Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2015

Lebogang Jehofa Gomme le Šegofatšwe

Lebogang Jehofa Gomme le Šegofatšwe

‘Lebogang Jehofa, gobane ke yo botho.’—PS. 106:1.

1. Ke ka baka la’ng Jehofa a swanelwa ke gore re mo leboge?

JEHOFA, yena Monei wa “mpho e nngwe le e nngwe e botse le neo e nngwe le e nngwe e phethagetšego,” o tloga a swanelwa ke gore re mo leboge. (Jak. 1:17) Ka ge e le Modiši wa rena yo lerato, o hlokomela dinyakwa tša rena ka moka tša nama le tša moya. (Ps. 23:1-3) O itlhatsetše e le “setšhabelo le matla a rena”—kudukudu dinakong tša tlalelo! (Ps. 46:1) Re tloga re na le mabaka a mantši a go dumelelana ka pelo ka moka le mantšu a mopsalme yo a ngwadilego gore: “Lebogang Jehofa, gobane o lokile; gobane botho bja gagwe ke bja go iša mehleng ya neng le neng.”—Ps. 106:1.

Temana ya rena ya ngwaga ya 2015 e re: ‘Lebogang Jehofa, gobane ke yo botho.’—Psalme 106:1

2, 3. (a) Dikotsi tša go se tšeele godimo ditšhegofatšo tša rena ke dife? (b) Re tlo ahlaahla dipotšišo dife sehlogong se?

2 Ke ka baka la’ng go le bohlokwa gore re ahlaahle taba ye ya go leboga Modimo? Go etša ge go boletšwe e sa le pele, batho ba mehleng ye ya bofelo ba tloga ba sa leboge. (2 Tim. 3:2) Ba bantši ga ba na taba le ditšhegofatšo tšeo ba di hwetšago. Ka ge ba tutuetšwa ke lefase la kgwebo le dipapatšo tša lona, batho ba dimilione ba katanela go ba le dilo tše di oketšegilego go e na le go kgotsofalela seo ba nago le sona. Le rena re ka fetelwa ke moya wo wa go se  leboge. Go etša Baisiraele ba bogologolo, re ka thoma go se sa ba le tebogo gomme ra se sa tšeela godimo tswalano ya rena ya bohlokwa le Jehofa le ditšhegofatšo tšeo re di hwetšago go yena.—Ps. 106:7, 11-13.

3 Le gona nagana ka seo se ka diregago ge re lebeletšane le diteko tše thata. Dinakong tše bjalo, re ka nolega moko gabonolo gomme ra se bone ditšhegofatšo tša rena. (Ps. 116:3) Ka gona, re ka dira’ng gore re hlagolele moya wa go leboga le go dula re na le wona? Le gona ke’ng seo se tlago go re thuša go dula re na le pono e nepagetšego gaešita le ge re lebeletšane le diteko tše šoro? Anke re boneng.

‘WENA JEHOFA, O DIRILE DILO TŠE DINTŠI’

4. Re swanetše go dira’ng gore re dule re na le moya wa go leboga?

4 E le gore re be le moya wa go leboga le go dula re na le wona, re swanetše go lemoga le go naganišiša ka ditšhegofatšo tšeo Jehofa a re neago tšona gomme re ele hloko ditiro tša gagwe tša lerato. Ka morago ga gore mopsalme yo mongwe a dire seo, o ile a makatšwa ke dilo tše dintši tše di kgahlišago tšeo Jehofa a di dirilego.—Bala Psalme 40:5; 107:43.

5. Re ka ithuta’ng go moapostola Paulo mabapi le go ba le tebogo?

5 Re ka ithuta dilo tše dintši go moapostola Paulo mabapi le go ba le tebogo. Go molaleng gore o ile a naganišiša ka ditšhegofatšo tša gagwe, ka gobane o ile a leboga Modimo gantši. Paulo o be a tseba gabotse gore o be a kile a ba “morogaki, motlaiši le motho wa mereba.” Ka baka leo, o ile a leboga gore go sa šetšwe boitshwaro bja gagwe bja nakong e fetilego, Modimo le Kriste ba mo gaugetše gomme ba mo nea bodiredi. (Bala 1 Timotheo 1:12-14.) Le gona Paulo o be a tšeela godimo kudu Bakristegotee le yena gomme gantši a leboga Jehofa bakeng sa dika tša bona tše dibotse le go mo hlankela ka potego. (Bafil. 1:3-5, 7; 1 Bathes. 1:2, 3) Le gona ge Paulo a be a lebeletšane le maemo a thata, kapejana o be a leboga Jehofa bakeng sa thekgo yeo a bego a e hwetša ka nako ya maleba go tšwa go bana babo ba moya. (Dit. 28:15; 2 Bakor. 7:5-7) Ka baka leo, ga go makatše ge mangwalo a Paulo a kgothaletša Bakriste gore: “Ipontšheng le le ba lebogago . . . , le go kgothatšana ka dipsalme, ditumišo tša go tumiša Modimo, dikopelo tša moya tšeo di opelwago ka lešoko.”—Bakol. 3:15-17.

GO NAGANIŠIŠA LE GO RAPELA GO KA RE THUŠA GO DULA RE NA LE TEBOGO

6. Ke’ng seo o lebogago Jehofa kudu ka sona?

6 Re ka ekiša bjang mohlala o mobotse wa Paulo tabeng ya go hlagolela go ba le tebogo le go e bontšha? Ka go swana le Paulo, re swanetše go naganišiša ka dilo tšeo Jehofa a re diretšego tšona. (Ps. 116:12) O be o tla araba bjang ge o be o ka botšišwa gore: ‘Ke dilo dife tšeo Jehofa a go šegofaditšego ka tšona tšeo o di lebogago?’ Na o be o tla bolela ka tswalano ya gago ya bohlokwa le Jehofa? Na o be o tla bolela ka go lebalelwa dibe ka baka la ge o na le tumelo sehlabelong sa Kriste sa topollo? Goba na o be o tla bolela maina a bana beno le dikgaetšedi bao ba go thekgilego ge o be o le mathateng? Ke therešo gore o ka se lebale go bolela ka molekane wa gago wa lenyalo goba bana ba gago bao o ba ratago kudu. Go ipha nako ya go naganišiša ka ditšhegofatšo tše bjalo tše di kgahlišago tšeo Tatago yo lerato e lego Jehofa a go neilego tšona, go tla dira gore o be le tebogo gomme gwa go tutueletša go mo leboga letšatši le letšatši.—Bala Psalme 92:1, 2.

7. (a) Ke ka baka la’ng re swanetše go leboga Modimo ge re rapela? (b) O tla holega bjang ge o ka leboga Modimo dithapelong tša gago?

7 Ge re dula re naganne ka ditšhegofatšo tša rena, ka mehla re kgona go rapela Jehofa le go mo leboga. (Ps. 95:2; 100:4, 5) Batho ba bantši ba rapela Modimo ge feela ba nyaka  dilo tše itšego go yena. Lega go le bjalo, rena re a tseba gore Jehofa o a thaba ge re mo leboga bakeng sa seo re nago le sona. Ka Beibeleng go na le dithapelo tše dintši tšeo di kgomago pelo tša tebogo, go akaretša thapelo ya Hanna le ya Hesekia. (1 Sam. 2:1-10; Jes. 38:9-20) Ka gona ekiša bahlanka bao ba Modimo ba botegago bao ba ilego ba bontšha moya wa go leboga. Ee, rapela Jehofa gomme o leboge dilo tšeo a go šegofaditšego ka tšona. (1 Bathes. 5:17, 18) Go dira seo go na le mehola e mentši. O tla thaba, wa rata Jehofa kudu gomme wa batamela kgauswi le yena le go feta.—Jak. 4:8.

Ke dilo dife tšeo Jehofa a go šegofaditšego ka tšona tšeo o di lebogago? (Bona serapa 6 le 7)

8. Ke’ng seo se ka dirago gore re se sa leboga dilo ka moka tšeo Jehofa a re diretšego tšona?

8 Ke ka baka la’ng re swanetše go dula re phafogile e le gore re se wele kotsing ya go se sa leboga botho bja Jehofa? Ka gobane ka tlhago re na le tshekamelo ya go se leboge. Nagana ka se: Batswadi ba rena ba pele e lego Adama le Efa ba be ba beilwe tšhemong ya paradeise. Ba be ba sa hloke selo, le gona ba be ba ka phela ka mo go sa felego ka khutšo. (Gen. 1:28) Eupša ga se ba ka ba tšeela godimo ditšhegofatšo tša bona. Ka megabaru ba ile ba kganyoga dilo tše di oketšegilego. Ka baka la seo, ba lahlegelwa ke dilo ka moka. (Gen. 3:6, 7, 17-19) Ka ge re dikologilwe ke batho bao ba sa lebogego, le rena re ka thoma go se bone dilo ka moka tšeo Jehofa a re diretšego tšona. Re ka thoma go se sa tšeela godimo tswalano ya rena le yena. Re ka lebala tokelo yeo re nago le yona ya go ba karolo ya borwarre bja lefase ka bophara. Re ka nwelela dilong tša lefase le tšeo kgauswinyane di tlago go feta. (1 Joh. 2:15-17) E le gore re pheme seo, re swanetše go naganišiša ka ditšhegofatšo tšeo re nago le tšona le go leboga Jehofa ka mehla bakeng sa tokelo yeo re nago le yona ya go ba batho ba gagwe.—Bala Psalme 27:4.

GE RE LEBELETŠANE LE DITEKO

9. Ke ka baka la’ng re swanetše go naganišiša ka ditšhegofatšo tša rena ge re lebeletšane le diteko tše šoro?

9 Go ba le tebogo go ka re thuša go lebeletšana le diteko tše šoro. Re ka ikwa re se na matla ge ka tšhoganetšo re lebeletšana le maemo ao a fetošago bophelo, go etša ge molekane a sa botege, bolwetši bjo šoro, lehu la motho yo re mo ratago goba ditlamorago tše šoro tša kotsi ya tlhago. Dinakong tše bjalo, re tla homotšwa le go matlafatšwa ke go naganišiša ka dilo tšeo Modimo a re šegofaditšego ka tšona. Ela hloko diphihlelo tše di latelago.

10. Irina o hotšwe bjang ke go naganišiša ka ditšhegofatšo tša gagwe?

 10 Irina *, e lego mmulamadibogo wa ka mehla kua Amerika Leboa, o be a nyetšwe ke mogolo yoo a ilego a se botege gomme a mo tlogela le bana. Ke’ng seo se thušitšego Irina go tšwela pele a hlankela Jehofa ka potego? O re: “Ke leboga gore Jehofa o a ntlhokomela. Ka go naganišiša ka ditšhegofatšo tša ka letšatši le letšatši, ke bona gore e tloga e le tokelo go tsebja le go ratwa ke Tatago rena wa legodimong yo a šireletšago. Ke a tseba gore a ka se tsoge a ntlogetše.” Gaešita le ge Irina a ile a lebeletšana le maemo a mantši a thata bophelong, go dula a thabile go mo thuša go tšwela pele ka bophelo le go kgothatša ba bangwe.

11. Ke’ng seo se thušitšego Kyung-sook go lebeletšana le bolwetši bjo šoro?

11 Kgaetšedi Kyung-sook, yo a dulago kua Asia, o ile a bula madibogo le monna wa gagwe ka nywaga e fetago e 20. Gateetee go ile gwa hwetšwa gore o na le kankere ya maswafo yeo e šetšego e kekile gomme dingaka tša mmotša gore o tla phela dikgwedi tše tharo go ya go tše tshela. Gaešita le ge yena le monna wa gagwe ba ile ba lebeletšana le diteko tše dintši, tše dikgolo le tše dinyenyane, ba be ba sa nagane gore yo mongwe wa bona a ka tsoga a swerwe ke bolwetši bjo šoro. O itše: “Bothata bjo bja maphelo bo ile bja nkgoma kudu. Ke ile ka ikwa eka ke lobile dilo ka moka, e bile ke be ke boifa kudu.” Ke’ng seo se thušitšego Kyung-sook go lebeletšana le boemo bjo ka katlego? O re: “Bošego bjo bongwe le bjo bongwe pele ke robala, ke ya lefelong leo le lego lebatong la ka godimo la ntlo ya rena gomme ka rapela Modimo ka go hlaboša ke mmotša dilo tše hlano tšeo ke di lebogago letšatšing leo. Ka morago ga moo ke ikwa ke imologile, ke moka ka tutueletšega go bontšha Jehofa gore ke a mo rata.” Kyung-sook o hotšwe bjang ke dithapelo tše tšeo a bego a di rapela bošego bjo bongwe le bjo bongwe? O re: “Ke lemogile gore Jehofa o a re thekga ge re le mathateng le gore mo bophelong ditšhegofatšo ke tše dintši go feta diteko tšeo re lebeletšanago le tšona.”

A na le kgaetšedi ya gagwe John yoo le yena a phologilego ledimo (Bona serapa 13)

12. Jason o homoditšwe ke’ng ka morago ga go hwelwa ke mosadi?

12 Jason, yo a hlankelago ofising ya lekala Afrika, o bile tirelong ya nako e tletšego ka nywaga ya ka godimo ga e 30. O re: “Ke hwetšwe ke mosadi nywaga e šupago e fetilego, gomme bohloko bja seo bo nola moko. Go hlwa ke nagana ka seo a ilego a lebeletšana le sona ge a be a swerwe ke bolwetši bja kankere go mphetša matla.” Ke’ng seo se thušitšego Jason go lebeletšana le maemo a ka katlego? O re: “Lebakeng le lengwe, ke ile ka gopola ka dinako tše di kgahlišago tšeo nna le mosadi wa ka re ilego ra di thabela gomme ka leboga Jehofa ka seo. Ke ile ka ikwa ke imologile gomme ka morago ga moo ka thoma go leboga Jehofa ka mehla bakeng sa dinako tše bjalo tše di kgahlišago. Go ba le tebogo go nthušitše kudu bophelong. Ke sa kwa bohloko bja go hwelwa, eupša go leboga Jehofa gore ke bile le lenyalo le le atlegilego le tokelo ya go mo hlankela le motho yo a bego a mo rata go tšwa pelong go nthušitše go ba le pono e botse.”

“Ke leboga kudu gore Jehofa ke Modimo wa ka.”—Sheryl

13. Ke’ng seo se thušitšego Sheryl go lebeletšana le go hwelwa ke ditho tše dintši tša lapa la gabo?

13 Ge Ledimo le Matla la Haiyan le be le hlasela bogare bja Philippines mafelelong a 2013, Sheryl, yoo a bego a na le nywaga e 13 feela ka nako yeo, o ile a loba mo e nyakilego go ba dilo ka moka. O itše: “Ke lobile legae la gešo le ditho tše dintši tša lapa lešo.” Tatagwe, mmagwe le bana babo ba bararo ba bolailwe ke ledimo leo le matla. Ke’ng seo se thušitšego Sheryl go lebeletšana le masetlapelo a go e na le go dula a nyamile? O na le tebogo e bile o dula a naganne ka ditšhegofatšo  tšeo a sa dutšego a na le tšona. O okeditše ka gore: “Ke bone dilo ka moka tšeo bana bešo le dikgaetšedi ba ilego ba di dira gore ba hlakodiše bao ba bego ba hloka thušo le go ba kgothatša. Ke be ke tseba gore bana bešo lefaseng ka moka ba a nthapelela.” O okeditše ka gore: “Ke leboga kudu gore Jehofa ke Modimo wa ka. Ka mehla o re nea dilo tše re di hlokago.” Ee, go lemoga ditšhegofatšo tša rena go re thuša gore re se nolwe moko ke manyami. Go ba le tebogo go re thuša go kgotlelela maemo le ge e le afe a gateletšago ao re ka lebeletšanago le wona.—Baef. 5:20; bala Bafilipi 4:6, 7.

“GE E LE NNA KE TLA HLALALELA JEHOFA”

14. Ke kholofelo efe e kgahlišago yeo re e letetšego? (Bona seswantšho seo se lego mathomong a sehlogo.)

14 Go theoša le histori, batho ba Jehofa ba be ba dutše ba thabela ditšhegofatšo tša bona. Ka mohlala, ka morago ga gore Baisiraele ba hlakodišwe go Farao le madira a gagwe Lewatleng le Lehwibidu, ba ile ba bontšha lethabo la bona ka dikoša tša go tumiša Modimo le go mo leboga. (Ek. 15:1-21) Lehono, e nngwe ya ditšhegofatšo tšeo re di tšeelago godimo kudu ke kholofelo ya rena e kgonthišeditšwego ya go tlo lokollwa selong se sengwe le se sengwe seo se re kwešago bohloko le go re gateletša. (Ps. 37:9-11; Jes. 25:8; 33:24) Nagana kamoo re tlago go ikwa ka gona ge Jehofa a fediša manaba a gagwe ka moka gomme a re amogela lefaseng le lefsa la khutšo le la go loka. Ruri leo e tla ba letšatši la go leboga!—Kut. 20:1-3; 21:3, 4.

15. O ikemišeditše go dira’ng ngwageng ka moka wa 2015?

15 Re fagahletše go tlo amogela ditšhegofatšo tše dintši kudu tša moya go tšwa go Jehofa ngwageng wo wa 2015. Ke therešo gore le diteko di tla ba gona. Le ge re ka welwa ke selo le ge e le sefe, re a tseba gore Jehofa a ka se tsoge a re tlogetše. (Doit. 31:8; Ps. 9:9, 10) O tla tšwela pele a re nea dilo ka moka tše re di hlokago gore re mo hlankele ka potego. Ka go re’alo, anke re ikemišetšeng go dula re na le moya wo o swanago le wa moporofeta Habakuku, yo a itšego: “Gaešita le ge mogo o ka se khukhuše, morara wona wa se enywe; mohlware wa šitwa go enywa, mašemo a mebotong a hloka dijo; mohlape wa dihuswane wa fela mašakeng gomme gwa hlokwa mohlape wa dikgomo merakeng; fela ge e le nna ke tla hlalalela Jehofa; ke tla thabela Modimo yo a mphološago.” (Habak. 3:17, 18) Ee, ngwageng wo ka moka, anke re naganišišeng ka lethabo ka ditšhegofatšo tša rena gomme re tutueletšege go latela keletšo ya temana ya rena ya ngwaga ya 2015 yeo e rego: ‘Lebogang Jehofa, gobane ke yo botho.’—Ps. 106:1.

^ ser. 10 Maina a mangwe a fetotšwe sehlogong se.

Ithute ka mo go oketšegilego

MOROKAMI (KGATIŠO E ITHUTWAGO)

“Le Phakgame ge e le Mabapi le Dithapelo”

Ke ka baka la’ng Bakriste ba therešo ba swanetše go rapela ka go se kgaotše? Ke mang yo a holegago ge o rapelela ba bangwe?