Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2014

Lehu e Lego Lenaba la Mafelelo le a Fedišwa

Lehu e Lego Lenaba la Mafelelo le a Fedišwa

“Lehu ke lenaba leo le tlago go fedišwa mafelelong.”—1 BAKOR. 15:26.

1, 2. Mathomong Adama le Efa ba be ba phela maemong afe, gona go rotoga dipotšišo dife?

GE Adama le Efa ba be ba bopša ba be ba se na lenaba le letee. E be e le batho ba phethagetšego bao ba bego ba dula paradeiseng. Ba be ba thabela tswalano ya kgauswi le Mmopi wa bona, e le morwa le morwedi wa Modimo. (Gen. 2:7-9; Luka 3:38) Taelo yeo Modimo a ilego a ba nea yona e ile ya bontšha kamoo bophelo bja bona bo bego bo tla ba ka gona. (Bala Genesi 1:28.) Go ‘tlala lefase le go le fenya’ go be go ka phethwa ka lebaka le itšego la nako. Eupša e le gore Adama le Efa ba tšwele pele ba ‘buša sephedi se sengwe le se sengwe se se gagabago lefaseng,’ ba be ba tla swanelwa ke go phela ka mo go sa felego. Ba be ba tla thabela kabelo ye ka mo go sa felego.

2 Bjale ke ka baka la’ng maemo a se ka tsela yeo lehono? Go tlile bjang gore go be le manaba a mantši gakaakaa ao a šitišago batho go thaba, gomme lehu e le lona lenaba le legolo? Modimo o tla dira’ng go fediša manaba a? Dikarabo tša dipotšišo tše gotee le tše dingwe tše di sepedišanago le tšona di ka hwetšwa ka  Beibeleng. Anke re ahlaahleng tše dingwe tša tšona.

TEMOŠO E LERATO

3, 4. (a) Modimo o ile a nea Adama le Efa taelo efe? (b) Go be go le bohlokwa gakaaka’ng gore ba kwe taelo yeo?

3 Gaešita le ge Adama le Efa ba be ba na le kholofelo ya go phela ka mo go sa felego, ga se gore go be go ka se kgonege gore ba hwe. E le gore ba tšwele pele ba phela, ba be ba swanetše go hema, go nwa, go robala le go ja. Sa bohlokwa kudu, maphelo a bona a be a ithekgile ka tswalano ya bona le Monei wa Bophelo. (Doit. 8:3) Go be go le bohlokwa gore ba amogele tlhahlo ya Modimo e le gore ba thabele bophelo ka mo go sa felego. Jehofa o ile a botša Adama se ka mo go kwagalago le pele Efa a ka bopša. O dirile seo bjang? “Jehofa Modimo a laela motho a re: ‘O ka ja wa ba wa kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.’”—Gen. 2:16, 17.

4 “Sehlare sa go tseba botse le bobe” se be se emela tshwanelo ya Modimo ya go kgethela motho se se lokilego le se se fošagetšego. Go ba gona, Adama o be a šetše a tseba se se lokilego le se se fošagetšego; o be a bopilwe ka seswantšho sa Modimo e bile a na le letswalo. Sehlare seo se be se tla bontšha Adama le Efa gore ka mehla ba be ba tla swanelwa ke go kwa Jehofa. Ge ba be ba ka ja dienywa tša sehlareng seo ba be ba tla bontšha gore ba kgetha go itaola, e lego seo se bego se tla bakela bona le bana ba bona mathata a magolo. Taelo yeo ya Modimo le kotlo ya go se e latele di ile tša bontšha gore o be a letetše gore ba se ke ba itaola.

KAMOO LEHU LE TSENEGO BATHONG

5. Go tlile bjang gore Adama le Efa ba se kwe Modimo?

5 Ka morago ga gore Efa a bopše, Adama o ile a mmotša taelo yeo Modimo a mo neilego yona. Efa o be a e tseba gabotse, moo a ilego a kgona go e bolela mo e nyakilego go ba lentšu ka lentšu. (Gen. 3:1-3) O ile a e botša Sathane, yoo a ilego a boledišana le yena a diriša noga, e lego sephedi seo se lego šedi. Sathane Diabolo o ile a dumelela kganyogo ya gagwe ya go nyaka go ba le matla le go itaola e gola. (Bapiša le Jakobo 1:14, 15.) E le gore a phethe merero ya gagwe e mebe, o ile a latofatša Modimo ka gore o bolela maaka. O ile a kgonthišetša Efa gore ge a be a ka itaola, o be a ka se hwe, eupša o be a tla swana le Modimo. (Gen. 3:4, 5) Efa o ile a mo kgolwa, a bontšha boitaolo bja gagwe ka go ja seenywa seo le ka go phegelela Adama gore le yena a se je. (Gen. 3:6, 17) Diabolo o be a bolela maaka. (Bala 1 Timotheo 2:14.) Lega go le bjalo, Adama ‘o ile a kwa lentšu la mosadi wa gagwe.’ Gaešita le ge noga yeo Sathane Diabolo a ilego a e diriša e ka ba e ile ya bonagala e na le bogwera, Sathane, e lego lenaba le sehlogo, o be a tseba ditlamorago tše kotsi tša seo a bego a re Efa a se dire.

6, 7. Jehofa o ile a ahlola Adama le Efa bjang?

6 Ka baka la boithati, Adama le Efa ba ile ba se kwe Yo a ba neilego bophelo le dilo ka moka tšeo ba bego ba na le tšona. Go ba gona, Jehofa o be a bona dilo ka moka tšeo di diregago. (1 Dikor. 28:9; bala Diema 15:3.) O be a dumeletše batho bao ba bararo gore ba bontšhe kamoo ba bego ba ikwa ka gona ka yena. Ka ge e le Tate, ruri Jehofa o ile a kwa bohloko kudu. (Bapiša le Genesi 6:6.) Ke moka o ile a swanelwa ke go ba Moahlodi, a phethe kahlolo yeo a bego a e boletše.

7 Modimo o be a boditše Adama gore: “Mohlang o ka jago [dienywa tša sehlare sa go tseba botse le bobe] o tla hwa lehu.” Go ka direga gore Adama o be a nagana gore lentšu “mohlang” le šupa go letšatši la diiri tše 24. Ka morago ga go se kwe taelo ya Modimo,  a ka ba a ile a letela gore Jehofa a mo otle pele letšatši le dikela. “Ge go be go hlaba phefšana ya mantšiboa,” Jehofa o ile a ya go banyalani bao. (Gen. 3:8) O ile a ba sekiša gomme a theetša dikarabo tša bona. (Gen. 3:9-13) Ke moka a botša badiri bao ba bobe kotlo ya bona. (Gen. 3:14-19) Ge nkabe a ile a ba bolaya ka yona nako yeo, morero wa gagwe ka Adama le Efa le ka bana ba bona e be e tla ba wa lefeela. (Jes. 55:11) Gaešita le ge Jehofa a ile a kgonthišetša Adama le Efa gore ba be ba tlo hwa lona letšatšing leo le go kwa ditlamorago tša sebe, o ile a ba dumelela gore ba be le bana bao ba bego ba ka tla ba holwa ke ditokišetšo tše dingwe tšeo A bego a tla di dira. Ka go re’alo, go ya ka pono ya Modimo, Adama le Efa ba hwile lona letšatšing leo ba dirilego sebe ka lona, ge e le gabotse ba hwile pele “letšatši” letee la nywaga e 1 000 le fela.—2 Pet. 3:8.

8, 9. Bana ba Adama ba ile ba kgongwa bjang ke sebe sa gagwe? (Bona seswantšho seo se lego mathomong a sehlogo.)

8 Na bana ba Adama le Efa ba be ba tla kgongwa ke seo batswadi ba bona ba se dirilego? Ee. Baroma 5:12 e hlalosa gore: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” Motho wa pele yo a ilego a hwa ke Abele. (Gen. 4:8) Ke moka bana ba bangwe ba Adama ba ile ba tšofala le go hwa. Na ba ile ba abelwa sebe le lehu? Moapostola Paulo o araba ka gore: “Ka go se kwe ga motho o tee ba bantši ba ile ba dirwa badiradibe.” (Baroma 5:19) Ka go re’alo, sebe le lehu tšeo re di fetišeditšwego ke Adama di ile tša fetoga manaba a se nago kwelobohloko bathong, ao batho bao ba sa phethagalago ba ka se kgonego go a fenya. Gaešita le ge re ka se tsebe gabotse kamoo Adama a fetišeditšego sebe le lehu go bana ba gagwe le go ditlogotlogolwana tša gagwe, se re se tsebago ke gore o re fetišeditše tšona.

9 Ke ka baka leo Beibele e bolelago ka sebe le lehu tšeo re di hweditšego go Adama e le “lešira le le širilego merafo ka moka le lešela le le apešitšego ditšhaba ka moka.” (Jes. 25:7) Ga go na motho yo a ka phemago sebe le lehu. Ka gona ntlha ke gore ‘bohle ba hwa ka Adama.’ (1 Bakor. 15:22) Potšišo yeo re ipotšišago yona ke yeo Paulo a e botšišitšego, yeo e rego: “Ke mang yo a tlago go ntlhakodiša mmeleng wo o hwago lehu le?” Na go na le yo a bego a ka mo hlakodiša? *Baroma 7:24.

SEBE SA ADAMA LE LEHU DI A FEDIŠWA

10. (a) Ke ditemana dife tše dingwe tša Beibele tše di bontšhago gore Jehofa o tla fediša lehu leo le bakilwego ke Adama? (b) Ditemana tše di utolla’ng ka Jehofa le Morwa wa gagwe?

10 Ee, Jehofa o be a ka hlakodiša Paulo. Gateetee ka morago ga go bolela ka “lešira,” Jesaya o ngwadile gore: “O tla metša lehu ka mo go sa felego, gomme Mmuši Morena Jehofa o tla phumola megokgo difahlegong ka moka.” (Jes. 25:8) Go etša tate yo a fedišago selo seo se tlaišago bana ba gagwe gomme a ba phumola megokgo, Jehofa o thabela go fediša lehu leo le bakilwego ke Adama! O na le yo a thušanago le yena go direng se. Bakorinthe ba Pele 15:22 e re: “Go etša ge ka Adama bohle ba ehwa, ka tsela e swanago, le ka Kriste bohle ba tla phedišwa.” Paulo le yena ka morago ga gore a botšiše gore: “Ke mang yo a tlago go ntlhakodiša?” o tšwetše pele ka gore: “A go lebogwe Modimo ka Jesu Kriste Morena wa rena!” (Baroma 7:25) Go molaleng gore lerato leo le ilego la tutueletša Jehofa go bopa batho ga se la fola ka baka la borabele bja Adama le Efa. Le gona Jesu, yoo a ilego  a thuša Jehofa go bopa banyalani ba babedi ba pele, o sa dutše a rata batho. (Die. 8:30, 31) Eupša batho ba be ba tla hlakodišwa bjang?

11. Jehofa o ile a dira tokišetšo efe go thuša batho?

11 Go se phethagale ga batho le lehu ke ditlamorago tša sebe seo Adama a se dirilego. (Baroma 5:12, 16) Re bala gore: “Ka karogo e tee, mafelelo go mehuta ka moka ya batho e bile go bonwa molato.” (Baroma 5:18) Jehofa o be a ka dira’ng gore a tloše kahlolo ye ntle le go tshela ditekanyetšo tša gagwe? Re hwetša karabo mantšung a Jesu ao a rego: “Morwa wa motho . . . [o] tletše go hlankela le go nea moya wa gagwe gore e be topollo bakeng sa ba bantši.” (Mat. 20:28) Morwa yo wa mathomo wa Jehofa wa moya o ile a bolela ka mo go kwagalago gore go belegwa ga gagwe mo lefaseng e le motho yo a phethagetšego, go be go tla nea topollo. Topollo ye e be e tla phetha toka bjang?—1 Tim. 2:5, 6.

12. Topollo e lekanago yeo e ilego ya phetha toka ke efe?

12 Ka ge Jesu e be e le motho yo a phethagetšego, go be go na le dilo tšeo a bego a swana ka tšona le Adama pele a ka dira sebe. Morero wa Jehofa e be e le go tlatša lefase ka bana ba phethagetšego ba Adama. Ka baka leo, ka ge Jesu a be a rata kudu Tatagwe le bana ba Adama, o ile a neela bophelo bja gagwe gore e be sehlabelo. Ee, Jesu o ile a gafa bophelo bja gagwe bjo bo phethagetšego bja go swana le bjoo Adama a bo lahlilego. Ka morago ga moo, Jehofa o ile a tsošetša Morwa wa gagwe bophelong e le sebopiwa sa moya. (1 Pet. 3:18) Ka baka la toka ya gagwe, Jehofa o ile a amogela sehlabelo sa motho yoo yo a phethagetšego, e lego Jesu, e le topollo goba tefo ya go reka lapa la Adama le go le holofetša bophelo bjo Adama a bo lahlilego. Re ka re Jesu o tšeetše Adama legato. Paulo o hlalosa gore: “Go bile go ngwadilwe bjalo gwa thwe: ‘Motho wa pele Adama e bile moya o phelago.’ Adama wa mafelelo ya ba moya o neago bophelo.”—1 Bakor. 15:45.

Abele, e lego motho wa pele wa go hwa, o tla holwa ke topollo ya Jesu (Bona serapa 13)

13. “Adama wa mafelelo” o tla dira’ng ka bahu?

13 Mafelelong go tla fihla nako ya gore “Adama wa mafelelo” e be “moya o neago bophelo” go batho ka moka. Ba bantši ba bana ba Adama ba tla tsošwa bahung. Ka baka la’ng? Ka gobane ba šetše ba phetše le go hwa. Ba tla swanelwa ke go tsošwa, ba boele ba phele gape mo lefaseng.—Joh. 5:28, 29.

14. Ke tokišetšo efe ya Jehofa yeo e tlago go thuša go fediša go se phethagale moo Adama a go fetišeditšego baneng ba gagwe?

14 Batho ba tla lokollwa bjang go tlaišweng ke go se phethagale? Jehofa o hlomile Mmušo wo o bopšago ke “Adama wa mafelelo” le babušigotee le yena bao ba kgethilwego bathong. (Bala Kutollo 5:9, 10.) Bao ba tlago go buša le Jesu legodimong ba tla be ba kwele seo se bolelwago ke go se phethagale. Ka nywaga e sekete, pušo ya bona e tla thuša bao ba lego mo lefaseng, ba re thuša go fenya go se phethagale moo re ka se kgonego go go fenya ka borena.—Kut. 20:6.

15, 16. (a) “Lenaba leo le tlago go fedišwa mafelelong” ke’ng, gona le tla fedišwa neng? (b) Go ya ka 1 Bakorinthe 15:28, Jesu o tla dira’ng mafelelong?

15 Mafelelong a pušo ya nywaga e sekete, batho ba ba kwago ba tla be ba lokolotšwe sebeng le lehung. Beibele e re: “Go etša ge ka Adama bohle ba ehwa, ka tsela e swanago, le ka Kriste bohle ba tla phedišwa. Eupša yo mongwe le yo mongwe o phedišwa go ya ka boemo bja gagwe. Thakangwaga ke Kriste, ka morago ga moo ya ba bao e lego ba Kriste [babušigotee le yena] nakong ya go ba gona ga gagwe. Ka morago ga moo, ya ba bofelo ge a gafela mmušo go Modimo wa gagwe yo e bilego e le Tatagwe, ge a fedišitše mebušo ka moka  le bolaodi ka moka le matla. Gobane o swanetše go buša e le kgoši go fihla ge Modimo a beile manaba a gagwe ka moka tlase ga dinao tša gagwe. Lehu ke lenaba leo le tlago go fedišwa mafelelong.” (1 Bakor. 15:22-26) Ee, mafelelong lehu leo le bakilwego ke Adama le tla fedišwa. “Lešira” leo le širilego batho ka moka le tla tlošwa sa ruri.—Jes. 25:7, 8.

16 Moapostola Paulo o phetha tlhaloso ya gagwe e buduletšwego ka gore: “Ge dilo tšohle di tla ba di beilwe ka tlase ga gagwe, ke moka Morwa le yena o tla ipea ka tlase ga Yo a beilego dilo tšohle ka tlase ga gagwe, gore Modimo e be tšohle go yo mongwe le yo mongwe.” (1 Bakor. 15:28) Morero wa pušo ya Morwa wa Modimo o tla ba o phethagetše. Ka nako yeo, o tla thabela go bušetša matla a gagwe a go buša go Jehofa gomme a mo nea batho bao ba phethagetšego.

17. Go tla dirwa’ng ka Sathane mafelelong?

17 Go thwe’ng ka Sathane, yena yo a bakilego mathata ka moka a batho? Kutollo 20:7-15 e nea karabo. Tekong ya mafelelo ya ge batho ka moka ba phethagetše, Sathane o tla dumelelwa gore a leke go aroša batho. Diabolo le bao ba mo latelago ba tla fedišetšwa sa ruri ka “lehu la bobedi.” (Kut. 21:8) Ka ge bao ba tlago go fedišwa ka “lehu la bobedi” ba ka se sa phela gape, lehu le la bobedi le ka se tsoge le fedišitšwe. Ge e ba re ka dula re botegela Jehofa, go ka se nyakege gore re boife “lehu [le] la bobedi.”

18. Taelo yeo Modimo a ilego a e nea Adama e tla phethagala bjang?

18 Batho bao ba phethagetšego ba tla ema pele ga Jehofa ba swanelega ka mo go feletšego bakeng sa bophelo bjo bo sa felego, ba se sa na lenaba le letee. Taelo yeo e bego e neilwe Adama e tla ba e phethagetše yena a se gona. Lefase le tla tlala ka bana ba gagwe bao ba tlago go le hlokomela le go thabela go phela le diphoofolo ka moka. Ruri re thabišwa ke gore Jehofa kgauswinyane o tla fediša lenaba la rena la mafelelo e lego lehu!

^ ser. 9 Ge puku ya Insight on the Scriptures e bolela ka maiteko a borathutamahlale a go leka go hlalosa sebaki sa botšofadi le lehu e re: “Ba lebala taba ya gore Mmopi ke yena a ahloletšego batho ba babedi ba pele lehu, a phethagatša kahlolo yeo ka tsela yeo batho ba sa e kwešišego ka botlalo.”—Bol. 2, letl. 247..