Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2014

Eba le Tumelo e Tiilego Mmušong

Eba le Tumelo e Tiilego Mmušong

“Tumelo ke tebelelo e kgonthišeditšwego ya seo se holofetšwego.”—BAHEB. 11:1.

1, 2. Ke’ng seo se tlago go matlafatša kgodišego ya rena ya gore Mmušo wa Modimo o tla phethagatša morero wa gagwe ka batho, gona ka baka la’ng? (Bona seswantšho se se lego ka mo godimo.)

GANTŠI rena Dihlatse tša Jehofa re bolela gore Mmušo wa Modimo ke tharollo e nnoši ya mathata a rena ka moka, e bile re botša batho ka phišego therešo ye ya bohlokwa yeo e lego ka Mangwalong. Le gona re kgothatšwa kudu ke kholofelo yeo re e newago ke Mmušo wo. Lega go le bjalo, re kgodišegile gakaaka’ng gore Mmušo wa Modimo ke pušo ya kgonthe yeo e tlago go phethagatša morero wa yona? Re na le mabaka afe a go ba le tumelo e tiilego Mmušong wo?—Baheb. 11:1.

2 Mmušo wa Mesia o hlomilwe ke Ramatlaohle ka boyena e le gore a phethe morero wa gagwe wa mabapi le tlholo ya gagwe. Mmušo wo o theilwe motheong o tiilego, e lego tshwanelo ya Jehofa ya go buša. Dikarolo tša bohlokwa tša Mmušo wo, e lego kgoši ya wona, babušigotee le yona le bao ba tlago go ba buša, ka moka di theilwe semolao go dirišwa dikgwerano, ke gore ditumelelano goba ditokišetšo tša semolao tšeo di dirilwego ke Modimo goba Morwa wa gagwe e lego Jesu Kriste. Go naganišiša ka dikgwerano tše go tla oketša kwešišo ya rena ya gore ruri morero wa Modimo o tla phethagala e bile go tla re thuša go bona kamoo  Mmušo wo o theilwego ka go tia.—Bala Baefeso 2:12.

3. Re tlo ahlaahla’ng sehlogong se le go se se latelago?

3 Beibele e bolela ka dikgwerano tše tshelelago tša motheo tšeo di lego mabapi le Mmušo wa Mesia woo kgoši ya wona e lego Kriste Jesu. Ke (1) kgwerano ya Aborahama, (2) kgwerano ya Molao, (3) kgwerano ya Dafida, (4) kgwerano ya moperisita yo a swanago le Melekitsedeke, (5) kgwerano e mpsha le (6) kgwerano ya Mmušo. Anke re ahlaahleng kamoo kgwerano e nngwe le e nngwe e tswalanago le Mmušo e bile e thušago go phethagatša morero wa Modimo ka lefase le ka batho.—Bona tšhate yeo e rego, “ Kamoo Modimo a Tlago go Phethagatša Morero wa Gagwe.”

KHOLOFETŠO YEO E UTOLLAGO KAMOO MORERO WA MODIMO O TLAGO GO PHETHAGALA KA GONA

4. Go etša ge go boletšwe go Genesi, ke ditaelo dife tšeo Jehofa a ilego a di bolela mabapi le batho?

4 Ka morago ga gore Jehofa a lokišeletše lefase le la rena le lebotse gore le tlo dulwa ke batho, o ile a bolela ditaelo tše di latelago tše tharo mabapi le batho: Modimo o be a tla bopa batho ka seswantšho sa gagwe, batho ba be ba tla dira gore lefase ka moka e be Paradeise le go le tlatša ka batho bao ba lokilego, le gona batho ba ile ba iletšwa go ja dienywa tša sehlare sa go tseba botse le bobe. (Gen. 1:26, 28; 2:16, 17) Go be go sa nyakege dilo tše dingwe. Ka morago ga gore motho a bopše, go be go nyakega feela gore a latele tše pedi tša ditaelo tšeo di boletšwego ka mo godimo e le gore morero wa Modimo o phethagale. Bjale go tlile bjang gore go nyakege dikgwerano?

5, 6. (a) Sathane o ile a dira’ng go leka go folodiša morero wa Modimo? (b) Jehofa o ile a arabela bjang go kgang yeo Sathane a e rotošitšego kua Edene?

5 Sathane Diabolo o ile a thoma borabele e le gore a folodiše morero wa Modimo. O ile a dira seo ka go tutuetša batho gore ba se kwe taelo yeo Modimo a bego a ba neile yona. O ile a goketša mosadi wa pele e lego Efa gore a se kwe taelo ya Modimo ya gore a se je dienywa tša sehlare sa go tseba botse le bobe. (Gen. 3:1-5; Kut. 12:9) Ka go dira seo, Sathane o ile a hlohla tshwanelo ya Modimo ya go buša dibopiwa tša Gagwe. Ka morago, Sathane gape o ile a latofatša bahlanka ba botegago ba Modimo gore ba mo hlankela ka baka la boithati.—Jobo 1:9-11; 2:4, 5.

6 Jehofa o be a tla arabela bjang go kgang yeo Sathane a e rotošitšego kua Edene? Ke therešo gore ge nkabe Modimo a ile a fediša marabele ao, o be a tla ba a fedišitše le borabele bja ona. Eupša seo gape se be se tla dira gore morero wa Modimo wa gore lefase le tlale ka bana bao ba kwago ba Adama le Efa o se ke wa phethagala. Go e na le gore Mmopi yo bohlale a bolaye marabele ao ka yona nako yeo, o ile a arabela ka go bolela boporofeta bjo bo kgahlišago—e lego kholofetšo ya kua Edene—go kgonthišetša gore se sengwe le se sengwe seo a se boletšego se tla phethagala.—Bala Genesi 3:15.

7. Kholofetšo ya kua Edene e re nea kgonthišetšo efe ka noga le peu ya yona?

7 Ka kholofetšo ya kua Edene, Jehofa o ile a ahlola noga le peu ya yona tšeo di emelwago ke Sathane Diabolo le bohle bao ba bego ba tla ema le yena tabeng ya go gana gore Modimo ke yena a nago le tshwanelo ya go buša. Modimo wa therešo o ile a nea peu ya mosadi wa gagwe wa legodimong matla a go fediša Sathane. Ka go re’alo, kholofetšo ya kua Edene ga se ya gatelela feela gore mothomi wa borabele bja kua serapeng sa Edene le ditlamorago tša bjona ka moka di tla fedišwa, eupša gape e bontšha kamoo se se tlago go dirwa ka gona.

8. Re tseba’ng ka mosadi le peu ya gagwe?

8 Peu ya mosadi e be e tla ba mang? Ka ge peu yeo e tlo pšhatla hlogo ya noga, ke gore, e tlo ‘fediša’ sebopiwa sa moya e lego Sathane  Diabolo, gona e swanetše go ba e be e tlo ba motho wa moya. (Baheb. 2:14) Ka go re’alo, mosadi yo a bego a tla belega peu yeo le yena e be e tlo ba wa moya. Gaešita le ge peu ya noga yona e ile ya ata, go ile gwa feta nywaga e ka bago e 4 000 ka morago ga ge Jehofa a boletše kholofetšo ya kua Edene go sa tsebje gore mosadi le peu ya gagwe ke bomang. Nywageng yeo ka moka, Jehofa o ile a dira dikgwerano tše mmalwa tšeo di thušago bahlanka ba Gagwe go tseba peu yeo le go ba kgonthišetša gore peu yeo ke yona yeo Modimo a tlago go e diriša go fediša masetlapelo ka moka ao Sathane a a baketšego batho.

KGWERANO YEO E HLAOLAGO PEU

9. Kgwerano ya Aborahama ke’ng, gona e thomile go šoma neng?

9 Nywaga e ka bago e dikete tše pedi ka morago ga gore Jehofa a botše Sathane kotlo ya gagwe, o ile a laela mopatriareka Aborahama gore a tloge motseng wa gabo wa Uri kua Mesopotamia gomme a ye nageng ya Kanana. (Dit. 7:2, 3) Jehofa o ile a re go yena: “Tloga nageng ya geno le go metswalo ya gago le ntlong ya tatago o ye nageng yeo ke tlago go go bontšha yona; go wena ke tla ntšha setšhaba se segolo, ka go šegofatša ka ba ka dira gore leina la gago e be le legolo; wena o be tšhegofatšo. Ke tla šegofatša bao ba go šegofatšago, ka rogaka yoo a go rogago, gomme malapa ka moka a mo lefaseng a tla šegofatšwa ka wena.” (Gen. 12:1-3) Ye ke pego ya mathomo e ngwadilwego ya kgwerano ya Aborahama—e lego kgwerano yeo Jehofa Modimo a e dirilego le Aborahama. Ga go tsebje gabotse gore ke neng moo Jehofa a ilego a dira kgwerano le Aborahama ka lekga la mathomo. Lega go le bjalo, kgwerano ye e thomile go šoma ka 1943 B.C.E., ge Aborahama wa nywaga e 75 a be a tloga Harane gomme a tshela Noka ya Eforate.

10. (a) Aborahama o bontšhitše bjang gore o be a na le tumelo e tiilego dikholofetšong tša Modimo? (b) Ke ditaba dife tšeo Jehofa a ilego a di utolla ganyenyane-ganyenyane ka peu ya mosadi?

 10 Jehofa o ile a bušeletša kholofetšo ya gagwe go Aborahama ka makga a mmalwa, gomme nako e nngwe le e nngwe a oketša ka ditaba tše itšego. (Gen. 13:15-17; 17:1-8, 16) Ge Aborahama a be a bontšha gore o na le tumelo e tiilego dikholofetšong tša Modimo ka go dumela go dira sehlabelo ka morwa a nnoši wa gagwe, Jehofa o ile a tiišetša kgwerano yeo a bego a e dirile le yena ka go mo kgonthišetša gore seo a mo holofeditšego sona se tla phethagala. (Bala Genesi 22:15-18; Baheberu 11:17, 18.) Ka morago ga gore kgwerano ya Aborahama e thome go šoma, Jehofa o ile a utolla ganyenyane-ganyenyane ditaba tša bohlokwa mabapi le peu ya mosadi. Peu yeo e be e tla tšwa lelokong la Aborahama, e be e tla ata, go yona go be go tla tšwa dikgoši, e be e tla fediša manaba ka moka le gona e be e tla ba tšhegofatšo go batho ba bangwe ba bantši.

Aborahama o ile a bontšha tumelo e tiilego dikholofetšong tša Modimo (Bona serapa 10)

11, 12. Mangwalo a bontšha bjang gore kgwerano ya Aborahama e na le phethagalo e kgolo, gona seo se bolela’ng go rena?

11 Gaešita le ge kgwerano ya Aborahama e ile ya phethagala ka tsela ya kgonthe go ditlogolo tša gagwe ge di be di hwetša Naga ya Kholofetšo, Mangwalo a bontšha gore kgwerano yeo e be e tla phethagala le ka tsela ya moya. (Bagal. 4:22-25) Moapostola Paulo o ile a budulelwa go hlalosa gore phethagalong ye e kgolo, karolo ya pele ya peu ya Aborahama ke Kriste gomme karolo ya bobedi e šupa go Bakriste ba 144 000 bao ba tloditšwego ka moya. (Bagal. 3:16, 29; Kut. 5:9, 10; 14:1, 4) Mosadi yo a tšweletšago peu yeo ke “Jerusalema ya godimo,” e lego karolo ya legodimong ya mokgatlo wa Modimo, yeo e bopšago ke dibopiwa tše di botegago tša moya. (Bagal. 4:26, 31) Go etša ge kgwerano ya Aborahama e holofeditše, peu ya mosadi e tla tlišetša batho ditšhegofatšo.

12 Kgwerano ya Aborahama e bolela ka Kgoši ya Mmušo wa Modimo le babušigotee le yona, gomme kgwerano yeo ke motheo wa semolao wa Mmušo wa magodimong. (Baheb. 6:13-18) Kgwerano ye e tla šoma go fihlela neng? Genesi 17:7 e re: “Kgwerano yeo e tla ba ya go iša mehleng ya neng le neng.” E tla šoma go fihlela Mmušo wa Mesia o fediša manaba a Modimo gomme batho ka moka ba lefaseng ba šegofaditšwe. (1 Bakor. 15:23-26) Ge e le gabotse, bao ba tlago go phela mo lefaseng ba tla holega ka mo go sa felego. Kgwerano yeo Modimo a e dirilego le Aborahama e bontšha gore Jehofa o tloga a ikemišeditše go phethagatša morero wa gagwe wa gore batho ba lokilego ba “tlale lefase”!—Gen. 1:28.

KGWERANO YEO E KGONTHIŠETŠAGO GORE MMUŠO WO E TLA BA WA KA MO GO SA FELEGO

13, 14. Kgwerano ya Dafida e kgonthišetša’ng mabapi le pušo ya Mesia?

13 Kholofetšo ya kua Edene le kgwerano ya Aborahama di bontšha ntlha ya bohlokwa ya gore bogoši bja Jehofa ka Mmušo wa Mesia bo theilwe ka go tia ditekanyetšong tša Modimo tša go loka. (Ps. 89:14) Na ka letšatši le lengwe Mesia o tla buša gampe gomme gwa nyakega gore pušo ya gagwe e fedišwe? Go na le kgwerano e nngwe ya semolao yeo e kgonthišetšago gore seo se ka se tsoge se diragetše.

14 Jehofa o ile a dira kholofetšo e itšego go Kgoši Dafida wa Isiraele ya bogologolo. Kholofetšo yeo e bitšwa kgwerano ya Dafida. (Bala 2 Samuele 7:12, 16.) Jehofa o ile a dira kgwerano ye le Dafida ge a be a buša kua Jerusalema, a mo holofetša gore Mesia e tla ba setlogolo sa gagwe. (Luka 1:30-33) Ka go re’alo, Jehofa o ile a hlalosa ka mo go oketšegilego gore peu yeo e be e tla tšwa kae gomme a bolela gore mojabohwa wa Dafida o be a tla ba le “tshwanelo ya molao” ya go dula sedulong sa bogoši sa Mmušo wa Mesia. (Hesek. 21:25-27) Ka Jesu, sedulo sa bogoši sa Dafida  “se tla dula se le gona go iša mehleng ya neng le neng.” Ee, peu ya Dafida “e tla ba gona go iša mehleng ya neng le neng, le sedulo sa gagwe sa bogoši sa ba gona go etša letšatši.” (Ps. 89:34-37) Ruri Mesia a ka se tsoge a bušitše gampe, le gona mmušo wa gagwe o tla phetha dilo tšeo di tlago go dula di le gona ka mo go sa felego!

KGWERANO YEO E DIRAGO GORE GO NYAKEGE MOPERISITA

15-17. Go ya ka kgwerano ya moperisita yo a swanago le Melekitsedeke, peu ya mosadi e be e tla hlankela gape e le eng, gona ka baka la’ng?

15 Gaešita le ge kgwerano ya Aborahama le kgwerano ya Dafida di kgonthišetša gore peu ya mosadi e tla ba kgoši, seo se nnoši ga se sa lekana go tlišetša batho ba ditšhaba ka moka ditšhegofatšo. E le gore ba šegofatšwe e le ka kgonthe, ba tla swanelwa ke go lokollwa sebeng gomme ba tlišwe ka lapeng la Jehofa la legohleng. E le gore se se kgonege, go be go tla nyakega gore peu e hlankele gape e le moperisita. Mmopi yo bohlale o dirile gore se se kgonege ka go dira tokišetšo e nngwe ya semolao, e lego kgwerano ya moperisita yo a swanago le Melekitsedeke.

16 Jehofa o ile a utollela Kgoši Dafida gore O be a tla dira kgwerano yeo e nago le merero e mebedi le Jesu. Wa pele e be e le wa gore Jesu a tle a ‘dule ka letsogong le letona la Modimo’ go fihlela a fenya manaba a gagwe gomme wa bobedi a be “moperisita go iša mehleng ya neng le neng go ya ka mokgwa wa Melekitsedeke.” (Bala Psalme 110:1, 2, 4.) Ke ka baka la’ng e be e tla ba moperisita “ka mokgwa wa Melekitsedeke”? Ka gobane nako e telele pele ga ge ditlogolo tša Aborahama di ka dula Nageng ya Kholofetšo, Melekitsedeke, yo e bego e le kgoši ya Salema, o ile a hlankela e le “moperisita wa Modimo Yo Godimodimo.” (Baheb. 7:1-3) O be a kgethilwe ke Jehofa ka go lebanya gore a dire seo. Ke yena feela yo go bolelwago ka yena ka Mangwalong a Seheberu yoo a ilego a hlankela e le kgoši e bile e le moperisita. Go feta moo, ka ge go se na pego ya motho yo a hlanketšego maemong a ka bobedi pele ga gagwe goba yo a ilego a mo hlatlama, a ka bitšwa “moperisita [wa] ka mehla le mehla,” goba wa ka mo go sa felego.

17 Jesu o kgethilwe ka go lebanya gore e be moperisita ka kgwerano ye yeo Jehofa a e dirilego le yena, le gona o tla dula e le “moperisita ka mo go sa felego ka mokgwa wa Melekitsedeke.” (Baheb. 5:4-6) Se se bontšha gabotse gore Jehofa o itlamile semolao gore o tla diriša Mmušo wa Mesia go phethagatša morero wa gagwe wa mathomong mabapi le batho mo lefaseng.

MMUŠO WO O THEILWE DIKGWERANONG TŠA SEMOLAO

18, 19. (a) Dikgwerano tšeo re di ahlaahlilego go fihla ga bjale di bontšha’ng ka Mmušo? (b) Ke potšišo efe yeo re tlago go e ahlaahla sehlogong se se latelago?

18 Ge re lebelela dikgwerano tšeo re di ahlaahlilego, re kgona go bona kamoo di tswalanago ka gona le Mmušo wa Mesia le kamoo Mmušo wo o theilwego ka go tia ditumelelanong tša semolao. Kholofetšo ya kua Edene e tlama Jehofa gore a phethagatše morero wa gagwe ka lefase le batho a diriša peu ya mosadi. Peu yeo e be e tla ba mang, gona e be e tla hlankela e le eng? Kgwerano ya Aborahama e re nea dikarabo.

19 Kgwerano ya Dafida e bontšha moo yoo e bego e tla ba karolo ya pele ya peu a bego a tla tšwa gona e bile e mo nea tshwanelo ya go buša lefase e le gore dilo tšeo di tlago go phethwa ke Mmušo wo e be tša ka mo go sa felego. Kgwerano ya moperisita yo a swanago le Melekitsedeke e kgonthišetša gore peu yeo e tla hlankela e le moperisita. Lega go le bjalo, Jesu o tla be a se noši go thuša batho gore ba boele ba phethagale. Go na le ba bangwe bao le bona ba tloleditšwego go tlo hlankela e le dikgoši le baperisita. Ba be ba tla tšwa kae? Re tla ahlaahla seo sehlogong se se latelago.