Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2014

Dipotšišo tše Tšwago go Babadi

Dipotšišo tše Tšwago go Babadi

Na mantšu a Dafida go Psalme 37:25 le mantšu a Jesu go Mateo 6:33 a bolela gore Jehofa a ka se tsoge a dumeletše Mokriste go hloka dijo?

Dafida o ngwadile gore ga se a ka a “bona le ge e le mang yo a lokilego a tlogetšwe a le feela, goba bana ba gagwe ba kgopela dijo.” Ka go re’alo o boletše mantšu ao go tšwa phihlelong ya gagwe. O be a tseba gabotse gore ka mehla Modimo o a re hlokomela. (Ps. 37:25) Lega go le bjalo, mantšu a Dafida ga a bolele gore barapedi ba Modimo ba ka se tsoge ba hlokile dinyakwa tša motheo.

Go bile le dinako tšeo ka tšona Dafida a ilego a lebeletšana le maemo a thata kudu. Nako e nngwe ke ge a be a tšhabela Saulo. Dafida o be a se na dijo, gomme a kgopelela yena le bao a bego a na le bona senkgwa. (1 Sam. 21:1-6) Ka gona boemong bjoo, Dafida o be a “kgopela dijo.” Lega go le bjalo, bjona boemong bjoo bjo thata, o be a tseba gore Jehofa ga se a mo lahla. Le gona ga go na moo Beibele e re botšago gore Dafida o ile a swanelwa ke go rapeletša batho gore ba mo nee dijo.

Go Mateo 6:33, re hwetša kgonthišetšo ya Jesu ya gore Modimo o tla kgotsofatša dinyakwa tša bahlanka ba gagwe ba botegago bao ba etišago dikgahlego tša Mmušo pele maphelong a bona. Jesu o itše: “Ka gona, tšwelang pele le tsoma Mmušo pele le toko ya gagwe gomme dilo tše tše dingwe ka moka [go akaretša dijo, dino gotee le diaparo] le tla di okeletšwa.” Lega go le bjalo, Jesu gape o bontšhitše gore ‘bana babo’ ba ka lebeletšana le tlala nakong ya tlaišo. (Mat. 25:35, 37, 40) Seo se ile sa diragalela moapostola Paulo. Ka dinako tše dingwe o ile a hloka dijo le go bolawa ke lenyora.—2 Bakor. 11:27.

Jehofa o re botša gore re tlo tlaišwa ka ditsela tše di fapafapanego. A ka re dumelela gore re hloke dinyakwa tša motheo e le gore re thuše go araba ditatofatšo tša Diabolo. (Jobo 2:3-5) Ka mohlala, ba bangwe ba Bakristegotee le rena, go swana le bao ba kilego ba išwa dikampeng tša tshwenyo tša Nazi, ba ile ba ikhwetša ba le tlalelong ka baka la tlaišo. Diabolo o ile a dira gore Dihlatse di hloke dinyakwa tša motheo gore a robe potego ya tšona. Dihlatse tše di botegago di ile tša dula di ekwa Jehofa; gomme yena a se di lahle. O ile a di dumelela go lebeletšana le teko ye, go fo swana le ge a dumelela Bakriste ka moka go lebeletšana le diteko tše di fapafapanego. Lega go le bjalo, ga go pelaelo gore Jehofa o thekga bohle bao ba tlaišegago ka baka la leina la gagwe. (1 Bakor. 10:13) Re ka dula re gopola mantšu a Bafilipi 1:29 ao a rego: “Le neilwe tokelo bakeng sa Kriste, e sego feela gore le dumele go yena, eupša le gore le tlaišege ka baka la gagwe.”

Jehofa o holofetša go thekga bahlanka ba gagwe. Ka mohlala, Jesaya 54:17 e re: “Sebetša le ge e le sefe seo se rulelwago go lwa le wena se ka se atlege.” Kholofetšo ye le tše dingwe tšeo di swanago le yona di kgonthišetša batho ba Modimo gore o tla ba šireletša e le sehlopha. Lega go le bjalo, re le motho ka o tee ka o tee, re ka lebeletšana le diteko, gaešita le go fihla bokgoleng bja gore re hwe.