Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  November 2014

Lebaka Leo re Swanetšego go ba ba Bakgethwa

Lebaka Leo re Swanetšego go ba ba Bakgethwa

“Le be ba bakgethwa.”—LEF. 11:45.

1. Puku ya Lefitiko e ka re thuša bjang?

KA PUKUNG ya Lefitiko, bokgethwa bo bolelwa ka makga a mantši go feta ka pukung le ge e le efe ya Beibele. Ka ge go letetšwe gore barapedi ka moka ba kgonthe ba Jehofa ba be le seka se, go kwešiša puku ya Lefitiko le go e tšeela godimo go tla re thuša go itlhatsela re le ba bakgethwa.

2. Ke dilo dife tše dingwe tšeo puku ya Lefitiko e bolelago ka tšona?

2 Puku ya Lefitiko, yeo e ngwadilwego ke moporofeta Moshe, ke karolo ya “Lengwalo ka moka” leo le holago ka go ruta. (2 Tim. 3:16) Ka kakaretšo, leina la Jehofa le tšwelela ka makga a lesome kgaolong e nngwe le e nngwe ya puku ye. Go kwešiša puku ya Lefitiko go tla re thuša go phema go dira selo le ge e le sefe seo se tla gobošago leina la Modimo. (Lef. 22:32) Go diriša ga puku ye leboelela mantšu ao a rego “ke nna Jehofa,” go swanetše go re gopotša gore re kwe Modimo. Sehlogong se le go se se latelago, anke re ikholeng ka dithuto tša bohlokwa tšeo di hwetšagalago ka pukung ya Lefitiko, e lego mpho e tšwago go Modimo yeo e re thušago go tšea karolo borapeding bjo bokgethwa.

GO NYAKEGA GA BOKGETHWA

3, 4. Go hlapišwa ga Arone le barwa ba gagwe go be go swantšhetša’ng? (Bona seswantšho seo se lego mathomong a sehlogo.)

3 Bala Lefitiko 8:5, 6Jehofa o ile a kgetha Arone gore a hlankele  e le moperisita yo a phagamego wa Isiraele, gomme a kgetha barwa ba gagwe gore ba hlankele e le baperisita ba setšhaba. Arone o swantšhetša Jesu Kriste gomme barwa ba Arone ba swantšhetša balatedi ba Jesu ba tloditšwego. Bjale na go hlapišwa ga Arone go be go swantšhetša go hlwekišwa ga Jesu? Aowa, ka gobane Jesu o be a se na sebe le “sekodi,” ka go re’alo go be go sa nyakege gore a hlwekišwe. (Baheb. 7:26; 9:14) Lega go le bjalo, go hlapišwa ga Arone go be go swantšhetša go hlweka ga Jesu le go hloka ga gagwe sebe. Bjale go hlapišwa ga barwa ba Arone go swantšhetša’ng?

4 Go hlapišwa ga barwa ba Arone go be go swantšhetša go hlwekišwa ga bao ba kgethilwego go ba ditho tša boperisita bja legodimong. Na kolobetšo ya batlotšwa e be e tswalana le go hlapišwa ga barwa ba Arone? Aowa, ka gobane kolobetšo ga e hlatswe motho dibe; go e na le moo e swantšhetša gore motho o ineetše go Jehofa Modimo ka mo go feletšego. Batlotšwa ba hlapišwa ka “lentšu la Modimo,” gomme seo se bolela gore ba swanetše go dira sohle se ba ka se kgonago go phela ka go dumelelana le dithuto tša Kriste. (Baef. 5:25-27) Ka go re’alo ba a kgethagatšwa le go hlwekišwa. Eupša go thwe’ng ka “dinku tše dingwe”?—Joh. 10:16.

5. Ke ka baka la’ng go ka thwe dinku tše dingwe di hlwekišwa ka Lentšu la Modimo?

5 Barwa ba Arone ga ba swantšhetše “lešaba le legolo” la dinku tše dingwe tša Jesu. (Kut. 7:9) Lega go le bjalo, na batho ba bao ba kolobeditšwego le bona ba dirwa ba bakgethwa le go hlwekišwa ka Lentšu la Modimo? Ee, go bjalo! Ge bao ba nago le kholofelo ya go phela mo lefaseng ba bala seo Beibele e se bolelago ka bohlokwa le mohola wa madi a Jesu ao a tšholotšwego, ba dumela mantšu ao gomme ba “direla [Modimo] tirelo e kgethwa mosegare le bošego.” (Kut. 7:13-15) Batlotšwa le dinku tše dingwe ba hlwekišwa ka mehla gomme seo se dira gore ba ‘dule ba itshwere gabotse.’ (1 Pet. 2:12) Ruri Jehofa o swanetše go ba a thaba ge a bona batlotšwa le dinku tše dingwe ba hlwekile e bile ba na le botee gomme ba theetša Modiši wa bona e lego Jesu le go mo latela ka potego!

6. Ke go itlhahloba gofe mo go tlago go re hola?

6 Taba ya gore Modimo o be a nyaka gore baperisita ba Isiraele ba hlweke mmeleng e ruta batho ba Jehofa thuto ya bohlokwa lehono. Gantši bao re ithutago Beibele le bona ba a lemoga gore mafelo a rena a borapedi a hlwekile le gore re dula re hlwekile le go apara gabotse. Lega go le bjalo, go hlweka ga baperisita go re thuša go lemoga gore motho yo mongwe le yo mongwe yo a rotogelago thabeng e kgethwa ya borapedi bja Jehofa o swanetše go ‘hlweka pelong.’ (Bala Psalme 24:3, 4; Jes. 2:2, 3.) Re swanetše go direla Modimo tirelo e kgethwa ka menagano le dipelo tše di hlwekilego gotee le ka mebele e hlwekilego. Se se nyaka gore re dule re itlhahloba, moo ba bangwe ba rena re ka swanelwago ke go dira diphetogo tše dikgolo gore re be ba bakgethwa. (2 Bakor. 13:5) Ka mohlala, motho yo a kolobeditšwego yo a bogelago ka boomo diswantšho tše di kgothaletšago bootswa o swanetše go ipotšiša gore: ‘Na se ke se dirago se bontšha gore ke yo mokgethwa?’ Ka morago ga moo o swanetše go kgopela thušo gore a tlogele mokgwa woo o mobe.—Jak. 5:14.

ITLHATSELENG LE LE BA BAKGETHWA KA GO KWA

7. Ka go dumelelana le Lefitiko 8:22-24, Jesu o beile mohlala ofe?

7 Ge Moperisita yo a Phagamego e lego Arone le barwa ba gagwe ba be ba bewa gore e be baperisita ba Isiraele, go ile gwa tšewa madi a kgapa gomme a tlotšwa tsebeng ya le letona ya yo mongwe le yo mongwe wa bona, monwaneng o mogolo wa seatla le monwaneng o mogolo wa leoto. (Bala Lefitiko 8:22-24.) Go tlotšwa ga bona ka madi go be go swantšhetša gore ba be ba tla kwa le go dira sohle seo ba ka se kgonago dikabelong tša bona. Ka mo go swanago, Moperisita yo a Phagamego e lego Jesu o beetše batlotšwa le  dinku tše dingwe mohlala o phethagetšego. Ka mehla o be a ekwa Modimo. Jesu o ile a dira thato ya Jehofa, le gona le ka mohla maoto a gagwe ga se a ka a aroga tseleng e kgethwa.—Joh. 4:31-34.

8. Ke’ng seo barapedi ka moka ba Jehofa ba swanetšego go se dira?

8 Bakriste ba tloditšwego le dinku tše dingwe tša Jesu ba swanetše go latela mohlala wa Moperisita wa bona yo a Phagamego ka go dula ba botega. Barapedi ka moka ba Jehofa ba swanetše go kwa le go latela tlhahlo yeo e lego ka Lentšung la Modimo gomme ka go re’alo ba phema go nyamiša moya o mokgethwa. (Baef. 4:30) Ba swanetše go ‘lokiša ditsela bakeng sa dinao tša bona.’—Baheb. 12:13.

9. Bana babo rena ba bararo bao ba šomilego kgauswi kudu le ditho tša Sehlopha se Bušago ba boletše’ng, gona mantšu a bona a ka go thuša bjang go dula o itlhatsela o le yo mokgethwa?

9 Ekwa mantšu a tšwago pelong a bana babo rena ba bararo bao ba nago le kholofelo ya go tlo phela mo lefaseng bao ka nywagasome ba šomilego kgauswi kudu le ditho tša Sehlopha se Bušago. Yo mongwe wa bona o itše: “Gaešita le ge se e le tokelo e kgethegilego, go šoma kgauswi kudu le bana babo rena ba go utolotše gore gaešita le ge ba tloditšwe ka moya o mokgethwa, ga se ba phethagala. Eupša e nngwe ya dipakane tša ka go theoša le nywaga e be e dutše e le go kwa bao ba etelelago pele.” Ngwanabo rena wa bobedi o itše: “Mangwalo a go swana le 2 Bakorinthe 10:5 a mabapi le ‘go kwa Kriste,’ a nthušitše go kwa bao ba etelelago pele le go dirišana le bona. Se ke go kwa go tšwa pelong.” Ngwanabo rena wa boraro o itše: “Go rata seo Jehofa a se ratago le go hloya seo a se hloilego, gotee le go tsoma tlhahlo ya gagwe ka mehla le go dira seo se mo kgahlišago, go bolela gore re kwe mokgatlo wa gagwe le bao a ba dirišago go thuša go phethagatša morero wa gagwe ka lefase.” Ngwanabo rena yo o gopola kamoo Nathan Knorr, yoo a ilego a ba setho sa Sehlopha se Bušago, a ilego a amogela ka pelo e tšhweu seo se bego se gatišitšwe ka go Morokami wa Seisemane wa 1925 sehlogong se se rego, “Go Tswalwa ga Setšhaba” le ge ba bangwe ba be ba se belaela. Go kwa ga Ngwanabo rena Knorr go ile gwa kgahla ngwanabo rena yo kudu. Go naganišiša ka mantšu a bana babo rena ba go ka go thuša go itlhatsela o le yo mokgethwa ka go kwa.

GO KWA MODIMO KA TSELA E KGETHWA TABENG YA MADI

10. Go bohlokwa gakaaka’ng gore re kwe molao wa Modimo tabeng ya madi?

10 Bala Lefitiko 17:10. Jehofa o ile a laela Baisiraele gore ba se ke ba ja “mohuta le ge e le ofe wa madi.” Le lehono go sa letetšwe gore Bakriste ba ile madi a diphoofolo le a batho. (Dit. 15:28, 29) Le ka mohla ga re nyake go dira dilo tšeo di tla dirago gore Modimo a se sa re amogela gomme a re ntšha ka phuthegong ya gagwe. Re a mo rata, e bile re nyaka go mo kwa. Gaešita le ge maphelo a rena a le kotsing, re ikemišeditše go se theetše batho bao ba sa tsebego Jehofa le bao ba se nago taba le go mo kwa. Ee, re a tseba gore batho ba tlo re kwera ka ge re sa tšhele madi, eupša re kgetha go kwa Modimo. (Juda 17, 18) Ke pono efe tabeng ye yeo e tlago go re matlafaletša go ‘tloga re ikemišetša’ go se je madi goba go se amogele tšhelo ya madi?—Doit. 12:23.

11. Ke ka baka la’ng re ka re seo se bego se dirwa ka Letšatši la Poelano ngwaga le ngwaga e be e se go senya nako?

11 Seo moperisita yo a phagamego kua Isiraeleng ya bogologolo a bego a se dira ka madi a phoofolo ka Letšatši la Poelano ngwageng o mongwe le o mongwe se re thuša go kwešiša pono ya Modimo ka madi. Madi a be a dirišetšwa tirelo e kgethwa. A be a dirišetšwa go phumola dibe tša bao ba bego ba nyaka gore Jehofa a ba lebalele. Madi a poo le a pudi a be a swanetše go rothetšwa pele ga sekhurumelo sa areka ya kgwerano. (Lef. 16:14, 15, 19) Tiro ye e be e bulela Jehofa tsela ya gore a lebalele Baisiraele dibe tša bona.  Go oketša moo, Jehofa o be a laetše gore ge motho a ka bolaya phoofolo yeo e jewago, a tšholle madi a yona gomme a a khupetše ka mmu, ka “gobane bophelo bja sephedi sa mohuta o mongwe le o mongwe bo mading a sona.” (Lef. 17:11-14) Na se e be e le go senya nako? Aowa. Go dirišwa ga madi ka Letšatši la Poelano, gotee le taelo ya gore madi a tšhollelwe fase, go be go dumelelana le taelo ya mabapi le madi yeo Jehofa a ilego a e nea Noa le ditlogolo tša gagwe pejana ga moo. (Gen. 9:3-6) Jehofa Modimo o ile a iletša batho go ja madi e le gore a šireletše bophelo. Se se bolela’ng go Bakriste?

12. Lengwalo leo Paulo a le ngwaletšego Bakriste ba Baheberu le tswalanya bjang madi le tebalelo ya dibe?

12 Ge moapostola Paulo a be a ngwalela Bakriste ba Baheberu ka tema e kgolo yeo madi a e kgathago gore batho ba hlwekišwe, o hlalositše gore: “Go ya ka Molao mo e nyakilego go ba dilo ka moka di hlwekišwa ka madi gomme ga go be le tebalelo ya dibe ka ntle le gore madi a tšhollwe.” (Baheb. 9:22) Le gona Paulo o hlalositše gore gaešita le ge dihlabelo tša diphoofolo di be di na le mohola go fihla bokgoleng bjo itšego, morero wa tšona e be e le feela go gopotša Baisiraele gore ke badiradibe le gore ba be ba hloka thušo e oketšegilego gore dibe tša bona di lebalelwe sa ruri. Ee, Molao e be e le “moriti wa dilo tše dibotse tše di tlago go tla, eupša e se wona dilo tšeo ka botšona.” (Baheb. 10:1-4) Tebalelo ya dibe e be e tla kgonega bjang?

13. O ikwa bjang ka taba ya gore Jesu o neile Jehofa mohola wa madi a gagwe?

13 Bala Baefeso 1:7. Lehu la Jesu Kriste la sehlabelo, yena yoo ‘a ikgafetšego rena’ ka go rata, le na le seo le se bolelago go bohle bao ba mo ratago le go rata Tatagwe. (Bagal. 2:20) Lega go le bjalo, seo Jesu a se dirilego ka morago ga lehu la gagwe le tsogo ke sona seo se re lokolotšego, sa dira gore re kgone go lebalelwa dibe. Jesu o ile a phethagatša seo se bego se dirwa ka Letšatši la Poelano ka tlase ga Molao wa Moshe. Ka letšatši leo, moperisita yo a phagamego o be a tsena ka Sekgethwakgethweng sa taberenakele a swere a mangwe a madi a diphoofolo tšeo  go dirilwego dihlabelo ka tšona. Seo se ile sa dirwa le tempeleng yeo e agilwego ke Solomone, moo moperisita a bego a tlišetša Modimo madi ao. (Lef. 16:11-15) Ka mo go swanago, Jesu o ile a tsena legodimong le mohola wa madi a gagwe gomme a o nea Jehofa. (Baheb. 9:6, 7, 11-14, 24-28) Re thaba kudu gore dibe tša rena di lebaletšwe le gore matswalo a rena a hlwekišitšwe ka gobane re bontšha tumelo mading a Jesu!

14, 15. Ke ka baka la’ng go le bohlokwa gore re kwešiše molao wa Jehofa wa mabapi le madi le go o kwa?

14 Na ga bjale o kwešiša lebaka leo ka lona Jehofa a re laelago gore re se ke ra ja “mohuta le ge e le ofe wa madi”? (Lef. 17:10) Na o kwešiša lebaka leo Modimo a lebelelago madi e le a makgethwa? Modimo o lebelela madi a swana le bophelo. (Gen. 9:4) Na o a dumela gore re swanetše go amogela pono ya Modimo ka madi gomme re kwe taelo ya gagwe ya gore re a ile? Tsela feela yeo re ka bago khutšong le Modimo ke ka go bontšha tumelo sehlabelong sa Jesu sa topollo le go dumela gore madi ke a bohlokwa kudu go Mmopi wa rena.—Bakol. 1:19, 20.

15 Yo mongwe le yo mongwe wa rena a ka ikhwetša a lebeletšane le phetho ya mabapi le tšhelo ya madi. Goba ka tšhoganetšo setho sa lapa goba mogwera wa rena yo mogolo a ka lebeletšana le kgetho ya ge e ba a swanetše go tšhelwa madi goba aowa. Dinakong tše bjalo tša tlalelo, re ka swanelwa ke go dira le diphetho tša ge e ba re tla amogela dikarolwana tša madi le mekgwa e itšego ya kalafo. Ka go re’alo, go bohlokwa kudu gore re dire nyakišišo gomme re itokišeletše maemo a tšhoganetšo. Ge e ba re rapela, megato e bjalo e tla re thuša go ema re tiile le go phema go roba molao wa Jehofa wa mabapi le madi. Ruri ga re nyake go kweša Jehofa bohloko ka go amogela selo seo Lentšu la gagwe le se ganago! Ditsebi tše dintši tša kalafo le batho ba bangwe ba kgothaletša batho gore ba neele ka madi ka morero wa go phološa maphelo. Lega go le bjalo, batho ba Jehofa ba bakgethwa ba dumela gore Mmopi ke yena a nago le tshwanelo ya go laela gore madi a dirišwe bjang. Go yena, ‘madi a mohuta le ge e le ofe’ ke a makgethwa. Re swanetše go kwa ka mo go feletšego molao wa gagwe wa mabapi le madi. Ka boitshwaro bja rena bjo bokgethwa, re mmontšha gore re tloga re leboga matla ao madi a Jesu a nago le ona a go phološa maphelo, e lego madi a nnoši ao a dirago gore batho ba lebalelwe dibe le go tlo hwetša bophelo bjo bo sa felego.—Joh. 3:16.

Na o tla kwa ka mo go feletšego molao wa Jehofa wa mabapi le madi? (Bona serapa 14 le 15)

LEBAKA LEO JEHOFA A LETETŠEGO GORE RE BE BA BAKGETHWA

16. Ke ka baka la’ng batho ba Jehofa e swanetše go ba ba bakgethwa?

16 Ge Modimo a be a phološa Baisiraele bokgobeng kua Egipita o ile a ba botša gore: “Ke nna Jehofa yo a le eteletšego pele go tšwa nageng ya Egipita gore ke bontšhe gore ke nna Modimo wa lena; le be ba bakgethwa ka gobane nna ke yo mokgethwa.” (Lef. 11:45) Jehofa o be a letetše gore setšhaba sa Baisiraele e be se sekgethwa ka gobane yena ke yo mokgethwa. Ka ge re le Dihlatse tša Jehofa, le rena re swanetše go ba ba bakgethwa. Puku ya Lefitiko e re botša seo phaa.

17. O ikwa bjang gona bjale ka puku ya Beibele ya Lefitiko?

17 Ruri re hotšwe kudu ke go ahlaahla tše dingwe tša ditaba tša ka pukung ya Lefitiko. Ga go pelaelo gore thuto ye e dirile gore o tšeele godimo kudu puku ye ya Beibele yeo e buduletšwego. Le gona ga go pelaelo gore go naganišiša ka tše dingwe tša dithuto tša bohlokwa tšeo di lego ka pukung ye go dirile gore o kwešiše kutšwanyana mabaka ao re swanetšego go ba ba bakgethwa. Eupša ke dithuto dife tše dingwe tša moya tšeo re ka ithutago tšona ka lengwalong le la Beibele? Ke’ng se sengwe seo re ka ithutago sona mabapi le go direla Jehofa tirelo e kgethwa? Re tla ahlaahla dintlha tše sehlogong se se latelago.