Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2014

Tšeela Godimo Tokelo ya Gago ya go Šoma Gotee le Jehofa!

Tšeela Godimo Tokelo ya Gago ya go Šoma Gotee le Jehofa!

“Re bašomigotee le Modimo.”—1 BAKOR. 3:9.

1. Jehofa o ikwa bjang ka mošomo, gona seo se mo tutueletša go dira’ng?

JEHOFA ke mošomi yo a thabelago seo a se dirago. (Ps. 135:6; Joh. 5:17) E le gore Jehofa a nee dibopiwa tša gagwe sebaka sa go latswa lethabo le kgotsofalo tšeo di tlišwago ke go dira dilo tše itšego, o di neile mošomo wo o thabišago le wo o kgotsofatšago. Ka mohlala, o ile a šoma gotee le Morwa wa gagwe wa leitšibulo ge a be a bopa dilo. (Bala Bakolose 1:15, 16.) Beibele e re pele ga ge Jesu a ka tla mo lefaseng, o be a le hleng ga Modimo kua legodimong e “le mošomi yo a nago le bokgoni.”—Die. 8:30.

2. Ke’ng seo se bontšhago gore ke kgale dibopiwa tša moya di dira mešomo ya bohlokwa le e thabišago?

2 Go tloga mathomong a yona go fihla mafelelong, Beibele e na le mehlala yeo e bontšhago gore Jehofa o be a dutše a nea barwa ba gagwe ba moya mešomo. Ka morago ga gore Adama le Efa ba dire sebe le go rakwa legaeng la bona la Paradeise, Modimo o ile a “bea [ka bohlabela bja serapa sa Edene] bakerubi le tšhoša ya bogale bjo bo tukago yeo e bego e dikologa e sa kgaotše gore e diše tsela e yago sehlareng sa bophelo.” (Gen. 3:24) Le gona Kutollo 22:6 e bontšha gore Jehofa o ile a “[roma] morongwa wa gagwe go tlo bontšha bahlanka ba gagwe dilo tše di swanetšego go direga kgauswinyane.”

 GO THWE’NG KA BATHO?

3. Jesu o ile a ekiša Tatagwe bjang ge a be a le mo lefaseng?

3 Ge Jesu a be a le mo lefaseng e le motho yo a phethagetšego, o ile a thabela go dira mošomo woo Jehofa a bego a mo neile wona. Le gona Jesu o ile a ekiša Tatagwe ka go nea barutiwa ba gagwe mošomo wa bohlokwa. E le gore ba fagahlele seo ba bego ba ka se dira, o ile a re go bona: “Ruriruri ke re go lena: Yo a dumelago go nna, le yena o tla dira mediro ye ke e dirago; o tla dira mediro e fetago ye, gobane ke a tloga ke ya go Tate.” (Joh. 14:12) E le gore Jesu a gatelele go akgofa ga modiro woo, o ile a hlalosa gore: “Re swanetše go dira mediro ya yo a nthomilego ge e sa le mosegare; bošego bo a tla bjoo ka bjona motho a ka se dirego selo.”—Joh. 9:4.

4-6. (a) Ke ka baka la’ng re leboga gore Noa le Moshe ba ile ba phetha mešomo yeo Jehofa a bego a ba neile yona? (b) Mešomo ka moka yeo Modimo a re neago yona e swana ka eng?

4 Gaešita le pele ga ge Jesu a ka tla lefaseng, Modimo o be a nea batho mešomo e kgotsofatšago. Le ge Adama le Efa ba ile ba palelwa ke go phetha mošomo wo ba bego ba o neilwe, ba bangwe ba ile ba phetha mešomo yeo Modimo a bego a ba neile yona. (Gen. 1:28) Noa o ile a newa ditaelo tše di lebanyago tša kamoo a bego a swanetše go aga areka gore a phološe maphelo Meetsefuleng. O ile a dira tšohle tšeo Jehofa a mo laetšego tšona. Ka baka la go tšeela ga gagwe dilo godimo, ke mo lehono re a phela!—Gen. 6:14-16, 22; 2 Pet. 2:5.

5 Moshe o ile a newa ditaelo tše di lebanyago tša go aga taberenakele le go rulaganya baperisita gomme a di latela ka botlalo. (Ek. 39:32; 40:12-16) Gaešita le lehono re sa holwa ke go phetha ga gagwe kabelo yeo ka potego. Bjang? Moapostola Paulo o hlalositše gore dibopego tšeo tša Molaong wa Moshe di be di swantšhetša ‘dilo tše dibotse tšeo di bego di sa tla.’—Baheb. 9:1-5, 9; 10:1.

6 Mešomo yeo Modimo a e neago bahlanka ba gagwe e fapana go ya ka mehla e le gore e sepedišane le morero wa gagwe wo o phethagalago ganyenyane-ganyenyane. Lega go le bjalo, mešomo ka moka yeo ba bego ba e newa e be e dutše e tagafatša Jehofa le go hola batho bao ba dumelago go yena. Seo se bjalo kudukudu dilong tšeo Jesu a ilego a di dira pele a etla lefaseng le ka morago ge a be a le mo lefaseng. (Joh. 4:34; 17:4) Ka mo go swanago, mešomo yeo re e newago lehono e tagafatša Jehofa. (Mat. 5:16; bala 1 Bakorinthe 15:58.) Ke ka baka la’ng re re’alo?

GO DULA RE NA LE PONO E BOTSE KA MOŠOMO

7, 8. (a) Hlalosa mešomo yeo Bakriste lehono ba nago le tokelo ya go e dira. (b) Re swanetše go arabela bjang tlhahlong ya Jehofa?

7 Ka ntle le pelaelo o a dumela gore go a makatša gore Jehofa o neile batho bao ba sa phethagalago tokelo ya go ba bašomigotee le yena. (1 Bakor. 3:9) Bao ba agago Diholo tša Kopano, Diholo tša Mmušo le meago ya makala ba kgatha tema medirong ya kgonthe ya go aga, go etša ge Noa le Moshe ba dirile. Go sa šetšwe gore o thuša go mpshafatša Holo ya Mmušo ya lefelong la geno goba go aga ntlokgolo ya rena kua Warwick, New York, tšeela godimo tokelo yeo ya go hlankela Modimo ka tsela ye. (Bona seswantšho seo se lego mathomong a sehlogo.) Ke tirelo e kgethwa. Eupša sa bohlokwahlokwa, Bakriste ba laetšwe go kgatha tema mošomong wa go aga wa moya. Morero wa mošomo woo le wona ke go tagafatša Jehofa le go hola batho bao ba kwago. (Dit. 13:47-49) Mokgatlo wa Modimo o re nea ditaelo tše di lebanyago tša kamoo re ka phethago mošomo woo ka bokgwari. Ka dinako tše dingwe, se se ka bolela go newa dikabelo tše difsa.

8 Ga e sa le go tloga kgale bahlanka ba botegago ba Jehofa ba ikokobeletša tlhahlo ya gagwe ka pelo ka moka. (Bala Baheberu 13:7, 17.) Mathomong re ka fo se kwešiše gabotse lebaka leo go thwego re phethe kabelo e  itšego ka tsela e itšego. Lega go le bjalo, re tseba gabotse gore re tla holega ge e ba re latela diphetogo le ge e le dife tšeo Jehofa a bonago di nyakega.

9. Bagolo ba beela phuthego mohlala ofe ka mošomo?

9 Kganyogo e matla ya go nyaka go dira thato ya Jehofa e bonwa tseleng yeo bagolo ba etelelago pele diphuthego. (2 Bakor. 1:24; 1 Bathes. 5:12, 13) Ba ithaopela go šoma ka thata le go dula ba sepedišana le diphetogo tše di diregago. Ba latela ka pelo ka moka mekgwa e mefsa ya kamoo mošomo wa rena wa go bolela ka Mmušo wa Modimo wo o bušago legodimong o swanetšego go phethwa ka gona. Gaešita le ge ba bangwe mathomong ba ka ba ba ile ba dikadika go rulaganya modiro wa go nea bohlatse ka mogala, maemakepeng goba mafelong a batho bohle, go se go ye kae ba ile ba bona mehola ya go dira seo. Ka mohlala, babulamadibogo ba bangwe ba bane kua Jeremane ba ile ba phetha ka gore ba šome tšhemo ya mafelong a kgwebo yeo e bego e se sa šongwa. Michael o re: “Go be go fetile nywaga e mmalwa re se sa šoma tšhemo yeo, ka gona re be re tšhogile. Jehofa o swanetše go ba a be a tseba gore re tšhogile, ka gona a dira gore re ipshine ka tšhemo mesong yeo. Re ile ra thabišwa kudu ke gore re latetše tlhahlo yeo re e neilwego ka go Tirelo ya Rena ya Mmušo le go ithekga ka Jehofa!” Na le wena o fagahlela go diriša mekgwa e mefsa ya go nea bohlatse tikologong ya geno?

10. Mokgatlo o dirile diphetogo dife morago bjale?

10 Ka dinako tše dingwe go dirwa diphetogo ka mokgatlong. Nywageng ya morago bjale, diofisi tše dintši tša makala di kopantšwe le tše dingwe. Gaešita le ge diphetogo tše bjalo di nyaka gore bana babo rena le dikgaetšedi bao ba šomago makaleng ao ba dire diphetogo, go se go ye kae ba feleletša ba bona mehola ya diphetogo tšeo. (Mmo. 7:8) Ruri bao ba swanelwago ke go dira diphetogo tše bjalo ba thabišwa kudu ke gore ba kgatha tema go thekgeng mokgatlo wa Jehofa wo o tšwelago pele!

11-13. Ke ditlhohlo dife tšeo ba bangwe ba ilego ba lebeletšana le tšona ka baka la diphetogo tšeo di dirwago ka mokgatlong?

11 Re ka ithuta dithuto tša bohlokwa kudu go bao ba ilego ba kgongwa ka go lebanya ge makala a be a kopanywa. Ba bangwe ba be ba hlanketše makaleng a gabo bona ka nywaga e mentši. Banyalani bao ba hlanketšego legaeng le lenyenyane la Bethele kua Amerika Bogare ba ile ba kgopelwa go yo šoma legaeng la Bethele kua Mexico leo e bego e le le legolo go feta la bona ka makga a e ka bago a 30. Rogelio o re: “Go be go se bonolo go tlogela ba lapa le bagwera.” Juan, e lego ngwanabo rena yo le yena a ilego a kgopelwa go hudugela Mexico o re: “Go bjalo ka ge eka o tswalwa lefsa; o swanetše go thoma bophelo bjo bofsa. O swanetše go tlwaelana le setšo se sefsa le tsela ya batho ba moo ya go nagana.”

12 Ditho tša malapa a Bethele dinageng tše dingwe tša Yuropa tšeo di ilego tša kgopelwa go hudugela ofising ya lekala ya Jeremane le tšona di ile tša kopana le ditlhohlo. Bao gare ga rena ba ipshinago ka go bogela dithaba ba tla dumela gore go bile thata go bao ba ilego ba swanelwa ke go huduga Switzerland moo go tletšego dithaba tše dibotsana. Le gona bao ba hudugilego Austria, mathomong ba ile ba hlologela bophelo bja moo bjo e sego bja leemaema.

13 Go bao ba hudugelago nageng e nngwe, seo se be se e ra gore ba swanetše go tlwaela bophelo bjo bofsa, go šoma le bana babo rena le dikgaetšedi bao ba thomago go ba bona, gomme mohlomongwe le go ithuta mošomo o mofsa. E bile seo se be se e ra gore ba swanetše go tlwaela ditho tša phuthego e mpsha le tšhemo, mohlomongwe le go ithuta leleme le lefsa. Go dira diphetogo tše go ka ba thata. Lega go le bjalo, ditho tše dintši tša Bethele di amogetše dikabelo tšeo. Ka baka la’ng?

14, 15. (a) Ba bantši ba bontšhitše bjang gore ba tšeela godimo tokelo ya go šoma le Jehofa kabelong le ge e le efe? (b) Ba re beetše mohlala tabeng efe?

 14 Grethel o re: “Ke ile ka amogela kabelo yeo go bontšha Jehofa gore ga ke mo rate ge feela ke le nageng ya gešo, ke mo hlankela moagong o itšego goba ka gobane ke neilwe mošomo o itšego.” Dayska o re: “Ka morago ga go lemoga gore kabelo yeo e tšwa go Jehofa, ke ile ka e amogela ka lethabo.” André le Gabriela ba dumelelana le seo ka gore: “Re ile ra bona se e le sebaka se sengwe sa go hlankela Jehofa ka go se etiše pele dilo tšeo re di ratago. Re ile ra ipotša gore: ‘Ge Jehofa a dira diphetogo, go bohlokwa kudu go di latela go e na le go ngangabala.’”

Tokelo ya rena e kgolokgolo ke go dira mošomo wa Jehofa!

15 Ka baka la ge makala a kopanywa le a mangwe, ditho tše dingwe tša Bethele di kgopelwa go hlankela e le babulamadibogo. Seo se ile sa diragalela ditho tše mmalwa tša Bethele ge lekala la Denmark, Norway le la Sweden a be a kopanywa gotee gomme a bopa ofisi ya lekala ya Scandinavia. Banyalani ba bangwe e lego Florian le Anja, ba itše: “Re lebelela kabelo ya rena e mpsha e le phetogo e kgahlišago. Rena re thabela go dirišwa ke Jehofa go sa šetšwe gore re hlankela kae. Re ka bolela go tšwa pelong gore re šegofaditšwe kudu!” Gaešita le ge ba bantši ba rena go ka fo se nyakege gore re dire diphetogo tše bjalo, na e ka se be mo gobotse gore re ekiše boikgafo bja bana babo rena ba le dikgaetšedi ka go etiša pele dikgahlego tša Mmušo? (Jes. 6:8) Ka mehla Jehofa o šegofatša bao ba tšeelago godimo tokelo ya bona ya go šoma le yena, go sa šetšwe gore ba mo hlankela kae.

TŠWELA PELE O THABELA TOKELO YA GAGO YA GO ŠOMA GOTEE LE JEHOFA!

16. (a) Bagalatia 6:4 e re re dire’ng? (b) Ke tokelo efe e kgolokgolo yeo motho le ge e le ofe a ka bago le yona?

16 Rena batho ba sa phethagalago re rata go ipapetša le batho ba bangwe, eupša Lentšu la Modimo le re re tshwenyege feela ka seo rena re ka kgonago go se dira. (Bala Bagalatia 6:4.) Ba bantši ba rena ga re na ditokelo tše itšego ka mokgatlong. Le gona ga go kgonege gore ka moka ga rena re be babulamadibogo, baromiwa goba go hlankela Bethele. Ke therešo gore tše ke ditokelo tše dibotse  kudu! Eupša ga se ra swanela go lebala gore tokelo e kgolokgolo yeo motho le ge e le ofe a ka bago le yona ke yeo ka moka ga rena re nago le yona. Ke ya go šoma gotee le Jehofa bodireding bja Bokriste. Ye ke tokelo yeo ka moka ga rena re swanetšego go e tšeela godimo kudu!

17. Ke therešo efe yeo re ka se e ganetšego ge feela re sa phela lefaseng la Sathane, eupša ke ka baka la’ng seo se sa swanela go re nyamiša?

17 Ge feela re sa phela lefaseng le la Sathane, go na le dilo tšeo re ka se kgonego go di dira tirelong ya Jehofa. Re ka šitišwa ke boikarabelo bja go hlokomela lapa, bolwetši goba maemo a mangwe. Eupša seo ga se sa swanela go re nyamiša. Le ka mohla o se ke wa nyatša tema yeo o e kgathago go šomeng gotee le Modimo ka go nea bohlatse ka leina la gagwe le go botša ba bangwe ka Mmušo wa gagwe ge sebaka se bulega. Sa bohlokwa kudu ke gore o šoma gotee le yena ka mo o ka kgonago le gore o rapelela gore a šegofatše bana beno bao ba kgonago go dira mo gontši go go feta. Gopola gore motho yo mongwe le yo mongwe yo a tumišago leina la Jehofa ke wa bohlokwa go yena!

18. Ke’ng seo re swanetšego go ikemišetša go se gafa, gona ka baka la‘ng?

18 Go sa šetšwe mafokodi a rena le go se phethagale, Jehofa o thabela go šoma gotee le rena. Ruri re tšeela godimo tokelo ya go šoma gotee le Modimo wa rena mehleng ye ya bofelo! Ka go re’alo, re swanetše go ikemišetša go gafa dilo tše dintši tšeo re di ratago, re tseba gore Jehofa lefaseng la gagwe le lefsa o tla re nea ‘bophelo bja kgonthe,’ e lego bophelo bjo bo sa felego maemong a thabišago le a khutšo.—1 Tim. 6:18, 19.

Na o tšeela godimo tokelo ya gago ya go hlankela Jehofa? (Bona dirapa 16-18)

19. Jehofa o re holofeditše’ng?

19 Ka ge re le kgauswi le go tsena lefaseng le lefsa, nagana ka seo Moshe a ilego a se botša Baisiraele pejana ga ge ba ka tsena Nageng ya Kholofetšo. O itše: “Jehofa Modimo wa lena o tla le atlegiša medirong yohle ya diatla tša lena.” (Doit. 30:9) Ge ntwa ya Haramagedone e fedile, bao ba bego ba dutše ba šoma gotee le Modimo ba tla tšea naga yeo a ba holofeditšego yona. Ka morago ga moo, re tlo thoma go swarega ka mošomo o mofsa—mošomo wa go dira lefase gore e be paradeise e botse!