Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2014

 Phihlelo

Dilo Tšeo ke di Thabetšego Tirelong ya Jehofa

Dilo Tšeo ke di Thabetšego Tirelong ya Jehofa

Ka 1947, baruti ba Khatolika kua Santa Ana, El Salvador, ba ile ba leka go lwantšha Dihlatse. Ge bana babo rena ba be ba swere Thuto ya Morokami ya beke le beke, bašemanyana ba bangwe ba ile ba foša maswika a magolo mojakong wo o bego o bulegile legaeng la baromiwa. Ke moka go ile gwa tšwelela lešaba leo le bego le eteletšwe pele ke baruti. Ba bangwe lešabeng leo ba be ba swere dithotšhi; ba bangwe ba swere medingwana. Ba ile ba fetša diiri tše pedi ba foša legae la baromiwa ka maswika gomme ba goeletša ka gore: “Phela ka mo go sa felego Kgarebe Maria!” le gore, “Anke Jehofa a hwe!” Morero wa bona e be e le go tšhošetša baromiwa gore ba tloge motseng woo. Ke be ke le yo mongwe wa baromiwa bao, gomme ke be ke le gona sebokeng seo nywageng e 67 e fetilego. *

NYWAGA e mebedi pele ga tiragalo yeo e hlalositšwego ka mo godimo, nna le moromiwagotee le nna e lego Evelyn Trabert re be re le dialoga tša klase ya bone Sekolong sa Beibele sa Watchtower sa Gilead, seo ka nako yeo se bego se le kgauswi le Ithaca, New York. Re be re abetšwe go hlankela kua Santa Ana. Eupša pele ke le anegela phihlelo ya ka ya nywaga e ka bago e 29 ke le tirelong ya boromiwa, e re ke le botšeng seo se dirilego gore ke tsenele modiro wo.

BOHWA BJA KA BJA MOYA

Ka 1923, e lego ngwaga wo ke belegwego ka wona, batswadi ba ka e lego John le Eva Olson ba be ba dula kua Spokane, Washington, U.S.A. E be e le Malutere eupša ba sa dumele thuto ya kereke yeo ya gore go na le mollo wa dihele, ka gobane ba be ba sa nagane gore Modimo yo lerato a ka dira lefelo la mohuta woo. (1 Joh. 4:8) Tate o be a šoma lepakeng, gomme bošegong bjo bongwe mošomigotee le yena o ile a mo kgonthišetša gore Beibele ga e rute gore batho ba a tlaišwa diheleng. Go se go ye kae batswadi ba ka ba ile ba thoma go ithuta Beibele le Dihlatse tša Jehofa gomme ba ithuta seo ge e le gabotse Beibele e se rutago ka motho ge a hwile.

Ke be ke na le nywaga e senyane feela, eupša ke gopola ke ekwa batswadi ba ka ba bolela ka mafolofolo ka therešo ya Beibele yeo ba bego ba sa tšwa go e hwetša. Ba ile ba ba mafolofolo le go feta ge ba be ba ithuta gore leina la Modimo wa therešo ke Jehofa, gomme  ba bona gore thuto e gakantšhago ya Boraro Botee ke maaka. Ke ile ka thoma go monya dithuto tšeo tša bohlokwa tša Mangwalo go etša sepontšhe, ka ithuta ‘therešo yeo e lokollago batho.’ (Joh. 8:32) Ka baka leo, ga sa nka ka nagana gore thuto ya Beibele e a tšwafiša, go e na le moo ka mehla ke be ke ipshina ka go hlahloba Lentšu la Modimo. Le ge ke be ke na le dihlong, ke be ke eya le batswadi ba ka bodireding. Ba ile ba kolobetšwa ka 1934. Ka 1939, ke ile ka kolobetšwa ke na le nywaga e 16 gore ke be mohlanka wa Jehofa.

Ke na le tate le mma kopanong ya kua St. Louis, Missouri ka 1941

Ka July 1940, batswadi ba ka ba ile ba rekiša ntlo ya bona, gomme boraro bja rena ra tsenela tirelo ya bobulamadibogo kua Coeur d’Alene, Idaho. Re be re hirile ntlo yeo e bego e agilwe ka godimo ga karatšhe. Le gona re be re bile re swarela diboka ntlong yeo. Ka nako yeo, ke diphuthego tše sego kae feela tšeo di bego di na le Diholo tša Mmušo, ka gona tše dingwe di be di kopanela magaeng a bana babo rena goba dintlong tše di hirilwego.

Ka 1941, nna le batswadi ba ka re ile ra ya kopanong kua St. Louis, Missouri. Letšatši la mafelelo la kopano yeo le ile la bitšwa “Letšatši la Bana,” gomme bana ba nywaga ya magareng ga e 5 le e 18 ba ile ba dula ka pele ga sethala. Ge Ngwanabo rena Joseph F. Rutherford a be a le kgauswi le go phetha polelo ya gagwe, o ile a bolela le rena bana a re: “Lena bana . . . ka moka . . . bao le dumetšego go kwa Modimo le Kgoši yeo a e kgethilego, hle emelelang!” Ka moka ga rena re ile ra emelela. Ke moka Ngwanabo rena Rutherford o ile a re: “Bonang, dihlatse tše mpsha tša Mmušo tša ka godimo ga tše 15 000!” Mantšu ao a ile a dira gore le ka mohla ke se lore ka go tlogela bobulamadibogo.

DIKABELO TŠA LAPA LA GEŠO

Dikgwedi tše sego kae ka morago ga kopano ya kua St. Louis, lapa la gešo le ile la hudugela ka borwa bja California. Ge re le moo, motseng wa Oxnard, kabelo ya rena e be e le go thoma phuthego e mpsha. Re be re dula ka kharabaneng e nyenyane yeo e bego e na le mpete o tee feela. Bošegong bjo bongwe le bjo bongwe, malao a ka a be a swanetše go lokišetšwa godimo ga tafola ya go jela—ruri maemo a be a sa hlwe a swana le ge ke be ke sa na le phapoši ya ka ya go robala!

Pejana ga ge re ka fihla California, Japane e ile ya hlasela Boemakepe bja Pearl kua Hawaii, ka December 7, 1941. Letšatšing le le latelago, United States e ile ya tsena Ntweng ya Bobedi ya Lefase. Balaodi ba mmušo ba ile ba laela gore metse e dule e le leswiswi, ka gona re ile ra swanelwa ke go tima mabone ka moka bošego. Dikepe tša Japane tša ntwa di be di sepelasepela lebopong la California, ka gona go tima mabone go be go tla thuša gore mašole a Japane a se kgone go bona metse yeo a ka e thuntšhago.

Ka morago ga dikgwedi tše itšego, ka September 1942, re ile ra ya kopanong ya sehlogo se se rego, Lefase le Lefsa ka Tlase ga Pušo ya Modimo, kua Cleveland, Ohio. Kopanong yeo re ile ra theetša Ngwanabo rena Nathan H. Knorr a nea polelo ya sehlogo se se rego, “Khutšo—Na e ka ba Gona ka mo go sa Felego?” O ile a ahlaahla Kutollo kgaolo 17 yeo e hlalosago “sebata” seo se bego “se le gona, eupša ga se sa le gona, fela se tla tloga se rotoga sekoting.” (Kut. 17:8, 11) Ngwanabo rena Knorr o ile a hlalosa gore “sebata” seo ke Kgwerano ya Ditšhaba yeo e ilego ya kgaotša go šoma ka 1939. Beibele e boletše e sa le pele gore Kgwerano ya Ditšhaba e be e tla tšeelwa legato, gomme seo sa dira gore lefaseng go be le khutšo ka nakwana. Seo se ile sa phethagala ka 1945 ge Ntwa ya Bobedi ya Lefase e be e fela. Ka morago ga moo, “sebata” se se ile sa rotoga gape e le Ditšhaba tše Kopanego. Ke moka Dihlatse tša Jehofa di ile tša katološa modiro wa tšona wa boboledi lefaseng ka bophara, gomme go bile le koketšego e kgolo kudu ga e sa le go tloga nakong yeo!

Diploma ya ka ya Gilead

Boporofeta bjoo bo ile bja mpontšha seo se bego se sa tlo direga. Ge go be go tsebišwa gore ngwageng o latelago go tlo thoma go ba le Sekolo sa Gilead, ke ile  ka nyaka go ba moromiwa. Ka 1943, ke ile ka kgopelwa go yo ba mmulamadibogo kua Portland, Oregon. Mehleng yeo, re be re diriša dikeramafomo go bapalela beng ba dintlo dipolelo mejakong ya dintlo tša bona, ka morago ga moo re ba nea dikgatišo tše di theilwego Beibeleng tša mabapi le Mmušo wa Modimo. Ngwageng woo ka moka, ke ile ka dula ke nagana ka tirelo ya boromiwa.

Ka 1944, ke ile ka thaba kudu ge nna le mogwera wa ka Evelyn Trabert re be re hwetša taletšo ya gore re tle Sekolong sa Gilead. Bahlahli ba rena ba ile ba re ruta ka dikgwedi tše hlano kamoo re ka thabišwago ke go ithuta Beibele. Re ile ra kgahlwa kudu ke boikokobetšo bja bona. Ka dinako tša go ja, bana babo rena bao ba be ba fela ba šoma go re tlišetša dijo ditafoleng. Re ile ra aloga ka January 22, 1945.

KABELO YA BOROMIWA

Nna le Evelyn gotee le Leo le Esther ba ga Mahan, re ile ra fihla kabelong ya rena kua El Salvador ka June 1946. Re ile ra hwetša mašemo a moo “a šweufaletše go bunwa.” (Joh. 4:35) Tiragalo yeo e hlalositšwego mathomong a phihlelo ye e bontšha kamoo baruti ba bego ba galefile ka gona. Beke feela pele ga tiragalo yeo, re be re sa tšwa go swara kopano ya mathomo ya tikologo kua Santa Ana. Re be re laleditše batho ba bantšintši polelong ya phatlalatša gomme ra thaba kudu go bona go tlile batho ba e ka bago ba 500. Go e na le gore re tšhabe motseng woo, re ile ra ikemišetša le go feta go dula moo le go thuša batho ba dipelo tše dibotse. Gaešita le ge baruti ba be ba laetše batho gore ba se bale Beibele e bile e le ba sego kae feela bao ba bego ba na le tšona, ba bantši ba be ba nyoretšwe therešo. Ba ile ba kgahlwa kudu ke gore re leka go ithuta Sepanishi e le feela gore re tle re ba rute ka Modimo wa therešo e lego Jehofa le ka dikholofetšo tša gagwe tše di kgahlišago tša lefase la Paradeise.

Ka morago ga go aloga Gilead, ba bahlano ba rena re ile ra romelwa El Salvador. Go tloga ka go le letshadi go ya ka go le letona: Evelyn Trabert, Millie Brashier, Esther Mahan, nna le Leo Mahan

Yo mongwe wa barutwana ba ka ba mathomo e be e le Rosa Ascencio. Ka morago ga gore a thome go ithuta Beibele le rena, o ile a arogana le monna yo a bego a dula le yena. Ke moka monna yoo le yena o ile a thoma go ithuta Beibele. Ba ile ba nyalana, ka morago ba kolobetšwa gomme ya ba Dihlatse tša Jehofa tše mafolofolo. Rosa e bile mmulamadibogo wa pele wa kua Santa Ana. *

Rosa o be a na le lebenkele le lenyenyane la go rekiša korosari. Ge a eya tšhemong, o be a le tswalela gomme a bota gore Jehofa o tla mo hlokomela. Ge a boa tšhemong gomme a bula lebenkele la gagwe ka morago ga diiri tše sego kae, bareki ba be ba etla ka bontši. O ile a bona ka mahlo go rereša ga Mateo 6:33 gomme a dula a botega go fihlela a ehwa.

Lebakeng le lengwe, moruti wa lefelong leo o ile a ya go monna yo a bego a hirišeditše rena baromiwa ba tshelelago ntlo ya gagwe gomme a mo laela gore ge a ka re dumelela go tšwela pele re dula moo, yena le mosadi wa gagwe ba tla rakwa motseng woo. Mong wa ntlo yeo, yo e bego e le rakgwebo wa go hlomphega, o be a šetše a tennwe ke boitshwaro bja baruti gomme a se tšhoge. O ile a ba a botša moruti yoo gore le ge a ka mo raka kerekeng a ka thaba. Mong yoo wa ntlo o ile a re botša gore re ka dula ntlong yeo go fihlela ge rena re nyaka go tloga.

 MOAGI YO A HLOMPHEGAGO O FETOGA HLATSE

Ofisi ya lekala yeo e agilwego ka 1955

Motsengmošate wa El Salvador, e lego San Salvador, moromiwa yo mongwe o be a ithuta Beibele le mosadi wa moentšeneare yo a bitšwago Baltasar Perla. Monna yoo wa go loka o ile a kgaotša go dumela go Modimo ka morago ga go bona boikaketši bja baruti. Ge go be go fihlile nako ya gore go agwe ofisi ya lekala, Baltasar, yoo gaešita le ge ka nako yeo e be e se Hlatse, o ile a ithaopela go re thalela polane ya moago woo le go o aga mahala.

Ka morago ga go šoma le batho ba Jehofa ge go be go agiwa, Baltasar o ile a kgodišega gore o hweditše bodumedi bja therešo. O ile a kolobetšwa ka July 22, 1955, gomme go se go ye kae ka moragonyana ga moo mosadi wa gagwe e lego Paulina le yena a kolobetšwa. Bana ba bona ka bobedi le bona ba hlankela Jehofa ka potego. Morwa wa gagwe e lego Baltasar, yo Monyenyane, o hlanketše Bethele ya Brooklyn nywaga e 49, moo a thekgago modiro wa boboledi woo o tšwelago pele o gola gomme ga bjale ke setho sa Komiti ya Lekala la United States. *

Ge re be re sa thoma go swara dikopano tša selete kua San Salvador, Ngwanabo rena Perla o be a re thuša go hwetša tumelelo ya go diriša lefelo le legolo la go itšhidulla. Mathomong re be re diriša ditulo tše sego kae feela; eupša ka tšhegofatšo ya Jehofa re ile ra tšwela pele re oketšega ngwaga le ngwaga go fihlela re tlatša holo yeo gaešita le go e tlatša wa go falala! Ditiragalong tšeo tše di thabišago, ke ile ka kgona go bona bao ke bego ke ithuta le bona Beibele. Nagana kamoo ke ilego ka thaba ka gona ge ba be ba mpontšha barutwana ba bona ba Beibele bao ba sa tšwago go kolobetšwa!

Ngwanabo rena F. W. Franz a boledišana le baromiwa kopanong ya selete

Kopanong e nngwe, ngwanabo rena yo mongwe o ile a tla go nna gomme a re o nyaka go mpotša selo se itšego. Ke be ke sa mo tsebe gomme ke fela pelo ya go kwa gore o ntshwaretše dife. O ile a re: “Ke nna yo mongwe wa bašemanyana bale ba ilego ba le foša ka maswika kua Santa Ana.” Gona bjale o be a fetogile gomme a hlankela Jehofa gotee le nna! Pelo ya ka e ile ya tlala lethabo. Poledišano yeo e ile ya nkgodiša gore tirelo ya nako e tletšego ke mošomo wo o e phalago ka moka woo motho a ka o kgethago.

Kopano ya mathomo ya tikologo yeo re bilego go yona kua El Salvador

DIKGETHO TŠE DIBOTSE

Ke bile moromiwa mo e ka bago ka nywaga e 29 kua El Salvador, la mathomo ke hlanketše motseng wa  Santa Ana, ka tla ka ya Sonsonate, ka morago ka ya Santa Tecla gomme mafelelong ka ya San Salvador. Ka 1975, ka morago ga go naganišiša le go rapela ka mo go tseneletšego, ke ile ka dira phetho ya go kgaotša tirelo ya boromiwa gomme ka boela Spokane. Batswadi ba ka ba botegago le bao ba tšofetšego ba be ba hloka thušo ya ka.

Ka morago ga lehu la tate ka 1979, ke ile ka hlokomela mma, yoo a ilego a gwahlafala ganyenyane-ganyenyane go fihlela a se sa kgona go dira selo. O ile a phela nywaga e seswai a le boemong bjoo gomme a hwa a na le nywaga e 94. Nakong yeo e thata, ke ile ka lapa mmeleng le maikwelong. Kgateletšego yeo e ilego ya ntshwara e ile ya mpakela bolwetši bjo bohloko bja lepanta (shingles). Eupša ka thapelo le ka thušo ya Jehofa e lerato, ke ile ka kgona go kgotlelela teko yeo. Go bile bjalo ka ge Jehofa a holofeditše gore: ‘Gaešita le bohlogoputsweng ke tla go rwala, ka go thekga gomme ka go hlakodiša.’—Jes. 46:4.

Ka 1990, ke ile ka hudugela Omak, Washington. Gona moo ke ile ka thuša tšhemong ya Sepanishi, gomme barutwana ba ka ba mmalwa ba kolobetšwa. Ka November 2007, ke ile ka se sa kgona go hlokomela ntlo ya ka kua Omak gomme ka hira phapoši torotswaneng ya kgauswi ya Chelan, Washington. Phuthego ya Sepanishi ya tikologong ye e ntlhokometše gabotse, gomme ke leboga seo kudu. Ka ge e le nna feela Hlatse ya motšofadi mo, ka lerato bana bešo le dikgaetšedi ba ntšea ke le makgolo wa bona.

Gaešita le ge ke kgethile go se nyalwe le go se be le bana e le gore ke kgone go tšea karolo ka botlalo bodireding “ntle le tšhitišo,” ke na le bana ba bantši ba moya. (1 Bakor. 7:34, 35) Ke ile ka amogela gore tshepedišong ya gona bjale ga go kgonege go ba le dilo ka moka. Ka gona ke etišitše pele dilo tšeo di tlago pele bophelong, e lego go hlankela Jehofa ka pelo ka moka. Lefaseng le lefsa, go tla ba le nako e ntši ya go thabela selo se sengwe le se sengwe. Lengwalo leo ke le ratago kudu ke la Psalme 145:16, leo le re kgonthišetšago gore Jehofa o tlo “kgotsofatša kganyogo ya sephedi se sengwe le se sengwe.”

Tirelo ya bobulamadibogo e dira gore ke ikwe ke sa le yo mofsa

Le ge ke na le nywaga e 91, ke sa tieletše, ka gona ke tšwela pele ka bobulamadibogo. Tirelo ya bobulamadibogo e nthuša gore ke ikwe ke sa le yo mofsa e bile e dira gore bophelo bja ka bo be le morero. Ge ke be ke fihla El Salvador ka lekga la mathomo, modiro wa boboledi moo e be e le gona o thomago. Go sa šetšwe kganetšo ya Sathane e sa kgaotšego, gona bjale go na le bagoeledi ba ka godimo ga ba 39 000 nageng yeo. Ruri se se matlafaditše tumelo ya ka. Ga go pelaelo gore moya o mokgethwa wa Jehofa o thekga maiteko a batho ba gagwe!

^ ser. 4 Bala Yearbook of Jehovah’s Witnesses ya 1981, matlakala 45-46.

^ ser. 19 Bala Yearbook ya 1981, matlakala 41-42.

^ ser. 24 Bala Yearbook ya 1981, matlakala 66-67, 74-75.