Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  December 2014

O ‘Tsebile Tsela’

O ‘Tsebile Tsela’

GUY HOLLIS PIERCE, setho sa Sehlopha se Bušago sa Dihlatse tša Jehofa o feditše bophelo bja gagwe bja lefaseng ka Labobedi, March 18, 2014. O be a na le nywaga e 79 ge kholofelo ya gagwe ya go ba yo mongwe wa bana babo Kriste bao ba tsošitšwego e be e phethagala.—Baheb. 2:10-12; 1 Pet. 3:18.

Guy Pierce o belegetšwe kua Auburn, California, U.S.A., ka November 6, 1934, gomme a kolobetšwa ka 1955. O ile a nyala mosadi wa gagwe yo a rategago e lego Penny ka 1977 gomme ba ba le bana. Phihlelo ya go ba hlogo ya lapa e ile ya mo thuša gore a be le lerato la botswadi. Ka 1982, yena le Penny ba be ba le babulamadibogo, ke moka ka 1986 a thoma nywaga ya gagwe e 11 yeo a e feditšego e le molebeledi wa tikologo kua United States.

Ka 1997, Guy le Penny Pierce ba ile ba thoma go hlankela e le ditho tša lapa la Bethele la United States. Ngwanabo rena Pierce o be a šoma Lefapheng la Tirelo, ke moka ka 1998 a kgethwa gore e be mothuši wa Komiti ya Bašomi ya Sehlopha se Bušago. Tsebišo ya gore Ngwanabo rena Pierce o kgethilwe gore e be setho sa Sehlopha se Bušago e ile ya dirwa ka October 2, 1999, sebokeng sa ngwaga le ngwaga sa Watch Tower Bible and Tract Society of Pennsylvania. Nywageng ya morago bjale, o hlanketše Komiting ya Bašomi, Komiting ya Bongwadi, Komiting ya Kgatišo le Komiting ya Balomaganyi.

Batho ba ditšo le ditlogo tše di fapafapanego ba be ba kgahlwa ke Ngwanabo rena Pierce ka baka la go rata go myemyela ga gagwe le go dira metlae. Lega go le bjalo, dika tšeo di ilego tša dira gore a ratwe kudu ke batho ke lerato la gagwe, boikokobetšo, go hlompha melao le melao ya motheo ya go loka le tumelo ya gagwe e feletšego go Jehofa. Ngwanabo rena Guy Pierce o be a tloga a dumela gore dikholofetšo tša Jehofa di tla phethagala go fo swana le ge re dumela gore letšatši le tla hlaba, e bile o be a nyaka go ruta batho ba bangwe therešo yeo.

Ngwanabo rena Pierce o be a sa lape go hlankela Jehofa, a tsoga ka masa e bile gantši a šoma go fihlela bošego. O dikologile lefase ka moka a tšama a kgothatša bana babo le dikgaetšedi ba Bakriste, le gona o be a ipha nako ya go ba le ditho tše di fapafapanego tša lapa la Bethele le ba bangwe bao ba bego ba nyaka go fetša nako ba na le yena, ba nyaka keletšo le thušo ya gagwe. Gaešita le ka morago ga nywaga e mentši, badumedigotee le yena ga ba lebale moya wa gagwe wa go amogela baeng, bogwera le kgothatšo ya Mangwalo.

Ngwanabo rena yo yo e bilego e le mogwera wa rena yo a rategago o be a na le mosadi le bana ba tshelelago, ditlogolo gotee le ditlogolwana. Le gona o be a na le bana ba bantši kudu ba moya. Polelo ya segopotšo ya Ngwanabo rena Pierce e neilwe legaeng la Bethele ya Brooklyn ka Mokibelo, March 22, 2014, ke Mark Sanderson, yo le yena e lego setho sa Sehlopha se Bušago. Tše dingwe tša dilo tšeo a di boletšego ke kholofelo ya Ngwanabo rena Pierce ya go phela legodimong gomme a bala mantšu a Jesu ao a rego: “Ntlong ya Tate go na le madulo a mantši. . . . Ge e ba ke tloga ke eya go le lokišetša lefelo, ke tla buša ka boa, ka le amogela gae go nna gore moo ke lego gona le lena le be gona. Le gona, le tseba tsela ya moo ke yago.”—Joh. 14:2-4.

Ruri re tlo hlologela Ngwanabo rena Pierce. Lega go le bjalo, re thabela gore o ‘tsebile tsela’ ya go ya ‘madulong’ a gagwe a ka mo go sa felego.