Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2014

Le tla ba “Mmušo wa Baperisita”

Le tla ba “Mmušo wa Baperisita”

“Le tla ba mmušo wa baperisita le setšhaba se sekgethwa.”—EK. 19:6.

1, 2. Peu ya mosadi e be e hloka tšhireletšo efe, gona ka baka la’ng?

BOPOROFETA bja mathomo bjo bo begilwego ka Beibeleng ke bja bohlokwa kudu go phethagaleng ga morero wa Jehofa. Ge Modimo wa therešo a be a dira kholofetšo ya kua Edene, o itše: “Ke tla tsoša bonaba magareng ga gago [Sathane] le mosadi le magareng ga peu ya gago le peu ya gagwe.” Bonaba bjo e be e tla ba bjo bogolo gakaaka’ng? Jehofa o itše: “E [peu ya mosadi] tla go pšhatla hlogo [ya Sathane] gomme wena wa e loma serethe.” (Gen. 3:15) Bonaba bja magareng ga noga le mosadi e be e tla ba bjo bogolo kudu moo Sathane a bego a tla dira selo se sengwe le se sengwe gore a fediše peu ya mosadi.

2 Ga go makatše ge mopsalme a ile a rapela Modimo mabapi le batho ba Gagwe bao a ba kgethilego gore: “Bona kamoo manaba a gago a tsošitšego mpherefere ka gona; bao ba go hloilego o šoro ba tsošitše dihlogo. Ba ithera ka sephiring ka bomenetša gore ba lwe le batho ba gago; ba logela ba utamego ba gago maanomabe. Ba itše: ‘Etlang re ba fediše gore e se hlwe e eba setšhaba.’” (Ps. 83:2-4) Leloko leo peu ya mosadi e bego e tla tšwa go lona le be le swanetše go šireletšwa gore le se ke la fedišwa le go šilafatšwa. E le gore a fihlelele seo, Jehofa o ile a dira ditokišetšo  tše dingwe tša semolao tšeo di bego di tla thuša gore morero wa gagwe o phethagale.

KGWERANO YEO E ŠIRELETŠAGO PEU

3, 4. (a) Kgwerano ya Molao e ile ya thoma go šoma neng, gona setšhaba sa Isiraele se ile sa dumela go dira’ng? (b) Kgwerano ya Molao e be hlametšwe go thibela eng?

3 Ge ditlogolo tša Aborahama, Isaka le Jakobo di ata gomme e eba tše dimilione, Jehofa o ile a di dira setšhaba—setšhaba sa Isiraele ya bogologolo. A diriša Moshe, Jehofa o ile a dira kgwerano ya moswananoši le setšhaba se sa Isiraele ka go se nea Molao, gomme sa dumelelana le ditaba ka moka tša mabapi le kgwerano yeo. Beibele e re: “[Moshe] a tšea puku ya kgwerano a e balela setšhaba se mo file ditsebe. Sona sa re: ‘Tšohle tšeo Jehofa a di boletšego re ikemišeditše go di dira gomme ra di kwa.’ Ka gona Moshe a tšea madi ale [a dipoo tša dihlabelo] a ka meruswing a foketša setšhaba ka ona gomme a re: ‘A ke madi a kgwerano yeo Jehofa a e dirilego le lena ka go dumelelana le mantšu ka moka a le sa tšwago go a kwa.’”—Ek. 24:3-8.

4 Kgwerano ya Molao e thomile go šoma Thabeng ya Sinai ka 1513 B.C.E. Ka kgwerano yeo, Modimo o ile a kgetha setšhaba sa Isiraele ya bogologolo gore e be setšhaba sa gagwe se se kgethegilego. Ga bjale Jehofa e be e le ‘Moahlodi wa sona, Moneimolao wa sona le Kgoši ya sona.’ (Jes. 33:22) Histori ya Baisiraele e bontšha seo se diregago ge batho ba latela ditekanyetšo tša Modimo tša go loka goba ba sa di latele. Ka ge Molao o be o thibela Baisiraele go nyala goba go nyalwa ke baheitene le go tšea karolo borapeding bja maaka, o be o hlametšwe go thibela leloko la Aborahama gore le se šilafatšwe.—Ek. 20:4-6; 34:12-16.

5. (a) Kgwerano ya Molao e ile ya bulela Baisiraele sebaka sefe? (b) Ke ka baka la’ng Modimo a ile a se sa amogela Baisiraele?

5 Le gona kgwerano ya Molao e dirile gore go be le baperisita bao ba bego ba swantšhetša baperisita ba nakong e tlago. (Baheb. 7:11; 10:1) Ge e le gabotse, ka yona kgwerano yeo, Baisiraele ba be ba na le sebaka sa moswananoši le tokelo ya go ba “mmušo wa baperisita” ge feela ba be ba ka kwa melao ya Jehofa. (Bala Ekisodo 19:5, 6.) Lega go le bjalo, Baisiraele ba ile ba se kwe. Go e na le gore ba thabele go fihla ga Mesia, yena karolo ya pele ya peu ya Aborahama, ba ile ba mo gana. Ka baka leo, Modimo o ile a se sa ba amogela.

Go se kwe ga Baisiraele go be go sa bolele gore kgwerano ya Molao e paletšwe (Bona dirapa 3-6)

6. Molao o fihleletše eng?

6 Go palelwa ga Baisiraele ke go dula ba botegela Jehofa le go tšweletša bohle bao ba bego ba tla bopa mmušo wa baperisita go be go sa re gore Molao o be o paletšwe. Molao woo o be o tla šireletša peu le go lebiša batho go Mesia. Ge Kriste a tlile gomme a tsebja, Molao woo o be o tla ba o phethile tema ya wona. Beibele e re: “Molao o fedile ka Kriste.” (Baroma 10:4) Lega go le bjalo, re  ka ipotšiša gore: Ke bomang bao ba bego ba tla hwetša sebaka sa go ba mmušo wa baperisita? Jehofa Modimo o ile a dira kgwerano e nngwe gore a bope setšhaba se sefsa.

MODIMO O KGETHA SETŠHABA SE SEFSA

7. Ke’ng seo Jehofa a ilego a se bolela e sa le pele ka kgwerano e mpsha a diriša Jeremia?

7 Nako e telele pele kgwerano ya Molao e ka fedišwa, Jehofa o ile a bolela e sa le pele a diriša moporofeta Jeremia gore o tla dira “kgwerano e mpsha” le setšhaba sa Isiraele. (Bala Jeremia 31:31-33.) Kgwerano yeo e be e ka se swane le kgwerano ya Molao ka gore yona e be e tla dira gore batho ba lebalelwe dibe ntle le gore ba dire dihlabelo ka diphoofolo. E be e tla dira seo bjang?

8, 9. (a) Madi a Jesu a tšholotšwego a kgatha tema efe? (b) Bao ba lego kgweranong e mpsha ba ile ba bulegelwa ke sebaka sefe? (Bona seswantšho seo se lego mathomong a sehlogo.)

8 Nywagakgolo ka morago, Jesu o ile a thea Selalelo sa Morena ka Nisani 14, 33 C.E. Ge a be a bolela ka senwelo sa beine, o ile a botša baapostola ba gagwe ba 11 bao ba botegago gore: “Senwelo se se bolela kgwerano e mpsha ka baka la madi a ka ao a tlago go tšhollelwa lena.” (Luka 22:20) Pego ya Mateo e tsopola Jesu a bolela mabapi le beine gore: “Se se bolela ‘madi a ka a kgwerano e mpsha,’ ao a tlago go tšhollwa bakeng sa ba bantši e le gore ba lebalelwe dibe.”—Mat. 26:27, 28.

9 Madi a Jesu a tšholotšwego a dira gore kgwerano e mpsha e šome. Le gona madi ao a dira gore batho ba lebalelwe dibe gatee ya ba moka. Jesu ga se karolo ya kgwerano e mpsha. Ka ge a se na sebe, ga a hloke go lebalelwa dibe. Eupša Modimo o be a ka diriša mohola wa madi a Jesu ao a tšholotšwego go hola ditlogolwana tša Adama. Le gona o be a ka amogela batho ba itšego bao ba ineetšego go yena gore e be “barwa” ba gagwe ka go ba tlotša ka moya o mokgethwa. (Bala Baroma 8:14-17.) Ka ge Modimo a tla ba lebelela ba se na sebe, ge e le gabotse ba be ba tla swana le Jesu, Morwa wa Modimo yo a se nago sebe. Batlotšwa ba e tla ba “bajabohwagotee le Kriste” gomme ba hwetša sebaka sa go ba “mmušo wa baperisita.” Ye ke tokelo yeo e ka bago e hweditšwe ke setšhaba sa Isiraele ka tlase ga Molao. Moapostola Petro o boletše mabapi le “bajabohwagotee le Kriste” gore: “Lena le ‘morafo wo o kgethilwego, boperisita bja bogoši, setšhaba se sekgethwa, batho ba e lego leruo le le kgethegilego, gore le bolele gohle mabothakga’ a yo a le biditšego leswiswing gomme a le biletša seetšeng sa gagwe se se makatšago.” (1 Pet. 2:9) Ruri kgwerano e mpsha e bohlokwa! E dira gore barutiwa ba Jesu e be karolo ya bobedi ya peu ya Aborahama.

KGWERANO E MPSHA E THOMA GO ŠOMA

10. Kgwerano e mpsha e thomile go šoma neng, gona ke ka baka la’ng e ile ya se thome go šoma pele ga moo?

10 Kgwerano e mpsha e thomile go šoma neng? Ga se ya thoma go šoma ge Jesu a be a bolela ka yona bošegong bja gagwe bja mafelelo mo lefaseng. E le gore e kgone go šoma, madi a Jesu a be a swanetše go tšhollwa gomme a iše mohola wa ona go Jehofa legodimong. Go feta moo, moya o mokgethwa o be o swanetše go tšhollelwa go bao e bego e tla ba “bajabohwagotee le Kriste.” Ka baka leo, kgwerano e mpsha e thomile go šoma ka Pentekoste ya 33 C.E. ge barutiwa ba Jesu ba botegago ba be ba tlotšwa ka moya o mokgethwa.

11. Kgwerano e mpsha e dirile bjang gore go kgonege gore Bajuda le Bantle e be karolo ya Isiraele ya moya, gona ke ba bakae bao ba tla bago kgweranong e mpsha?

11 Gaešita le ge go ka thwe kgwerano ya Molao e ile ya ‘felelwa ke nako’ ge Jehofa a be a tsebiša ka Jeremia gore O tla dira kgwerano e mpsha le Baisiraele, e ile ya tšwela pele e šoma go fihlela kgwerano e mpsha e  thoma go šoma. (Baheb. 8:13) Ge seo se be se tlo direga, Modimo o be a tlo lebelela Bajuda le badumedi ba Bantle ba sa bollago ka tsela e swanago, ka ge ‘lebollo la bona e tla ba e le la pelo ka moya, e sego ka molao o ngwadilwego.’ (Baroma 2:29) Ka go dira kgwerano e mpsha le bona, Modimo o be a tla tsenya melao ya gagwe “menaganong ya bona gomme [a] e ngwala dipelong tša bona.” (Baheb. 8:10) Bao ba bego ba tla ba kgweranong e mpsha e be e tla ba ba 144 000, gomme ba bopa setšhaba se sefsa—“Isiraele ya Modimo”—yona Isiraele ya moya.—Bagal. 6:16; Kut. 14:1, 4.

12. Kgwerano ya Molao e swana bjang le kgwerano e mpsha?

12 Kgwerano ya Molao le kgwerano e mpsha di swana ka’ng? Kgwerano ya Molao e be e le magareng ga Jehofa le Isiraele ya tlhago; kgwerano e mpsha e magareng ga Jehofa le Isiraele ya moya. Moshe e be e le mmoelanyi wa kgwerano ya kgale; Jesu ke Mmoelanyi wa kgwerano e mpsha. Kgwerano ya Molao e ile ya dirwa gore e šome ka madi a phoofolo; kgwerano e mpsha e ile ya dirwa gore e šome ka madi a tšholotšwego a Jesu. Le gona setšhaba sa Isiraele se be se eteletšwe pele ke Moshe ka tlase ga kgwerano ya Molao; bao ba lego kgweranong e mpsha ba eteletšwe pele ke Jesu—yena Hlogo ya phuthego.—Baef. 1:22.

13, 14. (a) Kgwerano e mpsha e tswalana bjang le Mmušo? (b) Go nyakega’ng gore ditho tša Isiraele ya moya di kgone go buša le Kriste legodimong?

13 Kgwerano e mpsha e tswalana le Mmušo ka gore e tšweletša setšhaba se sekgethwa seo se nago le tokelo ya go ba dikgoši le baperisita Mmušong woo wa legodimong. Setšhaba seo se bopa karolo ya bobedi ya peu ya Aborahama. (Bagal. 3:29) Ka go re’alo, kgwerano e mpsha e tiišetša kgwerano ya Aborahama.

14 Go sa na le sebopego se sengwe sa Mmušo wo seo se swanetšego go phethwa. Kgwerano e mpsha e tšweletša Isiraele ya moya le go nea motheo wa gore ditho tša yona e be “bajabohwagotee le Kriste.” Lega go le bjalo, go nyakega kgwerano e tlamago ya semolao e le gore ditho tšeo di kgone go buša le Jesu Mmušong wa gagwe e le dikgoši le baperisita legodimong.

KGWERANO YEO E DIRAGO GORE BA BANGWE BA KGONE GO BUŠA LE KRISTE

15. Jesu o dirile kgwerano efe le baapostola ba gagwe ba botegago?

15 Ka morago ga gore Jesu a thee Selalelo sa Morena, o ile a dira kgwerano le barutiwa ba gagwe ba botegago, yeo gantši e bitšwago kgwerano ya Mmušo. (Bala Luka 22:28-30.) Ka go se swane le dikgwerano tše dingwe tšeo go tšona Jehofa a akaretšwago, ye ke kgwerano yeo Jesu a e dirilego le balatedi ba gagwe ba tloditšwego. Ge Jesu a be a re, “go etša ge Tate a dirile kgwerano le nna,” go bonagala a be a šupa go kgwerano yeo Jehofa a e dirilego le yena ya gore e be “moperisita ka mo go sa felego ka mokgwa wa Melekitsedeke.”—Baheb. 5:5, 6.

16. Kgwerano ya Mmušo e dira gore Bakriste ba tloditšwego ba tle ba kgone go dira’ng?

16 Baapostola ba 11 ba botegago ba be ba ‘swareletše le Jesu melekong ya gagwe.’ Kgwerano ya Mmušo e ile ya ba kgonthišetša gore ba be ba tla ba le yena legodimong gomme ba dula didulong tša bogoši gore ba buše e le dikgoši le go hlankela e le baperisita. Lega go le bjalo, ga se baapostola ba 11 feela bao ba bego ba tla hwetša tokelo yeo. Jesu yo a tagafaditšwego o ile a iponagatša go moapostola Johane ponong gomme a re: “Yo a fenyago ke tla mo dumelela go dula le nna sedulong sa ka sa bogoši, go etša ge le nna ke fentše gomme ka dula le Tate sedulong sa gagwe sa bogoši.” (Kut. 3:21) Ka go re’alo, kgwerano ya Mmušo e dirilwe le Bakriste ba tloditšwego ba 144 000. (Kut. 5:9,  10; 7:4) Ye ke kgwerano ya semolao ya gore ba tle ba buše le Jesu legodimong. Se se swana le monyadiwa yo a tšwago ka lapeng la maemo a godimo yo a ka nyalwago ke kgoši gomme a buša gotee le yona. Ge e le gabotse, Mangwalo a bolela ka Bakriste ba tloditšwego e le “monyadiwa” wa Kriste, “kgarebe e sekilego” yeo e holofeditšwego lenyalo ke Kriste.—Kut. 19:7, 8; 21:9; 2 Bakor. 11:2.

EBA LE TUMELO E TIILEGO MMUŠONG WA MODIMO

17, 18. (a) Hlalosa dikgwerano tše tshelelago tšeo re di ahlaahlilego tšeo di tswalanago le Mmušo. (b) Ke ka baka la’ng re ka ba le tumelo e tiilego Mmušong wa Modimo?

17 Dikgwerano ka moka tšeo re di ahlaahlilego dihlogong tše tše pedi di tswalana le dikarolo tša bohlokwa tša Mmušo wa Modimo. (Bona tšhate yeo e rego, “Kamoo Modimo a Tlago go Phethagatša Morero wa Gagwe” yeo e lego sehlogong se se fetilego.) Ntlha ye e gatelela gore Mmušo wo o theilwe ka go tia ditumelelanong tša semolao. Ka go re’alo re na le lebaka le le kwagalago la go bota Mmušo wa Mesia ka mo go feletšego e le sedirišwa seo Modimo a se dirišago go phethagatša morero wa gagwe wa mathomong ka lefase le batho.—Kut. 11:15.

Jehofa o tla diriša Mmušo wa Mesia go phethagatša morero wa gagwe ka lefase (Bona dirapa 15-18)

18 Na go na le lebaka la go belaela gore seo Mmušo wo o se phethago se tla tlišetša batho ditšhegofatšo tša ka mo go sa felego? Ka gona, re ka bolela ka kgodišego gore Mmušo wa Modimo ke tharollo e nnoši ya sa ruri ya mathata ka moka a batho. Anke re botšeng ba bangwe therešo yeo ka mafolofolo!—Mat. 24:14.