Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2015

Dumelela Jehofa Gore a Tiiše Lenyalo la Gago le go le Šireletša

Dumelela Jehofa Gore a Tiiše Lenyalo la Gago le go le Šireletša

“Ge motse o sa letwe ke Jehofa, ke ga lefeela ge moleti a dula a phafogile.”—PS. 127:1b.

1, 2. (a) Ke ka baka la’ng Baisiraele ba 24 000 ba ile ba lahlegelwa ke ditšhegofatšo tše di kgahlišago? (b) Ke ka baka la’ng mohlala woo wa bogologolo o le bohlokwa go rena lehono?

PEJANA ga ge setšhaba sa Isiraele se ka tsena Nageng ya Kholofetšo, banna ba dikete ba ile ba “dira bootswa le barwedi ba Moaba.” Ka baka leo, Jehofa o ile a bolaya batho ba 24 000. Anke o nagane feela—Baisiraele ba be ba le kgauswiuswi le go tsena nageng yeo ba e holofeditšwego go tloga kgale, lega go le bjalo ba ile ba lahlegelwa ke ditšhegofatšo tše di kgahlišago ka baka la go ineela tekong.—Num. 25:1-5, 9.

2 Mohlala wo o boifišago o ngwaletšwe “go ba temošo go rena bao re fihletšwego ke bofelo bja mehla ye.” (1 Bakor. 10:6-11) Karolong ye ya mafelelo ya ‘mehla ya bofelo,’ bahlanka ba Modimo ba kgauswiuswi le go tsena lefaseng le lefsa la go loka. (2 Tim. 3:1; 2 Pet. 3:13) Eupša ka maswabi, ba bangwe ba barapedi ba Jehofa ba ile ba itebala boitshwarong. Ba tantšwe ke boitshwaro bjo bo gobogilego le go buna ditlamorago tše bohloko kudu. Batho ba bjalo ba ipea kotsing ya go lahlegelwa ke ditšhegofatšo tša ka mo go sa felego.

3. Ke ka baka la’ng banyalani ba hloka tlhahlo le tšhireletšo ya Jehofa? (Bona seswantšho seo se lego mathomong a sehlogo.)

 3 Ka baka la go ata ga boitshwaro bjo bo gobogilego lehono, banna le basadi bao ba lego lenyalong ba hloka tlhahlo ya Jehofa le tšhireletšo e le gore maiteko a bona a go šireletša manyalo a bona e se be a lefeela. (Bala Psalme 127:1.) Re tlo ahlaahla kamoo banyalani ba ka tiišago manyalo a bona ka go diša dipelo tša bona, ka go batamela kgauswi le Modimo, ka go apara semelo se sefsa, ka go dula ba boledišana gabotse le ka go fana tshwanelo ya lenyalo.

DIŠA PELO YA GAGO

4. Ke’ng se se dirago gore Bakriste ba bangwe ba wele boitshwarong bjo bo gobogilego?

4 Ke’ng se se ka dirago gore Mokriste a wele boitshwarong bjo bo gobogilego? Gantši selo seo se dirago gore motho a feleletše a wetše boitshwarong bjo bo gobogilego ke go se diše mahlo a gagwe. Jesu o hlalositše gore: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mat. 5:27, 28; 2 Pet. 2:14) Bakriste ba bantši bao ba wetšego boitshwarong bjo bo gobogilego ba thomile ka go bogela diswantšho tše di kgothaletšago bootswa, go bala dipuku tše di tsošago kganyogo goba go bogela dilo tše di gobogilego Inthaneteng. Ba bangwe ba bogetše dimobi tša thobalano, diterama tše di gobogilego tša sethaleng goba mananeo a thelebišene. Ba bangwe ba ile ba etela di nightclub le go ya mafelong ao banna le basadi ba binago ba sa apara goba mafelong a go thobolla batho mebele ka tsela e gobogilego.

5. Ke ka baka la’ng re swanetše go diša dipelo tša rena?

5 Ba bangwe ba wela tekong ka gobane ba bontšha batho bao e sego balekane ba bona kgahlego. Lefaseng le la go hloka boitshwaro le leo le ikgotsofatšago ka tsela le ge e le efe e gobogilego, go bonolo kudu gore pelo e boradia le e kgopo e thome go rata motho yo mongwe yo e sego molekane wa gago. (Bala Jeremia 17:9, 10.) Jesu o itše: “Pelong go tšwa dikeleletšo tše kgopo, dipolao, bohlotlolo [le] bootswa.”—Mat. 15:19.

6, 7. (a) Pelo e boradia e ka lebiša motho tseleng efe ya sebe? (b) Ke’ng se se ka re thušago go phema go wela boitshwarong bjo bo gobogilego?

6 Ge batho ba babedi bao ba kgahlegelanago ba ka thoma go ba le dikganyogo tše di gobogilego ka dipelong tša bona tše boradia, ba ka ikhwetša ba šetše ba boledišana ka ditaba tšeo ba swanetšego go di bolela le balekane ba bona feela. Go se go ye kae, ba thoma go tsoma dibaka tša go ba gotee, e bile ba thoma go kopana gantšintši tše ekego ga go direge selo. Ge ba thoma go ratana kudu, ba thoma go itebala boitshwarong. Ge ba dutše ba sepela tseleng yeo e lebišago sebeng, ke moo go bago thata le go feta gore ba kgaotše, le ge ba tseba gore seo ba se dirago se fošagetše.—Die. 7:21, 22.

7 Ba thoma go lebala dilo tša moya tšeo di tiišago lenyalo ge dikganyogo le dipoledišano tše di fošagetšego di dira gore ba thome go swarana ka matsogo, go atlana, go phopholana, go swaraswarana ka tsela e tsošago dikganyogo le go bontšhana dipontšho tše dingwe tša lerato, e lego dilo tšeo ba swanetšego go di dira le balekane ba bona feela. Mafelelong, ba “gogwa le go goketšwa ke kganyogo ya bona” gomme ba tanywa ke molaba. Ge kganyogo e gotše, e “tswala sebe”—tabeng ye, e ba boitshwaro bjo bo gobogilego. (Jak. 1:14, 15) A ditlamorago tše bohloko gakaakaang! Mathata a ka moka a boitshwaro a ka be a ile a phengwa ge nkabe batho ba ba ile ba dumelela Jehofa a tiiša go hlompha ga bona go kgethega ga lenyalo. Eupša bjang?

 TŠWELA PELE O BATAMELA KGAUSWI LE MODIMO

8. Go gwerana le Jehofa go re šireletša bjang boitshwarong?

8 Bala Psalme 97:10. Go gwerana le Jehofa ke selo sa bohlokwa kudu ge re nyaka go itšhireletša boitshwarong. Ge re dutše re ithuta ka dika tša Modimo tše di kgahlišago gomme re katanela go ‘ba baekiši ba Modimo, re le bana ba ba rategago, e bile re tšwela pele re sepela leratong,’ re tla kgona go gana “bootswa le ditšhila tša mohuta o mongwe le o mongwe.” (Baef. 5:1-4) Ka go tseba gore “Modimo o tla ahlola diotswa le dihlotlolo,” banyalani ba šoma ka thata gore manyalo a bona e be a hlomphegago le ao a se nago ditšhila.—Baheb. 13:4.

9. (a) Josefa o ile a kgona bjang go ganetša teko ya boitshwaro bjo bo gobogilego? (b) Re ka ithuta dithuto dife mohlaleng wa Josefa?

9 Ba bangwe ba bahlanka ba botegago ba Modimo ba ile ba wela boitshwarong bjo bo gobogilego ka go fetša nako ba na le bašomigotee le bona bao e sego Dihlatse ka morago ga mošomo. Gaešita le dinakong tša mošomo, diteko di ka tšwelela. E be e le mošomong moo lesogana le le botsana leo le bitšwago Josefa le ilego la lemoga gore mosadi wa mong wa lona o le rata kudu. Letšatši le letšatši, mosadi yo o be a leka go goketša Josefa. Mafelelong, o ile “a mo kakatlela ka seaparo sa gagwe, a re: ‘Robala le nna!’” Eupša Josefa o ile a kgona go tšhaba. Ke’ng seo se thušitšego Josefa go dula a tiile boitshwarong maemong a bjalo a lekago? O be a feditše le pelo gore a ka se senye tswalano ya gagwe le Modimo yeo e mo thušitšego go dula a hlwekile le go botega. Ka ge a ile a ema a tiile boitshwarong, o ile a rakwa mošomong le go golegwa ntle le molato, eupša Jehofa a mo šegofatša. (Gen. 39:1-12; 41:38-43) Go sa šetšwe gore Bakriste ba mošomong goba ba kae, ba swanetše go phema go ipea tekong le motho yo mongwe yo e sego molekane wa bona wa lenyalo.

APARA SEMELO SE SEFSA

10. Semelo se sefsa se re šireletša bjang boitshwarong?

10 Ka ge semelo se sefsa se “[bopilwe] go ya ka thato ya Modimo tokong ya therešo le potegong,” se ka thuša banyalani gore ba se wele boitshwarong bjo bo gobogilego. (Baef. 4:24) Bao ba aparago semelo se se sefsa ba ‘bolaya’ dithong tša mebele ya bona “bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru.” (Bala Bakolose 3:5, 6.) Lentšu le le rego “bolayang” le bontšha gore re swanetše go gata megato e matla ya go lwantšha dikganyogo tše di gobogilego tša botona le botshadi. Re tla phema selo le ge e le sefe seo se ka dirago gore re kganyoge go itshwara ka tsela e gobogilego le motho yo e sego molekane wa rena. (Jobo 31:1) Ge re dutše re katanela go phela ka go dumelelana le thato ya Modimo, re ithuta go ‘hlaswa se kgopo’ le go ‘kgomarela go se sebotse.’—Baroma 12:2, 9.

11. Semelo se sefsa se ka tiiša lenyalo bjang?

11 Semelo se sefsa se bonagatša “seswantšho sa Yo a se bopilego,” e lego Jehofa ka boyena. (Bakol. 3:10) Ruri go ba le mafelelo a mabotse kudu ge banyalani ba ikaga boitshwarong ka go apara “lerato leo le bonagatšago lešoko, botho, boikokobetšo, boleta le go se fele pelo”! (Bakol. 3:12) Le gona ba thabela botee lenyalong ge ba dumelela ‘khutšo ya Kriste e buša dipelong tša bona.’ (Bakol. 3:15) Ruri banyalani ba tla ipshina ka lenyalo ge ba ‘bontšhana borutho’! Ba thabela go ‘etelelana pele’ go “bontšhaneng kgodišo.”—Baroma 12:10.

12. O nagana gore ke dika dife tšeo di dirago gore lenyalo le thabiše?

12 Ge Sid a be a botšišwa ka dilo tšeo di  thušago go dira gore lenyalo la bona e be leo le thabišago o itše: “Lerato ke seka sa pele seo re dulago re se bontšha. Re hweditše gore go ba boleta le gona go thuša kudu.” Mosadi wa gagwe e lego Sonja o dumelelana le yena, gomme o okeditše ka gore: “Ruri go ba botho go bohlokwa kudu. Le gona re leka go bontšha boikokobetšo, gaešita le ge go se bonolo ka mehla.”

DULANG LE BOLEDIŠANA GABOTSE

13. Ke’ng seo se ka tiišago lenyalo, gona ka baka la’ng?

13 Ga go pelaelo gore poledišano e botse ke se sengwe sa dilo tša bohlokwa tšeo di tiišago lenyalo. Ruri go tla swabiša ge banyalani ba ka boledišana ka tsela ya go bontšha lenyatšo mola ba sa dire bjalo bathong bao ba sa ba tsebego goba diruiweng tša bona! Ge banyalani ba tletše ka “[dikgopi], bogale, pefelo, mašata le polelo e gobošago,” ba phušola leboto leo le šireleditšego lenyalo la bona. (Baef. 4:31) Go e na le go senya lenyalo la bona ka go hlwa ba swayana diphošo goba go hlabana ka mantšu, ba swanetše go aga tswalano ya bona ka mantšu a botho, a boleta le a kwelobohloko.—Baef. 4:32.

14. Ke mekgwa efe yeo re swanetšego go e phema?

14 Beibele e re go na le “nako ya go homola.” (Mmo. 3:7) Se ga se bolele gore re swanetše go ba le mokgwa wa go homolelana, woo o thibelago poledišano ya bohlokwa. Mosadi yo mongwe kua Jeremane o re: “Go homolela molekane wa gago go ka mo gobatša.” Eupša o oketša ka gore: “Gaešita le ge go sa kgonege gore ka mehla o dule o išitše maswafo fase ge o galefile, go fo phatloga le gona ga go thuše ka selo. O ka bolela goba wa dira selo se itšego o se wa nagana gomme wa gobatša molekane wa gago, ka go re’alo wa gakatša boemo.” Taba ke gore monna le mosadi ga ba rarolle mathata ge ba hlabelana mašata goba ba sa nyake go boledišana. Eupša lenyalo la bona le tla tia ge e ba ba sa dumelele diphapano di fetoga mokgwa goba di tšea nako e telele di sa rarollwe.

15. Poledišano e botse e ka tiiša lenyalo bjang?

15 Ditlemo tša lenyalo di a tia ge banyalani  ba ipha nako ya go ntšhetšana sa mafahleng. Tsela yeo re bolelago ka yona e bohlokwa go swana le seo re se bolelago. Ka gona, gaešita le maemong a thata, katanela go bolela dikgopolo tša gago ka tsela e botho, gomme seo se kwagale segalong sa lentšu la gago le mantšung ao o a dirišago. Ka go re’alo, o tla dira gore molekane wa gago a go theetše. (Bala Bakolose 4:6.) Monna le mosadi ba ka tiiša lenyalo la bona ka poledišano e botse ge feela ba bolela “polelo e botse ya go aga moo go nyakegago, gore e fetišetše se se holago” molekane wa bona.—Baef. 4:29.

Monna le mosadi ba ka tiiša lenyalo la bona ka go boledišana gabotse (Bona serapa 15)

FANANG TSHWANELO YA LENYALO

16, 17. Ke ka baka la’ng go le bohlokwa gore banyalani ba kgotsofatšane maikwelong le go tša thobalano?

16 Go oketša moo, banyalani ba ka tiiša lenyalo la bona ka go kganyogela balekane ba bona dilo tše dibotse le ka go etiša dikgahlego tša bona pele. (Bafil. 2:3, 4) Banna gotee le basadi ba swanetše go tshwenyega kudu ka dinyakwa tša maikwelo le tša thobalano tša balekane ba bona.—Bala 1 Bakorinthe 7:3, 4.

17 Ka manyami, banyalani ba bangwe ba dikadika go ba le thobalano le balekane ba bona, ka go re’alo banna ba bangwe ba thoma go nagana gore go ba botho ke go senya nako. Beibele e re: “Lena banna, le swanetše go leka go kwešiša basadi ba lena.” (1 Pet. 3:7, Phillips) Monna o swanetše go kwešiša gore tshwanelo ya lenyalo ga se feela go ba le thobalano. Mosadi o tla thabela thobalano le monna wa gagwe ge e ba a mo swara ka lerato le ka botho gaešita le dinakong tše dingwe. Ge bobedi bja bona ba swarana ka lerato, go na le kgonagalo e kgolo ya gore ba kgotsofatšane maikwelong le go tša thobalano.

18. Banna le basadi ba ka tiiša manyalo a bona bjang?

18 Gaešita le ge go se na sehlare sa ntšhirela sa gore motho a se botege lenyalong, go se bontšhane lerato go ka šušumeletša molekane yo mongwe go nyaka lerato le thobalano ka ntle. (Die. 5:18; Mmo. 9:9) Ka baka leo, Beibele e kgothaletša banyalani gore: “Le se ke la [timana tshwanelo ya lenyalo] ge e se ka go dumelelana ka nako e beilwego.” Ka baka la’ng? “Gore Sathane a se ke a tšwela pele a le leka ka baka la go se kgone go itshwara ga lena.” (1 Bakor. 7:5) Ruri e tla ba masetlapelo ge banyalani ba ka dumelela Sathane a diriša “go se kgone go itshwara” ga bona gomme a dira gore yo mongwe wa bona a dire bohlotlolo! Eupša ge molekane yo mongwe le yo mongwe a tsoma “seo se holago motho yo mongwe, e sego seo se holago yena a nnoši,” gomme a fana ka tshwanelo ya lenyalo ka lerato, e sego ka go fo phetha molao, thobalano yeo e dirwago ka lerato e ka tiiša lenyalo.—1 Bakor. 10:24.

TŠWELA PELE O ŠIRELETŠA LENYALO LA GAGO

19. Ke’ng seo re swanetšego go ikemišetša go se dira, gona ka baka la’ng?

19 Re kgauswiuswi le go tsena lefaseng le lefsa la go loka. Ke ka baka leo go ineela dikganyogong tša nama go ka bago kotsikotsi go swana le ge go bile bjalo go Baisiraele ba 24 000 bao ba bolailwego Melaleng ya Moaba. Ka morago ga go hlalosa tiragalo yeo ya masetlapelo le e lešago dihlong, Lentšu la Modimo le re lemoša ka gore: “Anke yo a naganago gore o eme a hlokomele gore a se we.” (1 Bakor. 10:12) Ka baka leo, go tloga go le bohlokwa kudu gore re tiiše manyalo a rena ka go dula re botegela Tatago rena wa legodimong le balekane ba rena. (Mat. 19:5, 6) Lehono, go feta le ge e le neng pele, re swanetše go ‘dira sohle se re ka se kgonago gore mafelelong a re hwetše re se na sepatso e bile re hloka sekodi gomme re le khutšong.’—2 Pet. 3:13, 14.