Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  October 2014

Ba Ile ba Ikgafa ka go Rata—Kua Taiwan

Ba Ile ba Ikgafa ka go Rata—Kua Taiwan

CHOONG KEON le Julie, e lego banyalani bao ga bjale ba lego nywageng ya magareng ga bo-30, ba thomile go hlankela e le babulamadibogo ba ka mehla kua Sydney, Australia, mo e ka bago nywaga e mehlano e fetilego. Choong Keon o re: “Re be re šoma mošomo wa nakwana wa boiphedišo gomme re phela bophelo bja manobonobo. Moo re bego re dula gona boemo bja leratadima e be e le bjo bo kgahlišago gomme le bophelo bo le bose. Re be re thabela go phela kgauswi le meloko le bagwera.” Go sa šetšwe seo, Choong Keon le Julie ba be ba sa iketla. Ka baka la’ng? Ba be ba tseba gore maemo a bona a be a ba dumelela go dira mo go oketšegilego tirelong ya Jehofa, eupša ba dikadika go dira diphetogo.

Ke moka, kopanong ya selete ya 2009, ba ile ba kwa polelo yeo e ilego ya ba kgoma kudu. Seboledi se ile sa bolela kudu ka bao ba bego ba ka katološa bodiredi bja bona. Se itše: “Anke le nagane ka mohlala wo: Mootledi a ka laola koloi ya gagwe gore e ye ka go le letshadi goba ka go le letona ge feela koloi yeo e sepela. Ka mo go swanago, Jesu a ka re hlahla gore re katološe bodiredi bja rena, eupša o dira seo ge feela re gata mogato—ge e ba re dira maiteko a magolo a go fihlelela pakane ya rena.” * Banyalani ba ba ile ba ikwa eka seboledi se bolela le bona ka go lebanya. Kopanong yona ye, go ile gwa boledišanwa le banyalani ba baromiwa bao ba hlankelago kua Taiwan. Ba ile ba bolela ka lethabo leo ba le hwetšago bodireding gomme ba gatelela gore go be go sa nyakega thušo e kgolo. Le lekgeng le, Choong Keon le Julie ba ile ba kwa eka mantšu ao a lebišitšwe go bona.

Julie o re: “Ka morago ga kopano yeo, re ile ra rapela Jehofa gore a re nee sebete sa gore re hudugele Taiwan.” O oketša ka gore: “Eupša re be re tšhogile, re dikadika go hudugela nageng e šele.” Lengwalo leo le ilego la ba thuša go dira phetho ke Mmoledi 11:4, yeo e rego: “Yo a šeditšego phefo a ka se bjale peu; yo a lebeletšego maru a ka se bune.” Choong Keon o re: “Re ile ra dira phetho ya gore re tlogele go ‘šetša phefo  le go lebelela maru’ gomme re thome go ‘bjala le go buna.’” Ba ile ba rapela ka mo go tseneletšego ka taba yeo, ba bala diphihlelo tša baromiwa, ba ngwalelana di e-mail le bao ba šetšego ba hudugetše Taiwan, ba rekiša dikoloi tša bona le dithoto, ke moka ba hudugela Taiwan ka morago ga dikgwedi tše tharo.

GO HWETŠA LETHABO LA GO DIRA BOBOLEDI

Bana babo rena le dikgaetšedi ba ka godimo ga ba 100 bao ba tšwago dinageng dišele ga bjale ba hlankela mafelong ao go nyakegago bagoeledi ba oketšegilego ba Mmušo kua Taiwan. Ba tšwa Australia, Brithania, Canada, Fora, Japane, Korea, Sepania le United States, gomme ke ba nywaga ya magareng ga e 21 le e 73. Gare ga bona go na le dikgaetšedi tše di sa nyalwago tša ka godimo ga tše 50. Ke’ng seo se thušitšego bana babo rena ba le dikgaetšedi bao ba fišegago go dira boboledi nageng e šele? Anke re kweng.

Laura

Laura, e lego kgaetšedi yo a sa nyalwago yo a tšwago Canada, o hlankela e le mmulamadibogo ka bodikela bja Taiwan. Eupša o thomile go rata go ya tšhemong nywageng e ka bago e lesome e fetilego. Laura o re: “Ke be ke sa thabele bodiredi ka ge ke be ke sa tšee karolo ka botlalo go bjona.” Ke moka bagwera ba gagwe ba kua Canada ba ile ba mo kgopela gore a ye le bona Mexico go yo dira boboledi moo kgwedi ka moka. Laura o oketša ka gore: “Leo e be e le lekga la mathomo ke tšea karolo ka botlalo bodireding gomme ka makala ke bo thabela!”

Phihlelo yeo e thabišago e ile ya kgothaletša Laura go naganišiša ka go hudugela phuthegong ya leleme lešele kua Canada. O ile a ingwadiša klaseng ya go ithuta se-China, a hlankela sehlopheng sa se-China, gomme a ipeela pakane ya go hudugela Taiwan, ke moka a fihlelela pakane yeo ka September 2008. Laura o re: “Go ntšere mo e ka bago ngwaga gore ke ikwe ke le gae, eupša ga bjale ga ke lore go boela Canada.” O ikwa bjang ka modiro wa boboledi? O re: “Ga bjale ke tloga ke o thabela. Ga go na seo se nkgotsofatšago go feta go bona barutwana ba Beibele ba fetoša maphelo a bona ge ba dutše ba tseba Jehofa. Go hlankela Taiwan go nneile sebaka sa go latswa lethabo leo le legolo ka makga a mantši.”

 GO LEBELETŠANA LE GO SE TSEBE LELEME GABOTSE

Brian le Michelle

Brian le Michelle, e lego banyalani bao ba lego nywageng ya magareng ga bo-30 bao ba tšwago United States ba ile ba hudugela Taiwan mo e ka bago nywaga e seswai e fetilego. Mathomong ba be ba nagana gore ga ba dire mo go lekanego bodireding. Eupša moromiwa yo a nago le phihlelo o ile a ba botša gore: “Le ge le ka nea motho pampišana feela, le swanetše go gopola gore mohlomongwe ke la mathomo motho yoo a ekwa ka Jehofa. Ka gona le se ke la nagana gore ga le dire mo go lekanego!” Kgothatšo yeo e ile ya thuša Brian le Michelle kudu gore ba se ke ba lahlela toulo. Ngwanabo rena yo mongwe o ile a ba botša gore: “E le gore le se ke la nyama, le se ke la hlahloba tšwelopele ya lena ya go ithuta se-China letšatši le letšatši, eupša le e hlahlobe nako e nngwe le e nngwe ge le etšwa kopanong.” Ba ile ba dira sona seo gomme lehono ke babulamadibogo ba atlegago.

Ke’ng seo se ka go kgothaletšago gore o ithute leleme lešele? Leka go etela naga yeo o ka ratago go hlankela go yona. Eya dibokeng tša moo, gwerana le bana babo rena le dikgaetšedi ba moo gomme o sepele le bona modirong wa boboledi. Brian o re: “Ka morago ga gore o lemoge gore batho ba bantši ba arabela gabotse molaetšeng wa Mmušo le go bona lerato le borutho la bana babo rena le dikgaetšedi, o tla tutueletšega go hlankela nageng e šele.”

GO THWE’NG KA MOŠOMO WA BOIPHEDIŠO?

Kristin le Michelle

Babulamadibogo ba bantši bao ba hlankelago moo go nyakegago bagoeledi ba oketšegilego ba Mmušo kua Taiwan ba iphediša ka go ruta Seisemane. Kristin le Michelle ba rekiša dihlapi. Kristin o re: “E be e le la mathomo ke dira seo, eupša mošomo wo o nthuša gore ke dule nageng ye.” Ge nako e dutše e eya, Kristin o ile a hwetša batho bao ba mo rekelago ka mehla. Mošomo wo wa nakwana o mo thuša gore a kgone go hlokomela yena le mosadi wa gagwe, e bile o ba nea nako e lekanego ya go phetha modiro wo ba o tletšego nageng yeo, e lego wa bobulamadibogo, modiro wa go rea batho.

“IPSHINE KA TIRELO”

William le Jennifer, e lego banyalani bao ba tšwago United States, ba fihlile Taiwan nywageng e ka bago e šupa e fetilego. William o re: “Ka dinako tše dingwe ke be ke lapa ka ge ke be ke swanetše go ithuta leleme le lefsa, ka mo ke le mmulamadibogo, ke hlokomela phuthego e bile ke hlokomela lapa.” Ke’ng seo se ba thušitšego gore ba atlege le go dula ba thabile? Ba ile ba ipeela dipakane tšeo ba ka kgonago go di fihlelela. Ka mohlala, ge ba be ba ithuta se-China ga se ba ka ba nyaka go se tseba ka ponyo ya leihlo, ka go re’alo ga se ba ka ba nyama kudu ge go be go bonagala eka ga ba sware dilo ka pela.

William le Jennifer

William o re o gopola molebeledi yo mongwe wa mosepedi a mmotša gore: “Ipshine ka tirelo.” Ka morago ga go ipeela pakane ya moya, re swanetše go thabela megato yeo re e tšeago go re thuša go e fihlelela. William o re go diriša keletšo yeo go thušitše yena le mosadi wa gagwe go fetofetoga le maemo, go theetša keletšo ya bana babo rena ba lefelong leo bao ba nago le boikarabelo le go fetoša tsela yeo ba bego ba dira dilo ka yona e le gore ba kgone go atlega bodireding nageng yeo. O oketša ka gore: “Keletšo yeo e ile ya re thuša le gore re thabele botse bja sehlakahlakeng seo re bego re hlankela go sona.”

Go swana le William le Jennifer, Megan, e lego kgaetšedi wa mmulamadibogo yo a sa nyalwago yo a tšwago United States, o ipshina ka tirelo ge a dutše a katanela go fihlelela pakane ya gagwe ya go bolela se-China gabotse. Mafelobekeng a mangwe le a mangwe o šoma gotee le sehlopha sa bagoeledi bao ba dirago boboledi tšhemong yeo e kgahlišago—boemakepeng bja Kaohsiung, e lego boemakepe bjo bogologolo bja Taiwan. Megan o ile a kgona go bolela ditaba tše dibotse dikepeng tše dintši gomme a bolela le barei ba dihlapi bao ba tšwago Bangladesh, India, Indonesia, Philippines, Thailand le Vanuatu. Megan o re: “Ka ge barei ba dihlapi ba sa dule nako e telele moo boemakepeng, re ba swarela thuto ya Beibele di tloga fase. Gore ke  kgone go ba fihlelela ka moka, gantši ke ithuta le ba bane goba ba bahlano ka nako e tee.” Se-China sa gagwe se bjang? O re: “Ke duma eka nka ithuta sona ka pela, eupša ga ke lebale seo ngwanabo rena yo mongwe a ilego a mpotša sona ge a be a re: ‘A re direng sohle seo re ka se kgonago, gomme Jehofa o tla re thuša go phetha bodiredi bja rena.’”

Megan

NYAKIŠIŠA KA LEFELO LEO O NYAKAGO GO HLANKELA GO LONA

Pele ga ge Cathy, yo a tšwago Brithania a ka hudugela nageng e šele, o ile a dira nyakišišo ka naga e bolokegilego yeo kgaetšedi yo a sa nyalwago a ka hlankelago go yona. O ile a rapela Jehofa ka taba yeo gomme a ngwalela diofisi tša makala tše mmalwa, a botšiša ka dikotsi tšeo di ka welago dikgaetšedi tšeo di sa nyalwago. Ka morago ga moo, o ile a naganišiša ka dikarabo tša mangwalo a gagwe gomme a kgetha Taiwan.

Ka 2004, ge Cathy a be a na le nywaga e 31, o ile a hudugela Taiwan, moo a phelago bophelo bjo bonolo. O re: “Ke ile ka botšiša bana babo rena le dikgaetšedi ba moo ka mafelo a makaone ao nka rekago dienywa le merogo ka theko ya tlase. Keletšo ya bona e botse e nthušitše go seketša tšhelete.” Ke’ng seo se mo thušago go phela bophelo bjo bonolo? Cathy o re: “Gantši ke rapela Jehofa gore a nthuše go kgotsofalela dijo tše bonolo tšeo ke di jago gotee le diaparo tše di hlomphegago tšeo ke nago le tšona. Ke bona gore Jehofa o araba dithapelo tša ka ka go nthuša gore ke tsebe dilo tšeo ke di hlokago le go nthuša gore ke kgotsofale gaešita le ge ke se na dilo ka moka tšeo ke di nyakago.” O oketša ka gore: “Ke thabela go phela bophelo bjo bonolo ka gobane seo se nthuša gore ke tsepamiše monagano wa ka dilong tša moya.”

Cathy

Lega go le bjalo, Cathy ga a phele bophelo bjo bonolo feela eupša gape o a bo thabela. O hlalosa lebaka la seo ka gore: “Ke dira boboledi lefelong leo batho ba bantši ba arabelago gabotse ditabeng tše dibotse. Seo se a nthabiša e le ruri!” Ge a be a fihla Taiwan, motseng woo a thomilego go hlankela e le mmulamadibogo go wona go be go na le diphuthego tše pedi feela tša se-China, eupša lehono go na le diphuthego tše šupa. Cathy o re: “Ruri go bona ka mahlo koketšego yeo e makatšago le go tšea karolo modirong wa puno go dira gore letšatši le letšatši ke thabe!”

‘BA BE BA TLOGA BA NTLHOKA!’

Choong Keon le Julie bao go boletšwego ka bona mathomong a sehlogo se ba tšwela pele bjang tirelong ya bona? Mathomong Choong Keon o be a ikwa eka go se tsebe se-China gabotse go mo dira gore a hloke mohola ka phuthegong. Eupša bana babo rena ba moo ba be ba sa mo lebelele ka tsela yeo. Choong Keon o re: “Ge phuthego ya rena e be e arolwa go ba diphuthego tše pedi, ke ile ka newa boikarabelo bjo bo oketšegilego ka ge ke be ke le mohlanka wa bodiredi. Ka nako yeo, ke ile ka ikwa gore ke hlankela moo go nago le tlhokagalo e kgolo.” Choong Keon o bolela a myemyela gore: “Tlhokagalo yeo e be e le e kgolo kudu moo ba bego ba tloga ba ntlhoka!” Lehono, o hlankela e le mogolo. Julie o oketša ka gore: “Re kgotsofetše e bile re hweditše lethabo leo re sa kago ra ba le lona. Morero wa rena wa go tla mo e be e le go tlo thuša, eupša gona bjale go holegile rena. Ruri re leboga Jehofa ge a re dumeletše go hlankela mo!”

Dinageng tše dintši, go sa dutše go nyakega bašomi ba oketšegilego punong ye ya moya. Na o kgauswi le go fetša sekolo gomme o ipotšiša ka seo o tlago go se dira ka bophelo bja gago? Na ga se wa nyala goba go nyalwa gomme o kganyoga go dirišwa ka mo go oketšegilego ke mokgatlo wa Jehofa? Na o ka rata gore lapa la gago le be le dinako tše di kgahlišago tirelong ya Jehofa? Na o rotše modiro, gomme o na le phihlelo ya bohlokwa ya bophelo ka moka yeo o ka e abelanago le ba bangwe? O tla šegofatšwa kudu ge o ka phetha ka go katološa bodiredi bja gago ka go hlankela moo go nyakegago bagoeledi ba oketšegilego ba Mmušo.

^ ser. 3 Bala puku ya “Go Nea Bohlatse bjo bo Tletšego” ka Mmušo wa Modimo, kgaolo 16, dirapa 5-6.