Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2014

Hlankela Modimo ka Potego go sa Šetšwe “Ditlaišego tše Dintši”

Hlankela Modimo ka Potego go sa Šetšwe “Ditlaišego tše Dintši”

“Re swanetše go tsena mmušong wa Modimo ka ditlaišego tše dintši.”—DIT. 14:22.

1. Ke ka baka la’ng bahlanka ba Modimo ba sa makatšwe ke ditlaišego?

NA O makatšwa ke gore o ka letela go lebeletšana le “ditlaišego tše dintši” pele o hwetša moputso wa bophelo bjo bo sa felego? Ga go na pelaelo gore ga o makale. Go sa šetšwe gore o sa tšwa go hwetša therešo goba ke kgale o hlankela Jehofa, o a tseba gore mathata ke karolo ya bophelo lefaseng le la Sathane.—Kut. 12:12.

2. (a) Bakriste ba lebeletšana le tlaišego efe go tlaleletša mathateng ao a welago batho ka moka ba sa phethagalago? (Bona seswantšho se se lego ka mo godimo.) (b) Ke mang yo a re bakelago tlaišego, gona re tseba bjang?

2 Ka ntle le mathata ao a “tlwaelegilego bathong,” e lego mathata ao a welago batho ka moka ba sa phethagalago, Bakriste ba lebeletšana le tlaišego e nngwe. (1 Bakor. 10:13) Ke efe? Go ganetšwa o šoro ka baka la go kwa ga bona ka go se šišinyege melao ya Modimo. Jesu o boditše balatedi ba gagwe gore: “Mohlanka ga a fete mong wa gagwe. Ge e ba ba ntlhomere, le lena ba tla le hlomara.” (Joh. 15:20) Ke mang yo a bakago kganetšo yeo? Ke Sathane, yoo Beibele e mo hlalosago e le “tau e rorago” yeo e ‘nyakago go metša’ batho ba Modimo. (1 Pet. 5:8) Sathane o tla diriša selo le ge e le sefe go leka go dira gore barutiwa ba Jesu ba se sa botega. Ela hloko seo se ilego sa diragalela moapostola Paulo.

 TLAIŠEGO YA KUA LISITARA

3-5. (a) Paulo o ile a lebeletšana le tlaišo efe kua Lisitara? (b) Ke ka tsela efe molaetša wa gagwe wa mabapi le ditlaišego tša nakong e tlago o bego o matlafatša?

3 Paulo o ile a tlaišwa ka makga a mantši ka baka la tumelo ya gagwe. (2 Bakor. 11:23-27) E nngwe ya tlaišo yeo e diragetše kua Lisitara. Ka morago ga gore Paulo a fodiše monna yo a bego a belegwe e le segole, mašaba a ile a reta yena le mošomigotee le yena e lego Baranaba ka go bolela gore ke medimo. Banna ba ba ile ba swanelwa ke go kgopela mašaba ao a bego a thabile gore a se ke a ba rapela! Lega go le bjalo, go se go ye kae baganetši ba Bajuda ba ile ba fihla, gomme ba bolela maaka ka Paulo le Baranaba. Gateetee maemo a ile a fetoga! Mašaba ao bjale a ile a kgatla Paulo ka maswika gomme a mo tlogela a nagana gore o hwile.—Dit. 14:8-19.

4 Ka morago ga gore Paulo le Baranaba ba etele Derebe, ba ile ba “boela Lisitara, Ikonia le Antiokia. Ge ba le moo ba matlafatša meoya ya barutiwa, ba ba kgothaletša go dula tumelong, ba re: ‘Re swanetše go tsena mmušong wa Modimo ka ditlaišego tše dintši.’” (Dit. 14:21, 22) Mantšu a a ka kwagala a makatša. Taba ya gore Bakriste ba be ba tlo lebeletšana le “ditlaišego tše dintši” e kwagala e fetša matla, e sa kgothatše. Ka gona ke ka baka la’ng go ka bolelwa gore Paulo le Baranaba ba ile ba ‘matlafatša barutiwa’ ka go ba botša molaetša wa gore ba tla lebeletšana le ditlaišego tše dintši?

5 Re ka hwetša karabo ka go lebeledišiša mantšu a Paulo. Ga se a fo re: “Re swanetše go kgotlelela ditlaišego tše dintši.” Go e na le moo, o itše: “Re swanetše go tsena mmušong wa Modimo ka ditlaišego tše dintši.” Ka gona Paulo o ile a matlafatša barutiwa ka go gatelela moputso wa go botega. Moputso woo e be e se toro feela. Jesu o itše: “Yo a kgotleletšego go fihla bofelong ke yena a tlago go phološwa.”Mat. 10:22.

6. Bao ba kgotlelelago ba tlo hwetša moputso ofe?

6 Ge e ba re ka kgotlelela, re tla hwetša moputso. Bakriste ba tloditšwego ba tla hwetša moputso wa bophelo bja go se hwe legodimong e le babušigotee le Jesu. “Dinku tše dingwe” tšona di tla hwetša moputso wa go phela ka mo go sa felego lefaseng leo go lona ‘go tla agago toko.’ (Joh. 10:16; 2 Pet. 3:13) Lega go le bjalo, go etša ge Paulo a boletše, gona bjale re sa tlo lebeletšana le ditlaišego tše dintši. Ela hloko mehuta e mebedi ya diteko tšeo re ka lebeletšanago le tšona.

DITLHASELO TŠE DI LEBANYAGO

7. Ke tlaišo ya mohuta ofe yeo e ka hlaloswago e le tlhaselo e lebanyago?

7 Jesu o boletše e sa le pele gore: “Batho ba tla le gafela dikgorong tša lefelong leo, gomme le tla itiwa disinagogeng la ba la emišwa pele ga babuši le dikgoši.” (Mar. 13:9) Go etša ge mantšu ao a bontšha, Bakriste ba bangwe ba tla tlaišwa mmeleng, mohlomongwe ka baka la ge seo se hlohleletšwa ke baetapele ba bodumedi goba ba dipolotiki. (Dit. 5:27, 28) Ela hloko gape mohlala wa Paulo. Na o ile a tšhošwa ke gore o be a tlo tlaišwa? Le gatee.—Bala Ditiro 20:22, 23.

8, 9. Paulo o ile a bontšha bjang gore o be a ikemišeditše go kgotlelela, gona ba bangwe mehleng yeno ba ekišitše mohlala wa gagwe bjang?

8 Paulo o ile a lebeletšana ka sebete le ditlhaselo tše di lebanyago tša Sathane gomme a re: “Ga ke tšee moya wa ka o le bohlokwa go nna, ge feela nka fetša tsela ya ka le bodiredi bjo ke bo amogetšego go Morena Jesu, gore ke hlatsele ka botlalo ditaba tše dibotse tša botho bjo bogolo bja Modimo.” (Dit. 20:24) Go molaleng gore Paulo o be a sa tšhošwe ke gore o be a tlo tlaišwa. Go e na le moo, o be a ikemišeditše go kgotlelela, go sa šetšwe seo se diregago. O be a tshwenyegile kudu ka go ‘nea bohlatse ka botlalo’ go sa šetšwe tlaišo le ge e le efe.

9 Lehono, bana babo rena ba bantši le dikgaetšedi le bona ba ikemišeditše go kgotlelela. Ka mohlala, nageng e nngwe Dihlatse  tše dingwe di ile tša kgotlelela go dula kgolegong nywaga e ka bago e 20 ka baka la go se tšee karolo dipolotiking. Molato wa tšona ga se wa ka wa išwa kgorong ya tsheko, ka gobane nageng yeo motho o be a sa ikgethele ge e ba a tla gana go tsenela bošole ka baka la letswalo. Ge Dihlatse tšeo di be di le kgolegong, di be di sa dumelelwa go etelwa ke ditho tša malapa a gabo tšona, gomme bagolegwa ba bangwe ba ile ba itiwa le go tlaišwa ka ditsela tše di fapafapanego.

10. Ke ka baka la’ng re sa swanela go boifa ditlaišo tšeo di tšwelelago re sa letela?

10 Bana babo rena mafelong a mangwe ba kgotlelela ditlaišego tšeo di tšwelelago ba sa letela. Ge seo se ka go diragalela, o se ke wa boifa. Nagana ka Josefa. O ile a rekišwa bokgobeng, eupša Jehofa “a mo hlakodiša ditlaišegong tša gagwe ka moka.” (Dit. 7:9, 10) Le wena Jehofa a ka go hlakodiša. Le ka mohla o se ke wa lebala gore “Jehofa o tseba go hlakodiša batho ba boineelo go Modimo molekong.” (2 Pet. 2:9) Na o tla tšwela pele o bota Jehofa, o tseba gore a ka go hlakodiša tshepedišong ye e kgopo ya dilo gomme a dira gore o thabele bophelo bjo bo sa felego ka tlase ga pušo ya Mmušo wa gagwe? O na le mabaka a mantši a go dira seo le go lebeletšana le tlaišo ka sebete.—1 Pet. 5:8, 9.

DITLHASELO TŠE DI SA LEMOGEGEGO

11. Ditlhaselo tša Sathane tše di sa lemogegego di fapana bjang le ditlhaselo tša gagwe tše di lebanyago?

11 Mohuta o mongwe wa tlaišo ye re ka lebeletšanago le yona o akaretša ditlhaselo tše di sa lemogegego. Ditlhaselo tše di fapana bjang le ditlhaselo tše di lebanyago tša go tlaišwa mmeleng? Ditlhaselo tše di lebanyago di swana le ledimo le matla leo le hlaselago motse gomme la senya ntlo ya gago gateetee. Ditlhaselo tše di sa lemogegego di swana le mohlwa wo o hlaselago ntlo ya gago gomme wa eja ganyenyane-ganyenyane go fihlela e ewa. Tlhaselong ye yeo e sa lemogegego, motho a ka fo se bone kotsi go fihlela selemo e le ngwagola.

12. (a) Leano le lengwe le le sa lemogegego leo Sathane a le dirišago ke lefe, gona ke ka baka la’ng le atlega kudu? (b) Paulo o ile a kgongwa bjang ke go nolega moko?

12 Sathane o nyaka go senya tswalano ya gago le Jehofa, go sa šetšwe gore o tla dira seo ka ditlhaselo tše di lebanyago tša tlaišo goba ka go ja tumelo ya gago ganyenyane-ganyenyane ka ditlhaselo tše di sa lemogegego. Leano le lengwe le le atlegago kudu leo Sathane a le dirišago ke go nolega moko. Moapostola Paulo o ile a dumela gore ka dinako tše dingwe o be a nolega moko. (Bala Baroma 7:21-24.) Ke ka baka la’ng Paulo—motho yo a godilego moyeng yoo mohlomongwe e bego e le setho sa sehlopha se bušago sa lekgolong la pele la nywaga—a be a ka ipitša “motho yo a hlomolago pelo”? Paulo o boletše gore o be a ikwa ka tsela ye ka baka la go se phethagale ga gagwe. O be a tloga a nyaka go dira se se lokilego, eupša go se bonolo. Ge e ba le wena ka dinako tše dingwe o tlelwa ke maikwelo a bjalo, na ga o kgothatšwe ke taba ya gore gaešita le moapostola Paulo o ile a lebeletšana le bothata bjo bo swanago?

13, 14. (a) Ke’ng seo se dirago gore ba bangwe ba batho ba Modimo ba nolege moko? (b) Ke mang yo a nyakago go re bona re tlogetše go hlankela Modimo, gona ka baka la’ng?

13 Ka dinako tše dingwe, bana babo rena le dikgaetšedi ba bantši ba ikwa ba nolegile moko, ba tshwenyegile e bile mohlomongwe ba ikwa ba se na mohola. Ka mohlala, mmulamadibogo yo mongwe yo a fišegago yo re tla mmitšago Deborah o re: “Nako le nako ke nagana ka phošo yeo nkilego ka e dira, gomme seo se nnola moko le go feta. Ge ke nagana ka diphošo ka moka tšeo ke di dirilego, seo se dira gore ke nagane gore le ka mohla ga go na motho yo a ka nthatago, gaešita le Jehofa.”

14 Ke’ng seo se dirago gore ba bangwe ba bahlanka ba Jehofa ba mafolofolo, ba bjalo ka Deborah, ba nolege moko? Go ka ba go na le mabaka a mmalwa. Ba bangwe ba ka fo ba ba na le mokgwa wa go nagana gampe ka bona ka noši le ka maemo a bona bophelong.  (Die. 15:15) Go ba bangwe, maikwelo a fošagetšego a ka ba a bakwa ke bolwetši bjo itšego. Go sa šetšwe gore sebaki sa maikwelo ao ke sefe, re swanetše go gopola gore ke mang yo a nyakago go a diriša gampe. Ge e le gabotse, ke mang yo a nyakago go re nola moko gore re feleletše re se sa hlankela Modimo? Ke mang yo a nyakago gore o tle o hwetše kotlo e boima e swanago le yeo e mo letetšego? (Kut. 20:10) Ke Sathane. Therešo ke gore go sa šetšwe gore Sathane o diriša ditlhaselo tše di lebanyago goba tše di sa lemogegego, morero wa gagwe ke o tee—o nyaka go re nola moko, go fokodiša phišego ya rena le go dira gore re tlogele go hlankela Modimo. O se ke wa lebala gore batho ba Modimo ba ntweng ya moya!

15. Re ka bontšha bjang gore re ikemišeditše go se fenywe ke go nolega moko?

15 Ikemišetše go se tlogele go lwa ntwa yeo ya moya. Dula o naganne ka moputso wa rena. Paulo o ile a ngwalela Bakriste ba kua Korinthe gore: “Ga re lape, eupša gaešita le ge e ba motho yo re lego yena ka ntle a onala, ruri motho yo re lego yena ka gare o mpshafatšwa letšatši le letšatši. Gobane le ge tlaišego e le ya nakwana gomme e le bohwefo, e re tšweleletša letago le legolo kudu gomme ke la ka mo go sa felego.”—2 Bakor. 4:16, 17.

ITOKIŠELETŠE TLAIŠO GONA BJALE

Bakriste ba banyenyane le ba bagolo ba itlwaetša go lwela tumelo ya bona (Bona serapa 16)

16. Ke ka baka la’ng go le bohlokwa gore re itokišeletše tlaišo gona bjale?

16 Go etša ge re bone, Sathane o lwa le rena ka “ditiro [tše dintši] tša bohwirihwiri.” (Baef. 6:11) Yo mongwe le yo mongwe wa rena o swanetše go latela keletšo yeo e lego go 1 Petro 5:9 yeo e rego: “Emeletšanang le yena le tiile tumelong.” E le gore re dire seo, re swanetše go lokišeletša menagano le dipelo tša rena, re itlwaetše gona bjale go dira se se lokilego. Ka mohlala: Pele ga ge mašole a ka ya ntweng, gantši a newa tlwaetšo e kgethegilego. Go bjalo le ka rena ka ge re le mašole a Jehofa a moya. Ga re tsebe gore ntwa  ya rena e tla akaretša eng nakong e tlago. Ka gona, na e ka se be gabohlale gore re itlwaetše gona bjale re sa le khutšong? Paulo o ngwaletše Bakorinthe gore: “Dulang le itekola go bona ge e ba le sa le tumelong, dulang le itlhatsela seo lena ka noši le lego sona.”—2 Bakor. 13:5.

17-19. (a) Re ka itekola ka ditsela dife? (b) Bafsa ba ka itokišeletša bjang go lwela tumelo ya bona ge ba le sekolong?

17 Tsela e nngwe yeo ka yona re ka kwago keletšo ya Paulo ke ka go itekola ka mo go tseneletšego. Ipotšiše dipotšišo tše bjalo ka tše: ‘Na ke rapela ka mehla? Ge ke lebeletšane le kgateletšo ya dithaka, na ke kwa Modimo e le mmuši go e na le go kwa batho? Na ke ba gona dibokeng tša Bokriste ka mehla? Na ke bolela ka ditumelo tša ka ka sebete? Na ke leka ka gohle go kgotlelela mafokodi a badumedigotee le nna—go etša ge le bona ba kgotlelela mafokodi a ka? Na ke ikokobeletša bao ba etelelago pele ka phuthegong ya gešo le bao ba etelelago pele ka mokgatlong?’

18 Ela hloko gore tše pedi tša dipotšišo tšeo di mabapi le go lwela ka sebete ditumelo tša rena le go lwantšhana le kgateletšo ya dithaka. Ba bantši ba bafsa ba rena ba swanelwa ke go dira seo sekolong. Ba ithutile go se boife goba go se lešwe dihlong ke ditumelo tša bona. Go e na le moo, ba bolela ka sebete. Ditšhišinyo tša kamoo ba ka dirago seo ka gona di gatišitšwe ka dimakasineng tša rena. Ka mohlala, Phafoga! ya Seisemane ya July 2009 e šišinya gore ge motho yo o tsenago le yena ka klaseng a go botšiša gore: “Ke ka baka la’ng o sa dumele go tlhagelelo?” o ka fo araba ka gore: “Ke ka baka la’ng ke swanetše go dumela go tlhagelelo? Gaešita le borathutamahlale ga ba dumelelane ka taba ye, mola e le bona ba swanetšego go tseba gakaone!” Batswadi, tlwaetšang bana ba lena gore ba tle ba kgone go lebeletšana le kgateletšo ya dithaka tša bona sekolong.

19 Ke therešo gore ga se ka mehla go lego bonolo go lwela tumelo ya rena goba go dira dilo tše dingwe tšeo Jehofa a re kgopelago go di dira. Ka morago ga go fetša letšatši ka moka mošomong, re ka swanelwa ke go ikgoga go ya dibokeng. Go e na le gore re ipshine ka boroko, go ka nyakega gore re tsoge mesong gomme re ye bodireding. Eupša gopola se: Ge e ba o itlwaeditše e sa le pele go ba le lenaneo le lebotse la go dira dilo tša moya, ge o ka welwa ke diteko tše dikgolo nakong e tlago, o tla kgona go lebeletšana le tšona gakaone.

20, 21. (a) Go naganišiša ka topollo go ka re thuša bjang go lwantšha maikwelo a fošagetšego? (b) Re swanetše go ikemišetša’ng mabapi le ditlaišego?

20 Go thwe’ng ka ditlhaselo tše di sa lemogegego? Ka mohlala, re ka lwantšha bjang maikwelo a go nolega moko? Tsela e nngwe e atlegago ya go dira seo ke ka go naganišiša ka topollo. Moapostola Paulo o ile a dira sona seo. Ka dinako tše dingwe o be a ikwa a hlomola pelo. Eupša o be a tseba gore Kriste ga se a hwela batho bao ba phethagetšego, eupša o hwetše badiradibe. Le gona Paulo e be e le yo mongwe wa badiradibe bao. Ge e le gabotse, o ngwadile gore: “[Ke] phela ka tumelo yeo e lego go Kriste Morwa wa Modimo, yena yo a nthatilego gomme a ikgafela nna.” (Bagal. 2:20) Ee, Paulo o ile a amogela topollo. O ile a lemoga gore topollo e be hola yena.

21 Yona pono yeo—go lebelela topollo e le mpho ya gago e tšwago go Jehofa—e ka go thuša kudu. Se ga se re gore maikwelo a go nolega moko a tla nyamalala kapejana. Nako le nako ba bangwe ba rena re tlo swanelwa ke go lwantšhana le tlhaselo ye yeo e sa lemogegego go fihlela lefaseng le lefsa. Eupša gopola se: Moputso o tla hwetšwa ke bao ba kgotlelelago. Re kgauswi kudu le letšatši le le kgahlišago leo ka lona Mmušo wa Modimo o tla tlišago khutšo gomme wa dira gore batho ka moka bao ba botegago ba phethagale. Ikemišetše go tsena Mmušong woo—gaešita le ge e ka ba ka ditlaišego tše dintši.