Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2015

Dipotšišo tše Tšwago go Babadi

Dipotšišo tše Tšwago go Babadi

Nakong e fetilego, gantši dikgatišo tša rena di be di bolela ka dilo tšeo e lego diswantšhetšo le phethagalo ya tšona goba dilo tša kgonthe. Eupša nywageng ya morago bjale seo se dirwa ka sewelo. Ka baka la’ng?

Morokami wa September 15, 1950, o ile wa hlalosa seo se bolelwago ke lentšu “seswantšhetšo” le polelwana “selo sa kgonthe.” O ile wa hlalosa gore seswantšhetšo ke motho, tiragalo goba selo se itšego seo se swantšhetšago motho yo a itšego goba selo se segolwanyana seo se sa tlago go direga. Selo sa kgonthe ke motho, tiragalo goba selo se itšego seo se emelago seswantšhetšo. Seswantšhetšo se be se bitšwa gape gore ke moriti, gomme selo sa kgonthe se bitšwa phethagalo.

Nakong e fetilego, dikgatišo tša rena di boletše gore banna le basadi ba botegago ba bjalo ka Debora, Elihu, Jefeta, Jobo, Rahaba, Rebeka le ba bangwe ba bantši ba be ba swantšhetša batlotšwa goba “lešaba le legolo.” (Kutollo 7:9) Ka mohlala, re boletše gore Jefeta, Jobo le Rebeka ba swantšhetša batlotšwa gomme ra re Debora le Rahaba ba swantšhetša lešaba le legolo. Eupša nywageng ya morago bjale ga se ra dira dipapišo tša mohuta woo. Ka baka la’ng?

SESWANTŠHETŠO

Kwana ya Paseka yeo Baisiraele ba bego ba dira sehlabelo ka yona e be e le seswantšhetšo.—Numeri 9:2

SELO SA KGONTHE

Paulo o boletše gore Kriste ke kwana ya rena ya “Paseka.”—1 Bakorinthe 5:7

Ke therešo gore Mangwalo a ruta gore batho ba itšego ba ka Beibeleng ba swantšhetša motho yo a itšego goba selo se itšego se segolwanyana seo se bego se sa tlo direga. Ka mohlala, go Bagalatia 4:21-31, moapostola Paulo o bolela ka “tiragalo ya tshwantšhetšo” ya mabapi le basadi ba babedi. Mosadi wa mathomo ke Hagara, yoo e bego e le lekgoba la Aborahama la mosadi. Paulo o hlalosa gore Hagara o swantšhetša setšhaba sa Isiraele, seo se bego se le kgweranong le Jehofa ka tlase ga Molao wa Moshe. Mosadi wa bobedi ke “mosadi yo a lokologilego,” e lego Sara mosadi wa Aborahama. Sara o be a swantšhetša mosadi wa Modimo, e lego karolo ya legodimong ya mokgatlo wa Modimo. Le gona Paulo o boletše dilo tše dintši tšeo Melekitsedeke, yo e bego e le kgoši e bile e le moperisita, a bego a swana ka tšona le Jesu. (Baheberu 6:20; 7:1-3) Go oketša moo, Paulo o boletše ka moporofeta Jesaya le barwa ba gagwe gomme a ba bapetša le Jesu le Bakriste ba tloditšwego. (Baheberu 2:13, 14) Jehofa o ile a budulela Paulo gore a ngwale dipapišo tše, ka gona re ka kgodišega gore diswantšhetšo tšeo le phethagalo ya tšona di nepagetše.

Lega go le bjalo, gaešita le ge Beibele e bontšha gore  motho a ka swantšhetša selo se itšego, ga se ra swanela go nagana gore selo se sengwe le se sengwe goba tiragalo e nngwe le e nngwe bophelong bja motho yoo e swantšhetša selo se itšego se segolwanyana seo se sa tlago go direga. Ka mohlala, Paulo o hlalosa gore Melekitsedeke o swantšhetša Jesu. Eupša Paulo ga a bolele selo ka seo se ilego sa direga ge Melekitsedeke a be a tlišetša Aborahama senkgwa le beine ka morago ga gore a fenye dikgoši tše nne. Ka gona ga go na lebaka la Mangwalo la gore re nyakišiše tlhaloso e utegilego ya seo se swantšhetšwago ke tiragalo yeo.—Genesi 14:1, 18.

Nywaga e makgolo ka morago ga lehu la Kriste bangwadi ba bangwe ba ile ba dira phošo e kgolo kudu. Ba ile ba dira gore mo e ka bago pego e nngwe le e nngwe ya ka Beibeleng e be le seo e se swantšhetšago. The International Standard Bible Encyclopaedia e hlalosa dithuto tša Origen, Ambrose le Jerome, ka gore: “Ba ile ba tsoma diswantšhetšo tiragalong e nngwe le e nngwe, gaešita le dilong tše dinyenyane tšeo di begilwego ka Mangwalong—gomme ba ba di hwetša. Ba be ba nagana gore gaešita le dilo tše dinyenyane tšeo di tlwaelegilego di utile ditherešo [tše di fihlegilego] kudu . . . , e bile ba be ba nagana gore gaešita le palo ya dihlapi tšeo barutiwa [ba Jesu] ba ilego ba di swara bošegong bjoo Mophološi wa bona yo a tsošitšwego a iponagaditšego go bona e na le seo e se swantšhetšago—gomme ba bangwe ba lekile ka gohle go hwetša tlhaloso ya palo ya dihlapi tšeo, e lego tše 153!”

Mongwadi yo mongwe e lego Augustine wa kua Hippo, o hlalositše gore pego ya Beibele yeo go yona Jesu a ilego a fepa banna ba 5 000 ka dinkgwa tše hlano tša garase le dihlapi tše pedi di na le seo di se swantšhetšago. O itše dinkgwa tše hlano tša garase di be di swantšhetša dipuku tša mathomo tše hlano tša Beibele. Le gona ka ge garase e be e lebelelwa e phalwa ke korong, seo se be se bolela gore “Testamente ya Kgale” e phalwa ke “Testamente e Mpsha.” E bile o hlalositše gore dihlapi tšeo tše pedi di be di swantšhetša kgoši le moperisita. Seithuti se sengwe sa Beibele se hlalositše gore go reka ga Jakobo tshwanelo ya bogolo go Esau ka dinawa tše khwibidu go swantšhetša go reka ga Jesu kholofelo ya batho ya go phela legodimong ka madi a gagwe a mahwibidu!

Ge e ba o hwetša go le thata gore o kgolwe ditlhaloso tše, go ra gore o šetše o bona mo bothata bo lego gona. Ga go kgonege gore batho ba tsebe dipego tša ka Beibeleng tšeo di swantšhetšago dilo tše itšego tše kgolwanyana goba tšeo di sa swantšhetšego selo. Ka baka leo, ke’ng seo re swanetšego go se dira? Ge Mangwalo a re botša gore motho yo a itšego, tiragalo goba selotsoko se swantšhetša selo se itšego seo se sa tlago go direga, re amogela tlhaloso yeo. Eupša ga se ra swanela go inaganela seo se swantšhetšwago ke pego e itšego ya ka Beibeleng ge go se na lebaka la Mangwalo la go dira bjalo.

Ka gona re ka holwa bjang ke ditaba tše dinyenyane le ditiragalo tšeo re di balago ka Beibeleng? Moapostola Paulo o ngwadile gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Paulo o be a ngwalela Bakriste ba tloditšwego ba lekgolong la pele la nywaga, a ba botša kamoo ba ka holwago ke dipego tša Beibele. Lega go le bjalo, go tloga ka yona nako yeo, Bakriste ka moka, go akaretša le “dinku tše dingwe,” ba hotšwe ke dithuto tšeo di lego ka Mangwalong.—Johane 10:16; 2 Timotheo 3:1.

Ka go re’alo, dipego tše dintši tša ka Beibeleng ga di hole batlotšwa feela, “dinku tše dingwe,” goba Bakriste bao ba phelago nakong e itšego. Go e na le moo, dipego tše dintši tša ka Beibeleng di hotše bahlanka ka moka ba Modimo, ba nakong e fetilego le ba mehleng yeno. Ka mohlala, tlaišego ya Jobo ga e swantšhetše feela tlaišego yeo e ilego ya wela batlotšwa nakong ya Ntwa ya Pele ya Lefase. Batho ba bantši ba Modimo, banna le basadi, batlotšwa le “dinku tše dingwe,” ba tlaišega go swana le Jobo e bile ba holwa ke go ithuta pego yeo. Ba “bone pheletšo yeo Jehofa a e neilego, gore Jehofa o na le lerato le legolo e bile ke yo a gaugelago.”—Jakobo 5:11.

Diphuthegong tša gabo rena lehono, go na le basadi ba godilego bao ba botegago go swana le Debora, gotee le bagolo ba bafsa bao ba lego bohlale go swana le Elihu. Le gona go na le babulamadibogo ba mafolofolo le bao ba nago le sebete go swana le Jefeta, gotee le banna le basadi ba botegago bao ba sa felego pelo go swana le Jobo. Ruri re leboga gore Jehofa o kgonthišeditše gore “dilo tšohle tšeo di ilego tša ngwalwa e sa le pele” di a hwetšagala lehono, e le gore “ka khomotšo e tšwago Mangwalong re be le kholofelo”!

Ka gona ka baka la mabaka a, ga re leke go inaganela seo se swantšhetšwago ke pego e nngwe le e nngwe ya ka Beibeleng goba phethagalo ya sona ya nakong e tlago. Go e na le moo, gona bjale dikgatišo tša rena di bolela kudu ka dithuto tša bohlokwa tšeo re ithutago tšona ka Mangwalong.