Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  March 2015

Go Thekga Bana Babo Kriste ka Potego

Go Thekga Bana Babo Kriste ka Potego

“Go fihla tekanyong yeo ka yona le diretšego yo mongwe wa bana bešo ba ba banyenyane, le diretše nna.”—MATEO 25:40.

1, 2. (a) Jesu o ile a botša bagwera ba gagwe diswantšho dife? (Bona seswantšho se se lego ka mo godimo.) (b) Ke’ng seo re swanetšego go se tseba ka seswantšho sa dinku le dipudi?

JESU o be a bolela le bagwera ba gagwe e lego Petro, Andrea, Jakobo le Johane ka selo se itšego seo se kgahlišago kudu. Ka morago ga gore a ba botše seswantšho sa mohlanka yo a botegago le wa temogo, sa dikgarebe tše lesome le sa ditalente, Jesu o ile a botša bagwera bao ba gagwe seswantšho se sengwe. Seswantšhong seo, o boletše ka nako ya ge “Morwa wa motho” a tlo ahlola “ditšhaba ka moka.” O ile a re “Morwa wa motho” o tlo aroganya batho ka dihlopha tše pedi, se sengwe a se hlalosa e le dinku gomme se sengwe a re ke dipudi. Le gona o ile a hlalosa sehlopha se sengwe sa bohlokwa sa boraro, e lego ‘bana babo’ Kgoši.—Bala Mateo 25:31-46.

2 Go etša baapostola, bahlanka ba Jehofa ba mehleng yeno le bona ba nyaka go tseba ka seswantšho se ka gobane  maphelo a batho a a akaretšwa. Jesu o itše ba bangwe ba tla hwetša bophelo bjo bo sa felego eupša ba bangwe ba tla fedišwa. Ke ka baka leo go lego bohlokwa kudu gore re tsebe seo se bolelwago ke seswantšho se le seo re swanetšego go se dira gore re tle re hwetše bophelo bjo bo sa felego. Ka gona sehlogong se, re tlo araba dipotšišo tše di latelago: Jehofa o re thušitše bjang go kwešiša seswantšho se? Re tseba bjang gore seswantšho se se gatelela modiro wa boboledi? Ke bomang bao ba swanetšego go dira boboledi? Le gona ke ka baka la’ng go le bohlokwa gore gona bjale batho ba botegele “Kgoši” yeo le ‘bana babo’ yona?

JEHOFA O RE THUŠITŠE BJANG GO KWEŠIŠA SESWANTŠHO SE?

3, 4. (a) Re swanetše go tseba’ng gore re kwešiše seswantšho sa dinku le dipudi? (b) Ka 1881, Morokami wa Seisemane o ile wa hlalosa seswantšho se bjang?

3 E le gore re kwešiše seo se bolelwago ke seswantšho sa dinku le dipudi, re swanetše go tseba gore “Morwa wa motho,” goba “Kgoši” (1) ke mang, gore dinku le dipudi ke bomang le gore ‘bana babo’ Kgoši ke bomang? Re swanetše go tseba gape gore “Morwa wa motho” o tla aroganya, goba go ahlola dinku le dipudi (2) neng? le gore (3) ke ka baka la’ng ba bangwe ba bitšwa dinku gomme ba bangwe ba bitšwa dipudi?

4 Ka 1881, Morokami wa Seisemane o ile wa re “Morwa wa motho,” goba “Kgoši,” ke Jesu. Le gona o ile wa hlalosa gore ‘bana babo’ Kgoši ga se feela bao ba tlago go buša le Jesu legodimong eupša ba akaretša le batho ka moka bao ba tlago go phela mo lefaseng ge ba šetše ba phethagetše. Morokami woo o hlalositše gore batho ba tla aroganywa nakong ya Pušo ya Kriste ya Nywaga e Sekete le gore bao ba ekišitšego lerato la Modimo dilong ka moka tšeo ba bego ba di dira ba tla bitšwa dinku.

5. Ka 1923, batho ba Modimo ba be ba kwešiša bjang seswantšho sa dinku le dipudi?

5 Ka morago, Jehofa o ile a thuša batho ba gagwe go kwešiša seswantšho se kutšwanyana. Ka 1923, Morokami wa October 15 wa Seisemane e o ile wa re “Morwa wa motho” ke Jesu. Eupša o ile wa diriša ditemana tša Beibele go hlalosa gore ‘bana babo’ Kgoši bao go bolelwago ka bona seswantšhong se ke feela bao ba tlago go buša le Jesu le gore ka moka ga bona ba tla be ba le legodimong nakong ya Pušo ya Nywaga e Sekete. Le gona o boletše gore dinku ke bao ba tlago go phela mo lefaseng ka tlase ga pušo ya Jesu le bana babo. E bile ka ge seswantšho se se re batho ba ba thuša bana babo Kgoši, gona go aroganya, goba go ahlola, go tla swanela go direga ge bana babo Jesu ba tloditšwego ba sa le mo lefaseng, pele ga ge Pušo ya Nywaga e Sekete e ka thoma. Sehlogo seo se boletše gape gore dinku e tla ba bao ba dumelago go Jesu le bao ba dumelago gore Mmušo o tla tliša bophelo bjo bokaone.

6. Kwešišo ya rena ka seswantšho sa dinku le dipudi e ile ya fetoga bjang ka 1995?

6 Ka nywaga e mentši re be re nagana gore batho ba ahlolwa ka modiro wa boboledi mehleng ye ya bofelo. Ge ba be ba amogela molaetša wa rena, go be go thwe ke dinku, gomme ge ba o gana, go thwe ke dipudi. Eupša ka 1995 tsela yeo re bego re kwešiša seswantšho se e ile ya  fetoga. Morokami o ile wa bapiša Mateo 24:29-31 (bala) le Mateo 25:31, 32 (bala), gomme wa hlalosa gore Jesu o tlo ahlola batho nakong ya masetlapelo a magolo ge Morwa wa motho “a fihla ka letago la gagwe.” *—Bona mongwalo wa ka tlase.

Re leboga kudu gore Jehofa o re thušitše go kwešiša diswantšho tša Jesu

7. Seswantšho sa dinku le dipudi se ra go re’ng?

7 Lehono, re kwešiša seswantšho sa dinku le dipudi gabotse. Re a tseba gore “Morwa wa motho,” goba “Kgoši,” ke Jesu. ‘Bana babo’ Kgoši ke bao ba tloditšwego ka moya o mokgethwa bao ba tlago go buša legodimong le Jesu. (Baroma 8:16, 17) “Dinku” le “dipudi” ke batho bao ba tšwago ditšhabeng ka moka. Ba tlo ahlolwa go ya mafelelong a masetlapelo a magolo ao a lego kgauswi le go thoma. Le gona re a tseba gore Jesu o tlo ahlola batho go ya kamoo ba ilego ba swara batlotšwa bao ba sa lego mo lefaseng. Re leboga kudu gore go theoša le nywaga Jehofa o re thušitše go kwešiša seswantšho se le diswantšho tše dingwe tše di lego go Mateo kgaolo 24 le 25!

SESWANTŠHO SE SE RE RUTA GORE MODIRO WA BOBOLEDI O BOHLOKWA KUDU

8, 9. Ke ka baka la’ng Jesu a ile a re dinku ke “baloki”?

8 Jesu ga se a ka a bolela lentšu “boboledi” goba polelwana “modiro wa boboledi” seswantšhong sa dinku le dipudi. Ka gona re tseba bjang gore seswantšho se se re ruta gore modiro wa boboledi o bohlokwa kudu?

9 E le gore re hwetše karabo, sa pele re swanetše go gopola gore Jesu o be a ruta batho a diriša diswantšho. O be a sa bolele ka dinku le dipudi tša kgonthe. Ka tsela e swanago, o be a sa re gore motho yo mongwe le yo mongwe yo a tlago go ahlolwa e le nku o swanetše go nea batlotšwa dijo le diaparo, a ba hlokomele ge ba babja goba a ba etele kgolegong. Go e na le moo, Jesu o hlalositše dinku e le “baloki” ka gobane ba lebelela batlotšwa e le bana babo le ka gobane ba botegela batlotšwa mehleng ye e thata ya bofelo.—Mateo 10:40-42; 25:40, 46; 2 Timotheo 3:1-5.

10. Dinku di ka thuša bjang bana babo Kriste?

10 Ge Jesu a be a bolela seswantšho sa dinku le dipudi, o be a bolela ka seo se bego se tla direga mehleng ye ya bofelo. (Mateo 24:3) Ka mohlala, o itše: “Ditaba tše tše dibotse tša Mmušo di tla bolelwa lefaseng ka moka.” (Mateo 24:14) Ke moka, pejana ga ge a ka bolela ka dinku le dipudi, o ile a bolela seswantšho sa ditalente. Jesu o ile a bolela seswantšho se gore a rute batlotšwa gore ba swanetše go šoma ka thata modirong wa boboledi. Eupša go šetše ba sego kae ba bona mo lefaseng, gomme go na le modiro o montši kudu wo o swanetšego go dirwa! Batlotšwa  ba laetšwe gore ba dire boboledi go “ditšhaba tšohle” pele bofelo bo fihla. Go etša ge re ithutile seswantšhong sa dinku le dipudi, “dinku” di thuša bana babo Jesu. Le gona e nngwe ya ditsela tše kaonekaone yeo ba ka dirago se ke ka go thuša bana babo Jesu modirong wa boboledi. Eupša na go lekane go fo ntšha moneelo go thekga modiro wo goba go ba kgothaletša go dira modiro wa boboledi?

KE BOMANG BAO BA SWANETŠEGO GO DIRA BOBOLEDI?

11. Ba bangwe ba ka botšiša potšišo efe, gona ka baka la’ng?

11 Lehono, go na le barutiwa ba Jesu ba dimilione tše seswai, gomme ba bantši ba bona ga se batlotšwa. Jesu ga se a ba nea ditalente. O di neile bana babo bao ba tloditšwego. (Mateo 25:14-18) Ka gona ba bangwe ba ka botšiša gore: ‘Ge e ba Jesu a se a re nea ditalente, na ruri re swanetše go dira boboledi?’ Ee. Anke re boneng lebaka la seo.

12. Re ithuta’ng mantšung a Jesu ao a lego go Mateo 28:19, 20?

12 Jesu o laetše barutiwa ba gagwe ka moka gore ba dire boboledi. Ka morago ga gore Jesu a tsošwe bahung, o ile a botša balatedi ba gagwe gore ‘ba dire batho barutiwa’ le go ba ruta “dilo tšohle” tšeo a ba laetšego tšona. Ka gona barutiwa ba le bona ba be ba swanetše go kwa taelo ya Jesu ya gore ba dire boboledi. (Bala Mateo 28:19, 20.) Go molaleng gore ka moka ga rena re swanetše go dira boboledi, go sa šetšwe gore re na le kholofelo ya go phela legodimong goba mo lefaseng.—Ditiro 10:42.

Ka moka ga rena re swanetše go dira boboledi, go sa šetšwe gore re na le kholofelo ya go phela legodimong goba mo lefaseng

13. Re ithuta’ng ponong yeo Johane a e bonego?

13 Ka pukung ya Kutollo, re ithuta gore modiro wa boboledi o be o tla dirwa ke batlotšwa le batho ba bangwe. Jesu o neile moapostola Johane pono ya “monyadiwa” yo a laletšago batho gore ba tle ba nwe meetse ao a neago bophelo. Monyadiwa yo o swantšhetša batlotšwa ba 144 000 bao ba tlago go buša le Jesu legodimong. (Kutollo 14:1, 3; 22:17) Meetse ao a swantšhetša sehlabelo sa Jesu sa topollo seo se tlago go thuša batho go hwetša bophelo bjo bo se nago sebe le lehu. (Mateo 20:28; Johane 3:16; 1 Johane 4:9, 10) Ka mafolofolo batlotšwa ba ruta ba bangwe ka topollo le kamoo e ka ba holago ka gona. (1 Bakorinthe 1:23) Eupša pono yeo e bolela ka sehlopha se sengwe sa batho bao e sego batlotšwa eupša ba na le kholofelo ya go tlo phela mo lefaseng. Le bona ba laelwa go botša batho gore: “Tlaa!” Le gona ba kwa taelo yeo ka go ruta batho ba bangwe ditaba tše dibotse. Ka gona pono ye e bontšha gore bohle bao ba amogelago molaetša wa ditaba tše dibotse ba swanetše go o botša ba bangwe.

14. Re bontšha bjang gore re kwa “molao wa Kriste”?

14 Bohle bao ba kwago “molao wa Kriste” ba swanetše go dira boboledi. (Bagalatia 6:2) Jehofa o letetše gore barapedi ba  gagwe ka moka ba latele melao e swanago. Nakong e fetilego, o be a letetše gore Baisiraele le badiiledi bao ba bego ba dula le bona ba kwe melao ya gagwe. (Ekisodo 12:49; Lefitiko 24:22) Ke therešo gore lehono ga go hlokagale gore re latele melao ka moka yeo e bego e neilwe Baisiraele. Go e na le moo, go sa šetšwe gore re batlotšwa goba go se bjalo, re swanetše go kwa “molao wa Kriste.” Se sengwe sa dilo tša bohlokwa kudu seo Jesu a re rutilego sona ke gore re bontšhe lerato. (Johane 13:35; Jakobo 2:8) Re swanetše go rata Jehofa, Jesu le batho. Le gona tsela e kaone kudu ya go bontšha lerato leo ke ka go botša ba bangwe ditaba tše dibotse tša Mmušo wa Modimo.—Johane 15:10; Ditiro 1:8.

15. Ke ka baka la’ng re ka re Jesu o laetše barutiwa ba gagwe ka moka gore ba dire boboledi?

15 Tše dingwe tša dilo tšeo Jesu a di boditšego barutiwa ba gagwe ba sego kae, ka dinako tše dingwe di ka šupa go barutiwa ba bantši. Ka mohlala, Jesu o dirile kgwerano le ba 11 ba barutiwa ba gagwe feela gomme a ba holofetša gore ba tla buša Mmušong wa gagwe. Eupša ke ba 144 000 bao ba tlago go buša le yena. (Luka 22:29, 30; Kutollo 5:10; 7:4-8) Le gona ka morago ga gore Jesu a tsošwe bahung, ke ba sego kae feela ba barutiwa ba gagwe bao ba ilego ba kwa taelo ya gagwe ya gore ba dire boboledi. (Ditiro 10:40-42; 1 Bakorinthe 15:6) Eupša barutiwa ba Jesu ka moka ba lekgolong la pele la nywaga ba ile ba latela taelo yeo. (Ditiro  8:4; 1 Petro 1:8) Le lehono re a tseba gore re swanetše go dira boboledi, gaešita le ge re se ra kwa Jesu a re botša gore re dire modiro wo. Ge e le gabotse, modiro wo o dirwa ke batho ba dimilione tše seswai. Re a tseba gore ge re dira boboledi, re bontšha gore re tloga re na le tumelo go Jesu.—Jakobo 2:18.

GA BJALE KE NAKO YA GORE RE BOTEGE

16-18. Re ka thuša bjang bana babo Kriste ka potego, gona ke ka baka la’ng re swanetše go dira seo gona bjale?

16 Sathane o lwa ntwa ya mahlomahwibidu le bana babo Kriste ba tloditšwego bao ba sa lego mo lefaseng, e bile o a tseba gore o šaletšwe feela ke “nako e kopana.” (Kutollo 12:9, 12, 17) Eupša go sa šetšwe ditlhaselo tša Sathane, batlotšwa ba tšwela pele go etelela pele modiro wa boboledi gomme batho ba bantši go feta le ge e le neng pele ba kwa ditaba tše dibotse. Go molaleng gore Jesu o thekga batlotšwa, e bile o a ba hlahla.—Mateo 28:20.

Ke tokelo e kgolo kudu go thuša bana babo Kriste

17 Re bona e le tokelo e kgolo kudu go thuša bana babo Kriste modirong wa boboledi. Le gona re thuša ka go ntšha meneelo le go šoma ka thata go aga Diholo tša Mmušo, Diholo tša Kopano le diofisi tša makala. Ge re ekwa bagolo le bana babo rena ba bangwe bao ba kgethilwego ke “mohlanka yo a botegago le wa temogo,” re bontšha gore re nyaka go thuša bana babo Kriste.—Mateo 24:45-47; Baheberu 13:17.

18 Kgauswinyane batlotšwa bao ba sa lego mo lefaseng ba tla swaiwa la mafelelo. Ke moka barongwa ba tla lokolla “diphefo tše nne tša lefase,” gomme masetlapelo a magolo a thoma. (Kutollo 7:1-3) Pele ga ge Haramagedone e ka thoma, Jesu o tla rotošetša batlotšwa legodimong. (Mateo 13:41-43) Ka gona ge e ba re nyaka go ahlolwa re le dinku ge Jesu a etla, ga bjale ke nako ya gore re botegele bana babo Kriste ba tloditšwego.

Re thuša bana babo Kriste ka ditsela tše dintši (Bona serapa 17)

^ ser. 6 Ge o nyaka go tseba ditaba ka botlalo tša mabapi le seswantšho se, bala sehlogo se se rego, “O tla ba le Boemo Bofe Pele ga Sedulo sa Kahlolo?” le se se rego, “Dinku le Dipudi di na le Bokamoso Bofe?” ka tokollong ya Morokami wa October 15, 1995.