Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  December 2014

Dipotšišo tše Tšwago go Babadi

Dipotšišo tše Tšwago go Babadi

Ke’ng seo Jeremia a bego a se bolela ge a be a re Ragele o llela bana ba gagwe?

Go Jeremia 31:15, re bala gore: “Se ke seo Jehofa a se boletšego a re: ‘Kua Rama go kwala lentšu, go kwala sello le go lla gabohloko; Ragele o llela bana ba gagwe. O ganne go homotšwa ka baka la bana ba gagwe ka gobane ga ba sa le gona.’”

Barwa ba babedi ba Ragele ba be ba sa phela ge a be a ehwa. Ka baka leo, seo Jeremia a se ngwadilego nywaga e 1 000 ka morago ga ge Ragele a hwile go ka bonagala se sa nepagala.

Morwa wa pele wa Ragele e be e le Josefa. (Gen. 30:22-24) Ka morago o ile a ba le morwa yo mongwe gape yo a bego a bitšwa Benjamini. Eupša Ragele o ile a hwa ge a be a belega morwa yoo wa bobedi. Ka gona, go rotoga potšišo yeo e rego: Ke ka baka la’ng Jeremia 31:15 e re Ragele o be a lla ka gobane bana ba gagwe “ga ba sa le gona”?

Gopola gore ge nako e dutše e eya, morwa wa gagwe wa pele e lego Josefa, o ile a ba tatago Manase le Efuraime. (Gen. 41:50-52; 48:13-20) Ge nako e dutše e eya, Efuraime e ile ya ba moloko o tumilego wo o bego o na le khuetšo e kgolo mmušong ka moka wa ka leboa wa meloko e lesome ya Isiraele gomme ka morago Efuraime e ile ya tla ya emela meloko yeo ka moka. Ka lehlakoreng le lengwe, moloko wo o tšwilego go morwa wa bobedi wa Ragele e lego Benjamini gotee le moloko wa Juda, e ile ya ba karolo ya mmušo wa ka borwa. Ka gona, ka kgopolo e itšego, go ka bolelwa gore Ragele o emela bomma ka moka ba Isiraele, ba mmušo wa ka leboa le wa ka borwa.

Nakong ya ge puku ya Jeremia e be e ngwalwa, mmušo wa ka leboa wa meloko e lesome o be o šetše o fentšwe ke Baasiria gomme batho ba wona ba bantši ba išitšwe bothopša. Lega go le bjalo, ditlogolwana tše dingwe tša Efuraime di ka ba di ile tša tšhabela tikologong ya Juda. Ka 607 B.C.E., Bababilona ba ile ba fenya mmušo wa ka borwa wa meloko e mebedi ya Juda. Go bonagala karolo ya phenyo yeo e bile gore mathopša a mantši a kgobokanywe Rama, yeo e lego dikhilomithara tše seswai ka leboa la Jerusalema. (Jer. 40:1) Mohlomongwe a mangwe a ile a bolaelwa gona moo tikologong ya Benjamini moo Ragele a bego a boloketšwe gona. (1 Sam. 10:2) Ka gona go llela ga Ragele barwa ba gagwe go ka ba go bolela gore ka tsela ya seswantšhetšo o be a llela Babenjamini ka kakaretšo goba kudukudu bao ba bolaetšwego Rama. Kgonagalo e nngwe e ka ba gore bomma ka moka ba setšhaba sa Modimo ba be ba llela go hwa goba go thopša ga Baisiraele.

Go sa šetšwe gore boemo e be e le bofe, mantšu a Jeremia a gore Ragele o llela bana ba gagwe e be e le boporofeta bja mabapi le seo se ilego sa direga nywagakgolong e mentši ka morago, ge bophelo bja Jesu bo be bo le kotsing ka morago ga go belegwa. Kgoši Heroda o ile a laela gore bašemane ka moka ba nywaga ya ka tlase ga e mebedi kua Betlelehema, yeo e bego e le ka borwa bja Jerusalema, ba bolawe. Ka go re’alo, bana bao ba be ba se sa le gona; ba be ba hwile. Anke o akanye ka sello sa bomma bao ba hwetšwego ke barwa ba bona! Go be go le bjalo ka ge eka sello seo se kwagala le kua Rama, yeo e lego ka leboa la Jerusalema.—Mat. 2:16-18.

Ka baka leo, mehleng ya Jeremia le mehleng ya Jesu, mantšu a rego Ragele o llela bana ba gagwe a be a hlalosa gabotse go lla ga bomma ba Bajuda bao ba bego ba llela bana ba bona bao ba bolailwego. Ke therešo gore bao ba hwilego gomme ba ya “nageng ya lenaba” e lego lehu, ba ka boa bokgobeng bja lenaba leo ge bahu ba tsošwa.—Jer. 31:16; 1 Bakor. 15:26.