Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2014

‘Bjale le Setšhaba sa Modimo’

‘Bjale le Setšhaba sa Modimo’

“Le kile la se be setšhaba sa Modimo, eupša bjale le setšhaba sa Gagwe.”—1 PET. 2:10.

1, 2. Ke phetogo efe yeo e diragetšego ka Pentekoste ya 33 C.E., gona ke bomang bao e ilego ya ba ditho tša setšhaba se sefsa sa Jehofa? (Bona seswantšho se se lego ka mo godimo.)

LETŠATŠI la Pentekoste ya 33 C.E. e bile le legolo kudu historing ya batho ba Jehofa mo lefaseng. Go ile gwa direga phetogo e kgolo kudu. Letšatšing leo, Jehofa o ile a diriša moya wa gagwe o mokgethwa go tswala setšhaba se sefsa—Isiraele ya moya, yona “Isiraele ya Modimo.” (Bagal. 6:16) E be e tla ba lekga la mathomo ga e sa le go tloga mehleng ya Aborahama moo batho ba Modimo ba bego ba ka se sa hlaolwa ka lebollo la nama. Go e na le moo, Paulo o ngwadile mabapi le setho se sengwe le se sengwe sa setšhaba seo se sefsa gore: “Lebollo la gagwe ke la pelo ka moya.”—Baroma 2:29.

2 Ditho tša mathomo tša setšhaba se sefsa sa Modimo e bile baapostola le barutiwa ba bangwe ba Kriste ba ka godimo ga ba lekgolo bao ba bego ba bokane gotee ka phapošing ya ka godimo kua Jerusalema. (Dit. 1:12-15) Ba ile ba amogela moya o mokgethwa, woo o ba dirilego gore e be barwa ba Modimo bao ba tloditšwego ka moya. (Baroma 8:15, 16; 2 Bakor. 1:21) Se e be e le bohlatse bja gore kgwerano e mpsha e thomile go šoma, e lego kgwerano yeo mmoelanyi wa yona e lego Kriste le yeo madi a gagwe a dirilego gore e šome. (Luka 22:20; bala Baheberu 9:15.) Ka  go re’alo, barutiwa ba ba ile ba fetoga ditho tša setšhaba se sefsa sa Jehofa, batho bao a sa tšwago go ba kgetha. Moya o mokgethwa o ile wa dira gore ba kgone go bolela ditaba tše dibotse ka maleme a fapafapanego ao a bego a bolelwa ke Bajuda le batho bao ba bego ba sokologetše tumelong ya Sejuda bao ba bego ba tlile Jerusalema ba etšwa dileteng ka moka tša Mmušo wa Roma go tlo bina Monyanya wa Dibeke wa Bajuda, goba Pentekoste. Batho ba ba ile ba kwa le go kwešiša ka maleme a gabo bona “matete a Modimo” ao a bego a bolelwa ke Bakriste bao ba tloditšwego ka moya.—Dit. 2:1-11.

SETŠHABA SE SEFSA SA MODIMO

3-5. (a) Ke’ng seo Petro a ilego a se botša Bajuda letšatšing la Pentekoste? (b) Ke megato efe e latelanago yeo e dirilego gore setšhaba se sefsa sa Jehofa se gole nywageng ya ge se be se sa tšwa go tswalwa?

3 Jehofa o ile a diriša moapostola Petro go etelela pele go bulela Bajuda le bao ba bego ba sokologetše tumelong ya Sejuda tsela ya go ba ditho tša setšhaba se seo se sa tšwago go tswalwa, e lego phuthego ya Bokriste. Ka letšatši la Pentekoste, Petro o ile a botša Bajuda ka sebete gore ba swanetše go amogela Jesu, yena yo ba mo “[kokotetšego] koteng,” ka gobane “Modimo o mo dirile Morena le Kriste.” Ge lešaba leo le be le botšiša gore le dire eng, Petro o ile a araba ka gore: “Itsholeng gomme yo mongwe le yo mongwe a kolobetšwe leineng la Jesu Kriste bakeng sa tebalelo ya dibe tša lena, ke moka le tla amogela mpho e sa lefelelwego ya moya o mokgethwa.” (Dit. 2:22, 23, 36-38) Letšatšing leo, batho ba e ka bago ba 3 000 ba ile ba tlaleletša setšhaba se sefsa sa Isiraele ya moya. (Dit. 2:41) Ka morago ga moo, go nea bohlatse ka mafolofolo ga baapostola go ile gwa tšwela pele go tšweletša dienywa tše dintši. (Dit. 6:7) Setšhaba seo se sefsa se be se gola.

4 Ka morago, ditaba tše dibotse di ile tša botšwa le Basamaria, gomme gwa ba le mafelelo a mabotse. Ba bantši ba bona ba ile ba kolobetšwa ke moebangedi Filipi, eupša ba se tšhollelwe moya o mokgethwa ka yona nako yeo. Sehlopha se bušago kua Jerusalema se ile sa romela moapostola Petro le moapostola Johane go Basamaria bao ba sokologilego, “ba ba bea diatla gomme ba amogela moya o mokgethwa.” (Dit. 8:5, 6, 14-17) Ka baka leo, Basamaria le bona ba ile ba fetoga ditho tše di tloditšwego ka moya tša Isiraele ya moya.

Petro o ile a botša Koronelio le ba lapa la gagwe ditaba tše dibotse (Bona serapa 5)

5 Ka 36 C.E., Petro o ile a dirišwa gape go bulela ba bangwe tsela ya go ba ditho tša setšhaba se sefsa sa Isiraele ya moya. Se se diragetše ge a be a nea bohlatse go tona ya madira a Roma e lego Koronelio le go metswalo ya gagwe gotee le bagwera. (Dit. 10:22, 24, 34, 35) Beibele e re: “Eitše ge Petro a sa bolela . . . , bohle [bao e sego Bajuda] bao ba kwago lentšu ba amogela moya o mokgethwa. Ke moka badumedi ba ba bolotšego bao ba bego ba tlile le Petro ba makala, gobane mpho e sa lefelelwego ya moya o mokgethwa e be e tšhollelwa le go batho ba ditšhaba.” (Dit. 10:44, 45) Ka go re’alo, ga bjale badumedi bao ba bego ba se ba bolla ba Bantle le bona e be e ka ba ditho tša setšhaba se sefsa sa Isiraele ya moya.

 “BATHO BA LEINA LA GAGWE”

6, 7. Ke ka ditsela dife ditho tša setšhaba se sefsa di bego di tla ba “batho ba leina la [Jehofa],” gona di ile tša dira seo go fihla bokgoleng bofe?

6 Sebokeng sa sehlopha se bušago sa Bakriste ba lekgolong la pele la nywaga seo se ilego sa swarwa ka 49 C.E., morutiwa Jakobo o itše: “Simeoni [Petro] o laodišitše ka botlalo kamoo Modimo ka lekga la pele a ilego a retologela ditšhabeng go amogela batho ba leina la gagwe go tšwa go tšona.” (Dit. 15:14) Batho ba bao ba bego ba sa tšwa go kgethwa bao ba bitšwago ka leina la Jehofa ba be ba tla akaretša Bajuda le badumedi bao e sego Bajuda. (Baroma 11:25, 26a) Ka morago, Petro o ile a ngwala gore: “Le kile la se be setšhaba sa Modimo, eupša bjale le setšhaba sa Gagwe.” Petro o boletše morero wa setšhaba seo ka gore: “Lena le ‘morafo wo o kgethilwego, boperisita bja bogoši, setšhaba se sekgethwa, batho ba e lego leruo le le kgethegilego, gore le bolele gohle mabothakga’ a yo a le biditšego leswiswing gomme a le biletša seetšeng sa gagwe se se makatšago.” (1 Pet. 2:9, 10) Setšhaba se se be se swanetše go tumiša Yo se mo emelago le go tumiša leina la gagwe phatlalatša. Se be se swanetše go ba dihlatse tšeo di nago le sebete tša Jehofa, yena Mmuši wa Legohle.

7 Go etša ge go be go le bjalo ka Baisiraele ba nama, ditho tša Isiraele ya moya ke tšona tšeo Jehofa a ilego a di bitša “batho bao ke ipopetšego bona e le gore ba ntumiše.” (Jes. 43:21) Bakriste bao ba lekgolong la pele la nywaga ba ile ba bolela ka sebete gore Jehofa ke yena Modimo a nnoši wa therešo e le ge ba bontšha gore medimo ka moka yeo e bego e rapelwa mehleng yeo e be e le ya maaka. (1 Bathes. 1:9) Ba ile ba nea bohlatse ka Jehofa le ka Jesu kua “Jerusalema, Judea ka moka le Samaria le go fihla karolong ya kgole ya lefase.”—Dit. 1:8; Bakol. 1:23.

8. Ke temošo efe yeo moapostola Paulo a ilego a e nea batho ba Modimo lekgolong la pele la nywaga?

8 Moapostola Paulo e be e le setho seo se nago le sebete sa “batho ba leina la [Jehofa]” ba lekgolong la pele la nywaga. Ge a be a eme pele ga boradifilosofi ba baheitene, o ile a lwela bogoši bja Jehofa ka sebete, yena “Modimo yo a dirilego lefase le dilo ka moka tše di lego go lona, ka ge yena Yo e le Morena wa legodimo le lefase.” (Dit. 17:18, 23-25) Go ya mafelelong a leeto la gagwe la boraro la boromiwa, Paulo o ile a lemoša batho ba leina la Modimo ka gore: “Ke a tseba gore ka morago ga ge ke tlogile, diphiri tše di gatelelago di tla tsena gare ga lena gomme di ka se sware mohlape ka bonolo, le gona gare ga lena ka noši go tla tsoga banna bao ba tlago go bolela dilo tše di kgopamego gore ba goge barutiwa gore ba ba šale morago.” (Dit. 20:29, 30) Bohlanogi bjo bjo go bego go boletšwe ka bjona e sa le pele bo be bo šetše bo bonagala gabotse mafelelong a lekgolo la pele la nywaga.—1 Joh. 2:18, 19.

9. Go ile gwa direga’ng ka “batho ba leina la [Jehofa]” ka morago ga lehu la baapostola?

9 Ka morago ga lehu la baapostola, bohlanogi bjoo bo ile bja gola gomme bja tšweletša dikereke tša Bojakane. Go e na le gore Bakriste ba bahlanogi ba itlhatsele e le “batho ba leina la [Jehofa],” ba ile ba ba ba ntšha leina la Modimo ka diphetolelong tša bona tše dintši tša Beibele. Ba be ba latela meetlo ya boheitene gomme ba nyatša Modimo ka dithuto tša bona tšeo di sa thewago Mangwalong, dintwa tšeo ba bego ba re ke tše kgethwa le ka boitshwaro bja bona bjo bo gobogilego. Ka go re’alo, ka nywagakgolo, Jehofa o be a na le barapedi ba botegago ba sego kae feela mo lefaseng eupša go se na sehlopha seo se rulagantšwego sa “batho ba leina la gagwe.”

GO TSWALWA LEFSA GA BATHO BA MODIMO

10, 11. (a) Ke’ng seo Jesu a ilego a se bolela e sa le pele seswantšhong sa gagwe sa korong le mefoka? (b) Seswantšho sa Jesu se ile sa phethagala bjang ka morago ga 1914, gona ka mafelelo afe?

10 Seswantšhong sa gagwe sa korong le mefoka, Jesu o boletše e sa le pele gore  bohlanogi bo be bo tla dira gore go be thata go tseba bodumedi bja therešo. O itše “ge batho ba robetše,” Diabolo o be a tla bjala mefoka tšhemong yeo Morwa wa motho a bjetšego korong go yona. Dilo tše di be di tla gola gotee go fihlela “bofelong bja tshepedišo ya dilo.” Jesu o hlalositše gore “peu e botse” e emela “barwa ba Mmušo” le gore “mefoka” ke “barwa ba yo kgopo.” Mehleng ya bofelo, Morwa wa motho o be a tla romela “babuni,” e lego barongwa gore ba tlo aroganya korong ya seswantšhetšo go mefoka. Barwa ba Mmušo ba be ba tla kgoboketšwa. (Mat. 13:24-30, 36-43) Se se phethagetše bjang, gona se kgoma bjang taba ya gore Jehofa o na le batho ba gagwe mo lefaseng?

11 “Bofelo bja tshepedišo ya dilo” bo thomile ka 1914. Ntweng yeo e thomilego ngwageng woo, Bakriste ba dikete tše sego kae bao ba tloditšwego, e lego “barwa ba Mmušo,” ba be ba le bokgobeng bja moya Babilona o Mogolo. Ka 1919, Jehofa o ile a ba lokolla, a dira gore go bonagale phapano magareng ga bona le “mefoka,” goba Bakriste ba mankekišane. O ile a kgoboketša “barwa ba Mmušo” gore e be sehlopha se se rulagantšwego, e le go phethagatša boporofeta bja Jesaya bjo bo rego: “Na naga e ka belegwa ka lešoko ka letšatši letee? Goba na setšhaba se ka belegwa ka nako e tee? Tsione e šokilwe ya ba ya belega bana ba yona.” (Jes. 66:8) Tsione, e lego mokgatlo wa Jehofa wa dibopiwa tša moya, e ile ya belega barwa ba yona ba moya gomme ya ba rulaganya gore e be setšhaba.

12. Batlotšwa ba ipontšhitše bjang e le “batho ba leina la [Jehofa]” lehono?

12 Go fo swana le Bakriste ba lekgolong la pele la nywaga, “barwa ba Mmušo” bao ba tloditšwego ba be ba swanetše go tlo ba dihlatse tša Jehofa. (Bala Jesaya 43:1, 10, 11.) Ka go re’alo, ba be ba tla fapana le batho ba bangwe ka boitshwaro bja bona bja Bokriste le ka go bolela “ditaba tše tše dibotse tša Mmušo . . . gore e be bohlatse go ditšhaba tšohle.” (Mat. 24:14; Bafil. 2:15) Ka go dira bjalo, ba thušitše batho ba dimilione gore e be bao ba lokilego pele ga Jehofa.—Bala Daniele 12:3.

 “RE TLA SEPELA LE LENA”

13, 14. Batho bao e sego ditho tša Isiraele ya moya ba swanetše go dira’ng gore ba rapele le go hlankela Jehofa ka tsela yeo a e amogelago, gona se se ile sa bolelwa bjang e sa le pele boporofeteng bja Beibele?

13 Sehlogong se se fetilego re bone gore Isiraeleng ya bogologolo batho bašele ba be ba ka rapela Jehofa ka tsela yeo a e amogelago, eupša batho bao ba be ba swanetše go dira seo ba na le batho bao Jehofa a dirilego kgwerano le bona. (1 Dikg. 8:41-43) Ka mo go swanago lehono, bao e sego ditho tša Isiraele ya moya ba swanetše go rapela gotee le batho ba Jehofa, “barwa ba Mmušo,” e lego Dihlatse tša Jehofa tše di tloditšwego.

14 Go tla ga batho ba bantši go tlo hlankela Jehofa le batho ba gagwe mehleng ye ya bofelo go ile gwa bolelwa e sa le pele ke baporofeta ba babedi ba bogologolo. Jesaya o porofetile ka gore: “Meraforafo e tlo ya go yona e re: ‘Etlang re rotogeleng thabeng ya Jehofa, ntlong ya Modimo wa Jakobo; o tla re ruta ditsela tša gagwe gomme ra sepela mebileng ya gagwe.’ Gobane molao o tlo tšwa Tsione gomme lentšu la Jehofa la tšwa Jerusalema.” (Jes. 2:2, 3) Ka mo go swanago, moporofeta Sakaria o boletše e sa le pele gore “meraforafo le ditšhaba tše matla di tla tla di tsoma Jehofa wa madira Jerusalema le go kgopela go gaugelwa ke Jehofa.” O ile a ba swantšha le “batho ba lesome bao ba tšwago bathong ba maleme ka moka” bao ka tsela ya seswantšhetšo ba tlago go itshwarelela morumong wa seaparo sa Isiraele ya moya gomme ba re: “Re tla sepela le lena ka gobane re kwele gore Modimo o na le lena.”—Sak. 8:20-23.

15. “Dinku tše dingwe” di “sepela le” Baisiraele ba moya modirong ofe?

15 “Dinku tše dingwe” di “sepela le” Baisiraele ba moya modirong wa go bolela ditaba tše dibotse tša Mmušo. (Mar. 13:10) E ba karolo ya batho ba Modimo, “mohlape o tee” le batlotšwa, ka tlase ga “modiši yo boleta” e lego Kriste Jesu.—Bala Johane 10:14-16.

ŠIRELETŠWA LE BATHO BA JEHOFA

16. Jehofa o tlo tliša bjang karolo ya mafelelo ya “masetlapelo a magolo”?

16 Ka morago ga go fedišwa ga Babilona o Mogolo, batho ba Jehofa ba tlo hlaselwa o šoro, gomme ka nako yeo re tlo hloka tšhireletšo yeo Jehofa a tlago go e nea bahlanka ba gagwe. Ka ge tlhaselo yeo e tla thoma karolo ya mafelelo ya “masetlapelo a magolo,” Jehofa ke yena a tla bego a laola dilo gomme o tla kgetha nako ya tiragalo ye. (Mat. 24:21; Hesek. 38:2-4) Nakong yeo, Gogo o tla hlasela “[batho] bao ba kgobokeditšwego go tšwa ditšhabeng,” e lego batho ba Jehofa. (Hesek. 38:10-12) Ge seo se direga, gateetee Jehofa o tla tsena ditaba gare gomme a hlakodiša batho ba gagwe ka go lwa le Gogo le lešaba la gagwe. Jehofa o tla godiša bogoši bja gagwe le go kgethagatša leina la gagwe, ka gobane o re: “Ke tla . . . itsebiša pele ga mahlo a ditšhaba tše dintši; ke moo di tlago go tseba gore ke nna Jehofa.”—Hesek. 38:18-23.

Nakong ya “masetlapelo a magolo,” re tlo swanelwa ke go dula re kgomaretše phuthego ya gabo rena (Bona dirapa 16-18)

17, 18. (a) Ge Gogo a hlasela batho ba Jehofa, ba tla hwetša ditaelo dife? (b) Re swanetše go dira’ng ge e ba re nyaka tšhireletšo ya Jehofa?

17 Ge Gogo a thoma tlhaselo ya gagwe, Jehofa o tla botša bahlanka ba gagwe gore: “Sepelang batho ba ka, le tsene diphapošing tša lena tša ka gare le tswalele mejako ya lena. Ikuteng ka nakonyana go fihla kgalefo e feta.” (Jes. 26:20) Nakong yeo ya tlalelo, Jehofa o tla re nea ditaelo tšeo di tlago go re thuša go phologa, gomme ‘diphapoši tša ka gare’ di ka ba di šupa go diphuthego tša gabo rena.

18 Ka go re’alo, ge e ba re nyaka go hwetša tšhireletšo ya Jehofa nakong ya masetlapelo a magolo, re swanetše go lemoga gore Jehofa o na le batho ba gagwe mo lefaseng, bao ba rulagantšwego ka diphuthego. Re swanetše go tšwela pele re le ngatana e tee le bona gomme re dule re kgomaretše phuthego ya gabo rena. Eka re ka bolela ka dipelo ka moka gotee le mopsalme gore: “Phološo e tšwa go Jehofa. Tšhegofatšo ya gago e go batho ba gago.”—Ps. 3:8.