Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2015

Ba Ile ba Ikgafa ka go Rata—Kua New York

Ba Ile ba Ikgafa ka go Rata—Kua New York

NYWAGENG e sego kae e fetilego, Cesar le mosadi wa gagwe e lego Rocio, ba be ba phela bophelo bja manobonobo kua California, moo Cesar a bego a šoma ka metšhene ya go fehla moya wa go fiša le wa go tonya gomme Rocio a šoma mošomo wa nakwana ofising ya ngaka. Ba be ba na le legae la bona, e bile ba se na bana. Lega go le bjalo, go ile gwa direga selo se sengwe seo se ilego sa fetoša maphelo a bona. Go ile gwa direga’ng?

Ka October 2009, ofisi ya lekala ya United States e ile ya romela mangwalo diphuthegong ka moka nageng yeo, e laletša baithaopi bao ba nago le bokgoni gore ba tsenele tirelo ya Bethele ya nakwana go tlo thuša ka go katološa lekala kua Wallkill, New York. Gaešita le bao ba bego ba fetile nywaga ya go tsenela tirelo ya Bethele ba be ba laletšwa go dira dikgopelo. Cesar le Rocio ba re: “Ka ge re be re fetile nywaga yeo, se e be e le sebaka sa moswananoši sa gore re hlankele Bethele. Re be re ka se dumelele selo go re šitiša go diriša sebaka seo!” Gateetee banyalani ba ba ile ba dira dikgopelo.

Ba bangwe ba baithaopi bao ba šomago kua Warwick

Go ile gwa feta lebaka la ka godimo ga ngwaga Cesar le Rocio ba sa laletšwe Bethele. Lega go le bjalo, ba ile ba gata megato e oketšegilego gore ba fihlelele pakane ya bona ka go nolofatša bophelo bja bona. Cesar o re: “Re ile ra fetoša karatšhe ya rena phapoši gomme ra hirišetša motho yo mongwe ntlo ya rena. Ke moka re ile ra tšwa ka ntlong ya rena e kgolo yeo re bego re e rata kudu yeo e bego e se kgale re e agile gomme ra yo dula phapošing e nyenyane.” Cesar o re: “Go dira diphetogo tše go be go tla re nolofaletša go amogela taletšo ya go ya Bethele ge re be re ka bitšwa.” Ke’ng seo se ilego sa direga? Rocio o re: “Ka morago ga kgwedi re tšwile ntlong ya rena e kgolo, re ile ra laletšwa go tlo hlankela re le baithaopi ba nakwana kua Wallkill. Go ile gwa ba molaleng gore ka go nolofatša bophelo bja rena, re ile ra dumelela Jehofa gore a re šegofatše.”

Jason, Cesar le William

MOYA WA BONA WA BOIKGAFO O A PUTSWA

Go fo swana le Cesar le Rocio, bana babo rena ba makgolo le dikgaetšedi ba dirile boikgafo e le gore ba kgone go tšea karolo modirong wa go aga kua  New York State. Ba bantši ba bona ba thekga modiro wa go katološa meago kua Wallkill, mola ba bangwe ba bantši ba thabela tokelo ya go thuša ka go aga ntlokgolo kua Warwick. * Banyalani ba bantši ba gafile magae a bona a mabotse, mešomo ya maemo gaešita le diruiwa tša bona gore ba hlankele Jehofa kutšwanyana. Na Jehofa o šegofaditše moya wa bona wa boikgafo? Ee!

Way

Ka mohlala, Way, yo a šomago ka mohlagase, le Debra, bao bobedi bja bona ba lego nywageng ya mafelelong a bo-50, ba ile ba rekiša legae la bona le dithoto tša bona kua Kansas gomme ba hudugela Wallkill gore ba kgone go thuša Bethele ba dula lefelong le lengwe. * Gaešita le ge seo se ile sa nyaka gore ba dire diphetogo maphelong a bona, ga ba itshole ka boikgafo bjo ba bo dirilego. Ge Debra a bolela ka mošomo wa gagwe wa Bethele, o re: “Ka dinako tše dingwe ke ikwa eka ke gare ga batho bao ba agago meago ya paradeiseng yeo e tšwelelago dikgatišong tša rena!”

Melvin le Sharon ba ile ba rekiša legae la bona le dithoto kua South Carolina e le gore ba kgone go thuša kua Warwick. Gaešita le ge go be go se bonolo go dira boikgafo bjoo, banyalani ba ba bona e le tokelo go tšea karolo modirong wo o mogolo. Ba re: “Go thabiša kudu go tseba gore selo seo re se dirago se tlo hola mokgatlo wa lefase ka bophara.”

Kenneth

Kenneth, yo a rotšego modiro wa go aga, le Maureen, bao ba lego nywageng ya magareng a bo-50, ba hudugile California gore ba yo thuša kua Warwick. E le gore ba kgone go huduga, ba ile ba kgopela kgaetšedi yo mongwe phuthegong ya gabo bona gore a šale a ba hlokomeletše legae gomme ba kgopela ditho tša lapa gore di ba hlokomelele tatago Ken yo a tšofetšego. Na ba a itshola ka go dira boikgafo bja go yo hlankela Bethele? Aowa! Ken o re: “Re holega kudu. Na seo se ra gore ga go na ditlhohlo? Tšona di gona, eupša re phela bophelo bjo bo nago le morero, e bile re kgothaletša ba bangwe ka bolokologi gore ba tsenele tirelo ye.”

GO FENYA DITLHOHLO

Ba bantši ba bao ba ithaopetšego go thuša Bethele ba ile ba swanelwa ke go fenya mapheko a itšego. Ka mohlala, William le Sandra, bao ba lego nywageng ya mathomong a bo-60, ba be ba iketlile, ba ipshina ka bophelo kua Pennsylvania. Ba be ba na le khamphani yeo e atlegilego ya go dira dikarolo tša metšhene gomme ba hirile batho ba 17. Ba be ba hlankela phuthegong yeo ba goletšego go yona, e bile ba bantši ba leloko la bona ba be ba dula tikologong yeo. Ka gona ge go be go bulega sebaka sa gore ba thuše Wallkill ba robala lefelong le lengwe,  ba ile ba tseba gore seo se bolela go šia batho ka moka bao ba tlwaelanego le bona le dilo tšeo ba tlwaelanego le tšona. William o re: “Tlhohlo ya rena e kgolo e bile go tlogela bophelo bja rena bja boiketlo.” Eupša ka morago ga go rapela gantši, banyalani ba ba ile ba phetha ka go huduga, gomme ga ba itshole. William o re: “Lethabo leo le tlišwago ke go hlankela le lapa la Bethele ga le bapišwe le selo. Nna le Sandra ga sa nka ra thaba ka tsela ye bophelong!”

Ba bangwe ba banyalani bao ba šomago kua Wallkill

Ricky, yo a okamelago modiro wa go aga khamphaning e nngwe kua Hawaii, o ile a kgopelwa go tlo thuša modirong wa go aga kua Warwick. Mosadi wa gagwe e lego Kendra, o be a nyaka gore a amogele taletšo yeo. Lega go le bjalo, ba be ba tshwenyegile ka boikarabelo bja go hlokomela morwa wa bona wa nywaga e 11 e lego Jacob. Ba ile ba ipotšiša ge e ba e tla ba gabohlale gore ba hudugele New York State le ge e ba morwa wa bona a tla kgona go tlwaelana le bophelo bjo bofsa.

Ricky o re: “Selo sa mathomo seo re bego re tshwenyegile ka sona e be e le go hwetša phuthego yeo e nago le bana bao ba godilego moyeng. Re be re nyaka gore Jacob a be le bagwera ba bantši ba babotse.” Lega go le bjalo, phuthego yeo ba ilego ba fihlela go yona e be e na le bana ba sego kae eupša e na le ditho tše mmalwa tša Bethele. Ricky o re: “Ka morago ga diboka tša rena tša pele moo, ke ile ka botšiša Jacob gore o ikwa bjang ka phuthego yeo e mpsha, kudukudu ka ge go be go se na dithaka tša gagwe. O ile a re: ‘O se tshwenyege tate. Bagwera ba ka e tla ba bana babo rena ba Bethele ba bafsa.’”

Jacob le batswadi ba gagwe ba thabela segwera le ditho tša lapa la Bethele phuthegong ya gabo bona

Se se thabišago ke gore bana babo rena ba bafsa ba Bethele e ile ya ba bagwera ba Jacob. Mafelelo e bile afe? Ricky o re: “Bošegong bjo bongwe ge ke be ke feta phaphošing ya morwa wa ka ke ile ka bona gore mabone a sa tšhumile. Ke be ke letetše go mo hwetša a bapala papadi ya elektroniki, eupša o be a bala Beibele! Ge ke be ke mmotšiša gore o dira eng, Jacob o ile a re: ‘Le nna ke setho se sefsa sa lapa Bethele, gomme ke tlo bala Beibele ka moka ka ngwaga o tee.’” Ka gona, Ricky le Kendra ba thabile kudu, e sego feela ka gobane Ricky o kgona go thuša modirong wa go aga kua Warwick eupša le ka gobane go huduga ga bona go thuša morwa wa bona go gola moyeng.—Die. 22:6.

GA BA TSHWENYEGE KA BOKAMOSO

Luis le Dale

Modiro wa go aga kua Wallkill le Warwick mafelelong o tla fela, ka gona bao ba laleditšwego go tlo thuša ba a tseba gore tirelo ya bona ya Bethele ke ya nakwana. Na bana babo rena ba le dikgaetšedi ba ikopiša hlogo ka go hlwa ba ipotšiša gore ba tla ya kae goba ba tla dira’ng ge modiro wo wa go aga  o fela? Le gatee! Ba bantši ba bona ba ikwa go swana le banyalani bao ba lego nywageng ya bo-50 bao ba tšwago Florida. John, yo a okamelago modiro wa go aga khamphaning e nngwe, le mosadi wa gagwe Carmen, bao ba thušago kua Warwick, ba re: “Re bone kamoo Jehofa a re hlokometšego ka gona go fihla ka se sebaka. Jehofa a ka se re re tle mo go tlo thuša gomme ka morago a re lahla.” (Ps. 119:116) Luis, yo a hlamago diphaephe tša go tima mollo, le mosadi wa gagwe Quenia, ba hlankela kua Wallkill. Ba re: “Re šetše re bone kamoo Jehofa a re hlokometšego nameng. Re kgodišegile gore o tla tšwela  pele a re hlokomela, gaešita le ge re sa tsebe gore bjang, neng goba kae.”—Ps. 34:10; 37:25.

KE TLA “LE TŠHOLLELA TŠHEGOFATŠO KA BOATI”

John le Melvin

Ba bantši ba bao ba thušitšego ka modiro wa go aga kua New York ba ka ba ba iphile mabaka a go se ithaope. Lega go le bjalo, ba lekile Jehofa—go etša ge a re laletša ka moka ga rena go dira bjalo. O re: “Hle, ntekeng, . . . le bone ge nka se le bulele mašoba a legodimo gomme ka le tšhollela tšhegofatšo ka boati.”—Mal. 3:10.

Gary

Na le wena o tla leka Jehofa gomme wa bona ge a go šegofatša? Rapela gomme o naganišiše ka seo o ka se dirago gore o tšee karolo modirong o kgahlišago wo re swaregilego ka wona, e ka ba e le wa go thuša kua New York goba wa go aga meago e mengwe ya pušo ya Modimo, gomme o bone ge Jehofa a go šegofatša.—Mar. 10:29, 30.

Dale, e lego moentšeneare wa tša go aga, le Cathy, bao ba tšwago Alabama, ba kgothaletša kudu mohuta wo wa tirelo. Ba bolela ka go ithaopa ga bona kua Wallkill gore: “Ge o ka beta pelo gomme wa ikgafa, o tla bona moya wa Jehofa o šoma.” Go nyakega’ng gore o ithaope? Dale o re: “O swanetše go nolofatša bophelo bja gago kutšwanyana. Le ka mohla o ka se itshole!” Gary, yo a tšwago North Carolina, o na le nywaga e 30 a okamela khamphani ya go aga. Yena le mosadi wa gagwe e lego Maureen, ba re e nngwe ya ditšhegofatšo tšeo ba di thabelago kua Warwick ke “go kopana le go šoma le bana babo rena ba bantši le dikgaetšedi bao ba feditšego maphelo a bona ba hlankela Jehofa Bethele.” Gary o oketša ka gore: “Gore o hlankele Bethele, o swanetše go phela bophelo bjo bonolo, e lego tsela e kaonekaone ya go phela tshepedišong ye ya dilo.” Jason, yo a bego a šomela khamphani ya mohlagase, le Jennifer, bao ba tšwago Illinois, ba re go šoma modirong wa go aga Bethele kua Wallkill ke “tatso ya lefase le lefsa.” Jennifer o oketša ka gore: “Go thabiša kudu go tseba gore Jehofa o amogela selo se sengwe le se sengwe seo re se dirago le gore modiro woo e tla dula e le wa bohlokwa go yena. Jehofa o tla kgonthišetša gore o re šegofatša wa go tlala seatla.”

^ ser. 7 Baithaopi ba bangwe ba thuša Bethele ka nakwana letšatši letee goba a mmalwa ka beke ba dula gae gomme ba itefelela madulo le ditshenyagalelo tše dingwe.