bona ga se a ba nea tšhelete e lekanago, eupša o be a letetše gore ka moka ga bona ba dire seo ba ka se kgonago go mo direla tšhelete e oketšegilego. Ka tsela e swanago, Jesu  o be a letetše gore balatedi ba gagwe ba tloditšwego ba dire sohle seo ba ka se kgonago modirong wa boboledi. (Mateo 22:37; Bakolose 3:23) Ka Pentekoste ya 33, balatedi ba Jesu ba ile ba thoma go dira batho ba ditšhaba ka moka barutiwa. Le gona ge re bala puku ya Beibele ya Ditiro, re bona gabotse gore ba šomile ka thata. * (Bona mongwalo wa ka tlase.)—Ditiro 6:7; 12:24; 19:20.

BAHLANKA BA DIRIŠA DITALENTE MEHLENG YA BOFELO

9. (a) Bahlanka ba babedi ba botegago ba ile ba dira’ng ka tšhelete yeo ba e neilwego, gona re ithuta’ng go seo? (b) Bao ba nago le kholofelo ya go tlo phela mo lefaseng ba swanetše go dira’ng?

9 Bahlanka ba babedi ba mathomo, bao ba dirišitšego tšhelete ya mong wa bona gabotse, ba swantšhetša bana babo rena le dikgaetšedi ba botegago ba tloditšwego mehleng ye ya bofelo. Ba be ba dutše ba dira sohle seo ba ka se kgonago modirong wa boboledi kudukudu ga e sa le go tloga ka 1919. Seswantšhong se, bahlanka ba ba babedi ba ile ba newa tšhelete e sa lekanego, eupša se ga se bolele gore go na le dihlopha tše pedi tša batlotšwa bao ba botegago. Bahlanka ba ka bobedi ba ile ba šoma ka thata gomme ba oketša gabedi tšhelete yeo ba bego ba e neilwe. Eupša na batlotšwa ke bona feela ba swanetšego go šoma ka thata modirong wa boboledi le wa go ruta? Aowa. Seswantšho sa Jesu sa dinku le dipudi se re ruta gore bao ba nago le kholofelo ya go tlo phela ka mo go sa felego mo lefaseng ba swanetše go thuša bana babo bao ba tloditšwego modirong wa boboledi gomme ba ba botegele. Ba bona e le tokelo e kgolo go ba thuša. Ee, batho ba Jehofa ke “mohlape o tee,” gomme ka moka ga bona ba šoma ka thata modirong wa boboledi le wa go dira barutiwa.—Johane 10:16.

10. Ke karolo efe ya pontšho yeo Jesu a e neilego yeo e hlatselago gore re phela mehleng ya bofelo?

10 Jesu o letetše gore balatedi ba gagwe  ka moka ba šome ka thata go dira barutiwa ba oketšegilego. Barutiwa ba gagwe ba ile ba dira sona seo lekgolong la pele la nywaga. Mehleng ye ya bofelo, e lego mehla yeo seswantšho sa Jesu sa mabapi le ditalente se phethagalago go yona, na balatedi ba gagwe ba dira modiro wo? Ee, lehono batho ba bantši kudu ba kwa ditaba tše dibotse le go fetoga barutiwa go feta nakong e fetilego! Ka baka la ge balatedi ba Jesu ka moka ba šoma ka thata modirong wo, ngwaga le ngwaga go kolobetšwa batho ba dikete. Le bona ba tšea karolo modirong wo wa boboledi. Modiro wo ka moka le mafelelo a wona a mabotse di bontšha gabotse gore modiro wa boboledi ke karolo ya bohlokwa ya pontšho yeo Jesu a e neilego mabapi le mehla ya bofelo. Ga go pelaelo gore Jesu o ikgantšha ka bašomi ba gagwe!

Jesu o neile bahlanka ba gagwe letlotlo la bohlokwa, e lego boikarabelo bjo bohlokwa bja go dira boboledi (Bona serapa 10)

MONG O TLO TLA NENG?

11. Re tseba bjang gore Jesu o tla tla nakong ya masetlapelo a magolo?

11 Jesu o itše: “Ka morago ga nako e telele mong wa bahlanka bao a tla a lokiša ditaba tša ditšhelete le bona.” (Mateo 25:19) Mong, e lego Jesu, o tla dira se ge masetlapelo a magolo a le kgauswi le go fela. Re tseba seo bjang? Boporofeteng bja gagwe bjo bo lego go Mateo kgaolo 24 le 25, Jesu o boletše gantši gore o a tla. Ka mohlala, o itše batho ba tla “bona Morwa wa motho a etla ka maru a legodimo.” Se se šupa nakong ya masetlapelo a magolo ge Jesu a tlo ahlola batho. Le gona o ile a lemoša balatedi ba gagwe bao ba phelago mehleng ya bofelo gore ba phakgame. O itše: “Ga le tsebe letšatši leo Morena wa lena a tlago ka lona” e bile a re, “Morwa wa motho o tla ka nako yeo le sa e naganego.” (Mateo 24:30, 42, 44) Ka gona seswantšhong sa ditalente, Jesu o be a bolela le ka nako ya ge a tlo ahlola batho le go fediša lefase la Sathane. *—Bona mongwalo wa ka tlase.

12, 13. (a) Mong wa bahlanka o ile a re’ng go bahlanka ba babedi, gona ka baka la’ng? (b) Batlotšwa ba tla swaiwa neng la mafelelo? (Bona le lepokisi le le rego, “Ba Ahlolwa ba Swanelega ge ba Ehwa.”) (c) Bao ba ilego ba thekga batlotšwa ba tla hwetša moputso ofe?

12 Ge mong wa bahlanka bao a boa leetong la gagwe, o ile a hwetša gore mohlanka yo a bego a mo neile ditalente tše hlano o dirile tše dingwe tše hlano gomme  mohlanka yo a bego a mo neile ditalente tše pedi o dirile tše dingwe tše pedi. Mong wa bona o ile a botša yo mongwe le yo mongwe wa bona gore: “O dirile gabotse, mohlanka yo botse le yo a botegago! O botegile dilong tše dinyenyane. Ke tla go bea gore o hlokomele dilo tše dintši.” (Mateo 25:21, 23) Mong, e lego Jesu, o tla dira’ng ge a etla nakong e tlago?

13 Pejana ga masetlapelo a magolo, Modimo o tla bontšha la mafelelo gore o amogela batlotšwa bao ba šomago ka thata bao ba tla bego ba sa le mo lefaseng ka nako yeo. Se ke go swaiwa ga bona ga mafelelo. (Kutollo 7:1-3) Ke moka, pele ga ntwa ya Haramagedone, Jesu o tla ba putsa ka go ba rotošetša legodimong. Eupša go thwe’ng ka bao ba nago le kholofelo ya go phela lefaseng, e lego bao ba ilego ba thekga batlotšwa modirong wa boboledi? Ba tla be ba ahlotšwe e le dinku. Le gona ba tla putswa ka bophelo lefaseng ge go tla be go buša Mmušo wa Modimo.—Mateo 25:34.

MOHLANKA YO KGOPO LE WA SEBODU

14, 15. Na Jesu o be a bolela gore batlotšwa ba bantši ba be ba tla ba kgopo le go ba dibodu? Hlalosa.

14 Seswantšho se se bolela le ka mohlanka yo a bego a neilwe talente e tee. Ga se a ka a e diriša go direla mong wa gagwe tšhelete e oketšegilego goba go e tsenya pankeng gore e be le tswalo. Go e na le moo, o ile a e uta mmung. Mong wa gagwe o ile a re mohlanka yo ke yo kgopo e bile ke sebodu. O ile a mo amoga talente yeo gomme a e nea mohlanka wa pele. Ke moka a lahlela mohlanka yoo yo kgopo ka ntle “leswiswing,” gomme ge a le moo a lla a le tlalelong.—Mateo 25:24-30; Luka 19:22, 23.

 15 Ge Jesu a be a re o tee wa bahlanka bao ba bararo o be a le kgopo e bile e le sebodu, o be a sa re gore motlotšwa o tee go ba bararo o tla swana le mohlanka yoo. Re tseba se ka go bapiša seswantšho se le tše dingwe tše pedi. Seswantšhong sa mohlanka yo a botegago le wa temogo, Jesu o boletše ka mohlanka yo mobe yo a ilego a tlaiša bahlanka ba bangwe. Jesu o be a sa re gore bao e bego e tla ba karolo ya mohlanka yo a botegago le wa temogo e be e tla ba babe. Go e na le moo, o be a lemoša batlotšwa bao gore ba se ke ba swana le mohlanka yoo yo mobe. Ke moka, seswantšhong sa dikgarebe tše lesome, Jesu o boletše ka dikgarebe tše hlano tša mašilo. O be a sa re gore seripa sa batlotšwa e be e tla ba mašilo. Go e na le moo, Jesu o be a lemoša ka seo se bego se tla direga ge e ba ba be ba sa itokiša le go dula ba phakgame. * (Bona mongwalo wa ka tlase.) Ka mo go swanago, seswantšhong sa ditalente, Jesu o be a sa re gore batlotšwa ba bantši mehleng ya bofelo ba be ba tla ba kgopo le go ba dibodu. Go e na le moo, o be a lemoša batlotšwa gore ba se swane le mohlanka yo kgopo eupša ba tšwele pele ba šoma ka thata modirong wa boboledi.—Mateo 25:16.

Jesu o tlo putsa barutiwa ba gagwe ka moka bao ba šomago ka thata modirong wa boboledi

16. (a) Re ithuta dithuto dife tše pedi tša bohlokwa seswantšhong sa ditalente? (b) Sehlogo se se re thušitše bjang go kwešiša seswantšho sa ditalente? (Bona lepokisi le le rego, “Re Swanetše go Kwešiša Bjang Seswantšho sa Ditalente?”)

16 Re ithuta dithuto dife tše pedi seswantšhong sa ditalente? Sa pele, Jesu o neile barutiwa ba gagwe ba tloditšwego letlotlo la bohlokwa, e lego boikarabelo bjo bohlokwa bja go bolela ditaba tše dibotse le go dira barutiwa. Sa bobedi, Jesu o letetše gore ka moka ga rena re šome ka thata modirong wa boboledi. Ge e ba re kgotlelela ka potego modirong wo gomme re dula re ekwa Jesu le go mmotegela, re ka kgodišega gore o tlo re putsa.—Mateo 25:21, 23, 34.

^ ser. 3 Morokami wa July 15, 2013, matlakala 21-22, dirapa 8-10, o hlalosa gore mohlanka yo a botegago le wa temogo ke mang.

^ ser. 3 Sehlogo se se fetilego ka makasineng wo se hlalosa gore dikgarebe ke bomang.

^ ser. 3 Seswantšho sa dinku le dipudi se hlalositšwe ka go Morokami wa October 15, 1995, matlakala 23-28, le sehlogong se se latelago ka makasineng wo.

^ ser. 5 Mehleng ya Jesu, talente e tee e be e le tšhelete yeo mošomi bego a swanetše go šoma nywaga e 20 gore a e hwetše.

^ ser. 8 Kapejana ka morago ga gore baapostola ba hwe, bohlanogi bo ile bja aparela diphuthegong ka moka. Ka nywagakgolo e mentši, modiro wa boboledi o ile wa dirwa ka tekanyo e nyenyane kudu. Eupša “lebakeng la puno,” goba mehleng ya bofelo, modiro wa boboledi o be o tla thoma gape. (Mateo 13:24-30, 36-43) Bala Morokami wa July 15, 2013, matlakala 9-12.

^ ser. 15 Bona serapa 13 sehlogong seo se rego, “Na o tla ‘Dula o Phakgame’?” ka makasineng wo.