Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2015

Agang Lenyalo le le Tiilego le le le Thabišago

Agang Lenyalo le le Tiilego le le le Thabišago

“Ge ntlo e sa agwe ke Jehofa, ke ga lefeela ge baagi ba yona ba šomile ka thata go e aga.”—PS. 127:1a.

1-3. Banyalani ba lebeletšane le mathata afe? (Bona seswantšho se se lego ka mo godimo.)

MONNA yo mongwe yo a nago le nywaga e 38 a nyetše e bile a thabile lenyalong o re: “Ge le dira maiteko a magolo e bile le bontšha gore le nyaka gore lenyalo la lena le atlege, Jehofa o tla le šegofatša.” Ee, banna le basadi ba ka thaba manyalong a bona le go thekgana dinakong tša mathata.—Die 18:22.

2 Eupša ga se mohlolo ge banyalani ba fela ba eba le “tlaišego nameng.” (1 Bakor. 7:28) Ka baka la’ng? Mathata a letšatši le letšatši a ka baka dikgohlano lenyalong. Go kgopišega, go se kwešišane le go se boledišane gabotse moo go bakwago ke maleme a rena ao a sa phethagalago go ka baka mathata le manyalong ao a atlegilego. (Jak. 3:2, 5, 8) Le gona banyalani ba bantši ba a imelwa mešomong mola ba bile ba swanelwa ke go hlokomela bana. Kgateletšego le molapo di dira gore banyalani ba bangwe ba se hwetše nako ya go matlafatša manyalo a bona. Mathata a ditšhelete, a tša maphelo goba mathata a mangwe a ka dira gore ba se sa ratana le go hlomphana. Go oketša moo, lenyalo leo le bego le bonagala le tiile le ka senywa ke “mediro ya nama,” ya go swana le boitshwaro bjo bo hlephilego, boitshwaro bja  mereba, bošoro, ditshele, lehufa, go tlalelana ka bogale le diphenkgišano.—Bagal. 5:19-21.

3 Se sebe le go feta ke gore ‘mehla ye ya bofelo’ e tletše ka mekgwa yeo Modimo a e hloilego yeo e lego kotsi lenyalong. (2 Tim. 3:1-4) Sa mafelelo, banyalani ba swanetše go lwantšhana le ditlhaselo tše matla tša lenaba la rena le kgopo. Moapostola Petro o re lemoša ka gore: “Lenaba la lena Diabolo o sepelasepela go swana le tau e rorago, a nyaka yo a kago go mo metša.”—1 Pet. 5:8; Kut. 12:12.

4. Ke’ng se se ka dirago gore lenyalo le tie le go thabiša?

4 Monna yo mongwe kua Japane o re: “Ke be ke gateletšegile ka ge ke be ke na le mathata a magolo a ditšhelete. Ka ge ke be ke sa logišane maano le mosadi wa ka, le yena o ile a gateletšega kudu monaganong. Go oketša moo, morago bjale o sa tšwa go hwetša gore o na le bothata bja maphelo. Ka dinako tše dingwe, kgateletšego ye e be e dira gore re lwe.” Mathata a mangwe lenyalong ga a phemege, eupša ga se gore a ka se rarollege. Ka thušo ya Jehofa, banyalani ba ka ba le lenyalo le le tiilego le leo le thabišago. (Bala Psalme 127:1.) Anke re ahlaahleng dilo tše hlano tšeo di agago lenyalo le le tiilego le la sa ruri. Ke moka re tlo ahlaahla le kamoo dilo tšeo di ka tiišwago ka gona ke lerato.

AKARETŠANG JEHOFA LENYALONG LA LENA

5, 6. Ke’ng seo monna le mosadi ba ka se dirago gore ba akaretše Jehofa lenyalong la bona?

5 Motheo wa lenyalo le le tiilego ke go botegela Mothomi wa lona le go mo kwa. (Bala Mmoledi 4:12.) Banna le basadi ba ka akaretša Jehofa manyalong a bona ka go latela keletšo ya gagwe e lerato. Ge Beibele e bolela ka batho ba Modimo ba bogologolo e re: “Ditsebe tša lena di tla kwa lentšu ka morago ga lena le re: ‘Tsela še. Sepelang ka yona,’ e le gore le se ke la fapogela ka go le letona goba le letshadi.” (Jes. 30:20, 21) Lehono banyalani ba ka “kwa” lentšu la Jehofa ka go bala Lentšu la Modimo ba le gotee. (Ps. 1:1-3) Ba ka matlafatša lenyalo la bona gape ka go ba le Borapedi bja Lapa bjo bo thabišago le bjo bo agago moyeng. Le gona ba swanetše go rapela gotee ka mehla gore lenyalo la bona le kgone go fenya ditlhaselo tše matla tša lefase la Sathane.

Ge banyalani ba dira dilo tša moya ba le gotee, ba ba le tswalano ya kgauswi le Modimo le go ba le lenyalo le le tiilego le le le thabišago (Bona serapa 5 le 6)

6 Gerhard wa kua Jeremane o re: “Nako le nako ge mathata goba go se kwešišane go re amoga lethabo lenyalong la rena, keletšo e tšwago Lentšung la Modimo e re thuša go hlagolela go se fele pelo le go lebalelana. Ka ntle le dika tše, lenyalo le ka se atlege.” Ge banyalani ba šoma ka thata go dula ba le kgauswi le Modimo lenyalong la bona ka go dira mediro ya moya ba le gotee, ba ba le tswalano ya kgauswi le Modimo le go ba le lenyalo le le tiilego le le le thabišago.

BANNA—DIRIŠANG BOHLOGO BJA LENA KA LERATO

7. Banna ba swanetše go diriša bohlogo bja bona bjang?

7 Tsela yeo monna a dirišago bohlogo bja gagwe ka yona e ka dira gore lenyalo le tie le go thabiša. Beibele e re: “Hlogo ya monna yo mongwe le yo mongwe ke Kriste; hlogo ya mosadi yona ke monna.” (1 Bakor. 11:3) Yona temana ye e bontšha banna kamoo ba swanetšego go diriša bohlogo bja bona—ba swanetše go ekiša tsela yeo Kriste a dirišago bohlogo bja gagwe go monna yo mongwe le yo mongwe. Le ka mohla Jesu ga se a ka a gatelela ba bangwe goba a ba swara makgwakgwa, eupša ka mehla o be a le  lerato, a le botho, a na le tekatekano, a le bonolo e bile a ikokobeditše pelong.—Mat. 11:28-30.

8. Monna a ka dira’ng gore mosadi wa gagwe a mo rate le go mo hlompha?

8 Banna ba Bakriste ga se ba swanela go dulela go gopotša basadi ba bona gore ba ba hlomphe. Go e na le moo, ba ‘tšwela pele ba dula le bona go ya ka tsebo [ka go ba naganela; ka go ba kwešiša, mongwalo wa ka tlase].’ Ba “ba [godiša] go etša sebjana se se fokolago, se setshadi.” (1 Pet. 3:7) Banna ba bontšha basadi ba bona pele ga batho le ge ba le noši gore ke ba bohlokwa ka go bolela le bona ka botho le ka go ba swara gabotse. (Die. 31:28) Banna bao ba dirišago bohlogo bja bona ka tsela e bjalo e lerato ba tla ratwa le go hlompšha ke basadi ba bona. Le gona Modimo o tla šegofatša manyalo a bona.

BASADI—IKOKOBELETŠENG BANNA BA LENA

9. Mosadi a ka bontšha bjang gore o ikokobeditše?

9 Go rata Jehofa ka dipelo tša rena ka moka go re thuša go ikokobetša ka tlase ga seatla sa gagwe se matla. (1 Pet. 5:6) Tsela e bohlokwa yeo ka yona mosadi yo a ikokobeditšego a hlomphago matla a Jehofa a bolaodi ke ge a dirišana le monna wa gagwe le go mo thekga. Beibele e re: “Lena basadi, ikokobeletšeng banna ba lena ka ge go swanela Moreneng.” (Bakol. 3:18) Ke therešo gore ga se ka mehla mosadi a tlago go dumelelana le diphetho tša monna. Eupša ge e ba diphetho tšeo di sa thulane le melao ya Modimo, mosadi yo a ikokobeditšego o tla di thekga.—1 Pet. 3:1.

10. Ke ka baka la’ng boikokobetšo bo le bohlokwa?

10 Mosadi o kgatha tema ya bohlokwa kudu ka ge e le “molekane” wa monna wa gagwe. (Mal. 2:14) O tsenya letsogo ge go dirwa diphetho tša lapa ka go ntšha sa mafahleng ka tlhompho eupša a dutše a ikokobeditše. Monna yo bohlale o tla theetša ditšhišinyo tša mosadi wa gagwe ka kelohloko. (Die. 31:10-31) Boikokobetšo bo tla dira gore ka lapeng go be le lethabo, khutšo le kwano, le gona bo tlišetša banna le basadi  lethabo la go tseba gore ba thabiša Modimo.—Baef. 5:22.

TŠWELANG PELE LE LEBALELANA KA BOLOKOLOGI

11. Ke ka baka la’ng go lebalelana go le bohlokwa?

11 Se sengwe sa dilo tša bohlokwa tšeo di agago lenyalo le le tiilego ke go lebalelana. Lenyalo le a tia ge monna le mosadi ba ‘tšwela pele ba kgotlelelana gomme ba lebalelana ka bolokologi.’ (Bakol. 3:13) Ka lehlakoreng le lengwe, lenyalo le tla senyega ge banyalani ba bolokelana dikgopi gomme ba fela ba gopotšana tšona ge go na le seo ba sa kwanego ka sona. Go fo swana le ge menga e ka wiša moago, dikgopi le go galefelana go ka mela ka dipelong tša rena, gomme gwa dira gore go lebalelana go be thata le go feta. Eupša lenyalo le tla tia ge e ba monna le mosadi ba dula ba lebalelana, go etša ge Jehofa a ba lebalela.—Mika 7:18, 19.

12. Ke ka tsela efe lerato le ‘bipago dibe tše dintši’?

12 Leratorato “ga le boloke pego ya bobe,” goba diphošo. Ge e le gabotse, “lerato le bipa dibe tše dintši.” (1 Bakor. 13:4, 5; bala 1 Petro 4:8.) Ka mantšu a mangwe, lerato ga le na gore o lebalela motho dibe gakae. Ge moapostola Petro a be a botšiša Jesu gore o swanetše go lebalela batho dibe tša bona gakae, Jesu o ile a mo araba ka gore: “Go fihla ga masomešupa-šupa.” (Mat. 18:21, 22) Ge e le gabotse Jesu o be a bontšha gore Mokriste ga se a swanela go ba le mollwane tabeng ya go lebalela ba bangwe.—Die. 10:12. *

13. Re ka fenya bjang mokgwa wa go se rate go lebalela?

13 Annette o re: “Ge banyalani ba sa nyake go lebalelana, ba thoma go se sa botana le go bolokelana dikgopi, gomme seo ke mpholo lenyalong. Go lebalelana go matlafatša lenyalo e bile go dira gore banyalani ba batamelane.” E le gore o fenye mokgwa wa go se lebalele, katanela go bontšha molekane wa gago tebogo le go mo tšeela godimo. Hlagolela mokgwa wa go reta molekane wa gago go tšwa pelong. (Bakol. 3:15) Ge o ka dira bjalo, o tla ba le khutšo ya monagano, wa thabela botee le ditšhegofatšo tša Modimo tšeo a di neago bao ba tlwaetšego go lebalela.—Baroma 14:19.

DIRIŠANG MOLAO WA GAUTA

14, 15. Molao wa Gauta ke’ng, gona o bohlokwa gakaaka’ng lenyalong?

14 Ga go pelaelo gore o rata gore batho ba bangwe ba go sware ka seriti le ka tlhompho. O a thaba ge ba bangwe ba tšeela dikgopolo tša gago godimo e bile ba go naganela. Eupša na o kile wa kwa motho yo a itšego a re: “Ke tla mo ruta go phela le batho”? Gaešita le ge re ka nagana gore motho yoo o na le lebaka le le kwagalago la go bolela ka tsela yeo, Beibele e re botša gore: “O se ke wa re: ‘Ke tla mo dira go etša ge a ntirile.’” (Die. 24:29) Ge e le gabotse, Jesu o boletše tsela e kaone kudu ya go rarolla mathata. Tsela yeo e tsebja kudu moo e bilego e bitšwa gore ke Molao wa Gauta. O itše: “Ka mo le nyakago batho ba le dira ka gona, le lena le ba direng ka wona mokgwa woo.” (Luka 6:31) Jesu o be a bolela gore re swanetše go swara batho ka tsela yeo re nyakago ba re swara ka yona gomme re se ke ra bušetša bobe ka bobe. Lenyalong, se se bolela gore re swanetše go swarana ka tsela yeo e tla dirago gore lenyalo le atlege.

 15 Banyalani ba matlafatša lenyalo la bona ge ba naganelana. Monna yo mongwe mo Afrika Borwa o re: “Re leka go diriša Molao wa Gauta. Ke therešo gore re fela re galefišana, eupša yo mongwe le yo mongwe wa rena o šoma ka thata go swara yo mongwe ka tsela yeo a ka ratago a mo swara ka yona—ka tlhompho le ka seriti.”

16. Ke’ng seo banyalani ba sa swanelago go se dirana?

16 O se ke wa botša batho ba bangwe mafokodi a molekane wa gago goba go mo kwera ka ona—o se ke wa leka le go dira metlae ka ona. Gopola gore lenyalo ga se phenkgišano yeo go yona re nyakago go bona gore ke mang a nago le matla, ke mang a kgonago go hlaba lešata goba gore ke mang a kgonago go hlaba ka mantšu. Ke therešo gore ka moka ga rena re na le mafokodi, e bile ka dinako tše dingwe re kgopiša ba bangwe. Eupša ga go na lebaka le letee leo le lokafatšago monna goba mosadi gore a diriše polelo e hlabago le ya lenyatšo, goba se sebe le go feta, a kgorometše goba a itie molekane wa gagwe.—Bala Diema 17:27; 31:26.

17. Banna ba ka diriša bjang Molao wa Gauta?

17 Gaešita le ge ditšong tše dingwe banna bao ba tlaišago basadi ba bona goba ba ba itiago ba lebelelwa e le bannatia, Beibele e re: “Yo a diegago go galefa o phala mogale, gomme yo a laolago moya wa gagwe o phala yo a thopago motse.” (Die. 16:32) Ga se papadi gore monna a ekiše monna yo a phagamego yo a kilego a phela e lego Jesu Kriste, gotee le go itshwara. Monna yo a tlaišago mosadi wa gagwe ka mantšu goba mmeleng ga se monnatia, e bile o tla senya tswalano ya gagwe le Jehofa. Mopsalme Dafida, yoo e bego e le monnatia e bile a na le sebete, o itše: “Ge le ferekane, le se ke la dira sebe. Bolelang le nnoši ka dipelong tša lena le le malaong a lena gomme le ikhomolele.”—Ps. 4:4.

“APARANG LERATO”

18. Ke ka baka la’ng go le bohlokwa gore re dule re hlagolela seka sa lerato?

18 Bala 1 Bakorinthe 13:4-7. Lerato ke seka se segolo go di feta ka moka lenyalong. “Aparang lerato leo le bonagatšago lešoko, botho, boikokobetšo, boleta le go se fele pelo. Eupša ka godimo ga dilo tše ka moka, aparang lerato gobane ke setlemo se se phethagetšego sa botee.” (Bakol. 3:12, 14) Lerato la boikgafo la go swana le leo Kriste a le bontšhitšego le tiiša tlemo ya lenyalo. Le dira gore lenyalo le se šišinyege le ge molekane yo mongwe a na le bofokodi bjo bo go tenago, ge a babja kudu, ge go na le mathata a ditšhelete le ge le sa phedišane gabotse le ba bogweng goba ba bogadi.

19, 20. (a) Banyalani ba ka thušwa ke’ng go aga lenyalo le le tiilego le le le thabišago? (b) Re tlo ahlaahla’ng sehlogong se se latelago?

19 Ruri go nyakega boikgafo, go botegelana le maiteko a magolo gore lenyalo le atlege. Go e na le gore banyalani ba arogane ge mathata a tšwelela, ba swanetše go šoma ka thata gore lenyalo la bona le atlege—e sego go fo kgotlelelana. Banyalani ba Bakriste bao ba ineetšego go Jehofa le go botegelana ba tutuetšwa ke go rata Modimo le go ratana gore ba rarolle mathata a bona, ka gobane “lerato le ka mohla ga le fele.”—1 Bakor. 13:8; Mat. 19:5, 6; Baheb. 13:4.

20 Go aga lenyalo le le tiilego le le le thabišago go thata kudu ka gobane re phela ‘dinakong tše di hlobaetšago.’ (2 Tim. 3:1) Eupša ka thušo ya Jehofa, re ka kgona. Lega go le bjalo, banyalani ba sa dutše ba swanetšwe ke go lwantšhana le boitshwaro bja go bola bja lefase le. Sehlogo se se latelago se tla ahlaahla seo banna le basadi ba ka se dirago go šireletša manyalo a bona.

^ ser. 12 Le ge banyalani ba leka go lebalelana le go lokiša mathata a bona, Beibele e dumelela molekane yo a se nago molato go dira phetho ya ge e ba a tla lebalela molekane wa gagwe yo a dirilego bohlotlolo goba go se mo lebalele. (Mat. 19:9) Bala sehlogo se se rego, “Pono ya Beibele: Bohlotlolo—Na bo Swanetše go Lebalelwa Goba ga se bja Swanela go Lebalelwa?” ka go tokollo ya Phafoga! ya August 8, 1995.